1 Samuel 8 - Nobonob Baibel

Israel ag kingnu appig

¹ Samuel nug anam haaha, kaino meum. Haen nug kaino ma amu nug he, nug bekoɗ aa beya, Israel dilag epeɗiak danab daapiɗ.

² Nuhig nid danab naanaeg amu, nug onig Joel; nug amag am Abaiya. Aa aab onig Berseba daayya, epeɗiak uɗat hepiɗ.

³ Aa anam hepiɗ, amge aa mamelah ippu ippuanatom ele amu, aa ib amu ii dim lamidpiɗ. Iitta. Aa men doɗo ib ena iittappa aoglahnu hepiɗ. Aa danab ag epeɗiak uɗat hekkulahnu uɗippig, haen amuppa aa lokkumakppa eheɗ haknu ehanittak aopiɗ. Aa nai doya mala hettoɗia epeɗia elele mettak kobol amu, aa amu dab-ii-mepiɗ; aa men doɗonu aakkuib dabmepiɗ. Diig amuppa amu, aa epeɗiak tutukku iinab hepiɗ.

⁴ Aa anam heehe, Israel dilag ikki danab oh ag ahan qagmena, Samuel gumidna, Rama goppig.

⁵ Ag gona appig. “Na am kaino meme. Na begapaɗ amu, aa nahip hak ena ii dim lamidttep amunu, ig wan laappan danab king ele bia, ig king ele daagnignu na danab laa, nug ihinig king dayaya, ig gumigkkunu tituane!” aon appig.

⁶ Ag anam appig, amge haen Samuel nug ahilag nai, “Na king laa ig gumigkkunu mekke!” nug nai amu doya, nug oo ena iitta daye, nug Yawe amegppa amunu unuqittom.

⁷ Nug Yawe amegppa unuqitta a, Yawe Samuel amegppa aum. “Na keeke oh ag na hekkutnu atteb amu, na amu hekkut! Aɗinu? Ag na ahilag okkai daakkutnu di ii medappig. Iitta! Ag da ahilag king daakkulnu dimeɗappig.

⁸ Anukka, da Israel danab ah Isip wanppanu omalattitti, haen amuppa ag digmena, da dimeɗan, kayak hambuppuak noolagppa dup nona binag mak heppig, ag gemu ele anamib hetteb. Amu ag gemu amubia na dimedatteb.

⁹ Amunu na ahilag nai doon, dim lamidna he! Na amu hekkut, amge na tatam ag nau aomnanu dabmettak nai mattanna, na king nug ahilag okkai dayaya, nug ahilagppa aɗi aɗi keeke hekku amu, na amu ele appe dooglag!” awa aum.

¹⁰ Yawe Nug anam a, Samuel nug amu doya, Yawe aum bia nug Israel danab ah, ag king laa gumadkkunu appig ele amu, nug ag amelagppa amu mattia, inam aum.

¹¹ “Danab laa, nug ahilag king daakku dayeb amu, king amu nug ahilagppa inam hekku. Nug ag bekkalkad diia heeb, ag ban daup danab daaglag. Daanna, laa ag bannu karis attan daan, ban hekkulagnu daaglag; laa ag hos attan daan, ban hekkulagnu daaglag. Amu laa ag king nug oiyaknu karis nuhigppa laih gokkunu heeb amu, ag baelagppa qaiettan, oiyaknu karis amu noob aon, anuqna gokkulag.

¹² King nug heeb, ag bekkalkad laa ag ban daup laa 1,000 dilag ikki daaglag; laa ag ban daup 50 dilag ikki daaglag. Amu king nug ele ag bekkalkad laa diia heeb, ag nuhig wan buun, nuhig ee aon, ma lakka menana, nuhig ban haknu keeke, am bannu karisnu keeke ele hena mettaglag.

¹³ Aria, nug ag aɗelkad ele laa diia heeb, ag nuhig leppu muttuɗig ena ele henana, ag nuhig ee digdig ele bappaidkkulagnu daaglag.

¹⁴ Amu king ele nug ahilkad wan enanag, ahilkad grep dad enanag, amu ahilkad olipnu dad enanag ele diia, nug nuhikkud ikki danab matteb, ag aoppeg, ahilag daaglag.

¹⁵ Nug heeb, ag ahilag ee aeg ohnu obatak eblaih tanig ele ooppanu obatak laippu king mettaglag; ag ahilag grep meu ele anamib hekkulag. Nug awa, nuhikkud ehanittak anuqak danab, maɗi nid laala ele madakku.

¹⁶ Laa amu, nug ahilkad maɗi nid maɗi ah ele diia, ahilkad makau, donki ena ena, nug amu ele diia heeb, ag nuhig uɗat hekkulag.

¹⁷ Nug ha, ag ahilkad doɗ ohnu nug obatak 10ppanu, obatak laippu awowa, nug heeb, ag Israel danab ah, ag nuhig begbeg maɗi nid daaglag.

¹⁸ King nug anam hekku amunu, haen amu uɗieb, ag king, nug ag gumadkkunu appig ele amu, ag nuhig hak amunu uug doon, ag nug waappa daamnanu Yawe unuqidkkulag, amge Yawe nug ahilag nai ii dooma,” awa aum.

¹⁹ Samuel nug Yawe oɗe awa, Israel amelagppa mattiom, amge ag amu ii dabmena, ag Samuel amegppa appig. “Anam bekkutai, amge ig king laa waappa daagnignu oonig hette. Ig dabmak amu ii uumta.

²⁰ Ig wan laa dilag danab oh daatteb bia daagnignu, king nug ig gumikkakka, ban haenppa nug ig noonig awa, anuqa ukka, ihinig ban hak gumakkunu, na king laa mekke!” aon appig.

²¹ Ag anam appig, Samuel nug amu oh doya male, nug Yawe amegppa, ag aɗi appig mattie doyom.

²² Samuel nug mattie, Yawe doya, Nug aum. “Na ahilag nai dim lamidna, king laa matte!” awa aum. Nug anam a, Samuel nug Israel danab ah oh amelagppa, ag eɗun lakka gokkulagnu aum.