2 King 16 - Nobonob Baibel

Ahas nug Juda dilag king beum

¹ Remalia bekka Peka nug Israel dilag king dayaya, nuhig king dayaknu maɗ 17ppa Jotam bekka Ahas nug Juda dilag king ba dayom.

² Ahas nug maɗ 20 dayaya, nug king ba dayom. Nug king ba, nug Jerusalem appa maɗ 16 king dayom. Amge nug Yawe, nuhig Kayak, nug nuhig neekkakppa kobol genab tutukku ele ii dim lamittom; nug alag Dawit heum bia ii heum.

³ Iitta. Nug Israel dilag king heppig bia heum. Laa amu, nug kobol naunab laa ele heum. Nug bekka mana, kayak hambuppuak mettom. Nug wan anen anennu danab ah, Yawe he, Israel ag lamadppig ele, nug amu dilag kobol, Yawe Nug kobol amunu ooppa uuaknab dootte amu, nug kobol amu dim lamittom.

⁴ Ahas nug aabaabppanu mettid lag nakokppa, qauko nakok igippa, amu ad okkai eppelkad bahia ukkak ele oh waalkadppa mana mettak haaha, nug ele appa kalu danab ile muttuɗig enanag bette ele manom.

⁵ Aria, Aram dilag king Resin, amu Remalia bekka Peka, Israel dilag king ele aa ahilti ban danab diieh gona, ag Jerusalem oo mattan aqaknu maadna daappig, amge ag Ahas, nuhikkud ban danab ele eɗadkkulagnu elele iitta.

⁶ Haen amuppa Aram dilag king Resin nug aab Elat eɗua aokkunu ban ha, nug Juda daappig amu lamatte ukkaeg, nug awom. Nug awe, Edom danab ag gona, aab amu aon daaeg uɗie, gemu ⌊nai imu yaak haenppa⌋ ele, ag appa daatteb.

⁷ Amu King Ahas nug danab laala maatte, Asiria dilag king Tiklat Pileser gumidna gona, amegppa inam appig. “Da King Ahas, da nahip maɗi nid, am nahip ehanittak ele daattem. Aram dilag king, am Israel dilag king ele aa gemu da banel uɗipiɗ iuttep. Amunu na uɗin, ig ehanigna, aa ele ban heppe, geha ig qagaiettak ii aomtanu ool daatte,” awa aum.

⁸ Amu Ahas nug silwa, gol ele Yawenu mettid lag, amuppanu awa, kingnu lag enanagnab, appan en maknu oo anen anenppanu ele awa, Asiria dilag king nug uɗia, Juda ehanadkkunu, nug keeke amu nuhig daakkunu hamu medakkunu me ukkom.

⁹ Aakku Asiria dilag king Tiklat Pileser nug King Ahas nai me ukkom amu doya, nug nuhikkud ban danab diie gona, Damaskus aab okkaippa ban hena, aab okkai amu aoppig. Tiklat Pileser nug King Resin qe mauhe, nug Damaskus danab ah amu diia ukka, Kir aab okkaippa daaglagnu maattom.

¹⁰ Aria, dimppa King Ahas nug Asiria dilag king Tiklat Pileser anidkkunu Damaskus ukkom. Haen Ahas nug Damaskus appa dayaya, nug qaɗab laa antta, nug qaɗab amu dottog, amu qaɗab amu haknu attem attem haknu ele pepappa ha, nug pepa amu me, mana mettak danab Uraia toppa Jerusalem ukkom.

¹¹ Aakku mana mettak danab Uraia nug dottog, haknu nai amu ele Ahas nug Damaskusnu me ukkom amu antta, nug qaɗab amubia heum. King Ahas nug Damaskusnu eɗua Jerusalem ii ugekke, Uraia nug qaɗab am ha malom.

¹² Amu King Ahas nug Damaskusnu eɗua uɗiowa, nug ukka, qaɗab am antta, nug gukkuitta ukka, amuppa mana mettak hattom.

¹³ Qaɗab amuppa amu, nug manaknu ofa nuhig, amu ee aegnu ofa, am wain gokkaɗaknu ofa nuhig ele heum. Nug anam ha, nug laippu dayaknu ofa nuhig ha, nug amunu doɗ tiig awa, qaɗabppa tauɗom.

¹⁴ Ahas nug bras qaɗab anukkanu, Yawenu mettid lag odppa, Nug noobppa dayom amu, nug qaɗab amu awa, qaɗab bau heqo yawalti uɗitteppanu me dayom.

¹⁵ King Ahas nug hewowa, nug qaɗab bau amuppa mana mettak haknu mana mettak danab Uraia amegppa aum. “Haen oh na mana mettak hekkutnu amu, na qaɗab bau amuppaib gona hekkut! Na deɗ ohnu buttua manaknu ofa, deɗ ohnu tueb ee aegnu ofa, kingnu manaknu ofa, ee aegnu ofa nuhig ele, amu danab ah dilag manaknu ofa, ahilag ee aegnu ofa, aria ahilag wain gokkaɗaknu ofa ele qaɗab amuppa hekkut! Na amu hena, na manaknu ofa, amu mana mettak laala ele, na amu henana, na amunu doɗ tiilag aon, qaɗab bau amuppa tauɗkkut. Amge bras qaɗabnu amu, amuppa da geha, qaɗab amuppa doɗ mane Kayak medette, ulum aokkul,” awa aum.

¹⁶ Ahas nug anam haknunab a, mana mettak danab Uraia nug haen oh king nai aum oɗe dim lamitta, anamib hettom.

¹⁷ Aria, dimppa King Ahas nug bras balal wil ele, nug amunu bras otala ele daug daugppa daappig amu hiɗalatta awa, nug tappiɗ balal amu attan daappig, nug amu ele akkom. Nug makau dawai dottog brasppa hak tappiɗ naɗi okkai brasppa hak onig Yu waappa daappig, nug amu ele akkom. Akka, nug menppa tappiɗ naɗi okkai brasppa hak onig Yu daakkunu balal bau ha, me dayom.

¹⁸ Ahas nug Asiria dilag kingnu dabmeum amunu, nug Sabatnu keeke peh lag bia Yawenu mettid lag guguittak, appa heppig amu hiɗa awa, kingnu Yawenu mettid lakka ukkaknu od ele am keldoum.

¹⁹ Amu keeke kuɗum laa ele King Ahas heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

²⁰ Amu Ahas nug mauhe, ag Dawitnu Aab, aab amuppa ag nug mamekkud aɗi boumadppig, ag nug ele aab amuppa boumppig. Nug mauhe, nug bekka Hesekaia nug mameg abenabppa king ba dayom.