2 Tesalonaika 3 - Nobonob Baibel

Pol Tesalonaika ag nuhignu unuqidkkulagnu oɗ mattom

¹ O lainkad, ig nai laippu imuib ele iikku ag amelagppa attem. Ag ihinignu dabmenana, ag Naɗi Nug ig ehanikkeb, ig uɗat elele hekkunignu, nuhig nai atu oh paha tuala ukkeb, danab ah ag wan atu amuppa daatteb amu, ag Tesalonaika danab ag nai amunu ena, binag ele dooppig bia ag nai amunu ena, binag ele dooglagnu ihinignu unuqitteg!

² Danab kuɗum ag Jesusnu oolagppa genab ii doonna, ag uɗat ihinig heppeg nauhkkunu hetteb amunu ag Kayak, Nug ig danab nau amu ag eppelagppanu uhuqigkkunu ele unuqitteg!

³ Amge Naɗi, Nug oo metta ii uuak kobol dim lamidtte amu, Nug ɠagattag aqeb, Satan nug ag ii eeɗadma.

⁴ Am Naɗi Nug ihinig dabmak maɗette, ig ahilagnu inam dabmeta doottem. Kobol oh ig ag hekkulagnunab amelagppa mattimut amu, ag henana daatteb, dimppa ele ag anam hekkulag.

⁵ Naɗi Nug ag oolagnu ulum aɗebeb, ag Kayaknu oo mauhak, amu Kristusnu uug doyaya eɗittaknuib dabmak awak kobol ele doon autna aoglagnu oonig daatte.

Danab oh ag uɗat hekkulag

⁶ O lainkad, ig Naɗi Jesus Kristus onigppa haknunab nai imu ag amelagppa attem. Ag lailkad laa bahilag iitta, ag kobol ena, ig tatam ippunadmut, ag amu ii dim lamidtteb amu, ag danab amu ele aib ouqeppig.

⁷ Ag akka, haen ig ag ele daatta, ig uɗat heutut anikkegeg, hamu ii daamut ana dootteb, amu ag kobol amu dim lamidkkulag am ena.

⁸ Ag ihinignu oolag uug qemanu ig amun tuqan ele ee aognignu uɗat ɠagattag hetata, ig danab laanu ee hamu ii lattamut. Iitta. Ig daden meta lamut.

⁹ Ig anam hemutnu diig am, ag ihinigppa anidna oolag maitteb, ag ele bau daaglagnu uɗat hekkulag. Ig totol danab amunu, ig ag oolagppa daatta, ag eppelagppa ee aolomnu ɗo daatte, amge ig anam ii hemut.

¹⁰ Haen ig ag ele daatta, ig ɗo imu ag mattamut. “Laa nug uɗat ii hekku amu, nug ee ii lama,” aot amut.

¹¹ Ig nai imu yaattemnu diig am, ig gemu laala ag uɗat hak kobol uuna, hamu oina, ag akka kobol ena ii henana, ag laa dilag dabmak, maittak keeke baolikkulagnu hettebnu nai daunigppa doottem.

¹² Amu Naɗi Jesus Kristus onigppa ig haknunab nai imuppa, dabmak maɗettaknu nai imuppa ele, ig danab kobol ena ii hetteb ele amelagppa inam attem. “Ag toɗoɗugna daanna, ag akka ee awaknu uɗat henana, amuppa ag ee aon laig!”

¹³ Amge O lainkad, ahilagnu amu ag uɗat ena hak kobolnu aib oolag bahi yeeb uuppig.

¹⁴ Am laippu laa nug nai ig uɗug imuppa yaamut imu dim ii lamitteb anidna, ag danab amu dab mena, nug uuidna piɗe dayeg! Ag anam heppeg, geha nug nuhig kobol eheɗ amunu uɗa nekku.

¹⁵ Amge nuhignu kekeɗ bia aib anidppig. Iitta. Ag nuhignu ag lailag doonna, nau aomanu nai metteg!

Bagqak nai

¹⁶ Naɗi Nug maɗoɗ kobolnu diig, Nug nukka ag hanhan, keeke ohppa, maɗoɗ madakkunu oonig daatte. Naɗi Nug ag oh ele dayeg!.

¹⁷ Da Pol, da dakka da eppelppa humattak nai uɗug imuppa iikku yaattem. Amuam da uɗug yaaladttem amu ohppa, dahil epponak keeke, da anamib aakku yaattem.

¹⁸ Naɗi Jesus Kristusnu ehanittak okkai hamu mettak, ag oh ahilagppa dayaɗ!