2 Tesalonaika 1 - Nobonob Baibel

Kayak unuqittaknu nai

¹ Pol, Silas, Timoti ele ig nai imu Tesalonaika tamaniak ahilagnu iikku yaattem. Ag ig Mamenig Kayak, amu ihinig Naɗi Jesus Kristus ele dilah danab ah daatteb.

² Mama Kayak, amu Naɗi Jesus Kristus ele, ahilah ehanittak okkai hamu mettak, amu ahilah maɗoɗ ele ahilagppa daaglahnu oonig daatte.

³ O lainkad, ig haen oh Kayak amegppa, “Ena heme,” aot akkunignab. Aɗinu? Ahilag ooppa genab doyak am okkainab mette, amu ag akka akka ag nug oo mauhak doona, tuɗidna huanak hetteb.

⁴ Anam amunu ig ahilag kekeɗ ag ahilagppa kobol nau kuɗum heegeg, ag amunu uug doonna eɗittaknuib dabmak aotteb, ahilag ooppa genab doyak ele ii paɗatteb amu, ig amu dootta, ig amunu Kayaknu Kristen tamaniak ohppa ag binalag mettem.

⁵ Kayak Nug ag ehanatte, ag ɠagattag daan, uug maon oitteb amunu, ig amuppa Kayak Nug danab ah tutukku epeɗiadtte anidttem. Nug anam hette amunu, Nug ag nuhig ɗo maɗoɗ ooppa daaglagnu, Nug amunu elele doyadkku. Ag Nug ele nuhig ɗo maɗoɗ ooppa daaglagnu hetteb amunu, ag aakku guittak aotteb.

⁶ Kayak Nug kobol tutukkuib hette, amu Nug inam hekku. Aun ag uug madatteb amu, Kayak Nug ag amunu nob nau matta,

⁷ Nug ag uug dootteb ele amu, haen ena matta, Nug ig ele haen ena megakku. Naɗi Jesus eɗua, aab aɗu amu engel ɠagattag nuhikkud ele ag hab attannu miag atiak nekkulag, haen amuppa Kayak Nug kobol amu hekku.

⁸ Naɗi Nug danab ag Kayak ii dootteb, amu ag ihinig Naɗi Jesusnu Nai Ena ele dim ii lamidtteb amu, Nug ag nob nau tutukku madakku.

⁹ Naɗi Nug danab amu nob nau, padal mak hanhannu matteb, ag Nug toppa, nuhig ɠagattag okkainabppa ele ii daamna.

¹⁰ Deɗ amuppa amu, Naɗi Nug uɗieb, nuhikkud danab ah oppiaawak ele ag Nug binag amahalak oppiaawak ele mettaglag. Ge, danab ag oolagppa genab dootteb ele, ag nuhignu enanagnab dooglag. Ag Tesalonaika daatteb, ag ele huu amuppa daaglag. Aɗinu? Ag ihinig nai Jesusnu mattimut amu, ag amu oolagppa genab dooppig.

¹¹ Ig amunu dabmetata, ig haen oh Kayak ahilagnu unuqidttem. Ig Kayak, Nug ag onilagppa eum amu, ig Nug ag ehanatteb, ag nuhig ewak baag amu elele dim lamidkkulagnu Nug unuqidttem. Laa ele Kayak Nug ag ɠagattag matteb, ag kobol ena oh hekkulagnu hetteb ele amu henana, ag uɗat oh Kristusnu oolagppa genab doon hetteb, amu ele genab hekkulagnu ig unuqidttem.

¹² Ib amuppa amu, ag Jesus Kristus, ihinig Naɗi, Nug onig binag amahlak ele mettana, ag nuhigppa ele binag amahlak ele aoglag. Amu oh am ihinig Kayak, amu Naɗi Jesus Kristus ele, ahilah ehanittak okkai hamu mettakppa aakku bette.