1 Stori 18 - Nobonob Baibel

Dawit nug kekeɗ aun aun eɗattom

¹ Amu Dawit nug king ba dayaya, nug Pilistia dilag daup eɗatta he, Pilistia ag ban hekkulagnu elele iitta daappig. Nug anam ha, nug Gat, aab naunau aab amu talilidna daappig ele Pilistia eppelagppanu awe, Israel dilag daappig.

² Amu Dawit nug Moap dilag daup ele ban ha eɗatte, ag nug waappa daan, ag en takis bia, hanhan Dawit medattappig.

³ Laa amu, Soba dilag king Hadateser nug nuhikkud daup ele ag gona, Yupretis leppa appa wan laa aon gumaglagnu ukkaeg, Dawit nuhikkud daup ele ag ahan ukkaeg, Hamat guguittak, appa ag Hadateser aɗi ele ban heppig. Ag appa ban hena, Dawit nug Hadateser eɗittom.

⁴ Nug eɗitta, nug Hadatesernu bannu karis 1,000, daup ag bannu karis attan daan, ban heppig ele 7,000, danab ag baelkadppa oinna, ban heppig ele 20,000 aɗalattom. Dawit nug anam ha, nug hos karis eeɗppig ele ⌊ag baula banppa gomananu⌋, nug hos amu baelag diɗi otaɗattom. Hos 100ib nug baelag diɗi ii otaɗattom.

⁵ Dawit amu he, Aram dilag daup Damaskusnu ag Soba dilag king Hadateser ehanidkkulagnu uɗieg, Dawit nug Aram dilag daup 22,000 aqe mauhppig.

⁶ Dawit nug anam ha, nug he, nuhikkud daup laala ag Aram dilag wanppa daaegeg, Aram ag nug waappa daanna, en takis bia, hanhan Dawit medattappig. Aben ohppa Dawit nug appa ukka, ban heum ele amu, Yawe Nug he, Dawit nug nuhikkud kekeɗ eɗadttom.

⁷ Amu Hadatesernu ban daup ikki ag guppiɗ golppa hak aɗan oippig amu, Dawit nug daup amu eɗatta, nug ahilag guppiɗ awa, diia Jerusalem ukka, appa meum.

⁸ Laa amu, Hadateser nug aab Teba, Kun ele gumatom, amu Dawit nug aab aɗit amunu bras huanak awa ukkom. Nug awa ukke, dimppa Solomon nug Kayaknu mettid lag buuom, haen amuppa nug tappiɗ naɗi okkai brasppa hak onig Yu, biidod okkai aɗit, amu keeke laala brasppa hak ele amu, nug bras amuppa keeke amu heum.

⁹ Amu Hamat dilag king Toi nug Dawit, Soba dilag king Hadateser, nuhikkud daup oh ele eɗattom doyom.

¹⁰ Tatam Hadateser nug Toi eɗidkkunu ban haaha dayom amunu, Toi nug Dawit Hadateser eɗittom doya, nug he, nug bekka Hadoram, nug King Dawit humidkkunu, Dawit nug Hadateser eɗittomnu amegppa, “Ena heme,” ele akkunu, gumitta teum. Nug keeke digdig silwappa, golppa, brasppa hak ele Dawit medakkunu awa ukkom.

¹¹ Nug keeke amu awa ukka, King Dawit mette, Dawit nug keeke amu oh Yawenu tituana mettom. Nug tatam Edom, Moap, Amon, Pilistia, Amalek ele ban haaha, wan amu ohppanu silwa, gol ele awa, Yawenu tituana mettom, anamib nug keeke Hadoram awa uɗiom ele Yawenu tituana mettom.

¹² Seruia bekka Abisai nug oolnu noak onig Yunu Oolnu Noak appa Edomnu ban danab 18,000 aqe mauhppig.

¹³ Abisai anam he, Dawit nug nuhikkud daup laala ag Edom daaglagnu maattom. Nug anam maatte, Edom danab ag Dawit waappa daappig. Yawe Nug he, Dawit nug adeppa adeppa kekeɗ ele ban hekkulagnu ukkom amu, nug kekeɗ eɗadttom.

Dawitnu danab okkai

¹⁴ Dawit nug Israel danab ah oh gumattom. Nug gumattatta, nug nai doya mala hettoɗia epeɗia elele mettak kobol, kobol tutukkuppa ele ag gumattom.

¹⁵ Seruia bekka Joap nug ban daup ikki anuqak daye, Ahilut bekka Jehosapat nug yaak danab dayom.

¹⁶ Ahitup bekka Sadok, Abiatar bekka Ahimelek ele, aa am mana mettak danab daapiɗ. Sawsa nug nai yaak danab dayom.

¹⁷ Jehoiada bekka Benaia nug danab Dawit gumappig, amuam Keret danab, Pelet danab ele, nug amu dilag okkai daye, King Dawit bekkod ag nuhig ehanittak anuqak danab okkai daappig.