2 Tesalonaika 2 - Nobonob Baibel

Ɗo tappe nak danabnu nai

¹ Aria Jesus Kristus, ihinig Naɗi, Nug eɗua uɗieb, ig oh Nug noobppa qagmeta, Nug ele daagnignu, O lainkad, ag keeke amunu dabmekkulagnu iikku attem.

² Ag, “Naɗi uɗikkunu deɗ aakku malom,” nai amu dooppignu amu, laa nug, “Da propet nai mehuqiqi dootteb,” mattia, tuɗitta nai amu mattie ag nai amu dooppigtai, o iitta danab laa nug, “Kayak ippuniɗom ele amu da ippuanadttem,” mattia, tuɗitta nai amu mattie ag nai amu dooppigtai, o iitta laa nug, “Pol aɗi ag uɗug laa yaan meeg dahilppa uɗie, nai imu amuppa dayom,” mattia, tuɗitta nai amu mattie ag nai amu dooppigtai, amge nai amunu amu ag aib ottaippig, dabmak ele ootot aib dayom.

³ Ag heppeg, laippu laa nug ib laalappa aib buppualattom. Deɗ amu tatam iinab uɗima. Tatam Kayak dimettak kobol okkai beeb amu, ɗo ii dim lamittak danab, danab amu nug padal mekku ele amu, nug ele miag atikku.

⁴ Danab amu nug danab laa oh ag keeke oh dilagnu, “Imuam Kayak,” atteb, keeke amu noolagppa ag gatelag qaun otteb ele amu, nug amu oh tappeb neeb, nug onigib humeb, attan tekku. Nug Kayaknu mettid lag, appa nug aguppa daakkunu ta dayaya, nuhignu, “Da iikkuib am Kayak,” awa akku.

⁵ Da ag ele daamut haenppa da nai imu ag amelagppa mattimi amu daulagppa daattete?

⁶ Ag keeke laa gemu danab amu nug nuhig haen iittappa nemanu, nuhig ib oo neum daatte amu ag dootteb. Oo nak amuam anam dayeb ukkeb, Kayak Nug deɗ nuhig tituanomppa amu, danab amu nug deɗ amuppa miag atikku.

⁷ Ɗo ii dim lamittak kobol amu gemu uɗia lokkumak haaha daatte, amge ɗo ii dim lamittak kobol okkai memanu, laa nug ib oo nette ele amu, nug anam heebeb ukkeb, laa nug heeb, ib oo nak amu iitta meeb amu, ɗo tappe nak kobol am okkai mekku.

⁸ Haen amuppa ɗo ii dim lamittak danab nug miag atieb, dimppa Naɗi Jesus, Nug geha Nug oɗeppa ouɗi iwaleb, qeeb mauhkku. Yo, Naɗi Nug nuhig amahlak naɗi ele uɗia, miag atia, amahlak amuppaib Nug ɗo tappe nak danab amu heeb nauhkku.

⁹ Amge ii nauhak haenppa ɗo ii dim lamittak danab amu nug Satannu ɠagattag ele uɗia, hambuppuak kobol danab haknu elele iitta, laanu dabmettaknu kobol danab haknu elele iitta, amu uɗat ɠagattagnab ele haaha,

¹⁰ nug danab ah, ag padal mekkulagnu oitteb ele, nug ib eheɗ digdigppa ag hambuppualadkku. Danab amu ag doyak diig genabib dooppig, amge ag uuppig. Ag ii uulob amu Kayak Nug eɗua diilo, amge iitta amunu, ag padal mekkulag.

¹¹ Ag doyak diig genabib uuppig amunu,, Kayak Nug heeb, laa nug hambuppualatta aut autanab aweb, ag hambuppuak amu oolagppa genab dooglag.

¹² Danab ah amu ag doyak diig genabibnu oolagppa genab ii dooppig, ag nau hak kobolnu enanagnab dooppig ele, ag anam hena, ag nob nau aoglag.

Ɠagattag dayaknu nai

¹³ Amge O ig lainkad ag, Naɗi Nug ahilagnu oo mauhtte amu, ig ahilagnu hanhan Kayak amegppa, “Ena heme,” aot akkunignab. Aɗinu? Kayak Nug digmakppanu ag eɗua diikkunu tituanattom; amu eɗua diiak amunu diig laa am Kayak Ouɗi Nug he, ag oppiaawak daatteb, diig laa am ag doyak diig genabibnu oolagppa genab dootteb.

¹⁴ Ag ihinig Naɗi Jesus Kristusnu binag amahlak oppiaawak ele ooppa daaglagnu Kayak Nug Nai Enanu mehuqak ihinigppa ag eɗua diiadkkunu ag onilagppa eum.

¹⁵ Amunu, O lainkad, ig oɗenigppate o iitta ig yaakppate nai ippunadmut amu, amuppa ag ɠagattag daana, pehettan aɗan dim lamitteg!

¹⁶ Aria, ihinig Naɗi Jesus Kristus Nugnab, amu ig Mamenig Kayak, Nug ihinignu oo mauhom, Nug nuhig ehanittak okkai hamu mettakppa oo ɠagattag qak hanhannu, ena baknu dabmak aɗa oiyak enanag ele mekkom amu, aɗit amu aa hepeɗ,

¹⁷ ag oolag ɠagattag qak dayebeb, ag oiyak ahilag ohppa enaib oiglagnu ɠagattag aoglagnu oonig daatte.