2 Stori 20 - Nobonob Baibel

Jehosapat, nuhikkud daup ele ag Moap, Amon ele banelag goppig

¹ Aria, amu dimppa amu Moap danab, Amon danab, Meun danab laala ele ag ahan, Jehosapat ele ban hekkulagnu uɗippig.

² Ag uɗieg, danab laala ag uɗin, Jehosapat amegppa appig. “Ban danab huanaknab Mauhak Le heqo laih, Edom appanu uɗin, ihinig wanppa na ele ban hekkulagnu bena malappig. Ag uɗin, Hasason Tamar, onig laa Engedi, ag appa daatteb,” aon appig.

³ Ag aeg, Jehosapat doya, nug baɗa aha, nug Yawe antta dim lamidkkunu Nug madikkunu dabmak ɠagattag awa, nug Juda danab oh ag ee ohnu kud mena daaglagnu nai me ukkom.

⁴ Jehosapat nug nai amu me ukke, Juda danab ah ag ahan, ag Yawe oɗ medappeg ehanadkkunu Jerusalem qagmeppig. Ge, ag Judanu aab ohppanu uɗin, Yawe antta dim lamittaknu Nug mattiglagnu qagmeppig.

⁵ Juda danab, laa Jerusalemnu, laa Juda wanppa laih laihnu amu, ag uɗin, Yawenu mettid lagnu danab dilag haɗap bauppa daaegeg, Jehosapat nug appa ele ukka, nug haɗap amu noobppa hibaitta daya, nug unuqitta,

⁶ nug inam aum. “O Yawe, ig mamenkad aɗi dilag Kayak, na hab attan daattem. Na wan anen anen dilag okkai daattem. Ɠagattag oh na eppenppa daatte. Na ebehin ele. Auntai laa nug na eɗidkkunu elele iitta.

⁷ O Kayak ihinig, ig memetankad anukka haenppa danab wan imuppa daadppig amu, na hee, nahipad danab ah Israel ag danab amu lamatteg, na wan imu na layap Abraham buɗuppud, amuam ig, na ihinig hanhan daakkunu ig mekkame.

⁸ Ig mamenkad aɗi ag wan imuppa daan, ag nahip mettid lag imu, na onin iguppa daakkunu hena, ag appig.

⁹ ‘Uug digdig, amuam kekeɗ ag uɗin, qep elabppa bu mekkaglagtai, o oɗe nau danab kuɗum aqe mauhtteb ele iqakkutai, o enug iqakkutai, uug amu laa ihinigppa beeb, ig uug nau amu dootta, ig mettid lag na onin daatteppa imu noobppa, appa na noomppa daat unuqidpput, na ihinig unuqittak doon ehanigppe, ig padal ii memata,’ aon appig.

¹⁰ Ag anam appig amu, gemu Amon, Moap, Edom danab ele ag banenig uɗin, iqaglagnu daatteb. Anukka ig memetankad anukkanu ag Isipnu uɗiegeg, na ag danab amu ele ban hekkulagnu aib ame amunu, ig memetankad ag ag ele ban ii heppig. Ag ag aqaeg ii iitta meppig. Danab amunab, ag buɗulkad gemu banenig uɗin, iqaglagnu daatteb.

¹¹ Ig ahilagnu ena hemut, amge ag uɗin, eheɗ heigna, lamigna eɗigppeg oolta, laih wan laappa daagnignu hetteb amu, na amu neegna anidkkutnu oɗ medattem. Na wan imu, am ig aunig daakkunu na ig mekkame.

¹² O Kayak ihinig, daup laihnu uɗippig amu, na ag epeɗiadna, ag eheɗ hetteb anidna, bu iite mattamna? Aɗinu? Danab banenig uɗin ig iqaglagnu hetteb ele, ag daup huanaknab, ig ag eɗadkkunignu elele iitta. Ig attem hekkunig amu, ig ii doottem, amge ig na neekkidttem,” awa unuqittom.

¹³ Jehosapat nug anam unuqittette, Juda danab oh, ag waalkad, nid yuɗ ahilkad, nid naunau ahilkad ele, ag oh Yawe noobppa aakku hippaidna daappig.

¹⁴ Ag anam daanna, Jehosapat nug unuqitte, Yawenu Ouɗi Nug Lewi buɗubppan mana mettak danab iitta, ag oolagppan laa onig Jahasiel, nuhigppa uɗiom. Jahasiel memetab anukkanu laa am Asap. Jehasiel nug Sekaraia bekka. Sekaraia nug Benaia bekka. Benaia nug Jeiel bekka. Jeiel nug Matania bekka.

¹⁵ Amu Yawenu Ouɗi Nug Jahasiel, nuhigppa daye, Jahasiel nug aum. “O King Jehosapat na, amu ag Juda danab, laa Jerusalemnu, laa Juda wanppa laih laihnu amu, ag oh nai doyeg! Yawe Nug ag amelagppa inam atte. ‘Ag daup huanaknab uɗin daatteb amu, ag amu dilagnu aib baɗappig; ahilag dabmak amu dilagnu qe nak aib dayom,’ awa atte. Aɗinu? Ban imu haknu am ahilag keeke iitta. Iitta! Am Kayaknu keeke.

¹⁶ Butti amu, ag Juda dilag daup, ag ahan, ag kekeɗ amu ele ban hekkulagnu ukkeg! Kekeɗ amu ag qauko ikki oppoɗu noak onig Sis amu, ag amu tenan gokkulagnu oiglag. Ag Juda amu, ag gona, atu taɗak onig Jeruel appa oolnu noak laa daatte amu, ag oolnu noak amu igippa kekeɗ daappeg anadkkulag.

¹⁷ Ag gona, appa anadkkulag, amge ag ban laa ii hemana. Iitta. Ag gona, ag ban helob bia ban hak abenppa hippaidna, ɠagattag daappeg, Yawe Nug ehanatteb, ag nuhig ehanittak anidkkulag. O Juda dilag daup, ag laa Jerusalemnu, ag laa Juda wanppa laih laihnu amu, ag aib baɗappig. Ag ahilag dabmak am qe nak aib dayom. Ag butti gona, ban hekkulagnu bia kekeɗ neekkatteg, Yawe Nug ag ele daaglag!” awa aum.

¹⁸ Jahasiel nug anam a, Jehosapat nug gateg qaun o, gomela, iɗu wanppa me, Juda danab ah oh, laa Jerusalemnu, laa Juda wanppa laih laihnu amu, ag ele anam hena, ag oh Yawe noobppa dup nona binag meppig.

¹⁹ Ag amu heeg, Lewi buɗub oolagppan laala, ag Kohat, Kora ele buɗulti ag ahan, hippaidna daanna, ag Yawe, Israel dilag Kayak, ag Nug baalag okkaippa binag meppig.

²⁰ Aria anam heeg ukke, deɗ amu uue, deɗ amu wagɗe, Juda dilag daup ag ahan, atu taɗak onig Tekoa, ag appa gokkulagnu goppig. Ag gokkulagnu daaegeg, Jehosapat nug aha, danab ah amelagppa aum. “O Juda danab ah oh, laa ag Jerusalemnu, laa ag Juda wanppa laih laihnu, ag dahil nai doyeg! Ag Yawe, ahilag Kayak, ag nuhignu oolagppa genab doyeg! Ag amu hekkulag dayeb, Nug heeb, ag ɠagattag qak daaglag. Ao, ag nuhikkud propet nainu oolagppa genab doyeg! Ag amu hekkulag dayeb amu, ag aɗi hekkulagnu hetteb, amuam meu okku.” Jehosapat nug anam awa aum.

²¹ Jehosapat nug anam a, nug danab ah ele nai mattin, nug danab laa ag Yawenu ahi, ag ahi amu ettaladnana, ag Yawe, Nug dagom onig ɠagattag ele, Nug oppiaawak ele, ag amunu Nug binag okkainab menana, ag daup noolag aon gonana, ag ahi inam ettaglagnu tituanattom. Ag Yawe amegppa, “Ena heme,” aon aig! Aɗinu? Nuhig oo mauhaknab kobol hanhan alet daatte.

²² Danab amu ag digmena ahi ettanna, ag Yawe ele binag meegeg, Yawe Nug he, daup laa ag banelag Juda wanppa uɗippig, ag am Amon danab, Moap danab, Edom danab ele amu, ag oolagppa ban ahe, ag akka akka nug qenana mauhadppig.

²³ Amon dilag daup, Moap dilag daup ele ag Edom dilag daup aqaeg, iitta mekkulagnu ahan, ohnab aqappig. Ag aqan malona, ag ahan akka akka ban hena aqanna, ag ele aakku mauhppig.

²⁴ Amon, Moap, Edom ele dilag daup ag anam heeg, Juda dilag daup ag uɗin, aben attan laa, danab nug aguppa dayaya, neekkeb ukkeb, atu taɗak anidkkunu elele amu, ag appanu uɗin bena, ag neekkeg, kekeɗ dilag daup huanaknab daappigppa ukke, ag danab gaɗalkad aakkuib anadppig. Kekeɗ bau laippu appa ii dayom; ohnab mauhppig.

²⁵ Jehosapat, nuhikkud daup ele ag anam anidna, ag kekeɗ dilag keeke aon gokkulagnu wana, ag ban haknu keeke, lamen, keeke enanag laala ele huanak anidppig. Keeke amu oh ag haen amuppaib akkan, mawadna gokkulagnu elele iitta. Keeke amuam huanak amunu, ag keeke amu mawadna gonan uɗinna, tuɗitteg ukke ukke deɗ ewamppa malappig.

²⁶ Jehosapat, nuhikkud daup ele ag anam hena, deɗ waɗeleppa ag eɗun, oolnu noak onig Beraka appa ag daanna, Yawe binag meppig. Diig amunu ag oolnu noak amu onig Berakanu Oolnu Noak ataɗeg, gemu ⌊nai imu yaak haenppa⌋ ele, oolnu noak amu onig anamib daatte.

²⁷ Ag amu hena malona, Jehosapat nug Juda danab oh, laa Jerusalemnu, laa Juda wanppa laih laihnu amu, nug danab amu oh noolag awa, ag oh Yawe Nug he, ahilag kekeɗ iitta meppig amunu, ag gamag ahak naɗi ele Jerusalem goppig.

²⁸ Ag Jerusalem tena, ag Yawenu mettid lakka gonana, laa ag harp, lut ele qenana, laa trampet iwaladppig.

²⁹ Wanppan wan laa ohppan danab ag Yawe anam aakku Juda ehanatte, ahilkad kekeɗ nauheg dooppig amunu, Kayak Nug ahilagnu ele anam hemanu ag baɗappig.

³⁰ Kayak Nug he, Juda dilag kekeɗ oh ag toettan daappig amunu, Juda wan, Jehosapat gumom amu, amuppan danab ah ag maɗoɗ ele daappig.

Jehosapat mauhom

³¹ Jehosapat, nug Juda dilag king, nug maɗ 35 dayaya, nug king ba dayom. Nug king ba, nug Jerusalem appa maɗ 25 king dayom. Nug anig am Silhi aɗeg Asubah.

³² Jehosapat nug mameg Asanu kobol, nug amu oh dim lamittom, laa ii apiɗittom; nug Yawenu neekkakppa kobol genab tutukku ele dim lamittom.

³³ Amge keeke laippu nug ii heum, nug aabaabppanu mettid lag nakok, nug amu ⌊oh⌋ ii loppaɗattom. Danab ah ele ag meulag ohppa Kayak, ag mamelkad aɗi dilag Kayak, ag meulag ohppa Nug dim lamidkkulagnu ii heppig.

³⁴ Amu keeke laa Jehosapat nug king abenabppa ta, king daye ukke, nug mauhom batak amu, keeke laala nug heum, keeke laala beum ele amu, amuam Hanani bekka Jehu buk laappa yom. Amu ag buk amu aon, buk laappa, buk amu onig am, Israel Dilag Kingnu Kaya, ag buk amuppa yaappig daatte.

³⁵ Amu keeke laa Jehosapat nug heum am, nug Juda dilag king dayeye, nug Israel dilag king Ahasia ele aa nai qakkaya layam batapiɗ, amge Yawenu neekkakppa Ahasia nug am nau hak danab.

³⁶ Aa layam bataya, Ahasia nug aa uub okkai kuɗum ag laih laih gonan, en aonna, gona uɗiglagnu a, Jehosapat nug dabmak amunu, “Yo,” a, aa heeh, uub itak danab ag aakku Esiongeber appa uub amu itadppig.

³⁷ Aa heeh, uub itak danab ag uub amu aakku itadppig, amge ag heegeg, Maresa danab Dodawahu bekka Elieser, nug propet, amu nug Jehosapat dimppa aɗi bekkunu nai imu mattie doyom. Nug aum, “Na Ahasia, ⌊Nug Yawenu neekkakppa nau hak danab amu,⌋ na nug ele nai qagapiɗ, diig amunu Yawe Nug heeb, keeke na heme ele am nauhkku,” awa aum. Amu nug aum, amubia uub amu ii oippig haenppa aakku nauheg, danab ag uub amu aon gona, en aon uɗiglagnu elele iitta.