1 Samuel 18 - Nobonob Baibel

Saul he, Dawit nug ele daapiɗ

¹ Saul, Dawit ele aa mattiya malaeh, haen amuppa Saul bekka Jonatan, nug Dawitnu, da layalnab doya, Jonatan nug nukka nuhignu oo mauhtte, amubia nug Dawitnu oo mauhom.

² Am Saul nug Dawit nug ele daaglahnu ɠagattag amegppa anana, nug Dawit eɗua appagppa gokkunu uuom amunu, Dawit nug eɗua, appagppa ii ukkom.

³ Aria, Dawit nug aben Saul daatte, amuppa dayeye, Saul bekka Jonatan, nug nukka nuhignu oo mauhom, amubia nug Dawitnu oo mauhom amunu, nug Dawit ele aa nug tituana nai qakkak laa hepiɗ.

⁴ Am Jonatan nug nuhig lamen elab uɗa awa, Dawit metta, nug nuhig lamen nakok elab ele metta, amu nug qep elab, lat tanig, am nuhig matagiɗ ele mettom.

⁵ Amu keeke oh Saul nug he, Dawit ukka hekkunu daye, Dawit nug enaib heum amunu, Saul nug he, Dawit nug Saulnu ban daup ikki laa beum. Be, danab ah oh, amu Saulnu ban daup ikki laa oh ele, ag Dawitnu oolagppa enanag dooppig.

Saul nug Dawitnu nau ninig ele doya, qeeb mauhkunu doyom

⁶ Dawit nug Pilistia danab qe mauhe, dimppa Saul nug nuhikkud ban danab ele ag Pilistia danab lamadna malona, ag bannu keeke oh hena malona, aria gemu ag eɗun appalkad anen anen ukkaegeg amu, Israel aab ohppanu ah ag ahan, aab uun gona, ibppa King Saul aɗi uɗalag tena, ag gamag ahak ahi ettanna, ag tambarin henana, musik haknu keeke laappa ele henana, ahi goɗappig.

⁷ Ah ag ahi goɗanna, ahi inam edappig. “Haen kuɗum Saul nug danab 1,000 aqe mauhtteb, amge Dawit nug danab 10,000 aqe mauhtteb.” Ag anam anan ettanna goɗappig.

⁸ Saul nug ahi anam ettaeg doya, nug amu uua auta awom. Nug ag Dawitnu ena doon, anam ahi edattebnu oo aegnab be, nug aum. “Ah ag Dawit nug danab 10,000 haen kuɗum aqe mauhtteb atteb, amge ag dahilnu amu, ag da haen kuɗum danab 1,000ib aqattem atteb. Ag anam anana, ag heppeg, Dawit king bekkunu hettebtai?” Saul nug anam aum.

⁹ Amu deɗ amuppanab Saul nug digma Dawitnu, dahilppa anam daalon dabmak aɗom; tuɗitta ele anamib aɗom.

¹⁰ Aria, wagɗe deɗ amuppa ouɗi nau Kayak noobppanu ukka, wagainab ma, Saul uug nau mette, Saul nug nug laugppa dayeye, nuhig dabmak eɗitte, nai digdig mattiom. Nug anam heehe, Dawit nug haen oh Saul nug anam heehe, harp qeum amu, nug anam dayaya, harp qeeqe, Saul nug eppegppa ban gudkkud aɗa dayom.

¹¹ Saul nug ban gudkkud aɗa dayaya, nug inam dabmeum. “Da geha ban dahil eppi ukka, geha Dawit tutukku ya, geha ban aeg ukka, laih matula ukka, lag gilil ya, Dawit gililppa qataqeeb daakku.” Saul nug anam dabma, nug ban eum, amge Dawit nug dekkaɗom; ban nug ii yom. Nug anam he, Saul nug ban eɗua eum, am Dawit eɗua dekkaɗom; nug tatam heum bia heum.

¹² Yawe Nug Saul ele tatam daapiɗ, amu gemu Nug Saul uuitte, nug ele ii daattep, amge Nug Dawit ele daattep amunu, Saul nug Dawit baɗittom.

¹³ Saul nug Dawit baɗittom amunu, nug Dawit awa, ban danab 1,000 dilag ikki meum. Nug ban daup ikki anam me dayaya, nug piɗe oiyeye, nug Saul ele aa nug guguittak ii daapiɗ. Aa nug guguittak ii daayya, Dawit nug ban danab ameg nuhig amu diie, ag gona, Israel dilag kekeɗ ele ban heppig.

¹⁴ Am Dawit nug nuhikkud ban danab ameg ele, ag kekeɗ ele ban heegeg, Yawe Nug Dawit ele daapiɗ amunu, keeke oh Dawit heum amu, keeke amu enaib ukkom.

¹⁵ Am Saul nug keeke oh Dawit heum amu enaib ugekke antta, diig amunu Saul nug Dawitnu baɗom,

¹⁶ amge Dawit nug ban danab dilag okkainu uɗat amu enaib heum amunu, Israel, Juda ele ag nuhignu oolag mauhom.

Saul nug heeb ukkeb, Pilistia ag Dawit qeppeg mauhkkunu heum

¹⁷ Am danab ah oh ag Dawitnu oolag mauhom amunu, Saul nug inam dabmeum. “Da dakka Dawit ii qeppi mauhma. Iitta. Amge Dawit nug Pilistia ele ban henana, ag geha nug qeppeg mauhkku. Da amu ii hepa.” Saul nug anam dabmaama amu, nug Dawit amegppa aum. “Antte! Imuam nid ahin dahil tatamnu. Nug onig am Merap, amu na nug na waat daakkunu aokkutnu da ool daatte. Amge tatam aa ewau matulak ii awak, haen imuppa amu, na dahil ban danab tutukku daanna, na kekeɗ ele ban haknu amu, na ootppa ɠagattag doyak ele anidkkulnu ool daatte. Anam daappe, haen Yawe Nug ig Israel ig gopput, kekeɗ aun ele ban hekkunignu ab amu, aria na gona, ban amu hekkut. Aria, na anam henana amu, na da aɗel aokkut; iitta am iitta,” awa aum.

¹⁸ Saul nug anam a amu, Dawit nug nai nob inam meum. “Da am danab onil iitta. Mamanu aab ikki ele Israel ooppa onig iitta. Na am danab okkai, na am king amunu da, da na aɗen aokkulnu am elele ii doottem,” awa aum.

¹⁹ Dawit nug anam aum ⌊amge Saul nug Dawit Merap aokkunu ɠagattag ana, amu hekkunu deɗ meum⌋. Amge deɗ amu do, Saul nug Merap Dawit ii mettom. Iitta. Saul nug a, Mehola aabppanu danab onig Adriel, nug Merap awom.

²⁰ Amge Saul aɗeg laa, onig Mikal, nug Dawitnu oo mauhom. Nug nuhignu oo mauhe, Saul nug nai amu doya, nug ena doyom.

²¹ Saul nug oo gamag ahe, nug inam dabmeum. “Da geha Dawit, nug da aɗel aokkunu elele appi, ewau matulak awaknu nai amu da nug ele qagapuɗ, da aɗel nug geha Dawit mauhkkunu ib daakku. Da geha appi, ah nob daden amu, Dawit nug Pilistia ele ban hekkulagnu daakku, amu ag geha nug qeppeg mauhkku.” Saul nug dabmak anam awa, nug Dawit amegppa baula aum. “Gemu na geha da aɗel amu aokkut,” awa aum.

²² Saul nug Dawit amegppa anam awowa, dimppa nug nuhikkud ehanittak danab ele amelagppa, ag Dawit amegppa inam akkulagnunab aum. “Ag gona, Dawit anidna, haen nug nukkaib dayebeb, ag nug amegppa da attem imu ag aig! ‘Antte! King Saul nug nahipnu ena dootte. Ig nuhikkud ehanittak, ig ele ig nahipnu oonig hette. Ig oh anam doottem amunu, na Mikal, Saul aɗeg, aokkut am ena!’ ” Saul nug ag Dawit amegppa anam akkulagnu aum.

²³ King Saul nug nuhikkud ehanittak laa ag Dawit amegppa anam akkulagnu a, ag gona, Dawit amegppa nai amu aeg, Dawit nug nob ma, amelagppa aum. “Amu laa nug king aɗeg aokku am, keeke hamute? Iitta! Amu keeke okkai. Da elele iitta. Aɗinu? Da am danab men doɗo okkai iitta; da ele am danab onil iitta,” awa aum.

²⁴ Dawit nug Saulnu maɗi nid amelagppa anam a, ag eɗun gona, Saul amegppa keeke oh Dawit aum, ag amu nug amegppa madippig.

²⁵ Ag Saul amegppa anam aeg, Saul nug he, ag Dawit amegppa akkulagnu eɗun goppig. Ag nug amegppa inam akkulagnu aum. “Aɗeg daden en amu, king nug keeke laalanu oo ii daatte. Iitta. Nug inamnu oo daatte. Geha na gona, Pilistia ban danab 100 aqappe mauhppeg, geha na hipalag gaɗa amu otaɗadna, akkan Saul toppa uɗie, amu geha ah daden daakku. King nug Pilistia ag kobol nau kuɗum ig Israel ihinigppa heppig doya, nug Pilistia ag amunu nob nau aoglagnu laa amu, ag anam mauhkkulagnu oo daatte.” Saul nug ag Dawit amegppa anam akkulagnu aum, amge Saulnu dabmaknab am, “Geha Pilistia ag banppa Dawit qeppeg mauhkku,” dayom.

²⁶ Saulnu maɗi nid amu ag Saulnu nai doon, ag gona, Dawit amegppa anam aeg, Dawit nug doya, nug ena doyom. Nug oo ena daye, nug king tana daakkunu nai amu dim lamidkkunu heum. Saul nug deɗ mettom, Dawit nug amu ii eɗidmanu, nug Pilistia ban danab hipalag gaɗa amu tatam akka uɗieb, deɗ amu bekkunu amu,

²⁷ Dawit nug ban danab ameg nuhig, nug gumadtte ele, nug a, ag Dawit ele gona, Pilistia ban danab 200 aqaeg mauhppig. Aqaeg mauheg, aria Dawit nug hipalag gaɗa otaɗa akka uɗia, King Saul tana daakkunu, nug amu oh nug mettom. Nug anam he amu, Saul nug aum bia, nug aɗeg Mikal Dawit mette, nug Dawit wau dayom.

²⁸ Dawit nug amu he, Saul aakku Yawe Nug Dawit ehanittom doyaya, nug aɗeg, Mikal, nug Dawitnu oo mauhom ele doya,

²⁹ nug Dawitnu tatam baɗak doyom amu, gemu nug baɗak amu eɗittak doyom. Nug Dawitnu kekeɗ dayom amu, nug anamib daye ukke, haen nug mauhom batak.

³⁰ Keeke amu oh dimppa, haen kuɗum Pilistia huu ag uɗieg, Israel ele ban heppig. Am haen oh ag anam heppig amu, Dawit nug ban hak kobol nuhig haaha, nug Saulnu ban daup ikki laa oh, nug amu dilag ban haknu kobol eɗidttom amunu, Israel danab ah oh ag nug am anam doon, nuhignu enanagnab dooppig.