2 King 17 - Nobonob Baibel

Israel dilag king daaeg uɗie, King Hosia daya batom

¹ Ahas nug Juda dilag king dayaya, nuhig king dayaknu maɗ 12ppa Ela bekka Hosia nug Israel dilag king ba dayom. Nug king ba, nug maɗ eblaih waɗele Samaria appa king dayom.

² Nug Yawenu neekkakppa eheɗ heum, amge nug kobol naunab, Israel dilag king Hosia king ii bak haenppa, ag king daan heppig bia amu, nug ii heum.

³ Amu Asiria dilag king Salmaneser nug ban ha, Hosia eɗitta he, Hosia nug Salmaneser waappa dayaya, maɗ oh en takis bia mettom.

⁴ Amge maɗ laa am Hosia nug danab laala maatte, ag Isip dilag king So gumidna, King So oɗ medappeg ehanidkkunu goppig. Amu Hosia nug en takis bia Salmanesernu ii me ukkom, maɗ ohppa me gottom bia, nug ii me ukkom. Nug anam he, Asiria dilag king Salmaneser nug Hosia nug nug waappa daamanu laa ehanidkkunu dabmette doya, aakku Salmaneser nug Hosia aɗa, maniguittom.

Asiria ag ban hena, Samaria eɗadppig

⁵ Asiria dilag king Salmaneser nug ban danab nuhig diie, ag gona, Israel wan ohppa ban heppig. Ag amu hena gona, Samaria aab okkaippa tena, aab amu maɗ ewam oo mattan aqaknu maadna daappig.

⁶ Hosia nug Israel dilag king dayaya, nuhig king dayaknu maɗ eblaih waɗeleppa amu, Asiria dilag king nug Samaria eɗatta, aab okkai amu awom. Awa, nug Israel danab ah diia, Asiria ukka, nug Israel laala aab Hala maattowa, laala amu diia, aab Gosan, nuhig wan ele, appa le Habor guguittak ele maattowa, Midia wanppan aab laalappa ele maattom.

Israel danab ah ag hipunin heppig amunu, uug amu beum

⁷ Uug amu oh Israel dilagppa beum. Aɗinu? Ag Yawe, ahilag Kayak, Nug ag alalkad anukka Paro, Isip dilag king eppegppa daappig, Nug appanu eɗua diia, omalatta uɗiom amu, ag nuhigppa hipunin heppig. Israel ag kayak hambuppuak noolagppa dup nona binalag menana,

⁸ ag wan anen anennu danab ah, Yawe he, Israel ag lamadppig ele, ag amu dilag kobol, Yawe Nug kobol amunu ooppa uuaknab dootte amu, ag kobol amu, kobol nau laala ele Israel dilag king ag danab ah hekkulagnu ippunadppig amu, ag amu ele dim lamidppig.

⁹ Israel ag lokkumakppa hipunin Yawe, ahilag Kayak, ag nuhigppa heppig. Laa amu, ag aab okkai ɠagattag aɗ ele ukka, aab naunau ele ohppa ag kayak hambuppuak dilag mettid lag nakok hadappig.

¹⁰ Ag gona, qauko nakok oh igippa, ad okkai eppelkad bahia ukkak ele oh waalkadppa ele, ag men gappi maadna, kayak hambuppuak Aserah dabmekkulagnu biidod ele galadna, ⌊ag keeke amu ag noolagppa dup nona binalag meppig⌋.

¹¹ Israel ag aabaabppanu mettid lag nakok ohppa ag kalu danab ile muttuɗig enanag bette, wan anen anennu danab ah, Yawe he, Israel ag lamadppig ele, Israel ag danab amu kalu ilak heppig bia heppig. Israel ag kobol nau digdig heppig, amu amuppa ag heeg, Yawe Nug oppoɗi beum.

¹² Yawe Nug ag ii hemananu aum, amge ag kayak hambuppuak dottolkad noolagppa dup nona binalag meppig.

¹³ Yawe Nug Juda, Israel ele, ag nau aomnanu nai, nuhikkud propet oh oɗelagppa mattom. Nug ag oɗelagppa, Juda, Israel ele dilagppa inam aum. “Ag oolag eɗueb, ahilag kobol nau am uueg! Ag dahil haknunab nai, am ɗo nai ele, da ag mamelkad aɗi dim lamidkkulagnunab mattoya, dahilad maɗi nid, propet, da ag oɗelagppa ele ag amelagppa mehuqmi amu, ag amu dim lamitteg!” awa aum.

¹⁴ Propet aɗi ag anam mattieg dooppig, amge Israel ag Yawenu nai dooglagnu uun, ag Nug oɗe dim lamidmananu dabmak ahilag ɠagattag eppe, ag mamelkad aɗi dilag kobol dim lamidppig. Ag mamelkad aɗi, ag Yawe, ahilag Kayak, ag nuhignu oolagppa genab ii dooppig. Iitta.

¹⁵ Israel ag Yawenu ɗo nai, tituanak Yawe he, Nug ag mamelkad aɗi ele ag nug tituanna nai qagappig, ag nai amu, amu nau aomnanu nai nuhig ele oh, Nug ag mattom amu, ag nai amu oh uuppig. Ag gona, kayak hambuppuak, keeke hamu, bau iitta ele, ag ag dim lamadnana, Israel ag akka am keeke hamu, kayak hambuppuak, amubia beppig. Anukka Yawe Nug ag danab ah ag guguattak daatteb, ag amu dilag kobol ii dim lamidmananunab aum, amge Israel ag nai nuhig tappaeg ne, amu henana, ag kobol nau amu dim lamidppig.

¹⁶ Israel ag Yawe, ahilag Kayak, ag nuhig haknunab nai oh amu uun, ag gol aon, golppa makau gaiɗ aɗit dottolah haatna, noolahppa dup nona binalah meppig. Ag kayak hambuppuak Aserah dabmekkulagnu biidod ele hena, ag amu noobppa dup nona binag meppig. Ag hoɗopai ele noolagppa dup nona binalag menana, kayak hambuppuak Bal ele noobppa dup nona binag meppig.

¹⁷ Ag bekkalkad, aɗelkad ele aqadna, kayak hambuppuak dilag mana mettak henana, eman hak danab ele eman henana, emaɗ kobol ele heppig. Israel ag kobol eheɗib ahilag ɠagattag ohppa hekkulagnu dabmenan oinna, ag Yawenu neekkakppa eheɗ nau heppig. Amu Yawe Nug ahilag kobol nau amu antta, ahilagnu oo huana nauhom.

¹⁸ Aakku Yawe Nug Israel dilagnu oo huan nauhe, Nug he, ag Nug noobppa ii daappig. Israel dilag huu okkai Juda, agib am ahilag wanppa daappig.

¹⁹ Amge Juda ag ele Yawe, ahilag Kayak, ag nuhig haknunab nai ii dim lamidppig. Iitta. Ag ele kobol nau digdig Israel dim lamidppig ele amu, ag amu dim lamidppig.,

²⁰ Anam amunu aakku, Yawe Nug Israel buɗub oh geɗattom. Nug eheɗ matta he, kekeɗ ag uɗin, Israel dilag keeke yab akkan goppig. Amge Israel ag kobol nau hak ii uuppig amunu, Yawe Nug he, ag gona, Nug noobppa ii daappig.

²¹ Anukka Israel, Juda ele oh aa King Dawit, nug buɗub ele waappa daappig. Amge dimppa Yawe Nug he, Israel buɗub ag oppatna, huu laa gemu ahilagnu ag “Israel” atteb amu, huu amu ag Juda buɗub uuadna, laih daanna, aria Israel ag ahan, Nebat bekka Jeroboam aon, ahilag king otieg, nug ahilag king beum. Amge Jeroboam nug ag eeɗatte, ag Yawe uun, ag hipunin okkai okkai aakku heppig.

²² Amu dimppa ele Israel ag hipunin digdig Jeroboamnu amu ii uuppig; ag dim lamidnana heppig. Ag hipunin amu ii uuadna, di-ii-madappig.

²³ Ag anam heegeg ukke ukke, Yawe Nug nuhikkud maɗi nid, propet, Nug ag oɗelagppa nau aomnanu nai ag amelagppa mattiom, amge ag nai amu uueg, amu Nug nai amu ippuanattom bia, Nug he, ag Nug noobppa ii daappig. Asiria ag banelag uɗin, Israel eɗadna, appalag diigppanu diin, Asiria wanppa ukkaeg, ag wan amuppa diia ukka laih me dayak danab ah appa daappig. Gemu ele ⌊nai imu yaak haenppa,⌋ ag appa ana daatteb.

Danab laihnu uɗin, Israel wanppa daatteb

²⁴ Israel ag anam gona daaegeg amu, Asiria dilag king nug danab ah Babilonnu, Kutanu, Awanu, Hamatnu, am Separwaimnu ele diia ukka, Israelnu aab anen anenppa maatte, Israel oulag daaglagnu daappig. Danab ah amu ag Israel wan ahilag daakkunu aon, ag Israelnu aab anen anenppa aakku daappig.

²⁵ Aria, danab ah huu bau uɗippig amu, ag Yawe noobppa dup nona binag ii meppig amunu, Yawe Nug he, laion uɗin, laala aqaeg mauhppig.

²⁶ Am danab laala ag gona, Asiria dilag king amegppa appig. “Danab ah na diin gona, Israel aabppa maadme amu, ag am wan amuppan Kayaknu ɗo ii dootteb amunu, Kayak amu nug he, laion ag uɗin, danab ah amu aqaeg mauhadtteb,” aon appig.

²⁷ Aria, Asiria dilag king nug nai amu doya, nug haknunab nai inam aum. “Heppeg, Israel dilag mana mettak danab laa ig aɗamut ele, nug eɗua Israel ukka, nug appa dayaya, nug wan amuppanu Kayaknu ɗo, danab ah amu ippuanattaɗ!” awa aum.

²⁸ King nug anam aum amunu, ag Israel dilag mana mettak danab laa aon meeg, nug eɗua Israel ukka, nug Betel aabppa ukka dayaya, Yawe noobppa dup nona Nug binag mak kobol amu danab ah aab laappanu daatteb amu ippuanattom.

²⁹ Amge wan laappanu danab ah amu ag ahilkad kobol dim lamidna, ag ahilkad kayak hambuppuak dottolkad hoyatteg ne, ag dottolkad amu anukka Israel ag ahilkad kayak hambuppuak maadkkulagnu aabaabppanu mettid lag nakok hadappig, ag amuppa maadppig. Danab ah amu oh ag huu anen anen ahilkad kayak hambuppuak hattana, aab anen anen ag daappig ele, amu ohppa maadppig.

³⁰ Babilon danab ag am ahilag kayak hambuppuak Sukotbenot dottog heppig. Kuta danab ag am kayak hambuppuak Nergal dottog heppig. Amu Hamat danab ag am kayak hambuppuak Asima dottog heppig,

³¹ Awim danab ag kayak hambuppuak Niphas, am kayak hambuppuak Tartak ele dottolah heppig. Separwaim danab ag nid ahilkad aqadna, ahilag kayak hambuppuak aɗit, Adramelek, Anamelek ele matappig. Aa am Separwaim dilag kayak hambuppuak aakku.

^32-33 Danab ah amu ag appalag diigppa kobol henana, ag ahilkad kayak hambuppuak noolagppa dup nona binalag meppig, amubia ag Israel wanppa maattak daanna heppig. Ag anam heppig, amge ag ele Yawe noobppa dup nona binag meppig. Amge ag ahilkad danab mettid lag nakokppa mana mettak danab daaglagnu akka otiadppig.

³⁴ Gemu ⌊nai imu yaak haenppa⌋ ele, danab ameg amu ag kobol amuib dim lamidna henan daatteb. Ag ebehilag oh Yawenu bodoetta le ii mette; iitta. Ag Yawenu haknunab nai, ɗo iɗu iɗu ele, Yawe Nug Jakop buɗub mattom amu, ag amu ii dim lamidtteb. Jakop nug amu, nug danab Yawe Nug onig laa Israel ataɗom.

³⁵ Yawe Nug anukka he, Nug Israel ele nug tituanna nai qagappig amu, haen amuppa Nug ag amelagppa inam hekkulagnunab aum. “Ag kayak hambuppuak noolagppa aib dup nona binalag meppig; waalagppa daan oɗelag ele aib dim lamidppig. Ag doɗ manadna kayak hambuppuak amu ele aib madappig.

³⁶ Ag Israel, ag amu ii hemana. Iitta. Ag da, Yawe, da dahil ɠagattag naɗippa, da ebehilppa da ag omalatti, ag Isip uun uɗippig amu, ag da noolppaib dup nona binal meɗaglag. Ag da noolppaib gatelag qaun ob, dup nokkulag. Ag doɗ manadna, daib meɗaglag.

³⁷ Ag dahil haknunab nai, dahil ɗo iɗu iɗu oh ele, nai da ye ag mattami amu, ag amu dim lamidkkulagoitte. Ag kayak hambuppuak noolagppa aib dup nona binalag meppig.

³⁸ Da hei, da ag ele ig nug tituanta nai qakkamut amu, ag nai amu aib daulag atiom. Ag aib gona, kayak hambuppuak noolagppa dup nona binalag meppig.

³⁹ Iitta. Ag da, Yawe, ahilag Kayak, ag da noolppaib dup nona binal mekkulag. Ag anam heppeg, aria geha da ag ehanadppi, kekeɗ ahilkad laippu laa ag ag ii eɗadmana,” awa aum.

⁴⁰ Yawe Nug anam aum, amge Israel ag nai dooglagnu uun, ag kobol anukka heppig ele, amuib ag henan dim lamidppig, ⌊amu wan laappan danab uɗippig daatteb, ag ele Yawenu nai ii dim lamidtteb⌋.

⁴¹ Wan laappanu danab ah amu, ag uɗippig, Israel wanppa daatteb amu, ag Yawe noobppa dup nona binag menana, kayak hambuppuak ahilag, amu ele noolagppa dup nona binalag metteb. Danab ah amu, ag bekkalkad, aɗelkad, alalkad ele amu, ag gemu ⌊nai imu yaak haenppa⌋ ele, ag kobol amuib dim lamidna henan daatteb.