1 Tesalonaika 2 - Nobonob Baibel

Uɗat Pol nug Tesalonaika heum

¹ Ao, ig lainkad, ag akka ele dootteb. Haen ig ag gumadta ukkaut, ag ele daamut, amu haen amuppa ihinig dayak ahilagppa amu hamu, meu iitta ii dayom.

² Ag dootteb, haen ig ag gumadta ii gomut, Pilipai appa amu ig guittak aomut, ag ig beɗunig heeg nauhom, amge ig ihinig Kayak, nuhig ehanittakppa, ig ɠagattag daata, wagai meta, nuhig Nai Ena ag Tesalonaika daatteb ele, ag amelagppa mattimut. Tesalonaika appa ele danab kuɗum ag ig ippunig oo neegkkulagnu heppig, amge ig amunu ii dabmemut. Iitta. Ig nai mehuqmut.

³ Mattiak ig mehuqttem ele, amuam dabmak hambuppuakppanu, o diig ena iittappanu, o bubuittak kobolppanu ele ii bette.

⁴ Iitta! Kayak Nug ig Nai Ena mehuqak uɗat imu hekkunignu elele anikka mekke, ig hettem. Ig Nai Ena madipput, danab ag ihinignu oolag daakkunu iitta. Iitta. Ig Kayak, Nug ig oonig epeɗitte amu, Nug ihinignu oo daakkunu hettem aakkuib.

⁵ Ag dootteb, ig haen laippu laa oo eeɗaknu ittag nai laa ii mattimut. Ig uɗat hettem ele amu ig hetata, ahilag keeke lokkumta aognignu laa ele ii hemut. Kayak Nug anigtte ele amu, Nug ele amu madikkun elele.

⁶ Amu ele, ig danab noolagppa binanig aognignu ii hemut; ag noolagppa iitta, danab ah laa noolagppa ele iitta.

⁷ Ao genab, ig am Kristusnu totol danab amunu, ig ahilagppa ehanittak keeke aognignu elele dayom, amge ig anam ii hemut. Iitta. Ig oonig bodoette wagai ii mak kobol dim lamidta, ag oolagppa uɗat hemut; nid anig nug bekkod atognoadtte bia ahilagppa uɗat hemut.

⁸ Ig ahilagnu oonig huana mauhom amunu, ig Kayak toppanu Nai Ena apput dooglagnu oonig dayeye heta, ig ag ena daaglagnu mauhlom amunu ele elele doomut. Aɗinu? Ig ahilagnu am ig lainkadnab doomut.

⁹ Ao ig lainkad, ag ihinig uɗat okkai uug ele amu ag anidna dooppig. Ig tuqan amun ele eppenigppa uɗat hetata, ig Kayaknu Nai Ena ele mehuqmut. Aɗinu? Ig ahilag ee keeke hamu aopput, ag ihinignu oolagppa uug doomnanu ig anam hemut.

¹⁰ Ag Tesalonaika daatteb ag oh ihinig hak ag oolagppa hemut, ag anidna, ihinig aɗi heehe anttomnu mattiak danab daatteb; Kayak ele anam daatte. Ig ag oolagppa genab dooppig ele, ig ag oolagppa oitta, ig oppiaawak daatta, genab tutukku hak kobol hetata, oonigppa kaliak laa iitta ele oimut.

¹¹ Ag dootteb, ig ag anen anen, danab laa nug bekkod bahi aqatte bia, ag bahi aqatta,

¹² ig oo ɠagattag qaknu nai ag amelagppa mattitta, ig oo maɗoɗ dayaknu nai ele mattitta, ig ag Kayak Nug oo niitte bia elele oiglagnu nai mattamut. Kayak Nug, Nug ag nuhig ɗo maɗoɗppa, binag amahlak oppiaawak nuhig ele aon daaglagnu ag onilagppa ette.

¹³ Ig ag amelagppa nai mehuqmut amu, ag wanppanu danab dilag nai bia ii aoppig. Iitta. Ag nai amunu, am Kayak nai, tutukku doonna aoppig amunu amu, ig haen oh Kayak amegppa keeke amunu ele, “Ena heme,” aot attem. Nai amunu amu ag oolagppa genab dootteb ele amu, nug ag oolagppa uɗat ɠagattag heehe, meu aakku bette.

¹⁴ O lainkad, ag Kayaknu Kristen tamaniak, Juda wanppa Jesus Kristusnu daatteb ele amu, ag ag ele laippu bia daatteb. Ag Tesalonaika daatteb amu ag, ag lailkad eppelagppa guittak aoppig amubia Kristen tamaniak, Juda wanppa daatteb ele, ag Juda laala eppelagppa guittak aoppig.

¹⁵ Juda ag ihinig Naɗi Jesus qeeg mauhom, propet ele aqaeg mauhppig. Ag ig ele appanu lamigppig. Kobol ag hetteb ele amu Kayak Nug amunu oo ii hette. Ag danab ah oh dilagppa kekeɗ daatteb.

¹⁶ Danab amu ag Kayak Nug iitta aɗi eɗua diikkunu oolag ii daatte amunu ig Nai Ena, iitta aɗi amelagppa mehuqkkunignu ib oo nekkulagnu hetteb amunu amu, ag ahilag hipunin okkainab meegeg, Kayaknu oppoɗi bak miagnab ag qaɗelagppa daatte.

Pol Tesalonaika tamaniak eɗua anadkkunu oo dayom

¹⁷ O gadon ig lainkad, Juda ag, ig ag Tesalonaika ag oolagppanu lamikkeg, ig ewau laa, aa ahilah nid nakok mauhe, oo doyak daattep bia daamut. Genab ig ag iɗulag baula haen tutu ii anidmut, amge ihinig dabmak ahilagnu haen oh dayom. Laa ele amu ig ag anadlomnu ib mattiak uɗat ɠagattag hetata, ag iɗulagnab ele anidlomnu oonig huanak gayom.

¹⁸ Amunu amu ig ag gumadta gokkunignu hemut. Da Pol, da dakka, da ib mein mein anidmi, amge Satan nug ihinig ib oo neum.

¹⁹ Ig ag eɗut anadkkunignu oonig huana dayomnu diig am, dimppa ihinig Naɗi Jesus eɗua uɗikku, ig Nug noobppa hippaidkkunig ele amu, haen amuppa ag am ig oonig ena daakkunu, maɗoɗppan gamag ahak ele aognignu, nob ena aognignu diig daaglag.

²⁰ Ig ahilagppa binag amahlak oppiaawak ele, amu maɗoɗppan gamag ahak ele aognig.