2 Samuel 10 - Nobonob Baibel

Israel ag Amon ele ban heppig

¹ Aria, haen laa ukke, Amon dilag king Nahas nug mauhe, nug bekka Hanun nug mameg abenabppa Amon dilag king dayom.

² Nahas nug mauhe, Hanun king daye, Dawit nug inam dabmeum. “Nahas nug dahilnu oo mauhaknab kobol doya dim lamittom, amubia da nug bekkanu ele oo mauhaknab kobol doye, dim lamidkkul,” dabmeum. Dawit nug anam dabmeum amunu, nug nuhikkud danab laa gona, oo doyak ehanittak nai Hanun amegppa akkulagnu maatte goppig. Nug maatte gona, ag Amon wanppa teppig.

³ Ag nai amu aon, Amon wanppa gona teppig, amge Amon dilag anuqak danab laa ag ahilag okkai Hanun amegppa appig. “Dawit nug danab imu ag uɗin, oo doyak ehanittak nai amenppa akkulagnu maatte uɗippig amu, am nahip dabmakppa nug diig amunu na mamen genab binag mekkunu hette dabmettemte? Amunu iitta. Dawit nug danab imu ag nagattoppa uɗin, ag oinna, aab okkai imu lokkumakppa italna anidna, nug amegppa attem daatte appeg, Dawit nug uɗia, ig eɗigkkunu maatte uɗippig,” aon appig.

⁴ Amon dilag anuqak danab ag anam aeg, Hanun he, laa danab Dawit maatte goppig amu aɗualadna, akkaɗilkad hippelag laihib hoyeg ukke, ahilkad lamen ele gamagppa, ag bitolagppa otaɗadna heeg, ag eɗun goppig.

⁵ Hanun aɗi ag anam heeg, danab Dawit maatte goppig ele ag uɗa nak nau doon, eɗun uɗiegeg, laa nug uɗia, kobol amunu Dawit amegppa aum amunu, King Dawit nug danab uɗa nak dooppig ele dilag nai imu nai awa ukkak danab oɗelagppa me goppig. “Ag Jeriko appa daappeg ukkeb, ag akkaɗilkad eɗun daappig bia daappeg, ag eɗun uɗieg!” Nug nai amu ahilagnu me ukkom.

⁶ Aria, Amon danab ag amu heeg ukke, ag Dawitnu neekkakppa eheɗ nau heppig dooppig. Dawit nug ahilagnu, danab nug uɗig nau noobppa dootte, nug ahilagnu anam doyom dooppig. Ag anam doyona, ag nai meeg ukke, daup laala ag uɗin ehanadkkulagnu daden maadppig. Daup uɗippig am inam. Aramnu am 20,000. Ag am aab onig Betrehop am Sobanu ele uɗippig. Aab onig Makanu amu daup 1,000, ahilag king ele, aria Tobnu am daup 12,000.

⁷ Amon ag anam heeg, Dawit doya, nug he, Joap, Israel dilag ban daup oh ele ag Amon ele ban hekkulagnu goppig.

⁸ Ag gona teeg, Amon dilag daup ag ahan, ahilag aab okkainu aɗ odppa ban hekkulagnu bappaidna daappig. Aram dilag daup, Sobanu, Rehobnu ele uɗippig, amu Maka dilag daup ele, amu Tobnu uɗippig ele, ag oh aab dimittim dad okkaippa ban hekkulagnu bappaidna akka daappig.

⁹ Ag anam aben aon daaegeg, Joap nug noobppa, dimugppa ele ban haknu dayom antta, nug Israel daup ena enaib laa otiatte, ag nug ele ag Aram dilag daup ele ban hekkulagnu aum.

¹⁰ Nug anam hewowa, nug he, nug amag Abisai nug Israel daup laa oh dilag okkai daye, nug Abisai aɗi ag Amonnu daup ele ban hekkulagnu aum.

¹¹ Nug anam babaitta, nug Abisai amegppa aum. “Aram dilag daup ag da eɗilkkulagnu hekkulag dayeb amu, na uɗin da ehaniɗe! O iitta, Amon dilag daup ag na eɗidkkulagnu hekkulag dayeb, da ukken, na ehanidkkul.

¹² Na ɠagattag daye! Ig ihinkad danab ah dilagnu, ig appanig Kayak mekkom ele amu, ig amunu ele oonigppa ɠagattag doot, ban imu ɠagattag hetu! Yawe Nug aɗi bekkunu ena anidtte amu, Nug anamib heeb baɗ!” awa aum.

¹³ Joap nug anam ana he, nuhikkud daup ele ag Aram daup aɗi ele ban hekkulagnu gona heeg, Aram dilag daup ag, ag noolagppanu oolppig.

¹⁴ Aram dilag daup ag ooleg, haen Amon dilag daup ag amu anidna amu, ag ele Abisai aɗi noolagppanu oolna, eɗun, aab okkai ooppa gona daappig. Ag anam heppig amunu, Joap nug he, nug nuhikkud daup ele ag ban amuppanu ahan, eɗun, Jerusalem teppig.

¹⁵ Aria, Israel heeg, Aram dilag daup ag oolppig, Aram ag amu anidna, ag ahilag daup ag eɗun ban hekkulagnu dabmena, ag heeg, daup ag baula qagmeppig.

¹⁶ Hadateser nug nai me ukke, Aram dilag daup le okkai Yupretis heqo laihppa daappig amu, ag ele uɗippig. Ag uɗieg, Sobak, nug Hadatesernu ban daup ikki dayom, nug ag noolag awe gona, aab onig Helam tena daappig.

¹⁷ Ag anam heeg, laala ag amunu Dawit amegppa aeg doya, nug he, Israel dilag daup oh ag uɗieg, ag Dawit ele oh Jodan le mataɗna, Helam goppig. Ag appa ukkaeg, Aram dilag daup ag ban hekkulagnu bappaidna, ag Dawit aɗi ele ban heppig.

¹⁸ Aram ag anam heppig amge Dawit, nuhikkud daup ele ag ban heeg, Aram dilag daup ag ooleg, Dawit aɗi ag Aram dilag daup bannu karis lamadppig amu 7,000 aqaeg mauheg, amu ban danab baelagppa oin, ban heppig ele 40,000 ag aqaeg mauhppig. Ag Aram dilag ban daup ikki Sobak ele qeeg mauhom.

¹⁹ Dawit nug Aram dilag daup huanak anam aqe, king laa oh ag Hadateser waappa daan, nug ehanidppig ele, ag amu anidna, ag Israel ele maɗoɗ daaglagnu nai qagappig. Ag nai amu qakkan, ag Israel waappa daappig. Anam amunu, Aram danab ag baula Amon ehanadkkulagnu baɗappig.