2 Samuel 18 - Nobonob Baibel

Dawitnu daup Apsalomnu eɗatteg, Joap nug Apsalom qe mauhom

¹ Aria, Apsalom aɗi ag Jodan le mataɗna, Gileat wanppa daaegeg, Dawit nug nuhikkud daup oh qagmeeg, nug otiatte, huu anen anen daappig. Huu laala am daup 1,000 ele, laa am 100 ele. Ag anam daaegeg, Dawit nug huu anen anen dilag ikki otiattom.

² Nug anam ha mala, nug he, daup amu oh ag huu obatak ewam daappig. Huu okkainab laippu dilag okkai am Joap. Huu okkainab laa dilag okkai am Joap amag Abisai. Abisai nug Seruia bekka. Amu huu okkainab laa dilag okkai am Gat danab Itai. King Dawit nug anam ha, ban haknu haenppa nug ag huu anam anam daanna, gona ban hekkulagnu maatte goppig. Amge ban haknu daanna, tatam nug nuhikkud daup amelagppa aum. “Da ag ele oh ban hekkunignu gokkunig,” awa aum.

³ Nug amelagppa anam aum, amge ag eɗun appig. “Iitta! Na ig ele aib gomut. Aɗinu? Apsalom aɗi ag ig eɗigna heppeg, ig oolkkunig dayeb amu, ag ihinignu dab-ii-memana. Ag iqappeg, ig kuɗumnab mauhkkunig dayeb amu, ag amunu keeke okkai ii doomna. Ag ig oonigppa danab 10,000 aqappeg, na bau daakkut dayeb amu, ag oolag gamag ii ahama, amge ag naib nidappeg mauhkkut amu, ag oolag huana gamag ahakku. Anam daamanu, na aab okkaippa ippa daanna, ippa na ehanikkak megakkut am ena. Na banppa gokkut am ena iitta,” aon appig.

⁴ Ag anam appig amunu, King Dawit nug aum. “Ag ahilag dabmakppa ag da aɗi kobol hekkulnu ena dootteb ele amu, da anamib hekkul,” awa aum. Nug anam aum, ag nug aabppa daakkunu ena dooppig amunu, ban ahe, ag ban hekkulagnu ukkaegeg, King Dawit nug aabnu aɗ odppa dayeye, ag nug noobppa huu 100 ele, huu 1,000 ele, ag daappig anam daanna, huu anen anen ag laippu tappan goppig.

⁵ Ag anam ukkaegeg, King Dawit nug Joap, Abisai, Itai ele amelagppa inam hekkulagnu aum. “Ag nid bau Apsalomnu amu, ag dahilnu anuqak doon, nuhigppa wagai aib meppig,” awa aum. Nug anam aum amu, daup laa oh ele ag nug ban daup ikki amelagppa Apsalomnu anam aawo, ag dooppig.

⁶ Amu Dawitnu daup ag Apsalom, Israel ele ban hekkulagnu tappan, ban hekkulagnu ban hak abenppa goppig. Ban amuam wan onig Epraim Dilag Atu, amuppa dayom.

⁷ Am Apsalom aɗi ag Dawitnu daup ele ban henana, Dawitnu daup ag Apsalom aɗi eɗadppig. Ag eɗadna, deɗ amuppa aben amuppa ag Apsalomnu daup 20,000 aqaeg mauhppig.

⁸ Amu ag ban heegeg ukke, ban tuɗitta, atu amu ohppa dayom. Amu ad kuɗum ele ban atu amuppa daye, ⌊atu amuam atu ena iitta, Dawitnu daup ag atu amubiappa ban hak dooppig amunu,⌋ Dawitnu daup ag Israel laa huanaknab aqappig.

⁹ Amu ban anam heeg ugekke, Apsalom nug miul nuhig attan dayaya ukka, nug ii doyaya Dawitnu daup uɗalag teum. ⌊Nug ag uɗalag ta oolele,⌋ miul nuhig ad ok okkai laa waappa ukke, ad amu eppeg huanak amunu, Apsalom ikki amuppa aihe dayeye, miul baeg ya ii dayom; iitta ukkom amunu, Apsalom nug aguppa aiha dayom. Baeg am wan ii tappom.

¹⁰ Apsalom nug anam aiha dayeye, Dawitnu daup laa nug amu anttowa, nug ukka, Joap amegppa aum. “Antte! Da Apsalom nug ad ok, amuppa aihom daye anidmi,” awa aum

¹¹ Danab amu nug Joap amegppa anam a, Joap nug eɗua amegppa aum. “Na Apsalom anidme? Aɗinu na nug ii qeme? Na anam helom amu, da na 115 gram silwa, ban daupnu let ele mettalom,” awa aum.

¹² Joap nug anam aum, amge danab amu nug aum. “Laa nug 11 kilogram silwa da eppelppanab melo amu, da king bekka amu ii qeppi mauhlo! Aɗinu? King nug na, Abisai, Itai ele amelagppa inam haknunab aum. ‘Ag dahilnu dabmak anuqak aona, ag nid bau Apsalom ehanidppeg, ena dayaɗ!’ awa aum. Nug anam aum, ig laa oh doomut amunu, da nid amu, nuhigppa eheɗ laa ii hepa.

¹³ King nug hanhan aun nug aɗi heum dookkunu haaha, aakku dootte amunu, da na ame bia Apsalom qelom amu, na dahilnu aɗitai keeke laa hena, ii ehaniɗlom. Amunu king nug da iweb mauhlomtai,” awa aum.

¹⁴ Danab amu nug anam a, Joap nug aum. “Uuppe! Da na ele nai laa ii mattimɗa,” awa aum. Nug anam anana, nug ban ewam awa, nug ban ewa, oh Apsalom momoppa ye noppig. Apsalom nug ad okppa aiha bau dayeye, nug anam heum.

¹⁵ Joap nug anam he, Apsalom nug mauhkkunu heehe, Joapnu ehanittak danab eblaih tanig ele, ag nuhig bannu keeke maoppig ele amu, ag Apsalom talilidna daanna, ag qeeg, nug aakku mauhom.

¹⁶ Nuhig ehanittak ag Apsalom qeeg, nug mauhe, Joap nug trampet iwale, Dawitnu daup ag, “Joap nug ig ban uugnignu hette,” dooppig amunu, ag baula Israel ii lamadppig.

¹⁷ Ag ban uun, ag Apsalom gaɗa aon, moɗ okkai atu amuppa dayom, amuppa ag gaɗa buɗieg no, ag men akkan, Apsalom gaɗa tonan, men meegeg ta, qagmak okkai dayom. Ag anam heppig, amge Israel dilag daup laa, ag Apsalom dim lamidppig amu, ag oolna, laulkadppa teppig.

¹⁸ Amu Apsalom ii mauhom haenppa, nug bau dayaya, nug men okkai laa babaitta, nug men amu oolnu noak onig Kingnu Oolnu Noak, aguppa qappe dayom. Nug amu heumnu diig am nug nukka, nug mattia inam aum. “Da nid danab iitta amunu, danab ah oh ag dahilnu daulag ii atimanu, da men imu ag dahilnu dabmekkulagnu hettem,” awa aum. Nug nukka nug onig men amuppa qataqeum, amu haen amuppa, gemu ⌊nai imu yaak haenppa⌋ ele, danab ah ag men amunu, “Apsalomnu at,” aon atteb.

Laa Apsalom mauhomnu Dawit amegppa aum

¹⁹ Am Sadok bekka Ahimas nug Joap amegppa aum. “Na appe, da qaietten ukken, Yawe Nug King Dawit ehanitte, nug nuhikkud kekeɗ eppelagppa ii daatte appi dookku,” awa aum.

²⁰ Nug anam aum, amge Joap nug aum. “King bekka mauhom amunu, na nai amu aon gokkut am ena iitta. Na deɗ laa nai aon gokkut,” awa aum.

²¹ Joap nug Ahimas amegppa anam ana, nug eɗua, Kus danab laa antta, nug amegppa aum. “Na gona, na aɗi keeke anidme ele amu, na king amegppa amu appe doyaɗ!” awa aum. Nug Kus danab amegppa anam a, danab amu nug Joap noobppa dup noa, eɗua aha, qaietta ukkom.

²² Kus danab ugekke, Sadok bekka Ahimas nug eɗua, baula Joap amegppa aum. “Da ukken, king amegppa gemunu nai appi, aɗi keeke bekku am nai iitta, amge na appe, da Kus danab dim lamitten, qaietten gokkulnu oɗ medattem,” awa aum. Nug anam aum, amge Joap nug aum. “O da bekkal, aɗinu na gokkutnu oot daatte? Na gona, keeke beumnu nai Dawit amegppa appe amu, nug nob ena laa medakkute? Iitta!” awa aum.

²³ Joap nug anam aum, amge Ahimas nug baula amegppa aum. “Da ukken, king amegppa gemunu nai appi, aɗi keeke bekku am nai iitta. Da qaietten ukken, king amegppa akkulnu aakkuib ool daatte,” awa aum. Nug anam baula aum amunu, Joap nug aum. “Ahan, qaiette!” awa aum. Nug anam aum amunu, Ahimas nug qaietta ukka, nug Jodan lenu oolnu noakppa ukka, nug Kus danab eɗittom.

²⁴ Am laa ag ban heegeg, Dawit nug aab laa amuppa dayaya, nug ukka, aab amuam aɗ aɗit ele, laa am laa talilittom, aɗit oh am od ele amu, nug od aɗit amu gamagppa dayom. Nug anam dayeye, aɗi uɗitte anittaknu danab nug aɗ attan ta, nug neekke ukke, danab nug nukka qaietta uɗieye anttom.

²⁵ Nug amu antta, nug king amu dookkunu eum. Nug anam e, king nug aum. “Nukka uɗitte dayeb amu, nai nug awa uɗitte am ena doottem,” awa aum. Anam amu, danab amu nug qaietta uɗiakib uɗiom.

²⁶ Anam daye, aɗi uɗitte anittak danab nug neekke ukke, danab laa ele qaietta uɗieye anttom. Antta amu, nug danab od gumom ele dookkunu aum. “Antte! Danab laa ele nukka qaietta uɗitte,” awa aum. Nug anam awa e, Dawit doya, nug aum. “Nug ele nai ena awa uɗitte bia doottem,” awa aum.

²⁷ King anam a, aɗi uɗitte anittak danab nug aum. “Da anidttem amu, danab anuqa uɗitte, nuhig qaiettak am Sadok bekka Ahimasnu qaiettak bianab,” awa aum. A amu, king nug aum. “Ahimas nug am danab ena. Nug nai ena awa uɗitte,” awa aum.

²⁸ Dawit anam a, Ahimas nug qaietta aabppa uɗiaya, nug king amegppa ewa aum. “Keeke oh ena daatte,” awa aum. Nug anam ana uɗia, king noobppa gateg qaun o, gomela, iɗu wanppa ma, nug aum. “Yawe, Nug am nahip Kayak, ig Nug binag metu! Nug he, danab ag na, na am dahil naɗi, dahil king, ag na eheɗ heidkkulagnu heppig ele amu, ig ag eɗadmut,” awa aum.

²⁹ Ahimas nug anam a, King Dawit nug oɗ mettom. “Ge, nid bau Apsalom, nug ena daattete?” awa oɗ mettom. Oɗ mette am Ahimas nug aum. “Da amunu tutukku ii doottem. Joap nug da, nahip maɗi nid, amu nahip maɗi nid laa ele, i meiteb uɗignihnu heehe, danab ag muttub huan qeegeg anadmi, amge diig aɗinu ag amu heppig amu, da ii doottem,” awa aum

³⁰ Ahimas nug anam a, King Dawit nug aum. “Na daugppa daappe, laa uɗiaɗ!” awa aum. King nug anam a, nug laih wana hibaitta dayom.

³¹ Nug wana dayeye, Kus danab nug uɗia, king amegppa aum. “Dahil naɗi, dahil king, nai ena da awe uɗimi amu, na nai amu doye! Yawe Nug gemu he, na laa ag na eheɗ heidkkulagnu heppig ele amu, na ag eppelagppa ii daattem,” awa aum.

³² Nug anam a, king nug oɗ mettom. “Ge, nid bau Apsalom, nug ena daattete?” awa oɗ mettom. Nug oɗ mette, Kus danab nug aum. “Na dahil naɗi, dahil king, nahipad kekeɗ laa oh ag na eheɗ heidkkulagnu ahaglag ele amu, ag oh nid bau amubia daaglagnu ool daatte,” awa aum.

³³ King Dawit nug nai amu doya, nug eheɗ ottaiom. Nug ottaia, nug aha, nug aben amu uua, oo laa od attan dayom amu, nug amuppa ukka ta, gayom. Nug aguppa tekkunu taata, nug inam mahittom. “O da bekkal Apsalom! O da bekkal Apsalom! Da na abenam awen mauhlom am ena. O Apsalom, da bekkal, da bekkal,” awa mahittom.