3 Jon 1 - Nobonob Baibel

Gaias nug uɗat ena heum

¹ Da Jon, da Kayaknu tamaniaknu ikki danab laa, da layalnab Gaius nahipnu nai iikku yaattem. Da genab nahipnu ool mauhtte.

² O lai gamal, Na Kayak ele oittep, oiyak nahip amuam ena daatte doottem, amubia amu na keeke ohppa ena daakkutnu Kayak unuqidttem.

³ Da lailad laa uɗin, na doyak diig genabib oo metta ii uuak kobolppa dabmettemnu, na doyak diig genabib tuɗidna dim lamidttemnu ele mattieg doyen, da maɗoɗppan gamag ahak huanak doomi.

⁴ Ao, dahilad nid ag haen oh doyak diig genabib dim lamidna oitteb doyen amu, da maɗoɗppan gamag ahak okkai aottem; maɗoɗppan gamag ahak laa am maɗoɗppan gamag ahak amu eɗidkkunu elele iitta.

⁵ O lai gamal, uɗat oh na ig lainkad ehanadna hettemppa, na oo metta ii uuak kobol dim lamidna hettem. Genab, na laa ii doyadttem, amge na ag ele ehanadttem.

⁶ Amu dilag ag Kristen tamaniak amegppa na ahilagnu oot mauhak doottemnu ele madippig. Amu danab amu ag gokkulagnu hebeppeg amu, Kayak Nug na danab amu attem ehanadkkutnu oo daatte bia ehanadkkut am ena.

⁷ Danab amu ag Jesus Kristus onig humaglagnu iitta aɗi gumadna gotteb, amu ag iitta aɗi dilagppanu uɗat nob ii aotteb.

⁸ Amunu ig danab amu ehanadkkunig am ena. Kobol amuppa ig ag ele doyak diig genabibnu uɗat laippu hekkunig.

Diotrepis amu Demitrius dilah kobol

⁹ Da nai laa yen Kristen tamaniak mettami, amge Diotrepes, nug nukka keeke ohnu beɗu hume anuqtte, nug da oɗel dab-ii-medatte.

¹⁰ Amunu da ukke, appa tekkul dayeb amu, da nuhig hak miag appi dooglag. Nug ihinignu dimug nai nau maditte, ge nug nai amuib ii maditte. Iitta. Nug ig lainkad ele laippu dayaknu ooppa eleleib ii dootte, am danab ag ehanadkkulagnu hetteb amu, nug aib awa atte. Nug anam haaha, laa ag ig lainkad ehanadkkulagnu oolag daatte amu, nug ag Kristen tamaniakppanu ele lamadtte.

¹¹ O lai gamal, kobol nau aib dim lamidme. Na kobol tutukku ena amu dim lamitte! Laa nug kobol ena hette, nug Kayak ele laippu daattep. Am laa nug kobol nauppa oitte amu, nug Kayak ele laippu iinab daattep.

¹² Demitrius nug kobol ena hette amunu, danab oh ag nug binag metteb. Doyak diig genabib am ele nug onig hume, attan tette. Ig ele nug binag mettem, amu na doottem, ihinig nai am genab.

Bagqak nai laala

¹³ Da keeke kuɗum yen medakkulnu daatte, amge da uɗugppa yaakkulnu ool ii daatte.

¹⁴ Da paha na gumitte gokkulnu dabmettem. Da gumitte goppi, na da ele nug iɗu anidɗaɗa, nai mattignih.

¹⁵ Kayaknu maɗoɗ nahip-ppa daakkunu ool daatte. Na laipad ippa daatteb ele, ag na humidtteb. Amu na dahil humittak imu da lailad oh appa daatteb ele amu, ag onilag diin, appe doyeg!