1 Tesalonaika 3 - Nobonob Baibel

Pol Timoti me, Tesalonaika tamaniak ɠagattag aqakkunu ukkom

¹ Ig ahilagnu nai doognignu oonig huana dayom amunu, ig nai mattita, i iya Atens ippa daagnihnu atata,

^2-3 Timoti, nug ig lainig, nug am Kayaknu maɗi nid, Jesus Kristusnu Nai Ena mehuqaknu danab ele amu, ig nug ag ɠagattag aqakkunu, ahilag ooppa genab doyak ele ehanidkkunu, am laala ag uug naɗi mawak haen imuppa ag oolag meppeg ta, meppeg nemanu ele nug meuɗ ukkom. Ag tutukku dootteb, Kayak Nug ig Kristen ig oh uug amubia maognignu tituanikkom.

⁴ Ao, haen ig ag ele daatta, haen amuppa ig Kristen, ig eheɗ hekkak aognignu amelagppa mattitta daamut. Amu meu aakku beum, ag aakku dootteb.

⁵ Amunu da baula hamu daakkulnu elele iitta oolppa doyena, da ahilag ooppa genab doyak anidkkulnu Timoti mei ukkom. Da oolppa uug doomi. Aɗinu? Da eheɗ haknu oo eeɗak danab nug ag eheɗ hekkulagnu eeɗatte, ag oolag eɗuomtai dabmemi. Anam dayeb amu uɗat ig hemut ele amu hamu daalo.

⁶ Amge Timoti ag uuatta aha, eɗua uɗia, geha iikku gumikka ba, Nug ahilag ooppa genab doyaknu, layagnu oo mauhak kobol hettebnu ele, ag amu ohnu ena, elele hetteb mattie doomuɗ. Laa ele, ag haen oh ihinignu dabmenana, oolagppa ihinignu ena doonna daattebnu, ig ag anadkkunignu oonig okkainab daatte, amubia ag ig anigkkulagnu oolag okkainab daatte, amunu ele mattie doomuɗ

⁷ amunu O lailad, ig uug digdigppa oitta, ag oolagppa genab doon ɠagattag daatteb doout, nai amu ahilagnu ig oonig ɠagattag qedatte.

⁸ Aɗinu? Ag haen oh Naɗinu ɠagattagppaib oitteb, ig amu doota, ig eleleib daattem.

⁹ Ig ahilagnu Kayak noobppa maɗoɗppan gamag ahak huanak doottem. Ag heeg, ig gamag ahak amu doottem amunu ig gamag ahak amunu Kayak amegppa, “Ena heme,” elele akkunignu elele iitta.

¹⁰ Amun tuqan ele Kayak Nug heeb, ig baula ag iɗulag anidta, ahilag ooppa genab doyaknu nai laala ii dooppig ele ippunadta apput dooglagnu oonig unuqagppanu unuqidttem.

¹¹ Ge, ig Mamenig Kayak, Naɗi Jesus Kristus ele aa omaigpeɗ, ahilagppa gokkunignu oonig daatte.

¹² Laa ele, Naɗi Nug oo mauhak kobol ahilagppa ambaknab matteb, ag lailkad dilagnu, danab oh dilagppa ele, ig ahilagnu oo mauhak doottem bia ag oolag mauhkkunu oonig daye,

¹³ amu deɗ Naɗi Jesus Nug nuhikkud oppiaawak danab ah ele eɗun nekkulag amu, deɗ amuppa ag ig Mamenig Kayak, ag Nug toppa danab ah oolagppa kaliak laa iitta, ag Kayaknu danab ah oppiaawak ele daaglagnu, Naɗi Nug heeb, ag oolag ɠagattag daaglagnu oonig ele daatte.