2 Stori 24 - Nobonob Baibel

Joas nug Juda dilag king dayom

¹ Joas nug maɗ eblaih aɗit ele dayaya, nug king ba dayom. Nug king ba, nug maɗ 40 Jerusalem appa king dayom. Nug anig am Berseba ah onig Sibia.

² Joas nug anam king ba daye, mana mettak danab Jehoiada nug bau dayeye amu, haen amu oh Joas nug Yawenu neekkakppa kobol genab tutukku ele dim lamittom.

³ Jehoiada nug ah aɗit, Joas wauuɗ daaglahnu tituanate diiate, Joas aa ele ag nid danab, nid ah ele menuadppig.

⁴ Amu Joas nug king ba daye, haen nakok elab ukke, nug Yawenu mettid lag bappaidkkunu dabmak awom.

⁵ Nug dabmak amu awa, nug mana mettak danab, amu Lewi buɗubppan mana mettak danab iitta, nug ag ele onilagppa e uɗieg, nug ag amelagppa aum. “Ag ahan, Juda aabaabppa gona, Israel danab oh ag maɗ anen anen men doɗo Yawe mettaglagnu daatte amu, ag men doɗo amu, ig amuppa Kayak, ag Nug waappa daan, Nug oɗe dim lamidtteb amu, ig nug laug bappaidkkunignu, ag men doɗo amu aweg! Ag paha amu heig!” awa aum. Nug anam aum, amge Lewi buɗub ag paha ii heppig.

⁶ Ag paha ii heppig amunu, king nug mana mettak ikki danab Jehoiada onigppa e do, nug Jehoiada amegppa aum. “Anukkanab Yawenu maɗi nid Moses, nug Israel danab oh ag takis laa maɗ anen anen mekkulagnu nai qakkom. Men doɗo amuppa anukka ag Kayaknu mettid haknu peh lag men maha aɗit ɗo nai yaak niitte ele appa daattep bappaidppig, ⌊gemu ig ele amubia lag imu bappaidkkunig⌋. Anam amu, aɗinu na Lewi buɗub ag gona, Juda danab, laa Jerusalemnu, laa Juda wanppa laih laihnu ele, ag eppelagppanu men doɗo Yawe mettaglagnu daatte aoglagnu ii tappaɗna duttunadme?” awa oɗ metta aum.

⁷ Am laa ah nau Atalia, nuhikkud huu ag anukka Kayaknu mettid lag loppaɗna, ooppa wana, keeke laala heeg nauhe, ag keeke Kayaknu tituanak daatte ele aon, kayak hambuppuak Bal iɗu iɗu binag maadkkulagnu aon goppig amunu, ⌊Joas nug ag lag amu eɗun bapaidkkulagnu tappaɗattom⌋.

⁸ Am anam daye amu, King Joas nug haknunab nai laa mattia, ag kunup laa adppa hena, ag aon gona, Yawenu mettid lag dimittim, lag amunu aɗ talilidtte ele odppa mekkulagnu aum.

⁹ Nug kunup anam hekkulagnu anam a, ag heeg, nug nai laa Juda wan ohppa, Jerusalem appa ele, appan danab ah ag dooglagnu me ukkom. Nai amuppa amu nug Israel danab oh ag Kayaknu maɗi nid Moses nug atu taɗakppa dayaya, ɗo meum bia, ag takis Yawe mettaglagnu aon uɗin, kunup amuppa mekkulagnu aum.

¹⁰ Joas nug nai amu me ukke, Juda dilag okkai, danab ah laa oh ele ag doon, ag gamag ahak ele men doɗo amu aon uɗin, kunup amuppa inaeg ambeum.

¹¹ Danab ah ag men doɗo amu aon uɗin meegeg, Lewi buɗub ag kunup amuppa men doɗo kuɗum daye anidna, ag maon gona, kingnu ehanittak anuqak danab mattaeg, kingnu nai yaak danab, mana mettak ikki danabnu ehanittak ele aa uɗiya, men doɗo kunup amuppanu aoya ⌊ebqeya,⌋ aa kunup eɗuya maoya goya, abenabppa mepiɗ. Ag hanhan anam heegeg, men doɗo kuɗumnab aoppig.

¹² Israel danab ah ag men doɗo anam Yawe mettaegeg, King Joas, Jehoiada ele aa men doɗo amu aoya, Yawenu mettid lag babaittak danab dilag okkai madapiɗ. Aa mattaeh, ag lag hak danab, danab ag menppa uɗat hak dootteb, danab ag aen, bras eleppa keeke haknu dootteb ele amu, ag danab amu oh ag Yawenu mettid lag bappaidkkulagnu men doɗo amuppa daden madappig.

¹³ Danab ag uɗat amu gumappig ele ag ahilag uɗat haknu yagbak doyeg, Kayaknu mettid lag babaittak uɗat amu elele ukkom. Ag lag tatam heeg dayom amu, ag amu dabmena, ag anam baula hekkulagnu heegeg ukke, tatam dayom bia daye, ag aben laa nakok gai-iitta dayom amu, ag ɠagattag qedappig.

¹⁴ Danab ag uɗat amu heppig amu, ag uɗat heeg ukke, lag babaittak amu oh hena malaeg, men doɗo iitta ii meum amunu, men doɗo amu ag aon gona, King Joas, Jehoiada ele mataeg, aa heeh, uɗat amu haknu doyak danab ag Lewi buɗub ag Yawenu mettid lag, amuppa maɗi ahilag hekkulagnu keeke heppig. Keeke amuam doɗ mana mettaknu huɗup keeke, tappiɗ, amu keeke laala ele gol, silwappa hak ele. Amu Jehoiada nug bau dayeye, mana mettak danab ag hanhan Yawenu mettid lag, amuppa manaknu ofa hedappig.

¹⁵ Amu Jehoiada nug anam daya he ukke ukke, nug kainonab ma, nug maɗ 130 dayaya amu, nug mauhom.

¹⁶ Jehoiada nug Israel dilagppa kobol ena ena ha, Nug Kayak tutukku dim lamitta, nug Kayaknu mettid lag ele dabmetta auta autanab awom amunu, nug mauhe, ag nug Dawitnu Aab, ag appa kingnu boumak abenppa nug boumppig.

Jehoiada mauhe, Joas nug Yawe dimetta, eheɗ heum

¹⁷ Amu Jehoiada nug mauhe, Juda dilag okkai ag King Joas gumidna tena, ag nug binag mena, ⌊ag eɗun, kayak hambuppuak dabmekkulagnu aegeg,⌋ nug ahilag nai amu doyom.

¹⁸ Ag anam aeg, Joas nug ahilag nai dim lamittom amunu, Juda danab ah ag ahan, ag Yawe, ag mamelkad aɗi dilag Kayak, ag Nug laugppa gona, Nug noobppa dup nona binag mekkulagnu uunna, ag kayak hambuppuak Aserah dabmekkulagnu biidod, kayak hambuppuak laala dottolkad ele noolagppa dup nona, ag binalag meppig. Juda danab ah, laa Jerusalemnu, laa Juda wanppa laih laihnu amu, ag amu heppig amunu, ag beɗulagppa aab ele daaeg, Kayak Nug danab ah amu dilagnu oppoɗi beum.

¹⁹ Juda danab ah ag amu hemananu, ag eɗun, Yawe dim lamidkkulagnu Yawe Nug nuhikkud propet danab maatte, ahilagppa goppig. Nug he, propet ag gona, Juda danab ah ag eheɗ heppig ag amelagppa appig, amge Juda danab ah ag dooglagnu uuppig.

²⁰ Anam amu, haen laa Kayak Ouɗi Nug mana mettak danab Jehoiada bekka Sekaraia, nuhigppa uɗia, nug danab ah noolagppa hibaitta, inam aum. “Kayak Nug inam atte. ‘Aɗinu ag Yawenu haknunab nai ii dim lamidtteb? Ag anam henana, ag ena ii daamna. Ag Yawe uun oitteb amunu, Nug ele ag uuatta oitte,’ ” awa aum.

²¹ Sekaraia nug anam ag amelagppa aum, amge king, danab okkai ele ag Sekaraia qeppeg mauhkkunu dabmak aona, king nug haknunab a, ag Yawenu mettid lag haɗap-ppa menppa nug qeeg mauhom.

²² King Joas nug Sekaraia mameg Jehoiada nug nuhignu ena heum ii dabmeum. Iitta. Nug danab nuhignu ena heumnu bekka aakku qe mauhom. Nug anam he, Sekaraia nug mauhaha, nug aum. “Yawe Nug nahip hak imu antta, Nug heeb, nahip hak nau imunu bu mettak nahip-ppa bekkunu ool daatte,” awa aum.

²³ Amu maɗ amu uue, maɗ laappa, maɗ amu digmeumppa Aram dilag daup ag Joas, Juda ele ban hekkulagnu uɗippig. Ag Juda wan, Jerusalem ele eɗadna, Juda dilag ikki danab oh aqaeg mauheg, ag Juda danab ah dilag keeke ena ele aon, ag ahilag king Damaskus appa dayom amu, ag keeke amu oh meeg ukke, nug medappig.

²⁴ Aram dilag daup ag kuɗum iitta, Juda dilag daup am huanak, amge Joas, Juda danab ah ele ag Yawe, ag mamelkad aɗi dilag Kayak, ag Nug uun oippig amunu, Joas nug bu aokkunu Yawe he, Aram dilag daup kuɗum iitta ag Juda dilag daup kuɗum eɗadppig.

²⁵ Aram dilag daup ag uɗin, anam hena, eɗun ukkaeg, Joas nug banppa guittak okkai awa, niiak abenppa niiaya dayom. Nug anam niiom amunu, nuhikuɗ ehanittak anuqak danab aɗit laa aa nug mana mettak danab Jehoiada bekka Sekaraia qe mauhomnu dabmeya, niiak abenppa niieye qeeh mauhom. Amu Joas nug aakku mauhe, ag Dawitnu Aab, ag appa nug boumppig, amge ag king dilag boumak abenppa ii boumppig.

²⁶ Laa aa Joas qepeɗ mauhkkunu dabmeya hepiɗ ele, aa am Amonnu ah onig Simeat bekka Sabat, amu Moapnu ah onig Simrit bekka Jehosabat ele.

²⁷ Amu Joas bekkod dilagnu nai, propet danab ag nuhignu nai kuɗum attem attem appig, danab ag Kayaknu mettid lag bappaidppignu kaya, kaya amu oh am ag buk laappa, buk amu onig am Kingnu Kaya, ag buk amuppa yaappig daatte. Joas nug mauhe, amu nug bekka Amasaia nug abenabppa king ba dayom.