2 King 20 - Nobonob Baibel

Hesekaia nug oɗe ma, mauhkkunu miag dayom

¹ Haen amuppa amu, Hesekaia nug oɗe ma, nug mauhkkunu miagnab dayeye, Amos bekka propet Aisaia nug aha, gumitta ukka, amegppa aum. “Yawe Nug atte. ‘Na mauhkkut amunu, na nahip keeke oh bappaidna, na mauhkkut. Na eɗun ena ii daamna,’ ” awa aum.

² Aisaia nug Hesekaia amegppa anam a, Hesekaia doya, nug eɗua, laug gililppa neekkakka, nug Yawe unuqitta aum.

³ “O Yawe, na dahil hak imu dabmekkutnu oɗ medattem. Da na noomppa oo metta ii uuak kobol dim lamitte oiyeye, da meul ohppa na dim lamidkkulnu heine oiyeye, da amenppa kobol aɗi aɗi am ena, da amu dim lamidmi.” Hesekaia nug anam unuqittowa, nug huana gayom.

⁴ Hesekaia nug amu he, Aisaia nug king laugnu gamagppan haɗap ii uuom haenppa, Yawe Nug nuhig nai imu Aisaia mettom.

⁵ “Na eɗun gona, Hesekaia, nug am dahilad danab ah dilag gumak danab, na nug amegppa inam appe doyaɗ! ‘Yawe, Nug na alan Dawitnu Kayak amu, Nug atte. “Da unuqittak nahip doyen, nahip gayak ele doomi. Da na ehanidppi, na ena daakkut. Da anam heppi, deɗ ewam uueb, na da, Yawe, na mettid lag dahilppa tekkut.

⁶ Da bau dayak nahipnu haen tuɗidppi, na paha ii mauhmana. Iitta. Na maɗ 15 baula daakkut. Laa amu da heppi, Asiria dilag king nug aab okkai imu ii eɗidma. Da ag Juda, da ag ehanadppi, aab imuam Asiria dilag king eppegppa ii daama. Da, da onilnu dabmak anuqak awen, Dawit, nug am dahil maɗi nid amu, da nuhignu ele dabmak anuqak awen, da heppi, aab imuam kekeɗ eppelagppa ii daama,” ’ ” awa aum.

⁷ Aria, amu dimppa Aisaia nug kingnu maɗi nid amelagppa aum. “Ag ad fig meu aon bappaidna, mamattin qaɗeppa meig!” awa aum. Nug anam a, ag ad fig meu amu Hesekaianu mamattin qaɗeppa meeg, mamattin uuitte, ena dayom.

⁸ Amge tatam Hesekaia nug Aisaia inam oɗ mettom. “Yawe Nug da geha eɗue bau mein, dimukkudppa nuhig mettid lakka gokkulnu aum amu, nug geha aɗi at, da nai amuam genab bekku dookkulnu meɗakku?” awa oɗ mettom. ⌊Nug anam oɗ mette, Yawe Nug he, lokko adqaɗppa dayom, lokko amu aben dayomppanu eɗua teum.⌋

⁹ Hesekaia nug anam oɗ mette, Aisaia nug aum. “Yawe Nug genab aɗi keeke hekkunu nai qakka aum, amu hekkunu dookkutnu at daakkunu aum amu, Nug na oɗmak imunu nob appe dookkulnu aum. ‘Aam amahale, amahlak giɗoppa ukka, adqaɗ Ahas heum ele, amuppa amahlak amu giɗo amuppa ugakka, adqaɗ amu laih gane tone, lokko laih tonatte ele amu, Nug heeb, lokko amuam noa, adqaɗ laih ii tonak ele daakku, o iitta, Nug heeb, lokko amuam eɗua adqaɗ amu teebeb, adqaɗ laih lokko tonak dayom amu, amunu laih am tonak ii daama, amahlak am aguppa eɗua daakku. Lokko noa daakkuppa, o eɗua ukka ii daakkuppa, laih amuam adqaɗnu tappa ukkaknu 10 aakku,’ awa aum. Nug anam aum amunu, na attem bekku am appe doyei!” awa aum.

¹⁰ Aisaia anam a amu, Hesekaia nug aum. “Lokko adqaɗnu tappa ukkakppa eblaih laih ele paha gokkunu am uug iitta. Am anam amunu, lokko nug eɗua, bittumttum ukkeb, adqaɗnu tappa ukkakppa eblaih laih ele batakkunu ool daatte,” awa aum.

¹¹ Aria, propet Aisaia nug Yawe onigppa e, Yawe Nug he, lokko am eɗua teete, adqaɗ tappa ukkak 10 lokko dayom eleppa am ii dayom.

King Merodak, Babilonnu, nug he, danab laala Jerusalem uɗippig

¹² Haen amuppa Baladan bekka, Merodak Baladan, nug Babilon dilag king dayom. Nug king dayaya, nug Hesekaia oɗe me doyom amunu, nug nuhikkud danab laa ag pas laala, keeke ena laa ele ag aon gona, nuhig daakkunu Hesekaia hamu mettaglagnu maatte goppig.

¹³ Ag gona, Hesekaia toppa teeg, Hesekaia nug humattom. Humatta, nuhig en maknu laugppan keeke oh ippuanattom. Keeke amuam silwa, gol, spais digdig ⌊spais am wanila, sinamon, keeke amubia⌋, goɗen enanag, amu nuhig ban haknu keeke oh ele. Keeke oh nuhig en lag anen anenppa dayom amu, nug ag ippuanattom. Keeke oh nuhig lag enanagnab, appa dayom, nuhig ɗo maɗoɗppa ele dayom amu, nug keeke amu oh ippuanattom. Nug keeke laippu laa ii lokkumom.

¹⁴ Hesekaia nug anam he, propet Aisaia nug aha, King Hesekaia toppa ukka, oɗ metta aum. “Danab uɗippig ele amu, ag aɗi nai madippig? Ag adeppan uɗippig?” awa oɗ mettom. Aisaia nug anam a, Hesekaia nug aum. “Ag umanunab uɗippig. Ag Babilonnu uɗippig,” awa aum.

¹⁵ Awa a amu, Aisaia nug oɗ mettom. “Ippa nahip lag enanagnabppa ag aɗi anidppig?” awa oɗ mettom. Nug anam oɗ mette amu, Hesekaia nug aum. “Dahil lag enanagnab, ippan keeke oh ag anidppig. Da keeke laippu laa, dahil en lakka daatte amu, da keeke anam laa ii lokkummi. Da dahil keeke oh ippunadmi,” awa aum.

¹⁶ Nug anam a amu, Aisaia nug Hesekaia amegppa aum. “Na Yawe, nuhig nai doye!

¹⁷ ‘Haen laa genab uɗikku, haen amuppa amu, nahip lag enanagnab, ippan keeke, keeke oh na mamenad aɗi ag qagmeppig ele, Babilon danab ag uɗin, keeke amu akkan aon gona, Babilon mekkulag. Keeke laippu laa ii daama.’ Yawe Nug anam atte.

¹⁸ Am keeke laa amu, na buɗunppan laala, ag na tiinppanunab dokkulag amu, Babilon ag nid amu oolagppan nid danab laala ag akkan gona, ag hipalkad aqappeg, ag anam daanna, ag Babilon dilag kingnu maɗi nid daaglag.” Aisaia nug Yawenu nai anam Hesekaia amegppa aum.

¹⁹ Nug anam a, Hesekaia nug nuhig dabmakppa, “Dahil haenppa ig maɗoɗ, baɗak ele iitta daagnig,” dabmeum amunu, nug eɗua Aisaia amegppa aum. “Na Yawenu nai da meɗame ele, nai amuam nai ena,” awa aum.

King Hesekaia mauhom

²⁰ Amu keeke kuɗum laa ele King Hesekaia heum, amuam uɗat ɠagattag oh Hesekaia heum, le ippu elab wan ooppa he uɗie, le Jerusalem uɗitte, aria laa am nug le moɗ le ukka amuppa noa daakkunu heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

²¹ Aria, King Hesekaia nug mauhe, nug bekka Manase, nug abenabppa king ba dayom.