2 King 24 - Nobonob Baibel

¹ Haen Jehoiakim nug Juda dilag king dayeye, haen amuppa Babilon wanppanu King Nebukatnesar nug nuhikkud ban danab ele ag uɗin, Juda ele ban heppig. Ag ban hena, nug Juda eɗatta he, Jehoiakim nug waappa dayom. Amge maɗ ewam dimppa amu, Jehoiakim nug Nebukatnesar waappa dayebeb, gumakkunu dabmak eɗue, nug Nebukatnesar waappa daakkunu uua, nug nuhig nai tappe neum.

² Haen amuppa Yawe Nug danab ag ban hena, danab aqadna, ahilkad keeke aotteb amu, Nug danab amu Babilonnu, Aramnu, Moapnu, amu Amonnu ele, ag Jehoiakim ele ban hena, Juda wan heppeg nauhkkunu maatte goppig. Yawe Nug nuhikkud maɗi nid propet oɗelagppa mehuqom amu, am anamnab beum.

³ Manase nug hipunin kuɗum heum amunu, genab, Yawe Nug Juda danab ah ag Nug noobppa daamnanu, Nug kekeɗ amu ag anam hekkulagnunab a goppig. Manase nug kobol nau kuɗum heum.

⁴ Amunu laa am, Nug Manase nug Jerusalem ohppa danab ah kuɗumnab, ag eheɗ laa ii heppig ele aqe mauhppig. Manase kobol heum amu, Yawe Nug antta, ⌊Juda danab ah kuɗum ele ag nug dim lamidppig antta, ag oolag ii eɗuom ele antta,⌋ Nug Juda dilag hipunin uhuqa madakkunu elele ii doyom.

⁵ Keeke laala oh King Jehoiakim heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

⁶ Jehoiakim nug mauhe amu, nug bekka Jehoiakin nug abenabppa king ba dayom.

⁷ Gemu amu Babilon dilag king nug wan Isip dilag wan tomppanu digma ukka, le Yupretis batom, anukka Isip gumom amu, gemu Babilon dilag king nug wan amu oh awa gumom. Anam amunu, Isip dilag king nug nuhikkud ban danab ele ag baula gona, wan laalappa ban ii heppig.

Jehoiakin nug Juda dilag king beum

⁸ Jehoiakin nug maɗ 18 dayaya, nug king ba dayom. Nug king ba, kalam ewamib Jerusalem appa king dayom. Nug anig am Elnatan aɗeg, Nehusta. Nug am Jerusalem ted.

⁹ Jehoiakin nug Yawenu neekkakppa eheɗ heum; nug mameg heum bia, nug heum.

¹⁰ Haen Jehoiakin nug king dayeye, Nebukatnesarnu ban daup ikkilkad ag Babilonnu ban danab ele uɗin, Jerusalem oo mattan aqaknu maadna daappig.

¹¹ Ag Jerusalem oo mettan, aqaknu daaegeg, Babilon dilag king Nebukatnesar nug uɗie, nuhikkud ban danab ele oh daappig.

¹² Amu King Jehoiakin nug Babilon dilag king uɗiom antta, aria nug, nug anig, kingnu ehanittak danab, nuhikkud anuqak danab ele oh ag aab okkai dimittim gona, ag akka ag King Nebukatnesar eppegppa daaglagnu appig. Ag anam heeg, aakku Nebukatnesar nug Jehoiakin awa, maniguittom. Nebukatnesar nug Babilon dilag king dayaya, nuhig king dayaknu maɗ eblaih ewamppa nug anam heum.

¹³ Nebukatnesar nug anam hewowa, nug Yawenu mettid lag ooppa noa, nug Israel dilag king Solomon lag amunu keeke golppa hattom amu, nug amu oh awa, aria en laa oh ele Yawenu mettid lagppanu awa, am kingnu lag enanagnabppan en ele awa, nug keeke amu oh akka, Babilon ukkom. Nug keeke oh akka ukkom amu, anukka Yawe Nug amunu nai mehuqom, amu Nebukatnesar nug anam haaha, nug anamib heum.

¹⁴ King Nebukatnesar nug Jerusalem danab ah 10,000 diia, Babilon ukkom. Amu oolagppa am anuqak danab oh, ban danab enanag, danab keeke laala haknu doyak okkai ele, amu ele. Nug ag oh diia, Babilon ukkom. Nug anam heum amu, danab keeke ohnu tutunab daappig ele, amuib uuatte, Juda wanppa daappig.

¹⁵ King Nebukatnesar nug Jehoiakin aɗa awa, Babilon ukkom. Amu nug ele Jehoiakin anig, wauud, nuhikkud ehanittak anuqak danab, am Juda danab okkai ele Jerusalemnu diia, Babilon ukkom.

¹⁶ Babilon dilag king Nebukatnesar nug ban danab oh, ahilag ebqak am 7,000, ag ban hekkulagnu ɠagattag daappig amu, nug ag diia, Babilon ukkom. Amu nug danab keeke laala haknu doyak okkai ele 1,000 diia ukkom.

¹⁷ Amu King Nebukatnesar nug Jehoiakin mameg nakok Matania awa me, nug Jehoiakin abenabppa king ba dayom. Nebukatnesar nug anam ha, nug Matania onig laa ataɗa, Sedekaia aum.

¹⁸ Sedekaia nug maɗ 21 dayaya, nug king ba dayom. Nug king ba, nug maɗ 11 Jerusalem appa king dayom. Nug anig am Jeremaia aɗeg Hamutal. Nug Lipna aabppanu ah.

¹⁹ Sedekaia nug Yawenu neekkakppa eheɗ heum; nug King Jehoiakim heum bia, nug heum.

²⁰ Juda danab ah, laa Jerusalemnu, laa Juda wanppa laih laihnu amu, ag ele anam heegeg, Yawe Nug ahilagnu oo nauhom amunu, Yawe Nug danab ah amu Nug noobppanu lamatte, ag ahilag wan uun, wan laappa uma gona, appa ag diia ukka laih me dayak danab ah daappig. Aria, Sedekaia nug Juda dilag king dayaya, nug Babilon dilag king waappa daakkunu uua, nug nuhig nai tappe neum.