1 Stori 23 - Nobonob Baibel

Dawit nug Lewi buɗub ag uɗat aɗi aɗi hekkulagnu tituanattom

¹ Amu Dawit nug kainonab ma dayaya, nug he, nug bekka Solomon nug Israel dilag king dayom.

² Nug Solomon king daakkunu tituana, am nug he, Israel dilag ikki danab, Lewi buɗubppan mana mettak danab, Lewi buɗubppan mana mettak danab iitta ele ag uɗin qagmen daappig.

³ Ag uɗin daaegeg, Dawit nug Lewi buɗubppan mana mettak danab iitta, ahilag maɗ am 30, o 30 eɗittak ebaqe, ahilag ebqak am 38,000.

⁴ Dawit ebaqa mala, nug aum. “Lewi buɗub 38,000 daatteb amu, ag oolagppanu 24,000 ag Yawenu mettid lagnu uɗat henan daaglag. 6,000 laa ag am Israel dilag ehanittak anuqak danab, epeɗiak danab ele daaglag.

⁵ 4,000 laa ag lag gumak danab daaglag, amu 4,000 laa ag musik haknu keeke, da ag amu hekkulagnu mattami ele amu, ag keeke amu aɗan, Yawe binag mekkulag,” awa aum.

⁶ Dawit nug anam ana mala, nug Lewi buɗub ag huu ewam daaglagnu obatom. Lewi nug bekkod ewam; Gerson, Kohat, Merari ele. Anam amu huu ewam amu ag obatak amu dim lamittak daappig. Huu laa am Gerson buɗub, huu laa am Kohat buɗub, huu laa am Merari buɗub.

⁷ Gerson nug bekoɗ aɗit, Ladan, Simei ele.

⁸ Ladan bekkod am ewam. Tatamnu am Jehiel. Nug dimugppan am Setam, Joel ele.

⁹ Nid amu ag Ladan baekkudppanu dilag ikki daappig. Simei bekkod ewam laa am Selomot, Hasiel, Haran ele.

¹⁰ Simei bekkod waɗele laa am Jahat, Sisa, Jeus, am Beria ele.

¹¹ Jahat nug nid naanaeg, nug dimugppan am Sisa, amge Jeus, Beria ele aa baelti am kuɗum iitta amunu, aa oh baeltippan laippuib uɗat laippu hekkulagnu tituanak daappig.

¹² Kohat bekkod waɗele am Amram, Ishar, Hebron, Usiel ele.

¹³ Amram bekoɗ am Aron, Moses ele. Yawe Nug Aron, nug buɗub ele ag hanhan keeke Yawenu tituanaknab daatteb ele Yawenu tituana mettak daaglagnu, ag doɗ keeke manan, Yawe mettaglagnu, ag Yawenu ɗo maɗoɗnu uɗat hekkulagnu, amu ag hanhan Yawe onig aon, itittak ena danab ah mattaglagnu tituanattom.

¹⁴ Moses, Kayaknu danab, nug bekoɗ aa Lewi buɗubppan mana mettak danab iitta, aa ag oolagppa daaglagnu tituanak daapiɗ.

¹⁵ Moses bekoɗ am Gersom, Elieser ele.

¹⁶ Gersom bekka naanaeg am Subael.

¹⁷ Elieser bekka naanaeg am Rehabia. Elieser nug bekka laal iitta, amge Rehabia nug bekkod kuɗumnab.

¹⁸ Ishar bekka naanaeg am Selomit.

¹⁹ Hebron bekka naanaeg am Jeria. Nug dimugppan am Amaraia. Amaraia dimugppan am Jahasiel. Amu Jahasiel dimugppan am Jekameam.

²⁰ Usiel bekka naanaeg am Maika. Maika dimugppan am Isia.

²¹ Merari bekoɗ am Mali, Musi ele. Mali bekoɗ am Eleasar, Kis ele.

²² Eleasar nug bekka laa iitta, nug aɗekkudib amunu, nug aɗekkud ag, ag mamelag amag Kis bekkod diiadppig.

²³ Musi bekkod ewam am Mali, Eder, Jeremot ele.

²⁴ Amu ag Lewi buɗub aakku. Danab ag ag onilkad yaappig ele ag aab ikki anen anen onilkad yaan, amu waappa ag baelkadppan danab okkai daappig amu, ag onilkad anen anen yaan, amu waappa Lewi buɗub onilkad anen anen yaappig. Ag danab ahilag maɗ am 20, o 20 eɗittak onilag yaappig. Danab amu ag Yawenu mettid lagppa uɗat heppig.

²⁵ Amu Dawit ⌊nug Lewi buɗub ag uɗat anen anen hekkulagnu tituanattomnu⌋ diignu, nug inam aum. “Yawe, Israel dilag Kayak, Nug nuhikkud danab ah ehanatte, ag maɗoɗ daaeg, Nug hanhan Jerusalem ippa daakkunu uɗiom amunu,

²⁶ Lewi buɗub ag gemu mettid haknu peh lag, keeke ag lag amuppa uɗat hetteb ele baula maon, laih laih ii gomana. ⌊Anam iitta amunu ag uɗat laa imu aoglag,⌋” awa aum.

²⁷ Dawit nug nuhig mauhak haen miag dayeye, nug Lewi buɗub ag ahilag maɗ am 20 o 20 eɗittak ebqekkulagnu aum. Nug anam a, ag heppig.

²⁸ Lewi buɗubppan mana mettak danab iitta, ag maɗi ahilag am inam. Ag mana mettak danab, Aron buɗub, ag ahilag uɗat Yawenu mettid lag, amuppa heegeg ehanadkkulagnu, ag Yawenu mettid lagnu haɗap oh atognokkulagnu, ag oo laala Yawenu mettid lag heqo laih laih daappig atognokkulagnu, ag heppeg, keeke oh Yawenu tituanak daatteb am oppiak ele daaglagnu, Kayak laugppa ag uɗat laala dayom, ag uɗat amu ele aakku hekkulagnu daappig.

²⁹ Ag amu oh hekkulagnu daanna, ag bret mettid anen anen oh balalppa maknu uɗat guman, ee aegnu ofanu plaua daakkunu uɗat guman, bisket teppu iitta, yis iitta uɗat ele gumappig. Ag keeke amu oh plaua gane, goɗen gane, amu oh bappaidna, kabolia, manaknu uɗat ele guman hekkulagnu daappig.

³⁰ Ag amu henana, ag buttua ohppa ele ahan daanna, ag Yawe amegppa, “Ena heme,” anana, ag Nug binag mekkulagnu, ag tueb ohppa ele anam henan,

³¹ aria Sabat deɗppa, o kalam baunu qagmak gamag ahak ele haenppa, o hobul dayaknu haen epeɗiakppa, amu laa hak haenppa ele, mana mettak danab ag manaknu ofa henan, Yawe mettaegeg, Lewi buɗubppan mana mettak danab iitta ag anam daanna, Yawe amegppa, “Ena heme,” anana, ag Nug binag mekkulagnu daappig. Ag hanhan, ahilag ebqak eleleppa, Yawe ag attem attem hekkulagnu aum bia Yawe noobppa daan, maɗi ahilag hekkulagnu daappig.

³² Amu Lewi buɗubppan mana mettak danab iitta, ag anam hekkulagnu daappig. Ag mettid haknu peh lag danab ah appa qagmetteb ele, ag amuppa, ag aben gun ele, appa, amu ag tiilag laippu ele, Aron buɗub, ag ag waalagppa Yawenu mettid lagppa ele ahilag uɗat aakku heppig.