2 Stori 34 - Nobonob Baibel

Amon bekka Josaia nug king ba dayom

¹ Josaia nug maɗ eblaih ewamppaib dayaya, nug king ba dayom. Nug king ba, nug maɗ 31 Jerusalem appa king dayom.

² Nug Yawenu neekkakppa kobol genab tutukku ele dim lamittom; nug alag Dawit heum bia heum. Nug ib ena dim lamittom. Nug ib eheɗppa ii ukkom.

³ Josaia nug king dayaya, nuhig king dayaknu maɗ eblaih aɗitppa nug nid bau dayaya, nug digma, nug memetab Dawitnu Kayak antta dim lamidkkunu Nug mattiom. Nug king dayaya, nuhig king dayaknu maɗ 12ppa amu, nug digma, nug aabaabppanu mettid lag nakok, kayak hambuppuak Aserah dabmekkulagnu biidod, kayak hambuppuak dottolkad adppa hak, amu kayak hambuppuak dottolkad aenppa keeke, hak ele, keeke amu oh Juda wanppa, Jerusalem appa ele daamnanu, amu oh oppiak ele daaglahnu uɗat heum.

⁴ Nug uɗat amu gumaama he, danab ag kayak hambuppuak Bal iɗu iɗu dilag qaɗab loppaɗegeg, nug he, ag kalu danab ile muttuɗig enanag bette ele qaɗab, Balnu qaɗab laa guguittak daappig ele loppaɗadna, ag kayak hambuppuak Aserah dabmekkulagnu biidod, kayak hambuppuak dottolkad laa adppa hak, o aenppa keeke, hak amu, ag amu ele loppaɗatteg nauheg, nug he, ag keeke amu oh maduduɗeg, naunau neeg, ag aon gona, danab ah ag doɗ manadna, kayak hambuppuak amu madappig ele boumppigppa, ag appa boumak aben anen anen qaɗelagppa buɗieg ukkom.

⁵ Josaia he, ag anam heeg, nug ele kayak hambuppuak dilag mana mettak danab mauhppig ele ebehilag eɗua awa, kayak hambuppuak dilag qaɗabppa manae ewom. Nug anam heum amunu, Juda wan, Jerusalem ele am Kayaknu neekkakppa dubuttid iitta ele daapiɗ.

⁶ Josaia nug anam ha, nug Manase dilag aabppa, Epraim dilag aabppa, Simeon dilag aabppa, amu Naptali dilag aabppa batak oiyom. Nug aab amuppa oiyaya, aab amu taliliattak aab nauhak daappigppa ele oiya,

⁷ nug kayak hambuppuak dilag qaɗab loppaɗatta, nug kayak hambuppuak Aserah dabmekkulagnu biidod okkulatte neeg, nug kayak hambuppuak dottolkad maduduɗattette, kalu ne, nug amu dilag qaɗab, danab ag amuppa kalu danab ile muttuɗig enanag bette amotppig amu, nug qaɗab amu ele Israel wan ohppa loppaɗattom. Josaia nug anam ha, nug aha, eɗua, Jerusalem ukkom.

Hilkaia nug Kayaknu ɗo, bukppa yaappig anttom

⁸ Josaia nug king dayaya, nuhig king dayaknu maɗ 18ppa, wan, Yawenu mettid lag ele Kayaknu neekkakppa dubuttid iitta daaglahnu uɗat malak daye, Josaia nug Asalia bekka Sapan, Jerusalemnu gumak danab okkai Masea, amu Joahas bekka Joa nug yaak danab dayom amu, nug danab ewam amu ag gona, ag Yawe, nuhig Kayak, ag nuhig mettid lag babaittaknu uɗat ɠagattag qettaglagnu maatte goppig.

⁹ Danab ewam amu ag gona, mana mettak ikki danab Hilkaia gumidna teppig. Amge amu ii beebe, Lewi buɗub, ag Kayaknu mettid lagnu od gumak danab amu, ag daaegeg, Israel danab ah ag men doɗo aon uɗin, Kayaknu mettid lag ehanidkkunu Lewi buɗub od gumadppig ele madappig. Manasenu danab, Epraimnu danab, Israel danab laa oh ag oɗo yaak danab ah daappig, Juda danab, Benyamin danab amu danab Jerusalem daappig ele amu, ag oh men doɗo aon uɗin, Lewi buɗub madappig. Danab ah ag men doɗo anam ag mattaeg, Lewi buɗub ag men doɗo amu aoeg, danab ewam imu ag aon gona, mana mettak ikki danab Hilkaia medappig.

¹⁰ Ag Hilkaia mettaeg awe, nug, nuhikkud ele ag danab Yawenu mettid lag babaittaknu uɗat gumak danab daatteb eppelagppa meppig. Danab okkai amu ag uɗat nid Yawenu mettid lag bappaidppig ele gumattegeg, ag uɗat heegeg, ahilag nob men doɗo amuppanu madappig.

¹¹ Ag Yawenu mettid lag babaittak danab, ahilag nob men doɗo amuppa mattana, ag lag menppa hak danab, lag hak danab ele, ag men otaɗa babaittak, oonu maknu ad, ad teppu ele laa daden mekkulagnu men doɗo amu laih ele ag madappig. Ad, men keeke, aoglagnu appig ele amu, keeke amuam Juda dilag king ag Yawenu mettid lagnu lag laala ii babaittegeg, nauhak daappig amu, ag lag amu bappaladkkulagnu keeke amu daden meppig.

¹² Danab uɗat amu oh heppig ele amu, ag oo metta ii uuak kobol dim lamidna, ahilag uɗat heppig. Amu ahilkad okkai, uɗat amu gumappig ele, ag am, Jahat, Obadaia, Sekaraia, Meulam ele. Danab amu oh ag Lewi buɗubppan mana mettak danab iitta, ag oolagppanu. Jahat, Obadaia ele aa Lewi bekka Merari buɗub laa aakku. Sekaraia, Mesulam ele aa Lewi bekka Kohat buɗub. Aria, Lewi buɗubppan mana mettak danab iitta, ag oolagppanu laa ag musik haknu doyak okkai ele.

¹³ Ag musik haknu doyak okkai ele amu, ag danab oh uɗat digdig heegeg, ag gumadna daappig. Amu Lewi buɗub laa, ag nai yaak danab, yaak danab, amu od gumak danab ele daappig.

¹⁴ Amu Lewi buɗub, Hilkaia ele ag men doɗo danab ah ag Yawenu mettid lag ehanidkkulagnu aon uɗin appa meppig ele aon uɗin, danab okkai mettalagnu henana, amu mana mettak danab Hilkaia nug Yawenu Ɗo Nai Buk, nug buk amu anttom. Yawe Nug ɗo amu Moses oɗeppa Israel danab ah ippuanattom.

¹⁵ Hilkaia nug buk amu anttowa, nug nai yaak danab Sapan amegppa inam aum. “Da buk laa Yawenu mettid lagppa dayeye anidmi. Buk amuam Yawenu Ɗo Nai Buk,” awa aum. Hilkaia nug anam ana amu, nug buk amu Sapan mettom.

¹⁶ Hilkaia nug buk amu awa ukka, Sapan mette, Sapan nug awa, king gumitta teum. Nug gumitta ta, king amegppa aum. “Nahipad uɗat nid ag keeke oh ag hekkulagnu ame amu, ag aakku hetteb.

¹⁷ Ag men doɗo Yawenu mettid lagppa dayom amu, ag men doɗo amu uɗat gumak danab, uɗat nid ele madappig,” awa aum.

¹⁸ Nug anam a amu, nai yaak danab Sapan tuɗitta, king amegppa aum. “Ele amu, mana mettak danab Hilkaia nug buk imu da meɗom,” awa aum. Nug anam ana, nug buk amuppanu nai king amegppa ebqeum.

¹⁹ Sapan nug ɗo nai amu ebqe, haen king nug ɗo nai amu doya, nug lamen elab nuhig aɗa pattiɗom.

²⁰ King anam ha, nug Hilkaia, Sapan bekka Ahikam, Maika bekka Abdon, nai yaak danab Sapan, amu kingnu ehanittak danab Asaia ele amelagppa haknunab nai imu aum.

²¹ “Ag da oul, Israel danab ah, Juda danab ah ele, ag oɗo yaak danab ah daatteb amu, ag oulkad ele daanna, ag gona, buk imu laa anttom amu, ag buk imunu nainu Yawe oɗ medappeg, ig aɗi hekkunignu ab dooglag. Ig mamenkad aɗi ag Yawenu nai amu ii dim lamidppig, ag nai amu oh aɗi aɗi ippunigtte ii heppig amunu, Yawe Nug ihinignu oo nauhak okkai dootte,” awa aum.

²² King Josaia nug amelagppa haknunab nai amu mattie, Hilkaia, laa king nug ele oh gokkulagnu aum ele ag oh ahan, propet ah Hulda oɗ mettaglagnu goppig. Hulda nug Tokhat bekka Salum wau. Tokhat mameg am Hasra. Hulda gamu Salum nug kingnu lamen gumak danab dayom. Amu Hulda nug Jerusalem appa, obatak ebqak aɗit, amuppa dayom.

²³ Ag gona teeg, Hulda nug ag amelagppa aum. “Yawe, Israel dilag Kayak, Nug nai mattia malom. Ag eɗun gona, laa nug ag da gumiɗna uɗiglagnu maatte uɗippig ele amu, ag nug amegppa inam appeg doyaɗ!

²⁴ Yawe Nug inam atte. ‘Da heppi, uug naunab aben imuppa, danab ah aben imuppanu dilagppa ele bekku. Danab eheɗ heeb, amunu eheɗ laa awaknu anak waappa dayaknu nai oh buk laa ebqeeg, Juda dilag king doyom, amuppa yaak nitte bia ana bekku.

²⁵ Aɗinu? Juda danab ah, Israel danab ah ele ag oh da dimeɗan uuiɗegeg uɗie, gemu ele hetteb. Ag kalu danab ile muttuɗig enanag bette manan, kayak hambuppuak madappig. Ag eppelagppa kayak hambuppuak dottolkad hadappig, amunu, diig amunu, da oppoɗi beum, gemu ele daatte. Da anam doyeye, oppoɗil bak dahil am wan imunu danab ah dilagnu dayeb ukkeb, ⌊hamu⌋ ii iitta mema. ⌊Iitta. Nob mettak malak aakkuib am iitta mekku,⌋’ awa atte.

²⁶ Anam amunu, ag Juda dilag king, nug ag Yawe nai dooglagnu maatte uɗippig ele, ag nug amegppa inam appeg doyaɗ! Yawe, Israel dilag Kayak, Nug nai na doome, Nug nai amunu inam atte.

²⁷ ‘Na nai laa, nai amuppa uug naunab wan imuppa, wan imunu danab ah ele dilagppa bekkunu daatte doon, na uug doon, na nakka na da, Kayak, na da noolppa na onin qe ne, na nahip lamen elab pattiɗna, da noolppa amen leb neum amunu, da nahip unuqittak doomi.’ Yawe Nug anam atte.

²⁸ ⌊Amu Yawe Nug inam ele king amegppa atte.⌋ ‘Anam amu, da heppi, na daanna, maɗoɗ ele mauhppe, ag na gaɗan ele na mamenad boumadppigppa boumidkkulag. Na uug naunab da heppi, aben imuppa, aben imuppan danab ah dilagppa ele bekku amu, na uug amu ii anidmana.’ ” Hulda nug anam ag amelagppa a, ag nai amu aon, ag eɗun gona, king amegppa appig.

²⁹ Aria, King Josaia nug Juda dilag ikki danab oh, laa Jerusalemnu, laa Juda wanppa laih laihnu amu, nug ag onilagppa e uɗin, qagmeppig.

³⁰ Josaia nug e, danab okkai amu ag uɗieg, nug Juda danab, Jerusalem danab ah, Lewi buɗubppan mana mettak danab, Lewi buɗubppan mana mettak danab iitta, nug ag ele oh ahan, Yawenu mettid lakka teppig. Danab oh, laa onig iitta, laa onig ele, amge onig okkainab iitta, amu laa onig okkainab ele, ag oh Yawenu mettid lag, amuppa teppig. Danab amu oh ag Josaia ele tena, Josaia nug Yawe, Israel danab ele nug tituanna nai qakkak heppig elenu buk, ag buk amu Yawenu mettid lag, laa nug amuppanu eɗua anttom amu, nug amuppanu nai oh ebqe dooppig.

³¹ King nug nai amu ebqewowa, nug Yawenu mettid lag, amuppa king aben laa biidod daugppa daakkunu tituanak dayom amu, nug aguppa, Yawe noobppa daye, nug nug tituana nai qakkak amu dim lamidkkunu nai baula qakkom. Nug nai amu qagakka, nug Yawe dim lamittatta, Yawenu haknunab anak, nuhig ɗo iɗu iɗu oh ele nug meu ohppa, oo ohppa ele dim lamitta, nug nug tituana nai qakkak bukppa nai aɗi aɗi dayom amu, nug nai amu ele dim lamidkkunu Yawe amegppa aum.

³² King Josaia nug anam ha, nug Jerusalem danab ah, ⌊Juda danab ah,⌋ Benyamin danab ah oh ele anam hekkulagnunab aum. Nug anam a, ag ele anam hena, ag nug tituana nai qakkakppa Kayak, ag mamelkad aɗi dilag Kayak, ag Nug aɗi aɗi hekkulagnu ippuanattom amu, ag nuhig nai amu dim lamidppig.

³³ Amu Josaia he, danab ag kayak hambuppuak dottolkad oh, Yawe Nug dottolkad amunu ooppa uuaknab dootte ele, ag dottolkad amu oh Israel wan ohppa heeg, iitta meppig. Amu Josaia nug ele Israel danab ah oh ag Yawe, ahilag Kayak, ag Nug waappa daan, nuhikkud maɗi nid daaglagnu he, ag aakku heppig. Josaia nug bau dayeye, Israel danab ah ag Yawe, ag mamelkad aɗi dilag Kayak, ag Nugib dim lamidppig.