1 Samuel 31 - Nobonob Baibel

Saul bekkod ele mauhppig

¹ Amu Pilistia ban danab ag Israel ban danab ele ban hena, Israel ag oolna goppig. Pilistia ban danab ag qauko Gilboa appa Israel ban danab kuɗum aqaeg mauhppig.

² Pilistia ag anam hena, ag Saul bekkod ele huana lamadna gona, nug bekkod ewam onilag Jonatan, Abinadab am Malkisua ele oh aqaeg mauhppig.

³ Ag Saul bekkod, nid danab ewam oh aqaeg mauheg, ban huan hena gona, Saul gukkuidna tena, Pilistia ban danab latppa ban hetteb ele ag Saul lamidna gona qeeg, nug guittak nau awom.

⁴ Saul nug guittak anam awa, nug danab bannu keeke nuhig maotte ele amegppa aum. “Pilistia danab amu, ag Kayak ii dootteb, ag uɗin, da aniɗna, yaaiɗna, ag da beɗul komanman nau kuɗum qettamnanu, nahip qep elab gaɗappa daatte amu eeɗna aon, iuppe mauhei!” Saul nug anam aum, amge danab ban hak keeke nuhig mawom ele nug eheɗ nau baɗom amunu, nug Saul aum bia ii he, Saul nug nukka qep elab ⌊nuhig⌋ awa, amuppa nukka ha mauhom.

⁵ Saul nug anam he, danab Saulnu ban haknu keeke maotte ele, haen nug Saul mauhom antta amu, nug ele qep elab nuhig awa, amuppa ha mauhom. Nug Saul ele oh aakku mauhpiɗ.

⁶ Keeke amu beegeg, deɗ amuppaib Saul, nug bekkod, nid danab ewam, amu danab Saulnu ban hak keeke mawom, amu ban danab laa ag Saul gumappig ele, ag oh deɗ amuppaib mauhppig.

⁷ Saul nug, amu laala ele ag anam mauheg, Israel danab ah oolnu noak onig Jesril heqo laih daatteb, amu Israel le Jodan heqo laih appa daatteb, amu ele, ag Israel ban danab oolna ukkaeg anattona, ag Saul, nug bekkod ele mauhppignu nai ele doyona, ag ahilkad aab uun, oolna goppig. Ag oolna ukkaeg, Pilistia danab ah ag uɗin, aab amuppa daappig.

⁸ Ban hak amu anam ukke, Israel ag oolna ukkaeg, wagɗe deɗ amuppa Pilistia ag Israel ban danab mauhppig beɗulagppanu keeke akkaglagnu uɗippig. Ag keeke aona oina, Saul mauhom gaɗa, nug bekkod ewam mauhppig gaɗalag ele qauko onig Gilboa niiegeg anadppig.

⁹ Ag Saul mauhom gaɗa anidna, ag nug baag otaɗna ikki aon, nuhig bannu klos uɗidna awon, ag nai awa ukkak danab, ag Israel ban eɗidppig, ag nai amu aon, ahilag kayak hambuppuak dottolkad dilag mettid lag, amuppa gona akkulagnu, am Pilistia danab ah ele amelagppa appeg dooglagnu maatteg goppig.

¹⁰ Ag anam hewona, ag Saulnu bannu lamen aon, ag ahilag kayak hambuppuak Astoret iɗu iɗu, ahilag mettid lag, amuppa mewona, ag Saul gaɗa amu Betsan aabnu aɗ attan aihppig.

¹¹ Pilistia ag anam heeg, haen aab Jabes, aab amuam Gileat atuppa daatte amu, aab amunu danab ah ag Pilistia ag Saul, nuhigppa keeke heppig, ag nai amu doona,

¹² danab ɠagattag aab amuppanu oh ag ahan, ag tuqan gona gona, Betsan aabppa tena, ag Saul gaɗa, bekkod ewam gaɗalkad ele aab amunu aɗppa aihak daappig amu, ag gaɗalkad amu oh akkan, eɗun Jabes gona, mauhak gaɗalag amu aab aɗuppa manadppig.

¹³ Ag mauhak gaɗalag amu manatteg ewe, danab manadppig ebehilkad amu akkan, ad tamarisk laa Jabes daatte, amu waappa boumadppig. Ag boumadna malona, ag ee ohnu kud mena daaeg ukke, deɗ eblaih aɗit ele uue, ag eɗun ee lappig.