2 King 12 - Nobonob Baibel

Joas nug Yawenu mettid lag babaittom

¹ Jehu nug Israel dilag king dayaya, nuhig king dayaknu maɗ eblaih aɗitppa amu, Joas nug Juda dilag king ba dayom. Nug king ba, nug maɗ 40 Jerusalem appa king dayom. Joas anig am Berseba aabppanu ah onig Sibia.

² Joas nug king anam ba daye, mana mettak danab Jehoiada nug ulum nai medette, haen amu oh Joas nug Yawenu neekkakppa kobol genab tutukku ele dim lamittom.

³ Amge Joas nug aabaabppanu mettid lag nakok ii loppaɗattom; daaegeg, danab ah ag aben amuppa tuɗidna gona, mana mettak henana, ag appa ele kalu danab ile muttuɗig enanag bette ele manappig.

⁴ Amu Joas nug mana mettak danab onilagppa e uɗieg, nug ag amelagppa inam aum. “Ag mana mettak danab, ag men doɗo, ofa Kayaknu tituanak daakkunu, danab ah ag Yawenu mettid lakka aon dotteb ele, ag amu oh aoglag. Amuam Yawenu mettid lagnu takis men doɗo, men doɗo danab ag ahilag keeke laa genab hekkunu nai anan qakkaknu nai, nai amu elele mettan medatteb, amu men doɗo danab ag akka Kayak mettaglagnu oolag daye medatteb amu, ag amu oh aweg!

⁵ Ag mana mettak danab oh anen anen, ag danab ah dabmattanna ehanadtteb, ag eppelagppanu men doɗo amu aotteb, ag men doɗo amu aona, haen ag Yawenu mettid lag laih adeppa, aben laa nauheb anidna, aria ag mana mettak danab ag laih nauhom amu bau bappaidkkulag,” awa aum.

⁶ Joas nug ag amelagppa anam aum, amge maɗ laala dimppa, nug king dayaya, nuhig king dayaknu maɗ 23ppa amu, King Joas nug mana mettak danab ag Yawenu mettid lagnu keeke laala nauhppig amu, ag ii bappaidppig anttom.

⁷ Nug anam antta, King Joas nug mana mettak danab Jehoiada, amu mana mettak danab laa ele onilagppa e uɗieg, nug amelagppa aum. “Aɗinu ag Yawenu mettid lagnu laih laala nauhppig amu, ag ii eɗun bappaidtteb? Ag danab ah dabmattan ehanadtteb ele eppelagppa men doɗo baula aib aoppig. Iitta. Ag men doɗo aon uɗiglag amu, ag men doɗo amu lag babaittak danab eppelagppa meppeg, ag babaitteg!” awa aum.

⁸ Joas nug anam a amu, mana mettak danab ag King Joas nai aum amu, ag nai amu doon, ag geha danab ah dilagppa men doɗo tuɗid ii aomnanu dabmak laippu aon, laa am, ag geha Yawenu mettid lag, amuppa keeke nauhak amu babaittaknu, ag akka ag amu ii hemananu appig.

⁹ Anam amu, mana mettak danab Jehoiada nug kunup laa awa, amuppa oɗe ha, kunup amu qaɗab guguittak meum. Nug danab Kayak laug ooppa gokkunu ugekke, nug eppeg naɗiap-ppa, qaɗab guguittak, appa meum. Amu mana mettak danab ag lag amu od gumak daappig, ag danab ah men doɗo aon, Yawenu mettid lakka uɗieg, ag amu aon, kunup amuppa inappig.

¹⁰ Mana mettak danab ag kunup amuppa men doɗo inaegeg noa, ambeebe anidna amu, aria ag nai meeg, kingnu nai yaak danab, amu mana mettak ikki danab ele dilah ukke, aa uɗia, men doɗo amu ebqewoya, aa battamppa inapiɗ.

¹¹ Ebqewoya, aria aa men doɗo amu aa danab Yawenu mettid lag eɗua babaittaknu uɗat gumak daatteb amu mattaeh, danab amu ag danab Yawenu mettid lag bappaidppig, uɗat amu heppig ele madappig; amuam, lag hak danab,

¹² menppa lag hak danab, amu men otaɗa babaittaknu doyak danab ele. Laa ele, ag men doɗo amuppa mettid lagnu ebehi plangppa hak, am men otaɗa babaittak ele daden meppig. Amu keeke laala Yawenu mettid lag babaittaknu ehanittak keeke daden maknu dayom amu, ag amu ele men doɗo amuppa daden meppig.

^13-14 Yawenu mettid lagnu men doɗo danab ah ag aon doeg ag aoppig ele amu, men doɗo amuam uɗat laippu amuib hekkunu men doɗo. Men doɗo amuppa uɗat laala ii heppig. Iitta. Yawenu mettid lag laih nauheb babaittaknu danab mattaknu, aria uɗat amu hekkulagnu keeke awaknu aakkuib. Anam daatte amunu, ag men doɗo amuppa tappiɗ okkai, o lamnu wik babaittaknu keeke, o tiig amuppanu awa tauɗeb ukkaknu tappiɗ silwappa hak, o trampet, o aɗi keeke laa golppa hak, o silwappa hak Yawenu mettid lag, amuppa uɗat haknu, ag keeke laala amu oh laa men doɗo amuppa ii daden meppig. Iitta.

¹⁵ Amu Kayaknu mettid lag babaittaknu uɗat gumak danab ag laa uɗat heppig ele, ag ahilag uɗatnu nob men doɗo amuppa mattaegeg, laa ag ahilagnu genab elele dooglagnu elele amunu, ikki danab ag men doɗo amuppa uɗat aɗi laa heppignu oɗ laa ii meppig. Iitta.

¹⁶ Men doɗo laa, amuam danab ah ag eheɗ haknu ofa, ib etta hipunin haknu ofa elenu men doɗo amu, ag men doɗo amu Yawenu mettid lagnu dayom, amuppa ii meppig. Iitta. Men doɗo amu ag aon uɗin, mana mettak danab ahilagib daakkunu madappig.

Aram dilag king nug Juda dilagnu banelag uɗiom

¹⁷ Juda dilag king Joas nug Yawenu mettid lag bappaidkkulagnu danab otiattom, amu dimppa Aram dilag king Hasael nug ban danab nuhikkud diie uɗin, Gat aab okkaippa ban hena, ag Gat eɗadna, aab ahilag amu aoppig. Aria, ag aab amu awona, ag Jerusalem aqaglagnu eɗun goppig.

¹⁸ Amge Juda dilag king Joas nug Aram dilag king Hasael Jerusalem aqakkunu uɗiom antta, nug keeke Yawenu tituanak daappig awa, Hasael, nuhig daakkunu hamu mettom. Keeke nuhig daakkunu Nug mettom, amuam nug mamekkud aɗi, King Jehosapat, King Jehoram, am King Ahasia ele, nug ag keeke oh ag Yawenu tituanna medappig, amu keeke nug Yawenu tituana mettom, amu ele, aria nug gol oh Yawenu mettid lag, amuppa en maknu oo anen anenppa dayom, amu kingnu lag enanagnab, appanu ele anam oh, nug en amu oh awa, Hasaelnu ma, me ukkom. Keeke amu me ukke, Hasael nug awowa, nug Jerusalem ii aqom; nug uua, eɗua ukkom.

¹⁹ Amu keeke kuɗum laa ele King Joas heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

^20-21 Amu Joas nug nuhikkud ehanittak anuqak danab ag Joas nug qeppeg mauhkkunu nai qagappig. Ag oolagppanu ehanittak anuqak danab aɗit laa, laa am Simeat bekka Josabat, laa am Somer bekka Jehosabat ele, aa Bet Milo, aab amuam Sila aabppa ukkaknu ibppa daatte, aa amuppa Joas qeeh mauhom. Aa qeeh mauhe, laa ag nug gaɗa aon, Dawitnu Aab, appa nug mamekkud aɗi boumadppigppa boumppig. Nug mauhe amu, nug bekka Amasaia nug abenabppa king ba dayom.