2 Stori 31 - Nobonob Baibel

¹ Juda danab, Israel danab ele ag Pasowanu Hobulppa dayak amu hena malona, ag amuppa daappig ele ag ahan, Judanu aabaabppa wana, men gappi aoɗatteg neeg, am kayak hambuppuak Aserah dabmekkulagnu biidod ele daappig amu, ag amu oh ele okkulatteg neppig. Ag amu hena, ag kayak hambuppuak dilag mettid lag nakok ele loppaɗadna, ag kayak hambuppuak dilag qaɗab ele heeg nauhadppig. Ag tatam Juda wanppa, Benyamin wanppa ele hewona, ag tuɗidna wana, Epraim wanppa, Manase wanppa ele heppig. Ag amu oh hena malona, dimppa ag eɗun, ahilag aab anen anen, ahilag wan anen anenppa ele gona daappig.

Danab ah ag Kayak noobppa dup nona binag mekkulagnu keeke aon uɗippig

² Amu Hesekaia nug mana mettak danab, amu Lewi buɗubppan mana mettak danab iitta, nug ag ele ag ahilag uɗat atten atten dayom amu, nug obatak obatak anam otiattom. Ag ahilag uɗat am manaknu ofa hekkulagnu, ag laippu dayaknu ofa hekkulagnu, ag danab ah Kayaknu ehanittak mattaglagnu uɗat hekkulagnu, ag Yawe amegppa, “Ena heme,” akkulagnu, ag Yawenu mettid lagnu aɗ odppa daan, Nug binag mekkulagnu ahi ettaglagnu daappig.

³ King nug en nuhignab, amuppanu mana mettak danab ag hanhan buttua, tueb ele manaknu ofa hekkulagnu doɗ matte heppig. Nug amu ha, nug kalam bau bettenu, Sabatnu, hobul dayaknu haen epeɗiaknu amu, nug haen amu ohnu manaknu ofa hekkulagnu doɗ ele ag mattom. Yawenu ɗoppa ag anam hekkulagnu yaak niitte, amubia Hesekaia nug mana mettak danab ag doɗ main, Kayak mettalagnu doɗ ag mattom.

⁴ Hesekaia nug Lewi buɗubppan mana mettak danab, Lewi buɗubppan mana mettak danab iitta, ag ele, nug ⌊ag laih wana, men doɗo awaknu uɗat laa hekkulagnu duttunak ii doomnanu⌋, ag Yawenu ɗo pehettak doon dim lamidkkulagnu elele daaglagnu, nug Jerusalem danab ah, ag aɗi keeke mana mettak danab, aɗi keeke Lewi buɗubppan mana mettak danab iitta, ag ag ele mattaglagnu daappig amu, ag aon uɗin mattaglagnunab aum.

⁵ Hesekaia nug anam a, pahanab Israel buɗub ag ee tatam oɗuom, amuam ee aeg, wain bau, goɗen, uppuh leppu, am aɗi keeke laa dattanu aoppig amu, ag amu aon uɗin, Lewi buɗubppan mana mettak danab, Lewi buɗubppan mana mettak danab iitta amu, ag ag ele madappig. Ag huanak madappig. Keeke ahilkad amu ohnu ag obatak eblaih tanig ele ooppanu obatak laippu ag Lewi buɗubppan mana mettak danab, Lewi buɗubppan mana mettak danab iitta, ag ag ele madappig.

⁶ Israel danab ag Juda wanppa aabaabppa daappig, am Juda danab ag ele aabaabppa daappig amu, ag makaunu obatak eblaih tanig ele ooppanu obatak laippu Yawe, ag nuhignu tituanna medappig. Ag makaunu heppig, anamib ag, sipsipnu, meemenu ele heppig. Ag amu hena, ag keeke laa, men doɗo, silwa, gol, keeke, ag keeke amu ele obatak amubia hewona, obatak laippu aon, ag Yawe, nuhignu tituanna mettan, ag keeke amu oh aon uɗin meeg, qagmak naɗinab dayom. Kayaknu ɗoppa, keeke amubia oh am Yawenu tituanak daatte.

⁷ Ag keeke Kayak medappig amu maɗ amuppa kalam ewamppa digmena, ag heeg ukke ukke, kalam eblaih aɗitppa malappig.

⁸ Israel danab ag keeke aon uɗin meeg, qagmak naɗinab daappig amu, haen Hesekaia, nuhikkud ehanittak anuqak danab ele ag uɗin, amu anidna, ag Yawe binag mena, ag Israel danab ah, ag Yawenu danab ah amu, ag ag itittak ena madappig.

⁹ Amu Hesekaia nug mana mettak danab, aria Lewi buɗubppan mana mettak danab iitta amu, nug ag ele keeke kuɗum danab ah aon uɗieg, qagmak naɗinabppa anam daappignu oɗ mattom.

¹⁰ Nug ag oɗ matte, mana mettak ikki danab Asaria, nug Sadok buɗub amu, nug nai mattia, king aum nob ma aum. “Yawe Nug nuhikkud danab ah itittak ena madatte amunu, danab ah ag digmena, ahilkad keeke aon, Yawenu mettid lakka uɗin meegeg, ig ee keeke elelenab daaut uɗie, gemu ele daautut, am laa hamu daatte. Keeke amuam qagmak naɗinab iikku daatteb,” awa aum.

¹¹ Anam amunu, Hesekaia nug ag Yawenu mettid lag, ag appa keeke maknu oo laala hekkulagnunab aum. Nug anam aum amunu, uɗat nid ag heppig.

¹² Ag anam babaitteg, danab ah ag keeke aon uɗiglagnu oo metta ii uuak kobol dim lamidna, ag keeke Yawenu daakkunu Nug hamu medappig, keeke obatak eblaih tanig ele ooppanu obatak laippu, amu keeke ag Yawenu tituanna medappig ele, ag keeke amu oh aon uɗin, Yawenu mettid lag, amuppa meppig. Anam mena, Lewi buɗubppan mana mettak danab iitta, ag oolagppanu laa onig Konania nug keeke amu gumeme, nug amag Simei nug waappa daya, ehanittom.

¹³ Aa uɗat amunu okkai daaeheh, danab eblaih laih ele ag aa waalahppa anuqak danab daan, ehanatppig. Ag onilag am Jehiel, Asasia, Nahat, Asahel, Jerimot, Josabat, Eliel, Ismakia, Mahat, Benaia ele. Danab amu oh ag Konania, nug amag Simei ele waalahppa daan, ehanatppig. King Hesekaia, nug mana mettak ikki danab Asaria ele, aa danab amu tituanadpiɗ. Asaria nug am Kayaknu mettid lagnu ikki danab.

¹⁴ Ag amu heegeg, Imna bekka Kore, nug Lewi buɗubppan mana mettak danab iitta, ag oolagppanu, nug Yawenu mettid lagnu aɗ od kaɗag uɗitteppanu daattenu gumak okkai amu, nug Israel danab ah ɗo hamu mettaknu ofa aon uɗin, amu keeke Israel danab ah ag Yawenu daakkunu tituanna, Nug medappig ele aon uɗippig, nug amu oh gumaama, nug keeke amu oh mana mettak danab, amu Lewi buɗubppan mana mettak danab iitta, ag ele, nug ahilagnu otiatta mattom.

¹⁵ Iden, Miniamin, Jesua, Semaia, Amaraia, Sekania ele ag mana mettak danab dilag aabaabppa Kore ehanidppig. Ag amu haknu oo metta ii uuak kobol dim lamidna, Kore ehanidnana, otiak uɗat amu hena, ag ahilag uɗat laippu laa, mana mettak danab kaino, o mana mettak danab nid bau, ag ahilag obatak anen anenppa daappig amu, ag oh am keeke amu madappig.

¹⁶ Ag ele Lewi buɗub, ag ahilag maɗ ewam, o ewam eɗitta tak, ag onilag am Lewi buɗub onilkad yaaknu bukppa niippig, ag Yawenu mettid lagppa, deɗ deɗppa ahilag obatak anen anenppa, appa obatak amunu uɗat atten hekkulagnu daappig amu, ag ele keeke amu madappig.

¹⁷ Mana mettak danab ag onilag am baekkudppan onilkad anen anen waappa Lewi buɗub onilkad yaaknu bukppa niippig ele amu, ag ib amuppa keeke amu mattaeg aoppig. Aria, Lewi buɗubppan mana mettak danab iitta, ag ahilag maɗ 20 o 20 eɗittak amu, ag uɗat aɗi aɗi heppig, ag obatak attenppa daappig amu, ag amu dabmenana, ag ib amuppa keeke amu mattaeg aoppig.

¹⁸ Keeke otin madappig amu, ag Lewi buɗub oh, ahilkad ah, ahilkad nid naunau, ag bekkalkad aɗelkad nakok okkai meppig, ag onilag am Lewi buɗub onilkad yaaknu bukppa niippig ele amu, ag amu dilag oh dabmenana, keeke otin madappig. Aɗinu ag amu oh dilagnu dabmenan, keeke madappig? Ag ele Yawenu neekkakppa elele daaglagnu ag oolag, meulag ele babaittak uɗat hekkulagnu oo metta ii uuak kobol dim lamidna heppig.

¹⁹ Aria, Aron buɗub, mana mettak danab daappig amu, ag ahilkad aab anen anen, o ahilkad aab anen anen daugppa, dad okkaippa daappig amu, danab ag keeke otin madappig ele ag amu dilag ele dabmena, keeke madappig. Danab okkai ag danab paniak uɗat amu hekkulagnu, ag danab amu onilagppanab enana, tituanatteg, ag uɗat amu heppig. Keeke ag otin madappig ele amu, danab aun, ag onilag am Lewi buɗub onilkad yaaknu bukppa niippig ele, amu ag oh keeke otia mattakppa keeke aoppig.

²⁰ Hesekaia nug Juda wan ohppa anam heum. Nug Yawe, nuhig Kayak, nug nuhig neekkakppa, keeke ena, keeke tutukku, kobol ena haknu oo metta ii uuak kobol ele dim lamittatta heum.

²¹ Hesekaia nug aɗi keeke Kayaknu mettid lag, nug amuppa hekkunu ha, nug Kayaknu ɗo ele dim lamidkkunu ha, nug Kayak aɗi aɗi hekkunu haknunab anak nug amegppa aum ele amu, nug keeke amu ohnu Kayak antta dim lamidkkunu Nug madikkunu dabmak awa, Nug dim lamidkkunu meu ohppa ele amu heum. Hesekaia nug anam he, Kayak ehanitte, nug elelenab dayom.