1 Samuel 22 - Nobonob Baibel

Saul nug a, laa nug Yawenu mana mettak danab Nop aabppa daappig amu aqe mauhppig

¹ Dawit nug anam he, king aum amunu Dawit nug aha, Gat uua, oola ukka, aab Adulam guguittak, wan oɗe laappa dayom. Dawit nug ukka dayeye, nug awakkud, amu nuhigppan laa ele ag nug appa daatte doon, ag ahan ukkaeg, oh appa daappig.

² Ag anam daaegeg, danab kuɗum uɗieg, Dawit ele daappig. Amu ag oolagppan laala ag uug nauppa daappig; am oolagppan laala ag lon mameg men doɗo amu eɗun ii medappig; am ag oolagppan laala ag gabmannu lamittak kobolnu, amu keeke laalanu ele bahilag yom. Ameg amu ag ahan uɗieg, Dawit ele daappig. Dawit nug ahilag ikki danab dayom; 400 danab anam amu, ag uɗieg, Dawit ele daappig.

³ Danab ag ukkaeg, Dawit ele daanna, Dawit nug aha, mameg, anig ele diiate, ag Mispa goppig. Aab amuam Moap wanppa dayom. Nug omalate gona, Moap wanppa tena, amu Dawit nug Moap dilag king amegppa inam aum. “Mama, anai ele, aa ena na ele daappeg ukkeb, haen Kayak Nug dabmak nuhig dahilnu heeb, miag bekku batakku am elelete, o iittate?” awa aum.

⁴ ⌊Dawit nug amunu king oɗ mette, King nug amunu, “Yo,” aum⌋ amunu, Dawit nug mameg, anig ele uuate, Moap dilag king ele daaegeg ukke, haen Dawit nug ban haknu aben ɠagattag uuom batak.

⁵ Dawit nug ban haknu aben ɠagattagppa, nug appa dayeye, deɗ laa propet onig Gad, nug Dawit amegppa aum. “Na ippa aib daame. Iitta. Na ahan, eɗun Juda wanppa ukke!” awa aum. Nug Dawit amegppa anam a, Dawit nug aha eɗua, Juda ukka, aben laa ad kuɗum ele, aben laa amu onig Heret adappig amu, nug appa ukka dayom.

⁶ Dawit nug eɗua, nug laih Juda dilagppa dayeye, deɗ laa Saul nug danab laa nug Dawit, nuhikkud ele ag adeppa daatteb anttomnu nai doyom. Saul aab Gibea guguittak, qauko nakok laa igippa ad tamarisk laa waappa dayom. Saul nug ban gudkkud eppegppa aɗa, dayak balalppa dayeye, nuhikkud ikki danab ag gukkuidna hippaidna talilidna daappig.

⁷ Saul, am nuhikkud danab ele ag appa anam daanna, Saul nug nuhikkud danab amelagppa aum. “Ag Benyamin buɗub, ag doyeg! Jesi nug am Juda buɗubppanu danab, amu nug bekka king ba keeke, nug geha wan maha, am grep dad keeke ag madakkute? Nug geha king bekku dayeb amu, geha nug heeb, ag ban daup ikki bena, ag oolagppan laala ag geha danab 1,000 gumadnana, laala geha danab 100 gumadkkulagte? Iitta!

⁸ Ag oh da nein qekkulnu hetteb amunu, ag oolagppan laippu laa nug da amelppa nid dahil, nug Jesi bekka ele aa nug tituanak heya, aa geha layam hanhan daaglah amu, laa da amelppa amunu ii aum. Ag oolagppan laa dahilnu dabmaama, am dahil keekenu ele nakok ii dabmeum. Ag oolagppa laa nug da amelppa nid dahil nug maɗi nid dahil Jesi bekka amegppa, nug lokkuma da iweb mauhkkulnu, nug gemu hette bia amegppa aum amu, laa da amelppa ii aum.” Saul nug anam aum.

⁹ Saul nug amu aum, am ⌊laa daappig ag nai nob nakok ii meppig,⌋ amge Edom danab laa onig Doeg, nug Saulnu ikki danab laa daappig oolagppa dayom amu, nug Saul amegppa inam aum. “Deɗ laa da Jesi bekka anidmi. Nug aab Nop, appa ukka, Ahitup bekka onig Ahimelek anttom.

¹⁰ Nug ukka, Ahimelek gumitta te, Ahimelek nug Dawit nug keeke aɗi hekkunu amu, nug amunu Yawe oɗ mettom. Nug anam oɗ mettowa, dimppa nug Dawit ee metta, nug Pilistia ted Goliat, nug nuhig qep elab ele mettom,” awa aum.

¹¹ Doeg nug nai amu mattia male, King Saul nug nai me, Ahitup bekka, Ahimelek toppa ukke, nug, amu nug mameg baekkudppa ele oh ag geha nug gumidna uɗiglagnu aum. Danab amu oh ag am aab Nop, appa mana mettak danab daappig. Saul nug ag uɗiglagnu nai me ukke, ag uɗin, Saul gumidna beppig.

¹² Ag gona Saul gumidna teeg, Saul nug Ahimelek amegppa inam aum. “Ahitup bekka, na nai da attem imu amu, na doye!” Nug anam a amu Ahimelek nug nai nob ma amegppa aum. “Ao, naɗi, da daattem,” awa aum.

¹³ Ahimelek nug anam a amu, Saul nug nai nob ma aum. “Aɗinu na heppe, da nein qekkulnu hettem? Na Jesi bekka ele aa anam hettep. Aa heyaya, na nug ee mettona, qep elab ele mettame. Na ele keeke oh Dawit hekkunu amu, na Kayak amunu oɗ mettame. Na amu heme, amuppa na nug da waalppa ii daamanu, da oɗel tappeb nekkunu ɠagattag qettame. Am gemu nug da iweb mauhkkulnu ib maditte. Nug haen laa, danab ag nug ii anidtteb, haen amuppa amu, nug anam hekku,” awa aum.

¹⁴ King Saul nug anam a amu, Ahimelek nug nai nob ma amegppa aum. “Nahipad maɗi nid oh ag nahipib dabmena oo metta ii uuak kobol dim lamidtteb, amge Dawit nug amu ha auta autanab aotte. Nug am na tanap, nug danab ag na gumidtteb ele amu, nug am amu dilag okkai. Laa ele, danab ah oh na lautppa daatteb, ag nuhignu ena elelenab dootteb.

¹⁵ Anukka deɗ laala da Dawit geha aɗi hekkunu, da Kayak oɗ medattami ⌊amu haen amu ohppa na dahilnu oot ii nauhom⌋. Dawit keeke eheɗ laala heum amu, da, nahip maɗi nid, da amunu nai nakok laa ii doomi amunu, na, nahip maɗi nid da, na dahilnu, ‘Nug eheɗ heum,’ aib ame. O na da mamel baekkudppa oolagppanu laa nug eheɗ heumnu ele aib ame,” awa aum.

¹⁶ Ahimelek nug anam aum, amge King Saul nug aum. “Iitta! Ahimelek, na amu na mamen baekkudppa ele ag mauhkkulag,” awa aum.

¹⁷ Saul nug Ahimelek amegppa anam awowa, nug nuhig gumak danab nug guguittak daappig amelagppa aum. “Yawenu mana mettak danab imu ag Dawit ehanidppig. Haen nug dahilppanu oolom ag dooppig, amge ag da amelppa nakok laa ii appig. Ag anam heppig amunu, ag ahan, mana mettak danab imu oh, ag aqappeg mauheg!” Saul nug anam ag amelagppa aum, amge Saulnu maɗi nid amu ag danab amu, ag am Yawenu mana mettak danab doon, ag aqaglagnu uuppig. Ag uuppig amunu, ag ag aqappeg mauhkkulagnu, ag keeke laa ii heppig. Iitta.

¹⁸ Saulnu gumak danab ag mana mettak danab ameg amu aqaglagnu uueg, King Saul nug Doeg amegppa aum. “Na ahan, aqappe mauheg!” awa aum. Nug anam a, Doeg, nug Edom ted, nug aha, aqe mauhppig. Nug deɗ amuppa danab 85 aqom; ag oh am mana mettak danabib daappig.

¹⁹ Doeg nug amu hewowa, nug aha, aab Nop, mana mettak danab ag aab amuppa daappig amu, nug appa ukka, nug danab oh aqe mauheg; nug danab, ah, nid naunau, am nid yuɗ ele aqowa, nug makau, donki, am sipsip ele oh aqom.

²⁰ Doeg nug mana mettak danab amu oh aqe mauhppig, amge Abiatar, nug am Ahitup alag, Ahimelek bekka amu, nug Doeg eppegppanu oola, Dawit toppa, nug ele daaglahnu ukkom.

²¹ Nug Dawit gumitta ukka ta, nug Dawit amegppa aum. “Saul nug Yawenu mana mettak danab amu oh, aqe mauhppig,” awa aum.

²² Abiatar nug Dawit amegppa amu mattie, Dawit nug Abiatar amegppa aum. “Da Saul he oole gomi, deɗ amu da ukke, aab Nob, appa tein, Doeg dayeye anidmi amunu, da doomi, nug geha dahilnu Saul amegppa ab dookku. Da anam doomi amunu, na mamen baekkudppa ele mauhppig amu, amuam dahil da beɗulppa daatte.

²³ Anam amunu, na da ele daaɗu! Na aib baɗame. Danab nug na nitteb mauhkkutnu hette amu, nug da ele iweb mauhkkulnu hette, amunu, na da ele daagnih, geha na ena daakkut,” awa aum.