2 Stori 32 - Nobonob Baibel

Asiria dilag king Senakerip nug nuhikkud daup ele ag Juda banelag uɗippig

¹ Hesekaia nug uɗat amu oh tutukku, elele ha male, amu dimppa Asiria dilag king Senakerip nug nuhikkud daup ele ag ahan, Juda banelag uɗippig. Senakerip nug nuhig dabmakppa, “Da Juda dilalkad aab okkai ɠagattag aɗ ele eɗatten, dahil daaglagnu aokkulnu hettem,” dabmaama, nug nuhikkud daup ele aab amu oo mattan aqaknu maadna daappig.

² Amu Senakerip nug uɗia, anam he, haen Hesekaia nug amu antta, nug Senakerip Jerusalem ele banelag uɗikkunu dabmeum antta,

³ nug nuhikkud ehanittak anuqak danab, daup dilag okkai ele onilagppa e doeg, nug le qeppuɗia bak, aab okkai dimittim appa beum heppeg, appa ii bemanu, nug ag dabmak amunu ulum mettaglagnu ag amelagppa aum. Nug amunu ag amelagppa a amu, danab okkai amu ag kingnu dabmak amunu ena doon, ehanidppig.

⁴ Ag nai amu ɠagattag qena heeg, danab kuɗum ag uɗin, aab dimittim wan maha okkaippa ag le qeppuɗin beppig oh keldoeg, le nakok daya, wan gamagppa ukkom amu, am le amu aakku ele le iitta ele dayom. Ag amu hekkulagnu diig am, ag amunu inam appig. “Aɗinu Asiria dilag king, nuhikkud daup ele ag uɗin, le kuɗum anidna itan lakkulag?” Ag anam anan, dabmak aon, le amu oh heeg, le iitta meum.

⁵ Ag amu heeg, Hesekaia nug Jerusalemnu aɗ aben laala nauhak dayom amu, nug babaitta, ⌊ban haknu⌋ lag attan ta ukkak menppa hak ele aɗppa hattom. Nug ele aɗ laa, aɗ tatam dayom, aɗ amu dimittim heum. Amu aben ag wan itan meeg, elele beum, aben amu ele nug ɠagattag qettom. Hesekaia nug amu haaha, nug ban, lat keeke, kuɗum hatta, nug guppiɗ ele kuɗum hattom.

⁶ Nug danab daup dilag okkai daaglagnu tituanatta, nug he, haɗap aab okkai odppa daatte, appa ag nug noobppa qagmen daaegeg, nug nai imuppa ag oolag ɠagattag qettom.

⁷ Nug aum. “Ag ɠagattag daan, oolagppa ele ɠagattag doyeg! Ag Asiria dilag king, nuhikkud daup huanaknab uɗin daatteb, ag amu dilag aib baɗappig, dabmak ahilag ele ahilagnu qe nak aib dayom. Aɗinu? Laa ig ele daattem, nuhig ɠagattag am Asiria dilag eɗidtte.

⁸ Asiria dilag kingnu ɠagattag am danabib, amge Yawe, ihinig Kayak, Nug ig ehanigkkunu, Nug heeb, banppa ig kekeɗ eɗadkkunignu, Nug ig ele daattem,” awa aum. Juda dilag king Hesekaia nug anam a, daup ag oolag ɠagattag qak dooppig.

⁹ Amu haen Asiria dilag king, nuhikkud daup ele ag Lakis oo mattan aqaknu maadnana amu, Senakerip nug nuhikkud ban daup ikki laala maatte, ag nai imu Juda dilag king Hesekaia, Juda danab ah oh appa daappig ele appeg dooglagnu Jerusalem goppig.

¹⁰ Nug maatte gona, ag nai inam madippig. “Asiria dilag king Senakerip nug inam atte. ‘Ag Jerusalem daatteb ele amu, dahilad danab ag ahilag aab dimittim oo mattan aqaknu maadna daatteb. Ag anam daaegeg, ag Juda, ag aab ooppa daan, oolag ɠagattag qak dootteb, amge ag diig attemun dabmak amu aotteb?

¹¹ Amu Hesekaia, nahipad king amu, nug ag amelagppa, “Yawe, ihinig Kayak, Nug ehanikkeb, ig Asiria eppelagppa ii daamta,” awa atte. Nug anam atte, amge nug anana, nug ag ee, le ele iittanu mauhkkulagnu hambuppualadtte.

¹² Hesekaia nugnab, nug ag Juda danab ah oh, laa Jerusalemnu, laa Juda wanppa laih laihnu amu, nug ag amelagppa, “Ag qaɗab laippu, Jerusalem iikku daatte, qaɗab amuppa aakkuib ag Yawe noobppa dup nona binag mekkulag; laa ohppa am iitta,” nug anam ana he, ag Kayak amunu qaɗab, nuhig aabaabppanu mettid lag nakok ele amu, ag amu iite hatteg nauhppig?

¹³ Da, amu da mamelad aɗi ele ig wan laala ohppan danab eɗadmut amu, ag amu iite dootteb. Wan anen anen, amu dilag kayak ag heppeg, wan amuppan danab ah ag da eppelppa ii daamnanu elele daappigte?

¹⁴ Da mamelad aɗi ag wan laala eɗadna heeg nauhppig ele, wan amu dilag kayak laa nug nuhikkud danab ah ehanatteb, da ag ii eɗadpanu elele ii dayom. Iitta amunu, ag Juda, ahilag Kayak Nug ele ag da eppelppa ii daamnanu ehanadkkunu elele iitta.

¹⁵ Amunu ag Juda danab ah, ag Hesekaia hambuppualadmanu ag dabmeig! Ag nuhig nainu oolagppa genab aib dooppig. Aɗinu? Wan laappan kayak laippu laa he, wan amuppan danab ah ag da eppelppa o da mamelad aɗi eppelagppa ii daamnanu ii ehanattom. Kayak laippu laa nug amu hekkunu elele iitta amunu, ahilag Kayak, Nug genab anam hekkunu elele iitta.’ ” Asiria dilag daup dilag okkai ag Hesekaia, Juda danab ah appa Jerusalem daappig ele amelagppa anam appig.

¹⁶ Asiria dilag daup dilag okkai ag anam awona, ag nai nau laa ele Yawe Kayaknu, nuhig maɗi nid Hesekaianu ele madippig.

¹⁷ King Senakerip nug pas laala ele yom. Amuppa nug Yawe, Israel dilag Kayak, nug Nug awa awa naunab qetta, nug inam yom. “Wan laappan kayak ag wan amuppan danab ah da eppelppa ii daalobnu ehanadkkulagnu elele iitta daaeg, da wan amu oh eɗadmi. Da ag eɗatten diimi, amubia Hesekaianu Kayak Nug nuhikkud danab ah ele ag da eppelppa ii daalobnu ehanadkkunu elele iitta. Da ag eɗadkkul,” awa yom.

¹⁸ Senakerip, nuhikkud daup dilag okkai ag nai aon gona, Hesekaia, danab ah Jerusalem daappig ele dooglagnu appig ele amu, danab amu ag daanna, ag danab aabnu aɗ attan daappig doon, eheɗ baɗan, baɗakppa daappeg, Asiria ag uɗin aab okkai amu eɗidkkulagnu, ag Hibru naippa anam eegeg, danab aɗ attan daappig amu, ag dooppig.

¹⁹ Asiria dilag daup dilag okkai amu ag Kayak, Nug laug Jerusalem appa dayom amu, ag nuhignu hamu bia doon, anam madippig. Ag kayak hambuppuak, danab ag eppelagppa hadatteb bia, ag Kayak, nuhignu anam doon, ag anam hambuppun, eheɗ madippig.

²⁰ Asiria dilag daup dilag okkai ag anam mattieg amu, King Hesekaia, Amos bekka Aisaia, nug propet, nug ele, aa Yawe amegppa amunu apiɗ.

²¹ Asiria dilag king, daup ele ag haen tutu dayaknu aab kalakppa daaegeg, Hesekaia, Aisaia ele aa amunu unuqitteh, Yawe Nug nuhig engel laa me, nug uɗia, Asiria dilag daup, danab okkai ele huanaknab, oh bia, aqe mauhppig. Yawe he, engel anam he, Senakerip nug eɗua aha, uɗa nak nau guittak ele doyaya, aab diigppa ukkom. Nug eɗua, aab diigppa ukka, deɗ laa nuhig kayaknu mettid lakka te, nug bekoɗ aɗit qep elabppa nug qeeh mauhom.

²² Yawe Nug anam heum amunu, Nug Hesekaia, Jerusalem danab ah ele ehanatte, ag Asiria dilag king, Senakerip eppegppa ii daappig. Amu Yawe Nug ha, nug Juda danab ah ag kekeɗ laa eppelagppa daamnanu ele ehanattom. Nug ib kuɗumppa atognoatta he, wan laala ag taliliadna daappig amu, ag danab amu ele maɗoɗ ele daappig.

²³ Danab kuɗum ag doɗ aon uɗin, Jerusalem appa manadna, Yawe medappig. Ag ele en okkai aon, Juda dilag king Hesekaia, nuhig daakkunu nug hamu medappig. Haen amuppa danab wan atu ohnu ag digmena, Hesekaianu, “Nug binag okkai ele,” doon oidttappig.

Hesekaia nug oɗe awa, mauhkkunu heum, amge nug ii mauhom

²⁴ Haen amuppa amu, Hesekaia nug oɗe ma, nug mauhkkunu miagnab dayaya, nug Yawe unuqittom. Nug unuqitte, Yawe Nug Hesekaia eɗua ena daakkunu uɗat naɗi Kayak Nug heumnu at daatte laa ha mettom.

²⁵ ⌊Yawe Nug Hesekaia ehanitte, nug eɗua ena dayowa,⌋ nug dada danab ba, nug Yawe ehanittom, nug amunu nug Nug dim lamidlonu ii dabmaama, ii heum. Nug eheɗ amu heum amunu, Yawe Nug Hesekaianu, Juda danab ah, laa Jerusalemnu, laa Juda wanppa laih laihnu amu, Nug danab ah amu dilagnu, ⌊ag Hesekaia doyom bia ele dooppig amu, Nug amu oh dilagnu⌋ oppoɗi beum.

²⁶ Anam daye, Hesekaia nug dada danab ooppa doyak kobol dim lamidkkun uua, oo eɗue, Jerusalem danab ah ag ele oolag eɗuom amunu Yawe Nug ag Hesekaia bau dayom haenppa bu ii mattom.

Hesekaia nug en naɗi ele

²⁷ Hesekaia nug en naɗi ele, amu nug ele binag okkai ele. Nug en naɗi ele amunu, nug silwa, gol, men daden nob okkainab ele, spais, guppiɗ, amu en digdig laa ele appa maknu nug en maknu oo laala buuattom.

²⁸ Hesekaia nug anam ha, nug lag laala ele, ag amuppa ee aeg, wain bau, goɗen ele maknu buuattom. Nug amu buuatta, nug makau dilag aɗ, sipsip, meeme dilag aɗ ele babaittom.

²⁹ Kayak he, Hesekaia nug en okkai, naɗi ele amunu, nug aab laala kala hatta, nug makau, sipsip, meeme ele huanak awom.

³⁰ Aria, Jerusalem aabnu aɗ dimittim le qeppuɗia bak laa onig Gihon dayom. Le amu, laa iitta, Hesekaia nug le amu oɗe qelakka he, le amu aab ooppa noa ukkom. Le am ukka, Dawitnu Aab ooppa laih qaban uɗitteppa, appa le moɗppa waum. Hesekaia nug aɗi hekkunu eppeg bahia aɗa he, uɗat amu elele mettom.

³¹ Amu haen Babilon dilag king nug danab laala ag gona, Kayak Nug keeke laa danab hekkunu elele iitta heeb, Hesekaia nug eɗua ena daakkunu at laa matu mettomnu oɗmak hekkulagnu matte goppig amu, ag Jerusalem tena, Hesekaia anidnana, ag nug Kayak dabmettaknu kobol danab haknu elele iitta Yawe Nug Hesekaianu ha mettom amu, ag nug amunu oɗ medappig. Ag oɗ mettaeg, Yawe Nug Hesekaianu diig tutukku dookkunu Hesekaia ma anttak metta uuitte, ⌊Hesekaia nug danab amu amelagppa nuhig dabmakppanu nai madippig⌋.

Hesekaia nug mauhom

³² Amu Hesekaia nug king dayaya, aɗi uɗat laala, aɗi kobol laala Yawe ena dookkunu heum ele amu, kaya amu oh propet Aisaia, Amos bekka, kaya amu oh nug nuhig tuleglegnu nai buk laappa yom amu, ag kaya amu aon, ag buk laappa, buk amu onig am Juda, Israel Ele Dilag Kingnu Kaya, ag buk amuppa yaappig daatte.

³³ Amu Hesekaia nug mauhe, ag qauko nakokppa Dawit buɗub boumadppigppa boumppig. Juda danab ah oh, Jerusalem danab ah ele ag nug mauhe, nug onig humappig. Hesekaia nug mauhe, nug bekka Manase nug abenabppa king ba, king dayom.