2 Samuel 2 - Nobonob Baibel

Ag heeg, Dawit am Juda dilag king beum

¹ Amu Saul mauhe ukke, dimppa Dawit nug Yawe oɗ mettom. “Da eɗuen, Juda wanppa aab laappa ukken daakkul, o iitta?” awa oɗ mettom. Oɗ mette am Yawe Nug eɗua amegppa aum. “Ahan, anam hekkut,” awa aum. Nug anam a amu, Dawit nug oɗ mettom. “Ge, da aab attenppa ukken daakkul?” awa oɗ mettom. Oɗ mette amu, Yawe Nug aum. “Hebron gona daakkut,” awa aum.

² Yawe Nug anam aum amunu, Dawit, nug waauɗ aɗit ele ag ahan, appa goppig. Nug waauɗ aɗit amu, laa Ahinoam, nug appag diig am Jesril, amu laa am Abigel. Tatam nug am Karmel ted Nabal wau daye, Nabal mauhe, Dawit awom.

³ Amu Dawit nug he, danab ag nug dim lamidppig ele ag, ag baelkadppa ele, ag oh ele ahan, Hebron gona, aab onig Hebron appa amu, aab laala aab amu talilittak daappig ele, ag amuppa daan oippig.

⁴ Ag anam daaegeg, Juda danab ag Hebron uɗin, ag Dawit nug ahilag king daakkunu hena, ag Dawit king daakkunu goɗen gokkaɗakppa tituanppig. Ag anam heppig dimppa amu, laa ag Jabes Gileat danab ag, Saul mauhe, haen elab ii ukke, ag gona gaɗa awona, ag aon uɗin boumppig Dawit amegppa aeg doyom.

⁵ Aeg doya, Dawit nug Jabes Gileat danab dooglagnu nai imu me, ahilagppa ukkom. “Ag Saul, ihinig okkai, ag nuhignu oo mauhaknab doon, ag nug gaɗa aon uɗin boumppig amunu, da Yawe Nug ag itittak ena madakkunu ool daatte.

⁶ Nug ele ahilagnu oo mauhaknab kobol, oo metta ii uuak kobol ele doya dim lamidkkunu ool daatte. Ag kobol ena amu heppig amunu, da ele ahilagnu anam hekkul.

⁷ Saul, ahilag okkai, nug aakku mauhom, Juda danab ag da ahilag king daakkulnu goɗen gokkaɗakppa tituaniɗppig amunu, ag ɠagattag daan, ag oolagppa ɠagattag doyeg!” Nug nai amu me ukkom.

Saul bekka laikkud, amu Dawit aɗi ele ban heppig

⁸ Amge amu ii beum haenppa, Ner bekka Apner, nug Saulnu ban daup ikki anuqak dayom amu, Nug Saul bekka Isboset omala, Jodan le mataɗa, Mahanaim ukkom.

⁹ Nug ukka he, Gileat danab, Asur danab, Jesril danab, Epraim danab, Benyamin danab, amu Israel laa oh ag Isboseth nug ahilag king daakkunu nai qagappig. ⌊Juda aakkuib ag nug ii dim lamidppig.⌋

¹⁰ Saul bekka Isboset, nug maɗ 40 dayaya, nug Israel dilag king ba dayom. Nug king ba, nug maɗ aɗit king dayom. Nug Israel dilag king dayom, amge Juda ag Dawit dim lamidppig.

¹¹ Ag nug dim lamittegeg, Dawit nug Hebron appa maɗ eblaih aɗit, kalam eblaih laippu ele Juda dilag king dayom.

¹² Anam daye amu, deɗ laa Ner bekka Apner, Saul bekka Isbosetnu daup danab ele ag ahan, Mahanaim uun, Gibeon goppig.

¹³ Amu haen amuppa Seruia bekka Joap, ⌊Dawitnu daup okkai,⌋ nug nuhikkud daup ele ag ahan gona, le gottu Gibeon appa daatte ele, ag appa Apner aɗi ele nug uɗa teppig. Ag nug uɗa tena, Apner aɗi ag le laih daugppa daaegeg, Joap aɗi ag laih heɗep nena daappig.

¹⁴ Ag anam daanna, Apner nug Joap dookkunu ewa aum. “I hepuɗ, nahipad ban danab ena laala, ag dahilad ban danab laala ele, ag akka ahan, i noonihppa ban nakok heig!” awa aum. Nug anam a, Joap, “Ena, anam heig!” awa aum.

¹⁵ Joap nug anam a, ag heeg, Benyaminppan danab 12, ag Saul bekka Isboset dim lamidppig, ag ahaeg, danab 12 Dawit dim lamidppig amu, ag ele ahappig. Ag oh ahan, ag nug gukkualadna goppig.

¹⁶ Ag nug gukkuadna gona, Benyamin danab laippu, Dawit dim lamittom laippu ele aa nug gukkuid gukkuid ukkaeh, laa oh ele anamib hena, anen anen nug ikkilag uɗug aɗan, qep tutu aɗualadppig amu, amuppa ag anen anen ohnab nug qetti yaan, danab 24 amu oh aakku mauhna, nena qeppig. Ag anam heppig amunu, Gibeon wan aben amunu amu, ag onig Helkat Hasurim ataɗppig.

¹⁷ Ag anam heeg, deɗ amuppa ban naɗi aakku ahom. Ban naɗi ahe heeg ukke, Dawitnu daup ag Apner, Israel dilag daup ele eɗadppig.

¹⁸ Amu Seruia bekkod ewam, ag ban amuppa daappig. Ag onilag am Joap, Abisai am Asahel ele. Asahel nug doɗ gasel huana qaietta gotte, nug amubia huana qaietta gokkunu elele.

¹⁹ Asahel nug anam haknu elele dayom, Dawitnu daup ag Apner aɗi ele eɗatteg, Apner aɗi laa ii mauhppig ag oolna ukkaegeg, Asahel nug Apner tutukku dim lamittom. Nug tutukkunab Apner baeg matta, dim lamitta ukkom.

²⁰ Aa anam qaiettaya goyaya, Apner nug ugakka, nug eɗua neekke ukke, Asahel antta, oɗ mettom. “Na Asahelte?” oɗ mettom. Oɗ mette am Asahel nug aum. “Ao, am daib,” awa aum.

²¹ Nug anam a amu, Apner nug aum. “Na da aib dim lamiɗme. Na naɗiap-ppa, o iitta na nanehppa eɗun gona, nid bau laa anidppe, nug ele ban heya, eɗidna qeppe mauheb, nuhig lamen, qep keeke nahipnu awe! Amge aib da dim lamiɗme,” awa aum. Nug anam aum, amge Asahel nug uuom. Nug Apnerib dim lamidkkunu haaha, dim lamittom.

²² Asahel nug anam he, Apner baula aum. “Na da aib dim lamiɗme! Na da dim lamiɗkkutnu ii uukkutnu dayeb amu, da na nidappi mauhkkut. Anam beeb amu, da attem hein, na awan Joap noobppa daakkul. Da uɗal eheɗ neebeb, da amu hekkulnu elele iitta,” awa aum.

²³ Apner nug anam aum, amge Asahel nug dim lamidkkunu ii uuom. Iitta. Nug dim lamitta ukka, gukkuitta ukke, Apner nug ban laih aeg iittappa Asahel oo ye, ban oo ya ooppa ukka, laih gomeppa matulom. Apner nug anam he, Asahel na qa mauha niieye, danab aun aɗi ag aben amuppa uɗippig ele amu, ag anam hippaidna daan anidppig.

²⁴ Ag anam daappig, amge Joap, Abisai ele aa Apner qekkulahnu nug dim lamidpiɗ. Aa Apner dim lamitteheh, aam noono, Apner aɗi amu Joap, Abisai aɗi ele ag qauko nakok onig Ama, appa wappig. Qauko nakok amuam aab onig Gia guguittak. Gia, Ama ele aa Gibeonnu wan meu waknu nakokib elele, am amunu ib ukkakppa daattep.

²⁵ Anam heeg ukke, aben amuppa Benyamin danab ag Apner ele qagmena, ag nug ele qauko nakok igippa tena, ban hekkulagnu qagmena daappig.

²⁶ Ag anam hena, Apner nug baag okkaippa Joap dookkunu inam eum. “Ig ge iitta ban hetata, danab aqagnigte? Ig anam hepput ukkeb ukkeb, gogppa teeb, uug digdig bekku amu, na iite doottem? Ig oh am eamakkud; amu haen gane laa ele ukkeb, na nahipad danab ag uuglagnu akkut?” awa aum.

²⁷ Apner nug anam e amu, Joap nug noob ma eɗua eum. “Kayak genab bau daatte, genab amubia na nai amu ii alom amu, da dahilad danab ele ig ag ele tiinig laippu, ig ag dim lamadkkunignu ii uulom. Ig hepput ukkeb ukkeb, butti buttua batalom, ⌊amge na ame am ena, aakku ig iikku uugnig⌋,” awa aum.

²⁸ Joap nug anam anana, nug trampet iwale gaye, nuhikkud danab ag dim lamittak uɗat amu uuppig. Ag Israel laa dim lamadkkulagnu uun, ag ele ban ii heppig.

²⁹ Ag anam heeg, Apner, nuhikkud danab ele ag tuqan amuppa ahan, baelagppa gonana, ag atu onig Araba oppatna gona, Jodan le mataɗna, atu onig Bitron ele oppatna gona, Mahanaim teppig.

³⁰ Ag amu heegeg, Joap nug Apner aɗi lamattakppanu eɗua ukka he, nuhikkud danab oh ag qagmeeg, nug ebaqattom. Nug ebaqatte, Dawitnu danab 19, Asahel ele ag mauhppig anttom.

³¹ Amge Dawitnu danab ag Benyamin danab 360, ag Apner ele oippig amu, ag danab amu aqaeg mauhppig.

³² Joap aɗi ag Asahel gaɗa maon gona, mamegnu boumak aben, Betlehem appa dayom amu, ag aguppa boumppig. Ag boumona, ag baelagppa tuqan amuppa oinna, ag gona, buttua aam beebe, ag Hebron teppig.