Aisaia 17 - Nobonob Baibel

Yawe Nug geha Aram, Israel ele bu madakku

¹ Nai meunab ele Damaskus aab okkaippanu Yawe he, Aisaia doyom ele am iikku. “Antte! Kekeɗ ag geha aab okkai Damaskus heppeg nauheb, geha Damaskus am aab okkai ii daama. Iitta. Ag heppeg nauha, aab amuam geha kinipan ameg okkai hume tak daakku.

² Kekeɗ ag geha amu heppeg, danab ah laa geha appa aab okkai laa distrik Aroer amuppa ii daamna; geha aab okkai oh hamuib daaglag. Geha aab amu hamu daappeg, sipsip ag geha appa ee lanana, ag ele appa niippeg, danab laa ag lamadkkunu am iitta amunu, ag ii baɗamna, ag hamu daaglag.

³ Geha aab ɠagattag aɗ ele Israel wanppa appa iitta mekkulag; Aram huu ag baula wan ahilag ii gumamna. Amu Israel danab ah ag binalag iitta mekku, amubia Aram danab ah oɗo yaak daaglag, ag binalag iitta ele daaglag.” Yawe Nukka Ɠagattag Oh Ele, Nug anam atte.

Israel dilag nai uug ele

⁴ Yawe Nug atte. “Haen amuppa am inam bekku. Israel binalag am iitta mekku. Ao, danab titiɗak nug oɗe ma, ebehi tette, amubia ⌊geha kekeɗ ag heppeg,⌋ Israel huu ag geha laippu laippuib daanna, ⌊ag binalag iitta ele daaglag⌋.

⁵ Haen amuppa kobol bekku am ee aeg awak haenppa, danab ag ee aeg aotteb, ag eppelagppa amu aɗan aotteb bia bekku. Ao, danab ee aeg eppelagppa aotteb bia bekku. Am danab ag oolnu noak onig Repaim, appa ee aeg ikkilkad aotteb, amubia bekku.

⁶ Kobol bekku am danab ag ee aeg aotteb, amge ag ii doonna, ee aeg ikki laippu laippu tippalna, ii aotteb; laib laib uueg daatteb, am amubia ⌊Israel huu ag geha ebqak laib laib daaglag⌋. Ele amu, amuam danab ag ad olip uɗaleg, meu neeg, olip meu laib laib ewam, aɗit keeke attan daatteb, amubia ⌊Israel anam laib laib daaglag⌋. O iitta, ad olip eppeg laippu meu huan niieye, danab nug olip eppeg amu uɗale nena qeegeg, olip meu waɗele, tanig ele keeke, olip eppeg amuppa daatteb bia, ⌊Israel huu ag anam laib laib daaglag⌋.” Yawe, Nug Israel dilag Kayak, Nug anam atte.

⁷ Haen amuppa danab ah diig ohnu ag geha laa ag hattom ele ehanadkkunu neekkidkkulag. Ao, ag Israel dilag Kayak Oppiaawak Ele, ag Nug ehanadkkunu ag amelag human, Nug neekkidkkulag.

⁸ Haen amuppa danab ag geha kayak hambuppuaknu qaɗab ag eppelagppa heppig ele, ag amuppa ehanittak aoglagnu dab-ii-memana. Ao, ag baula kayak hambuppuak Aserah dabmekkulagnu biidod eppelagppa hena, qaɗab kalu danab ile muttuɗig enanag bette ele amuppa main, kayak hambuppuak Aserah mettaglagnu eppelagppa ele heppig amu, ag baula amuppa ehanittak aoglagnu iinab dabmemana. Iitta.

⁹ ⌊Dimppa danab ah ag anam hekkulag, amge gemu ag oolag ii eɗutte amunu, haen amu ii nak, haen gamag imu⌋ haen amuppa kekeɗ ag heppeg, amu geha Israel danab ah ag aab okkai ɠagattag amuppa ii daamna. Iitta. Aab okkai amu geha aab okkai anukka Hiwi danab dilag, Amo danab dilag, anukka Israel uɗieg anadna, ag oolna ukkaeg, aab okkai amuppa danab ii daappig, ag amubia daaglag. Aab okkai oh anam danab iitta ele, nauhak daaglag.

^10-11 Aɗinu? Ag ⌊Juda, ag⌋ Kayak ahilag, Nug ag ehanatte, ag padal ii metteb ele amu, ag Nug daulag atiom. Ao, ag ahilag Kayak, Nug kekeɗ aqamanu ehanattak ahilag, Nug am aab aɗ ɠagattagnab ele ahilag bia daatte amu, ag Nug dab-ii-metteb. Anam amunu, ag muɗi grep ena ena aon eppaglagtai. Ao, ag grep aben laihnu aon eppaglagtai. Ag buttua eppelagppa eppan heppeg, qaɗu buttua amuppaib belo. Ao, deɗ amuppa buttua ag eppan heppeg, haɗag ele qelo. Ag anam heppeg belo, amge meu awak haenppa keeke amu oh am keeke hamu. Ag grep meu laa ii aomna. Iitta. Ag meu diig aɗit laa, meu amuam oɗe digdig, amu guittak ii bodoedatte ele, ag meu amu aakkuib aoglag.

Israel ag geha uug anidkkulag, amge kekeɗ uɗin uug mattaglag ele, ag am geha uug naunab aoglag

¹² O gadonnab gadon! Wan laala ohppan ban hak danab ag ⌊ig iqaglagnu⌋ uɗippeppeg, oqotti naɗi okku. Oqotti amuam yu duban huanaknab oqotti otte, amubia daakku. Ao, O gadonnab gadon. Danab wan laala ohnu uɗippeppeg, oqotti huanaknab ahakku. Oqotti amuam le okkai okkainab oqotti ahatte, oqotti am amubia daakku.

¹³ Huu laa wan laalappanu amu, ag uɗinna, oqotti naɗi, yu dubannu oqotti naɗi bia hekkulag, amge Kayak Nug alatteb, ag eɗun oolna, laih umanab gokkulag. Nug ag lamatteb, ulah qaukoppa ee aeg dappunkkeg mawa gotte, amubia ag ele eɗun oolkkulag. Ao, ulah gappud iwale gotte, amubia ag ele eɗun oolkkulag.

¹⁴ Tueb, baɗak eheɗ nau! Ii wagkkaɗebeb, padal mak aakkuib! Kayak Nug heeb, laa ag eheɗ heignana, ihinkad keeke aotteb dilagppa anam bekku. Ao, Kayak Nug heeb, aun aɗi ag iqan, ihinkad keeke aoglagnu hetteb dilagppa anam bekku.