Aisaia 48 - Nobonob BaibelYawe Nug butti aɗi, aɗi bekkunu daatte he bette 1-2 Ag Juda, ag ahilag nai ɠagattag qettaglagnu henana, ag Yawe onigppa ɠagattag qedatteb. Ao, ag ahilag nai ɠagattag qettaglagnu henana, ag Israel dilag Kayak onigppa hetteb. Ag amu hetteb, amge ag doyak diig genabib, ag amuppa ii hetteb. Ge! Ag kobol genab tutukkuppa ii hetteb. Amu ag Jerusalem, aab amuam Yawenu tituanak daatte amu, ag aab amunu, “Am ihinig aab okkai,” atteb. Ag anam anana, ag Yawe Nukka Ɠagattag Oh Ele, ag nuhig ehanittakppa ena oittebnu ele atteb. Ag amu hetteb, amge O Jakop buɗub, laa ahilagnu Israel atteb amu, ag doyeg! Ao, ag Jakop buɗub, ag alalag Juda amu, ag doyeg! 3 ⌊Yawe Nug atte.⌋ “Anukkanab da keeke bekkunu dayom ai dooppig. Ao, tatamnab aɗi keeke bekku amu, da ii beum haenppa ai dooppig. Ge, da ai doyeg, haen do, da laippun hei, aakku beppig. 4 Da ag, ahilag dabmak am ɠagattag eppom daatte, da ag heppeg, dabmak ahilag eɗukkunu iinab hetteb am doomi. Ahilag dabmak am ɠagattagnab; aen o bras bia. 5 Anam amunu, da keeke imu bekkunu anukkanab ai dooppig. Ao, keeke imu ag ii beppig haenppa da ai dooppig. Da amu heminu diig am, da anam ii helom, ag, ‘Dahil kayak dottog, nug he beum,’ alob. Ao, da anam ii helom amu, ag, ‘Dahil kayak dottog adppa hoiyak, laa aenppa ele hak amu, aa anam bekkunu aeh, aakku beppig,’ alob. 6 Da keeke digdig bekku amu, da ii bak haenppa ai dooppig. Ao, da ai doyeg beppig amu, ag amelagppa anadppig amunu, ‘Yawe Nug amu ii heum,’ akkulagnu iite uuglag? Ge, ag nai genab, ‘Yawe Nug amu bekkulagnu ana, he beppig,’ iite akkulag?” ⌊Yawe Nug anam ana mala, Nug nai tuɗitta atte.⌋ “Gemu da digmein, keeke bau, keeke laa ag ii dootteb, da amu appi dooglag. Ao, da keeke lokkumak daatte amu, da amunu appi dooglag. 7 Keeke bau da akkulnu hettem am genab keeke baunab. Gemuib da digmein hei betteb. Da anukkanab ii hemi. Gemuib da digmein hei betteb, Anam amunu, ag deɗ laa ag da hettemnu nai nakok laa ii dooppig, ag amunu ag oolagppa laa nug, ‘Ao, da anukka amunu doomi,’ anaknu elele iitta. 8 Anukkanu, gemu ele ag dahil nai dooglagnu uun, ag amunu dabmak ii aoppig. Ag daulag hanhan ituakib daatte. ⌊Da gemu keeke bau imunu madittem, anukka ag amelagppa ii ai dooppig amu, amunu diig am⌋ da doottem, ag paha da dimeɗan, laa binag mekkulagnu hetteb. Ag digmak haenppanu, gemu ele ag da waalppa daamnanu, dahil nai tabappeg nekkunu henan oitteb. 9 Ag Juda ag eheɗ amu hetteb, amge da, da onilnu dabmak anuqak awewe, da ag Juda, da ag paha eheɗ ii hadattem. Ao, danab ah ag dahil hak pehettak doon, ag hak amu binag mekkulag amu, ag binag mak amu hekkulagnu da dabmak anuqak awewe, da bu elele paha ii madattem. Da ahilag haknu nob elele mattalom amu da hadappi, ag iitta melob, amge da amu bemanu da paha nob anam ii madattem. 10 Antteg! Danab nug silwa babaitta epeɗia awak daakkunu uɗat hette. Ao, nug he, silwa aab aɗuppa oppiaawak ba daatte, da amubia ahilagppa hemi. Amge da aab aɗuppa ii hemi. Iitta. Ag ena, oppiaawak ele bekkulagnu da uug digdig laa mattami. 11 Amu da diilnu dabmak anuqak awewe, da ag qagaiettakppanu eɗuen diiadkkul. Ge! Da, da diilnu dabmak anuqak awewe, da ag qagaiettakppanu eɗuen diiadkkul. Aɗinu? Da laa uuidppi, nug heeb, laa ag da onilnu, ‘Am keeke hamu,’ dooglagnu elele iitta. Ao, da laa uuidppi, nug dahil binag amahlak oppiaawak ele awa, nug onigppa qataqekkunu iinab hepa.” Yawe Nug anam awa atte. Yawe Nug heeb, Israel ag diia ukka laih me dayak danab ah ii daamna 12 Amu Yawe Nug atte. “Ag Jakop buɗub, ag dahil nai doyeg! Ao, ag Israel danab ah, da ag onilagppa emi ele amu, ag doyeg! Da dakka am Kayak. Da hanhan daattem; anuqakppa, batakppa ele da daattem. 13 Da eppelppa wan hemi. Da eppelppa hab ele hemi. Gemu amu, keeke amu oh dahil ɠagattagppa tutukku ena daatteb. 14 Amu ag Israel danab ah ag gukkuiɗna uɗin, nai dahil doyeg! Kayak hambuppuak laa nug aha, keeke bekkun daatte a dooppigte? Iitta! Amge da Yawe, da attem. Danab laa, ⌊Sairus⌋ da nug tituanmi ele amu, nug dahil dabmak Babilon dilagnu heeb bekku. Ao, nug aha, Babilon ele ban hekku. 15 Da, ge da, da nug amegppa ami. Ao, da nug tituanmi. Da heppi uɗieb, da nug aɗi hekkunu tituanmi amu, nug elele hekku. 16 Ag Israel danab ah, ag gukkuiɗnanab uɗin, dahil nai doyeg! Anukkanab digmak haenppanu uɗie, gemu ele da keeke bekkunu daatte amu, da lokkumakppa dayeye ii mattimi. Ao, keeke bekkunu daatte mattimi, haen amu uɗie, gemu ele da iikku daattem,” awa atte. Yawe Nug anam atte, amu gemu Naɗi Yawe, Nug nuhig Ouɗi da meɗa, Nug da meiɗe, ⌊nai imu madikkulnu⌋ uɗimi. 17 Yawe, Nug ag Israel, ag ahilag qagaiettakppanu eɗua uhuqaknu ehanittak daatte, Nug ag Israel, ahilag Kayak Oppiaawak Ele amu, Nug atte. “Da am Yawe, da ag Israel, ahilag Kayak daattem. Da ag kobol aɗi aɗi am ahilagnu ena, laa oh eɗidtte amu, da kobol amu ippunadttem. Ao, ib ag gokkulagnu daatteb ele amu, da ib amuppa gokkulagnu ulum madattem. 18 Ag dahil nai, dahil ɗo ele tutukku dabmena dim lamidlob am ena, amge ag ii heppig. Ag anam helob amu, ahilag maɗoɗ am le hanhan ugakkaib daatte bia daalo. Ag helob amu, ahilag genab tutukku hak kobol am yu duban qa gotte uɗitte, ahilag genab tutukku hak kobol am anam daalo. 19 Ag anam helob amu, ag buɗulkad ag yu ihippan abuɗ bia daalob. Ag dimulagppa uɗiglag amu, ebqak ahilag am abuɗnu ebqak bia daalob. Ag anam helob am da heppi, laa ag uɗin heppeg, ahilag wan am padal ii melo. Da noolppa iitta ii melo,” awa atte. 20 ⌊Yawe Nug atte.⌋ “Ag Babilonnu ahan ukkeg! Ao, ag Babilon oolagppanu ahan, oolna ukkeg! Ag gonana, ag, ‘Yawe Nug ig Jakop buɗub, nuhikkud maɗi nid maɗi ah ele, Nug ig laa eppelagppa dayaknu qagaiettakppanu eɗua uhuqak ha mekkom,’ mattinna eig! Ag wan atu ohppan danab ah dooglagnu nai amu appeg doyeg! 21 ⌊Ag gobeppeg, haen amuppa kobol digdig Yawe Nug Israel Isipnu diia ukke daappig bia daaglag. Yawe Nug Israel Isipnu diia ukkom, haen amuppa⌋ Nug omalatte, ag atu taɗakppa oippig, amge ag le baalag ii diiom. Nug he, le ahilagnu menppa neum. Ao, Nug he, men oppate, le huanaknab noa ukkom. 22 Israel dilagppa anam daakku, amge Yawe inam ele atte. ‘Laa ag nau hak danab ah daatteb ele, ahilagnu maɗoɗ nakok laa iinab daama,’ ” awa atte. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.