1 Samuel 23 - Nobonob Baibel

Dawit nug ukka, aab Keilanu danab ah ehanattom

¹ Aria, haen laappa, laa ag Dawit amegppa inam appig. “Pilistia ban danab ukkaeg, Israel dilag aab onig Keila, ag ag ele ban hetteb. Ag ban henana, Israel ag ee aeg dattanu maɗ imunu aoppig ele amu, ag amu aotteb,” appig.

² Dawit nug nai amu doya, nug Yawe oɗ metta aum. “Da Pilistia ban danab banelag gokkul, o iitta?” awa oɗ mettom. Nug Yawe oɗ mette, Yawe Nug nob ma aum “Ao, na gona, Keila danab ehanadna, Pilistia aqe!” aum.

³ Yawe Nug Dawit amegppa anam a, nuhig ban danab ag goppeg, Pilistia daup ele ban hekkulagnu amu doon, ag eheɗ baɗan, Dawit amegppa inam appig. “Ehe, ippa Juda wanppa amu ⌊Saul nug iqakkunu hette amunu,⌋ ig baɗak nakok okkai doottem, amge ig Keila gota, Pilistia dilag daup ele ban hekkunig dayeb amu, ig baɗak huanak doognig,” aon appig.

⁴ Nug nuhikkud ban danab ag anam aeg, Dawit nug eɗua ban amu attem hekkulagnu nug Yawe oɗ mette, Yawe nug amegppa aum. “Da geha na ehanidppi, na geha Pilistia amu eɗadkkut amunu, na ahan, Keila gona, Pilistia aqe!” Yawe Nug anam amegppa aum.

⁵ Yawe Nug anam a, Dawit nug nuhikkud ban danab ele ag ahan, Keila gona, Pilistia ban danab ameg appa daappig amu, ag ag ele ban heppig. Ag Pilistia ele ban hena, ag Pilistia kuɗum aqeg mauhatteg, makau keeke, ag agappig. Dawit nug nuhikkud ban danab ele ag anam heppig. Ag anam ehanatteg, Keila ag eheɗ, nau ii aoppig; iitta.

⁶ Ahimelek bekka Abiatar nug oola, Dawit gumitta ugakka amu, nug lamen enanag-epod am aɗa ukkom. Aɗa ukkom amu, aria Dawit nug nuhikkud ban danab ele Keila ukkaegeg, Abiatar nug ag ele oh gona, nug lamen amu ele awa ukkom.

Saul nug Dawit aɗakkunu dim lamittom

⁷ Dawit nug nuhikkud daup ele ag Keila appa anam hena, ag Keila appa daappig. Appa daaegeg amu, danab laa ag Saul amegppa, Dawit nug Keila daattenu appig. Aeg, Saul nug aum. “⌊Amu ena!⌋ Dawit nug aab laa, aab amuam aɗ ele, amu aɗ amuppa od oɗeppa od, manak qaknu keeke ele daye, nug amuppa daatte amunu, Dawit nug nukka maniguittom. Kayak Nug Dawit da eppelppa meum,” awa aum.

⁸ Saul anam awowa, nug nuhikkud ban danab ele ag gona, Keila aab oo mettan, ag Dawit nuhikkud daup ele ban hekkulagnu nug nuhikkud ban danab oh onilagppa e, ag nug gumidna uɗippig.

⁹ Saul nug nuhikkud ban danab qagmatte, dimppa Dawit nug Saul uɗia, nug qeeb mauhkkunu ha babaittom, nug nai amu doya, nug mana mettak danab Abiatar amegppa aum. “Lamen enanag-epod amu aon uɗie!” awa aum.

¹⁰ Dawit nug anam a, Abiatar nug lamen awa do, Dawit, nug inam unuqitta aum. “O Yawe, na Israel dilag Kayak, da am nahip maɗi nid. Genabnab genab, da Saul nug geha da iweb mauhkkulnu, nug Keila ippa uɗia, aab imuppan danab ah oh ele aqeb mauhkkulagnu maittak awom doomi.

¹¹ O Yawe, da nai anam doomi amunu, da na oɗ medattem; Keila danab ah ag da Saul eppegppa meiɗkkulag, o iitta? Am da doomi bia Saul nug genab ippa uɗikkute, o iittate? O Yawe, na ig Israel, ihinig Kayak daattem amu, na da, nahip maɗi nid amu, na da amunu appe dookkulnu ool daatte,” awa aum. Dawit nug Yawe anam oɗ mette, Yawe Nug nai nob ma aum. “Geha nug uɗikku,” awa aum.

¹² Yawe Nug anam a, Dawit nug eɗua oɗ metom. “Saul nug geha uɗia beeb, Keila danab ah ag geha da, dahilad danab ele awigna, Saul eppegppa meigkkulag, o iitta?” awa aum. Nug eɗua, Yawe anam oɗ mette, Yawe Nug nob ma aum. “Geha ag na Saul eppegppa meidkkulag,” awa aum.

¹³ Yawe Nug anam aum amunu, Dawit nug nuhikkud danab ele, ag ahilag ebqak amu 600 keeke anam, ag ahan, Keila uun gona, haen tutu aben laappa daappig. Haen tutuib dayona, ag appanu ahan gona, aben laappa ele haen tutuib daappig. Ag anamib henan goppig. Amu Saul nug, “Dawit nug nuhikkud danab ele ag Keila uuppig,” doya, nug Keila ii ukkom.

Dawit nug atu taɗakppa dayom

¹⁴ Amu Dawit nug nuhikkud danab ele ag atu taɗakppa oinna, ban haknu aben ɠagattag laalappa daana, atu taɗak onig Sip, qauko qauko daattebppa ele daappig. Ag anam oiyegeg amu, Saul nug haen oh Dawit mattia, dim lamitta oiyom, amge Kayak Nug Dawit ii paɗe, Saul eppegppa ukkom.

¹⁵ Amu Dawit nug ukka, aab laa onig Hores, Hores am atu taɗak onig Sip, appa dayom amu, Dawit nug appa dayaya, deɗ laa nug Saul nug qeeb mauhkkunu uɗieye nai doyom.

¹⁶ Dawit nug Hores dayeye, Saul bekka Jonatan nug Dawit gumitta ukka, ɠagattag qetta, Kayaknu ooppa genab doyak nuhig paɗamanu anana, Nug nai tuɗitta Dawit amegppa aum.

¹⁷ “Na aib baɗame! Aɗinu? Mama nug na nitteb mauhkkutnu ib laa ii anidma. Na am Israel dilag king bena daakkut, amu geha da na waatppa nahip ehanittak okkai daakkul. Mama nug amu ele dootte.” Jonatan nug Dawit amegppa anam aum.

¹⁸ Jonatan nug a amu, aa Yawe noobppa geha aa aya, ⌊aa nug ehanittak hekkulahnu⌋ aa baula nug tituanya nai qagapiɗ. Aa nai qakkak hewoya, Jonatan nug eɗua appagppa ugekke, Dawit nug Hores dayom.

¹⁹ Aria, Sip aabppanu danab ah laala ag ahan, Gibea gona, Saul gumidna wana, inam amegppa appig. “Dawit nug ig oonigppa ban haknu aben ɠagattag laala Hores appa guguittak daatteb ele amu, nug appa daatte. Hores am qauko nakok onig Hakila, appa ana daatte. Hakila am Jesimonnu yau uɗitteppanu daatte.

²⁰ Dawit nug appa ana daatte amunu, O king, haen adekkuppa na uɗin danab amu aɗakkutnu ena doon, na uɗippe, ig geha nug na eppenppa mekkunig.” Sip danab ah ag Saul amegppa anam appig.

²¹ Sip danab ah ag anam aeg, Saul nug ag amelagppa aum. “Ag dahilnu oolag dootte amunu, da Yawe Nug itittak ena ag madakkunu ool daatte.

²² Amge laala ag inam da amelppa aeg doomi. ‘Dawit nug am lokkumakppa kobol nau hekkunu doya auta autanab awak danab,’ amunu ag eɗun gona, keeke oh attemnab daatte amu, ag pehettan tutukku anidna, aben nug daatte, amu ele pehettan anidna italna autna aweg! Laa amu, ag imu ele hettoɗin, danab aun nug aben amuppa Dawit anttom ele antteg!

²³ Amu ag gona, nug lokkumtte, aben amu oh italna anidna, eɗun uɗin, amelppa aig! Appeg, da nug genab appa daatte doye amu, da geha ag ele gota, da geha nug antte aɗakkul. Genab, nug Juda wanppa daatte dayeb amu, da nug aɗakkulnu, da Juda danab ohppa da nug mattie mattie antten aɗakkul,” awa aum.

²⁴ Saul nug Sip danab anam amelagppa a, ag ahan, anuqna gona, Sip aabppa teppig. Saul nug geha dimppa gokku. Ag gona teppig, ⌊amge⌋ Dawit nug nuhikkud ele ⌊ag matu⌋ ahan, ag yau uɗitteppanu gonana, ag Jesimon eɗidna gona, atu taɗak onig Maon, ag appa daappig. Maon am atu taɗak onig Araba, amunu laih laa aakku.

²⁵ Amu Saul nug nuhikkud ban danab ele ag ahan uɗin, Dawit anidna aɗaglagnu digmena mattiegeg, am laa Dawit amegppa aeg, nug aha, tuɗitta ukka, atu taɗak Maon atteb, amuppa men okkai laappa ukkom. Nug ukka, appa dayom. Nug ukka appa dayeye, Saul nug amu doya, nug Dawit dim lamitta ukkom.

²⁶ Amu Saul nug Dawit dim lamitta ugekke, nuhikkud ban danab ele ag gona, qauko heqo laihppa ukkaegeg, Dawit nug nuhig huu ele ag qaiqaɗ qauko amu heqo laihppa Saul, nuhig huu ele ag Dawit nuhig huu ele aɗualadmananu oolna goppig. Dawit nug nuhig huu ele anam heeg amu, Saul nug nuhig huu ele lamadppig. Lamadna gona, Dawit gukkuidna tenana, ag Dawit nuhig huu ele oo mattaglagnu heegeg,

²⁷ aria haen amuppanab am nai awa ukkak danab laa ukka, Saul toppa ta, amegppa aum. “Pilistia ban danab ag wan ihinigppa uɗieg, ig ele ban hetteb amunu, na paha ukke!” Danab amu nug Saul amegppa anam aum.

²⁸ Nug Saul amegppa anam a, Saul nug amu doya, Dawit lamittom amu uua, nug eɗua ukke, Pilistia ele ban heppig. Nug anam he, danab ah ag wan maha amu onig ataɗna, “Sela Hamalekot” appig.

²⁹ Saul nug eɗua ukke, Dawit nug aben amu uua ukka, nug ukka, laih ban haknu aben ɠagattag laala appa daatteb ele, aben onig Engedi, nug appa ukka dayom.