2 Samuel 7 - Nobonob Baibel

Yawe Nug nuhig mettid lagnu Dawit amegppa mattiom

¹ Yawe Nug he, Dawit nug Israel dilag kekeɗ eɗatte bodoettan, ban hekkulagnu ii ahappig, amu king Dawit nug ele lag enanagnab nuhig ha mala, appa ta dayaya, haen amuppa

² nug propet Natan amegppa aum. “Gadon, da lag enanagnab, ad sidappa hak, da lag amuppa iikku daattem, amge Kayaknu Tituanak Nainu Kunup am pehppa daatte,” awa aum.

³ Dawit nug anam a amu, Natan nug oɗeppa awa aum. “Yawe Nug na ele daattep amunu, na aɗi hekkutnu dabmettem amu, na anamib he!” awa aum.

⁴ Natan nug anam aum, amge tuqan amuppa Yawe Nug nuhig nai imu Natan mettom.

⁵ “Na gona, dahil maɗi nid Dawit amegppa dahil nai imu appe doyaɗ! ‘Yawe Nug inam atte. Laa nug lag dahil, da lag amuppa daakkul amu, laa nug lag amu hekku. Na iitta.

⁶ Anukka da Israel danab Isipnu diie uɗie, gemu ⌊nai imu yaak haenppa⌋ batak amu, da lagnab laappa ii daami. Iitta. Da pehppa dayeye, Israel adeppa adeppa gokkulagnu ippunatti goppig amu, da mettid haknu peh lag amuppa daaiyi gomut.

⁷ Da anam daaiyi, Israel oh ele anam adeppa adeppa oitta amu, haen amuppa da haen laa gumak danab laa nug dahilad danab ah Israel, nug ag gumadkkunu amegppa ami amu, da amu dilagnu laa, “Diig aɗinu na lag dahil ad sidappa hak laa hena ii meɗame?” amegppa amite? Iitta!’

⁸ Anam amunu, na gona, dahil maɗi nid Dawit inam appe doyaɗ! ‘Yawe Nukka Ɠagattag Oh Ele Nug inam atte. Na gikkiɗah dad okkaippa sipsip gumattette, da hei, na uɗat amu uun, dahilad danab ah, amu Israel danab ah, na ahilag king daakkutnu meidmi.

⁹ Na adeppa adeppa gome amu, da ele oh gomuɗ. Amu ele da hei, na kekeɗ nahip oh eɗatte, gemu ag na waatppa daatteb. Aria, gemu amu, da heppi, na onin okkainab, danab onilag okkai okkai laa oh eɗattak, wanppa daan oippig, oitteb ele amu, na onin okkainab, ag onilag bia daakku.

^10-11 Da danab keeke eppe, ena bette, amubia da Israel danab ah ag wan ele daaglagnu, ag amuppa maɗoɗ ele daaglagnu ehanatten, aben madappi daaglag. Danab nau ag anukka da Israel dilag ikki danab digmein tituanadmi, haen amuppa danab nau amu ag digmena, dahilad danab ah eheɗ hattaegeg uɗie, gemu ele hetteb, amge da heppi, ag amu tuɗidna ii hemana. Amu ele, da heppi, nahipad kekeɗ ag ɠagattag ii daamna. Amu da Yawe, da heppi, na buɗunad oolagppanu laala ele, ag anen anen ahilag haenppa, ag Israel dilag king hanhan bena daaglag.

¹² Anam, amu haen na nahip mauhak haen doob mauhppe, da heppi, na buɗunadppanunab laa nug na abenam aweb, laa nug gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku.

¹³ Laa nug gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku. Nid nahip amu, nugnab dahil lag, da onil amuppa daakkunu amu, nug hekku.

¹⁴ Da nug mameg daakkul; nug da bekkal daakku. Nug eheɗ heeb amu, da heppi, laa ag bu mettaglag. Da heppi, ag mataɗak nau nug mettaglag.

¹⁵ Da heppi, laa ag bu anam mettalag, amge da na bekkat amu, da dahil oo mauhaknab kobol nuhigppanu aɗitten ii aopa. Da Saul, nug king daamanu na noomppa lamidmi amu, da oo mauhaknab kobol dahil nuhigppanu aɗitten aomi, amge da na bekkatnu anam ii hepa. Iitta. Da hanhan nuhignu oo mauhaknab kobol dookkul.

¹⁶ Na buɗunad ag hanhan da noolppa daaglag. Ag iitta ii memana. Laa nug gumak uɗat nahip na eppenppanu matakka ii aoma; da heppi, hanhan na eppenppa, na buɗunad eppelagppa ele daakku.’ ” Yawe Nug Natan, Dawit amegppa anam akkunu amegppa aum.

¹⁷ Yawe Nug nai amu oh Natan amegppa a, Natan nug Dawit amegppa Yawe Nug mattiom, nug nai amunab Dawit amegppa aum.

Dawit nug unuqittom

¹⁸ Natan nug Dawit amegppa nai amu mattia male, King Dawit nug aha ukka, Yawenu pehppa noa, Yawe noobppa heɗep na dayaya, nug Yawe amegppa aum. “O Naɗi Yawe, da attem daai, da baeladppa ele am attem daaegeg, na da ehaniɗe, da gemu okkai daattem? ⌊Dahilppa ii beum. Iitta! Na ii helom bia, amge na nahip hak enappa aakku heme.⌋

¹⁹ Anam amge, O Naɗi Yawe, na amuib ehaniɗna hekkutnu ii dabmettem. Iitta. Na heppe, da, da nahip maɗi nid amu, da buɗulad oolagppanu laala, ag ahilag haen anen anenppa, ag Israel dilag king hanhan bena daaglagnu ele ame. O Naɗi Yawe, na kobol enanag inam haen oh danab dilagppa hettemte?

²⁰ O Naɗi Yawe, na da, nahip maɗi nid, na da dooiɗttem amunu, da, Dawit, da na amenppa aɗi nai laa madikkulnu daatte? Iitta.

²¹ Na nahip nai genab daakkunu dabmak anuqak aona, na aɗi dabmettem ele, amu bekkunu ele, na keeke okkai amu dahilppa heme daatte. Na amu heme amu, na da, nahip maɗi nid, na da ippunittak meɗakkutnu aakku heme.

²² O Naɗi Yawe, na laa oh eɗattaknab daattem. Ig daunigppa doomut, amubianab laa na bia iinab daatte. Na nakka Kayak daattem, laa ii daatte.

²³ Laa amu, aun aɗi laa ag nahipad danab ah, Israel, ag ag bia daatteb? Laa iitta. O Kayak, na huu laa ag begbeg maɗi nid daaegeg, na ag nahipad daaglagnu na ag begbeg dayaknu qagaiettakppanu eɗua uhuqak hemete? Iitta. Na nahipad danab ah Isip wanppanu dayaknu qagaiettakppanu eɗua uhuqak heme, amuppa na he, danab ah oh ag na onin dootteb. Na kobol okkai naɗi, danab hekkunu elele iitta, danab antta nug ebehi oh bodoetta le mette amu, na amu henana, amuppa na hee, nahipad danab Israel, ag Kanan wan imuppan danab, ahilkad kayak hambuppuak ele lamadppig.

²⁴ Na Israel danab ah tituanatte, ag nahipadnab danab ah aakku daatteb; hanhan anam daaglag. Na, O Yawe, na ahilag Kayak bena daattem.

²⁵ Anam amunu, O Yawe Kayak, na da, nahip maɗi nid, na keeke dahilppa, da buɗuladppa ele dilag hekkutnu, na nai anan qakkame amu, da na heppe, gemu, butti aɗi ele nai amu meu okkunu oɗ medattem.

²⁶ Na amu hekkutnu diig am, na anam heppe, am na onin hanhan binag ele daakku. Na anam heppe, danab ag, ‘Yawe Nukka Ɠagattag Oh Ele, Nug am Israel dilag Kayak, Nug ag gumadtte!’ aon akkulag. Laa amu, da Dawit, nahip maɗi nid amu, da buɗulad ag hanhan na noomppa king daaglag.

²⁷ O Yawe Nakka Ɠagattag Oh Ele, na Israel dilag Kayak, na, ‘Da heppi, na, na buɗunad oolagppanu laala ele, ag ahilag haen anen anenppa, ag Israel dilag king hanhan bena daaglag,’ mattieye, aakku da doomi amunu, diig amuppa da na inam unuqidkkulnu ɠagattag awen, iikku unuqidmi.

²⁸ O Naɗi Yawe, na am Kayak, na aɗi hekkutnu attem amu, na amu aakkuibnab hettem. Na keeke ena ena dahilppa hekkutnu da, nahip maɗi nid, da amelppa nahip nai amu anan qakkame.

²⁹ Amunu amu, gemu na ootppa ena doon, da, nahip maɗi nid, na da, da buɗulad ele na noomppa hanhan king daagnignu itittak ena megakkutnu oɗ medattem. Aɗinu? Na, Naɗi Yawe, na itittak ena megakkutnu nai anan qakkame, amu itittak ena amuam hanhan da, nahip maɗi nid, am da buɗuladppa daakku.” Dawit anam unuqittom.