Aisaia 20 - Nobonob Baibel

Isip, Kus dilahnu nai

¹ Maɗ laa, maɗ amuppa Asiria dilag king Sargon nug he, ban daup ikki anuqak, nug ban danab huu laa diie, Pilistia wanppa gona, aab okkai Asdot ele ban hena aqappig.

² ⌊Asiria ag Pilistia dilag aab okkai amu aoppig, amge keeke amu ii bak, bekkunu maɗ ewam daye,⌋ haen amuppa Yawe Nug Amos bekka Aisaia amegppa aum. “Na lamen heɗiag ele meme amu uɗona, na baen gaɗa baenppan ele uɗakkut,” awa aum. Nug anam a, Aisaia nug anam haaha, nug qaɗeppan lamen ele iitta, baeg gaɗa ele iitta, anam hamu oiyom. Am Aisaia nug Yawenu nai doya, nug Yawe aum bia anam heum.

³ Amu haen Asiria ag aab okkai Asdot aoeg dimppa, Yawe Nug inam aum. “Maɗ ewam imu oh Aisaia, maɗi nid dahil, nug lamen heɗiag ele meum amu uɗowa, baeg gaɗa ele uɗa, aakku qaɗeppan lamen iitta, baeg gaɗa ele iitta, hamu oiyom. Anam oiyomnu diig am, geha keeke uug nau Isip, Kus ele dilagppa bekku, Aisaia heum am, amunu doyaknu at aakku ippunattom.

⁴ Aisaia heum, amubia geha Asiria dilag king nug ukka, Isip wanppa, Kus wanppa ele ban haaha ⌊eɗattowa⌋, geha nug danab nid bau, am danab kaino ele wan aɗit amuppan aɗalatteb, nug eppegppa daappeg, nug ag diia, wan laappa ukka maadkku. Haen nug diia appa ukkeb, geha ag qaɗelagppan lamen iitta, baelag gaɗa ele iitta, hamu oiglag. Asiria ag heppeg, danab ah kaino, nid bau oh ele ag anam oinna, ag bitolag ele miag dayebeb oiglag. Beɗulag miag ele anam oinna, geha ag uɗa nak nau dooglag.

⁵ Anam beeb amu, danab ah laa ag Kus dilagnu oolagppa genab dooppig, ag Isip binalag meppig amu, ag geha keeke uug ele amu beeb anidna, ag geha baɗan, uɗalag nekku.

⁶ Haen Asiria ag uɗin, Isip amu Kus ele aqappeg, danab yu ihippa daatteb ag geha haen amuppa akkulag. ‘Antteg! Wan amuppan danab, ag ig ehanigppeg, Asiria ii iqamna dabmemut ele amu, ag aakku iitta meppig. Ig Asiria dilag qep elab eɗidkkunignu ig ib laa iitta,’ aon akkulag.” Yawe Nug anam aum.