1 Samuel 29 - Nobonob Baibel

Akis he, Dawit nug eɗua, Siklak ukkom

¹ Pilistia ag uɗin, ahilkad ban danab Apek guguittak qagmena, haen tutu dayaknu aab kalan daaegeg, Israel ag am laih Jesrilnu le qeppuɗia betteppa haen tutu dayaknu aab kalan daappig.

² Ag anam aab kalappigppa daanna, deɗ laa Pilistia danab okkai ag ahilkad ban danab ele ahappig; huu laala am ahilkad danab 100 ele, huu laala am ahilkad danab 1,000 ele. Danab okkai okkai ag ahilkad huu ele ag ahan, banppa gokkulagnu laippu tappan ukkaegeg, Akis nug nuhikkud ban danab ele, amu Dawit, nug nuhikkud ban danab ele ag ahan, dimulagppa dim lamadna tappa ukkak laippuppa uɗippig.

³ Ag anam tappa ukkak laippuppa gonana, Pilistia dilag okkai ag Dawit anidna, nuhig huu ele anadna, ag Akis oɗ mettan appig. “Hibru ameg imuam aɗinu ag ig ele ippa daattem?” aon appig. Ag anam aeg, Akis nug nob ma amelagppa aum. “Nug am Dawit. Danab amu nug anukka Saul, Israel dilag king, nuhig ban daup ikki laa dayom. Amge nug Saul uuitta, nug uɗie, da ele maɗ laippu kalam laala ele anam daamuɗ. Nug uɗie, ii aakku daauɗ uɗiom, haen amu ohppa da nug anidmi, am nug eheɗ nakok laa ii heum.” Akis nug anam aum.

⁴ Nug anam aum, amge Pilistia dilag okkai laa ag nuhignu oolag nauhe, nug amegppa appig. “Na heppe, nug eɗua ukka, aben nug daakkunu mettame ele amu, nug appa dayaɗ! Nug ig ele oh daat, Israel ele ban ii hemata. Nug amu hekku dayeb amu, ig Israel ele ban hetata, nug eɗua Israel ehanadkku. Nug anam ha, ihinkad danab aqeb mauhkkulag amu, nug nuhig okkai, Saul, nug nug amegppa eɗua ena daakku. Nug anam bekkunu ib laa, ib amu eɗidkkunu laa ii daatte.

⁵ Dawit imuib amu, ag ahi laa inam iite ettan goɗappig? ‘Saul nug kekeɗ 1,000 aqe mauhppig, amge Dawit nug 10,000 aqe mauhppig.’ ” Ag anam appig.

⁶ Ag anam aeg amu, Akis nug Dawit onigppa e do, nug Dawit amegppa aum. “Genabnab genab, Yawe bauklel daatte, genab amubia na dahilnu kobol enaib heme amunu, ban imuppa na geha da ehaniɗkkutnu ool daatte. Haen na da gumiɗna uɗime uɗie, gemu batak da nahip-ppa eheɗ hak nakok laa ii anidmi, amge Pilistia danab okkai laa ag na geha ig ele daagnignu amu, ag nahipnu uug dootteb,

⁷ am na eheɗ laa heppe, Pilistia danab okkai ag geha nahipnu ag oolag nauhmanu, na oot maɗoɗ ele eɗun ukke!” awa aum.

⁸ Nug anam aum, amge Dawit nug nob ma aum. “Amge aɗi eheɗ hemi? Da, nahip maɗi nid, da na gumitte uɗimi uɗie, gemu batak amu, dahil kobolppa, dahil uɗatppa ele, na keeke aɗi eheɗ daye anidme amunu, da goppi, dahil naɗinu kekeɗ ele ban hekkunignu elele iitta?” awa aum.

⁹ Dawit nug anam a, Akis nug aum. “Da ele anam doottem. Kayaknu engel laa nug da ehaniɗlolob, da amunu enanag doolom, amu da nahipnu enanag amubia doottem, amge Pilistia dilag okkai ag, ‘Aib,’ ana malappig amunu amu, na ig ele banppa ii gomata.

¹⁰ Anam daatte amunu, Dawit, butti buttuanab na nahipad huu ele, ag Saul uun, na ele da gumiɗna uɗippig amu, wagɗebeb ag oh ahan, eɗun ukkeg!” awa aum.

¹¹ Akis nug anam a, deɗ amu uue, wagɗe buttuanab Dawit nug nuhikkud danab ele ag ahan, eɗun Pilistia wanppa, ⌊ag daatteb abenppa⌋ goppig. Ag ukkaeg amu Pilistia ag Jesril goppig.