1 Tesalonaika 1 - Nobonob Baibel

Humittak nai

¹ Da Pol, Silas, Timoti ele ig nai imu Tesalonaika tamaniak, ag Mame Kayak, am ihinig Naɗi Jesus Kristus ele ouqak daatteb amu, ig ahilagnu iikku yaattem. Kayaknu ehanittak okkai hamu mettak, amu nuhig maɗoɗ ele ahilagppa daaglahnu oonig daatte.

^2-3 O ig lainkad, ig ihinig unuqittakppa ag onilag diita unuqidtata, ig ahilag ooppa genab doyak amu he, ag kobol ena humana, ag oo mauhak kobolnu uɗat huanak hena, ag oolag ɠagattag qettan, ihinig Naɗi Jesus Kristus ameg metteb amu, ig amunu dabmeta, ig Mamenig Kayak amegppa akkunignu bahi yaak ii doota, Nug amegppa hanhan, “Ena heme,” aot attem.

⁴ O lailad, Kayak ahilagnu oo mauhtte ele, Nug ag nuhikkudnab tituanattom amu, ig amu doottem.

⁵ Aɗinu? Nai Ena ig ahilagppa aot gomut ele, ig nai aakkuib aot ii gomut. Iitta. Ig Kayaknu ɠagattagppa uɗat heut, Kayak Ouɗi ele Nug he, ag oolagppa genab doona, Kayak ag eɗua diiom ele genab dooppig. Ig ele ag ehanadkkunignu ag oolagppa attem bia oiutut, ag anigna dooppig.

⁶ Ag ihinig kobol dim lamidnana, Naɗinu ele dim lamidppig. Ag uug teppu ele maoppig, amge Kayaknu nai ii uuppig. Iitta. Ag Kayak Ouɗinu maɗoɗppan gamag ahak ele nai amu aoppig.

⁷ Amuppa ag danab prowins Makedonianu, prowins Akaianu ele ag oolagppa genab dootteb, ag danab amu oh kobol ena ippunadppig.

⁸ Naɗinu nai ag Tesalonaika ag mehuqppig, nai amu do oqotti bia prowins Makedonia, Akaia eleib ii ukkom. Iitta. Aabaab ohppa danab ag, ag Tesalonaika Kayaknu oolagppa genab dooppig, ag nai amu dooppig amunu amu, ig baula ahilagnu amunu akkunignu iitta.

⁹ Aɗinu? Danab aabaab ohppanu ag Tesalonaika, ahilagnu ag mattin, ag Tesalonaika danab ag ig ena atognoigppignu, ag Kayak Bauklel dim lamidkkulagnu kayak hambuppuak dottolkad aakku uuadppignu, ag eɗun Kayak Bauklel, genab ele waappa daan nuhig uɗat hekkulagnu,

¹⁰ ag Kayak Bekka Nug hab aabppanu eɗua uɗikkunu haen ameg mettebnu ele maditteb. Nug anukka mauhe, Kayak Nug he, Nug mauhakppanu eɗua hibaittom. Amuam Jesus, Nug dimppanu hipuninnu bu aqak, Kayak eppegppanu uɗitte amu, ig amu aomtanu eɗua awikkom.