1 Tesalonaika 5 - Nobonob Baibel

Kristus eɗua uɗikkunu haennu dabmettaknu nai

¹ O ig lainkad, keeke amu oh bekkunu haen, deɗ ele amu ig amunu yaagnignu laa iitta.

² Ag akka tutukku dootteb, Naɗinu deɗ am tuqanppa, yabhok danab oitte, amubia uɗikku.

³ Danab ah ag, “Haen ena aakku beum, ig maɗoɗ ena daagnig,” abeppeg, haen amuppanab keeke eheɗ, ag heeb nauhkkulagnu, ahilagppa bekku. Keeke eheɗ amuam ah nug nid aokkunu guittak paha bette, amubia beeb dooglag. Danab ah ag keeke eheɗ amu ii qe-eɗidmana.

⁴ Amge ig lainkad, ag doyak amunu gatatuppa ii oitteb amunu, deɗ amu yabhok danab bia ahilagppa ii bema.

⁵ Ag oh am amahlak bekkod. Yo, ag am amun bekkod. Ig am tuqan danab, o gatatu danab iitta.

⁶ Amunu amu, ig laala niitteb bia aib niimut. Iitta. Ig haen oh dabmetata daatta, ikka ig ihinig oiyak pehettak atognoak kobol dim lamidta oitu!.

⁷ Laa ag niitteb ele, ag tuqan niitteb, laa ag le ɠagattag huanak laeg kaaka aqatte ele amu, ag tuqan laegeg kaaka aqatte,

⁸ amge ig am amahlak bekkod, amunu ig ikka ig ihinig oiyak pehettak atognoak kobol dim lamidta oita, ig ooppa genab doyak, oo mauhak kobol ele aota, ban danab ag kekeɗ ag momolag heppeg nauhmanu qahaɗ palatteb, amubia ig kobol aɗit amu meta, Kayak Nug eɗua awigkkunu dabmak aɗat daattem ele, kobol amu ban danab ag ikkilagppa aen hat metteb ele amu, amubia ig meta oitu!

⁹ Aɗinu? Kayak Nug nuhig oppoɗi bak ig iqakkunu ii tituanikkom. Iitta. Jesus Kristus, ihinig Naɗi, Nug eɗua awigkkunu tituanikkom.

¹⁰ Nug ig ehanigkkunu mauhom amunu, ig bau daagnig o iitta ig mauhkkunig amu, ig Nug uɗikku amu, ig Nug ele bauklel haen oh daagnig.

¹¹ Anam amunu, ag gemu hetteb amu, ag tuɗidna, anamib henana, akka akka nug ehanidna, nug oo ɠagattag qettak ele heig!

Tamaniak danab amu tamaniaknu ikki danab ele, oiyak ahilagnu nai

¹² O lainkad, ag aun aɗi ag ahilagnu uɗat ɠagattag hetteb, ag Naɗi onigppa ahilag ikki daanna, ag ib ippunadnana ahilagnu tolittak nai atteb ele amu, ag danab amu dilagnu ena elele doyeg!

¹³ Ahilag uɗat, diig amunu amu ag ahilagnu oolagppa ena doonna, ahilagnu oo mauhak ele doon autna aweg! Ag akka akka lailkad ele maɗoɗppaib daanna oiyeg!

¹⁴ O lainkad, ig nai baula tuɗidta, ahilkad dabmak maɗettagnignu ag amelagppa iikku attem. Danab ag bahi yaak doonna, hamu uɗat iitta oitteb ele amu, ag nau aomnanu nai ag amelagppa aig! Laa oo baɗak dootteb amu, ag ɠagattag aqeg! Ag laa ag ɠagattag iitta amu, ag ehanatteg! Danab oh dilagnu amu, ag dagom kobol dim lamidna oiyeg!

¹⁵ Danab ag ahilagppa kobol nau laa heppeg, ag amunu eɗun nob nau aibnab meppig. Ag haen oh kobol ena, lailkad amu danab laa ele ahilagppa hekkulagnu ɠagattag dayeg!

¹⁶ Ag haen oh maɗoɗppan gamag ahakppa oiyeg!

¹⁷ Ag unuqittak haen oh henana dayeg!

¹⁸ Wanppan oiyak ahilagppa aɗi aɗi bette amu, ⌊Kayak Nug ag ehanadtte amunu,⌋ ag amunu Nug amegppa, “Ena heme,” aon aig! Ag Kristus Jesusnu daatteb amu, Kayak Nug ag kobol anam hekkulagnu oo daatte.

¹⁹ Ag oolagppa Kayak Ouɗinu ib aib oo neppig!

²⁰ Laala ag Kayak oɗe aon, ahilagppa nai mehuqtteb amu, ag nai amunu,, “Keeke hamunab,” aib dooppig.

²¹ Nai oh, amu keeke oh ele ag epeɗin, aɗi am ena aakkuib, ag aɗeg!

²² Keeke eheɗ oh, ag dimatteg!

²³ Kayak, Nug aakkuib am oo maɗoɗ diig, Nug nukkaib heeb, ag beɗulag dimittim, oolagppa ele oppiaawak daaglagnu ool daatte. Nugib ag ouɗilag, dottolag, amu beɗulag ele atognobob, ihinig Naɗi Jesus Kristus eɗua uɗikku haenppa ag oolagppa kaliak laa iitta ele daaglagnu, ig Kayak unuqidttem.

²⁴ Kayak Nug ag onilagppa ette ele amu, Nug oo metta ii uuak kobol dim lamidtte amunu, Nug amu hekku.

²⁵ O lainkad, ag Kayak ehanigkkunu ag unuqitteg!

²⁶ Ag Kristen kobolppa oppiaawak eleppa, ag nug humittak heig!

²⁷ Ig lainkad laa oh nai imu dooglagnu, da Naɗi onigppa ag ag amelagppa ebqekkulagnunab iikku attem.

²⁸ Ihinig Naɗi Jesus Kristusnu ehanittak okkai hamu mettak ahilagppa dayaɗ!