2 King 11 - Nobonob Baibel

Atalia nug Juda dilag king abenab awom

¹ Amu Jehu nug Juda dilag king Ahasia qe mauhe, Ahasia anig Atalia nug nug bekka Ahasia mauhom doyowa, nug aha he, laa ag danab oh ag king ele tiig laippu amu, ag ag aqaeg mauhppig.

² Amge ag laippu ii qeppig. Atalia nug he, laa ag oh Juda dilag king ele tiig laippu aqappeg mauhkkulagnu heegeg, King Jehoram aɗeg laa Jehoseba, nug Ahasia ele aa am eappinag, nug Ahasia bekka Joas lokkuma awa, nug ah Joas gumom ele, Atalia nid amu qeeb mauhmanu, nug niiaknu oo laappa lokkumate, ag nug qeeg ii mauhom.

³ Jehoseba nug Joas maɗ eblaih laippu ele Yawenu mettid lag ooppa, gumak ah nuhig ele lokkume dayom. Dayeye, haen amu Atalia nug Juda dilag kuin dayom.

Joas king beum

⁴ Amge Atalia nug anam kuin dayaya, kuin dayak nuhig maɗ eblaih aɗit ele, maɗ amu ooppa amu, mana mettak danab Jehoiada nug ban daup 100 dilag ikki, Karnu ban danab, amu ban danab ag king, nug laug ele gumappig amu, nug nai me ukke, ag Yawenu mettid lakka uɗiglagnu amelagppa aum. Nug nai me ukke, ag uɗieg, aria Jehoiada nug ag ele nug tituanna nai qagappig. Ag nug tituanna nai qakkeg, Yawenu mettid lag, appa nug he, ag keeke amu hekkulagnu ag nai ahilag amu ɠagattag qedappig. Ag amu hewona, dimppa nug Ahasia bekka Joas omala doa ippuanattom.

⁵ Jehoiada nug anam hewowa, nug ag amelagppa inam haknunab aum. “Ig hepput, Joas nug geha king bekkunu, ag inam inam hekkulagnu daatteb. Ban danab ag Sabat deɗppa ahilag uɗat hekkulag ele amu, ag huu ewam oppatna, huu ameg laippu, ag kingnu lag enanagnab, lag amunab guman daaglag.

⁶ Huu laa ag aɗnu od onig Sur, ag amu guman daappeg, huu laa amu, ag huu laa kingnu lag enanagnab, ag lag amunab gumatteb ele dimulagppa daaglag.

⁷ Aria, huu ameg aɗit laa, ag Sabat deɗppa uɗat ii helobbia ele amu, ag Yawenu mettid lag, king ehanidkkulagnu, ag lag amu guman daaglag.

⁸ Ag eheɗ laa king, nuhigppa bemanu ag qep elab keeke, ag eppelagppa dayebeb dayeg! Ag king talilidna daappeg, auntai laa nug king gumitta gokkunu ehah iitta ele amu, ag nug qeppeg mauhaɗ! Ag king nug adeppa adeppa gokku amu, ag nug gukkuidna dayeg!” awa aum.

⁹ Jehoiada nug anam a, ban daup 100 dilag ikkilkad ag mana mettak danab Jehoiada nug aum bianab aakku heppig. Danab ag Sabat deɗ amuppa ahilag uɗat hena malan, ag laulkadppa gokkulagnu daappig, laa ag haen amuppaib uɗin, uɗat digmena hekkulagnu daappig ele, Jehoiada nug ag oh daaglagnu aum, amu ahilkad okkai oh ag danab amu diin, Jehoiada toppa goppig.

¹⁰ Ag anam daanna, Jehoiada nug ban, guppiɗ ele, keeke amu oh anukka King Dawitnu daappig amu, nug keeke amu awa, ban daup ikki amu mattom. Keeke amu oh am Yawenu mettid lag, amuppa daappig.

¹¹ Amu ban danab amu ag gona, ag king guman talilidna daanna, ag bannu keeke eppelagppa aɗappig. Ag qaɗab, Yawenu mettid lag ele guguittak daan, ag lag amunu yau uɗitteppanu ukka, yawalti uɗitteppanu aakku daappig.

¹² Ban danab ag bappaidna anam daaegeg, Jehoiada nug king bekka Joas, nug nug omala, dimittim uɗiom. Nug omala uɗia, king haɗ nug igippa ma, nug Kayaknu nug tituana nai qakkak nai buk itoɗiakppa yaak niitte metta, Nug nid amu nug king daattenu eum. Nug anam he, ag Joas king daakkunu goɗen gokkaɗakppa tituanna, ag eppig. “King nug haen elab bau dayaɗ!” enana appig. Danab ah ag amu anidna, ag amunu oolag gamag ahe, ag eppelag tap qenana, inam eppig. “King nug haen elab bau dayad!” aon eppig.

¹³ Amu haen kuin Atalia nug ban danab, am danab ah eppignu oqotti doya amu, nug laugppanu aha noa, Yawenu mettid lakka, danab ah qagmeppigppa ukkom.

¹⁴ Ukka, nug Yawenu mettid lag odppa biidod elab galak daatte, amu guguittak king bau amu hibaitta, king hetteb bia ha dayeye daaegeg anttom. Nug ban daup ikki, am trampet iwalak danab ele oh ag king guguittak daaegeg anatta, laa amu nug Juda danab ah oh appa daappig, ag gamalag ahe henana, laa trampet iwalegeg ele anattom. Atalia nug amu antta, nug nuhig lamen elab pattiɗa, nug eum. “Ag ɗo tippalna, da uuiɗna, laa okkai daakkunu hetteb!” awa eum.

¹⁵ Atalia nug anam heum, amge mana mettak danab Jehoiada nug matu ban daup 100 dilag ikkilkad amelagppa aum. “Laa nug Yawenu mettid lagppa nug aib qeeb mauhom,” awa aum. Nug anam matu aum amunu, gemu ag nug aon, dimittim gokkulagnu ana, nug ag amelagppa haknunab inam aum. “Ag nug talilidna daan, ag aon, dimittim ukkeg! Laa nug ehanidkkunu dim lamidkku dayeb amu, ag nug qeppeg mauhaɗ!” awa aum.

¹⁶ Jehoiada nug daup dilag okkai amelagppa anam a, ag anam hena, ag Atalia aɗan omalna, ag king laug enanagnab guguittak, od laa onig Hosnu Od, ag amuppa wana, ag nug qeeg mauhom.

Mana mettak danab Jehoiada nug Juda danab ah ag Yaweib dim lamidkkulagnu ehanattom

¹⁷ Aria, Jehoiada nug he, King Joas nug, danab ah ele, amu Yawe ele ag nug tituanna nai qagappig. Nug tituana nai qakkak amuam, danab ah ag Yawenu danab ah aakkuib daaglagnu nai. Nug amu hewowa, nug he, king, amu danab ah ele ag nug tituanna nai qagappig.

¹⁸ Ag nai amu qakkan malan, danab ah ag kayak hambuppuak Balnu mettid lakka gona, ag lag loppaɗppig. Ag qaɗab, am dottolkad ele amuppa daappig heeg nauheg, ag Balnu mana mettak danab Matan qaɗab guguittak qeeg mauhom. Aria, Jehoiada nug ban danab laala otialatte, ag Yawenu mettid lag gumappig.

¹⁹ Nug anam he, Jehoiada nug ban daup 100 dilag ikkilkad, Karnu ban danab, ban danab ag king, nuhig lag enanagnab ele gumatteb, aria Juda danab ah oh appa daappig ele omalatte, ag oh king Yawenu mettid lag, amuppanu omalna, kingnu lag enanagnab, appa goppig. Ag gona, kingnu lag enanagnab, ag appa Ban Danab Dilag Od atteb, od amuppa tena, aria king nug amuppa noa ukka, sia kingppa ta dayom.

²⁰ Ag anam heeg, Juda danab ah ag gamag ahak dooppig. Ag Atalia qep elabppa kingnu lag enanagnab, appa qeeg mauhom amunu, Jerusalem appa maɗoɗib dayom.

²¹ Joas nug maɗ eblaih aɗit ele dayaya, nug king beum.