1 Tesalonaika 4 - Nobonob Baibel

Oiyak Kayak oo daatte ele

¹ Ao ig lainkad, ig kobol Kayak oo niitte bia, ag amuppa oiglagnu ippunadmut amu, ag amu dim lamidtteb. Gemu amu, ig Naɗi Jesus onigppa ag huana dim lamidkkulagnu ahilkad dabmak maɗedattem.

² Aɗinu? Ig nai amuppa Naɗi Jesus aɗi aɗi ippuanadkkunignu aum amu, ig ag ippunattaut, ag ana dootteb.

³ Kayak Nug ag oppiaawak daaglagnu, ag gappai kobol ii hemananu,

⁴ ag ewau matulak kobol tutukku oppiaawak ele doon autna aona hekkulagnu,

⁵ ag iitta aɗi, ag Kayak ii dootteb ele, ag gappai hekkulagnu oo ahak nau dootteb, ag amubia ii hemananu,

⁶ ag Kristen ag gappai kobol, mauhnoak oiyak, oo ahak kobol, keeke amu oh hena, lailkad buppualadnana, laanu ah ele ii aomnanu Nug oo daatte. Ig anukka kobol nau amunu nau aomnanu nai mattat, amelagppa mattimut, amu amubia Naɗi Nug danab anam hetteb ele amu nob nau madakku.

⁷ Aɗinu? Kayak Nug ig dubuttid ele oignignu ig oninigppa ii eum. Iitta. Dubuttid iitta, oppiaawak oignignu eum.

⁸ Amunu amu danab nug nai amu dimedatte, nug danab di-ii-medatte. Iitta. Nug Kayak, Nug nuhig Ouɗi ag madatte ele amu, Nug dimedatte.

⁹ Amge layagnu oo mauhak kobolnu amu, da nai laa yaakkulnu uɗat laa ii daatte. Keeke amunu amu, Kayak Nug ag ippuanatta malom.

¹⁰ Ao, ag Makedonia appa lailkad oh dilagnu oolag mauhtte, amge O ig lainkad, ag kobol amu tuɗidna mamanidppeg, okkainab daakkunu ahilkad dabmak iikku maɗedattem.

¹¹ Amu anukka ig ag amelagppa amut, amubia ag dabmak tutukku aona, ag toettan daana, ag ahilag keeke tutukku hena, ag akka eppelagppa uɗat heig!

¹² Ag anam hekkulag amu, geha aun laa, ag tamaniakppa ii daatteb ele, ag ag noolagppa hak ena amu ippunadppeg, ag ahilagnu ena dooglag. Amu keeke laalanu ele, ag Kristen daatteb amu, ag laa gumadna gona ii unuqadmana.

Naɗi eɗua uɗikkunu nai

¹³ O ig lainkad, ag danab ah mauhppig, ag amu dilagnu amu ootot daaglagnu, ag danab laa ag Kayaknu oolagppa genab ii dootteb ele, ag eɗua hibaittaknu deɗ ameg ii metteb ele, ag mauhaknu gaatteb, amubia gaaglagnu ele amu, ig oonig ii daatte.

¹⁴ Ig Jesus Kristus mauhowa, eɗua hibaittomnu oonigppa genab doottem amunu, ig Kayak Nug heeb, laala ag Jesusnu oolagppa genab doona mauhppig amu, Jesus ag ele omalatteb uɗiglagnu ele oonigppa genab doottem.

¹⁵ Ig nai imu Naɗi oɗe amu ag amelagppa iikku attem. Ig laa oh, ig geha Naɗi Nug eɗua uɗikku haenppa ig danab ah bau daattem ele amu, ig danab mauhppig ele amu daappeg ig ii anuqmata.

¹⁶ Aɗinu? Haen amuppa danab ah ag haknunab laa anaknu ewak, engel okkainu ewak, amu Kayaknu trampet ele gayak doobppeg, Naɗi Nug hab aabppanu neeb, danab ag Kristusnu oolagppa genab dooppig ele amu, ag tatam eɗun hippaidkkulag.

¹⁷ Kayak Nug heeb, ag eɗun hippaidppeg, ig laa oh bau daagnig amu, ig ag ele oh lombigppa teta, appa Naɗi Jesus ele nug uɗa teta tamanit, Nug ele hanhan daagnig.

¹⁸ Anam amunu, ag nai amuppa lailkad ele nug ɠagattag qeig!