1 Samuel 16 - Nobonob Baibel

Samuel nug Dawit king daakkunu goɗen gokkaɗakppa tituanom

¹ Amu Yawe Nug Samuel amegppa aum. “Da hei, Israel dilag king dayaknu ehah am Saul eppegppa, nug baekkudppa eppelagppa ele ii daatte, me na nuhignu haen elab oot doyeye, oot uugnab doottem. Amu haen gane laa ele ukkeb, na kobol amu uukkut? Uuppe! Da danab laa, Jesi, Betlehem daatte, nug bekka, da nug king daakkunu tituanmi amunu, na ad olip meunu goɗen idppa qeppe noob, aon Betlehem Jesi laugppa gona, goɗen amu aon, laa nug king daakku amu, na nug igippa gokkaɗe!” awa aum.

² Yawe Nug Samuel amegppa aum, amge Samuel nug eɗua aum. “Da ukken, amu heppi, Saul nug amu doya, nug da iweb mauhkkul.” Samuel nug anam a amu, Yawe Nug Samuel amegppa aum. “Na makau balat laa aon ele goppe, laa nug na oɗ metta, ‘Na aɗinu Betlehem uɗime?’ aab amu, aria na inam akkut, ‘Da Yawenu mana mettak laa hekkulnu uɗimi,’ akkut.

³ Na gona, amu hekkutnu hena, na Jesi nug ele mana mettak amuppa uɗikkunu oɗ medappe, nug uɗieb, mana mettak amuppa aɗi keeke na hekkutnu da ool daatte amu, da geha ippunidkkul. Da danab aun nug king daakku ippunidppi, na nug king daakkunu goɗen gokkaɗakppa tituankkut,” awa aum.

⁴ Yawe Nug ib amuppa hekkunu Samuel amegppa a, Samuel nug Yawe aum oɗe bia heum. Nug aha, Betlehem ukke, ikki danab aab amuppan ag nug uɗiom, ag amunu baɗan, nug uɗa tena, ottaina, ag amegppa appig. “Danab okkai, na oot maɗoɗ elete uɗime?” aon appig.

⁵ Betlehem ikki danab ag Samuel anam oɗ mettaeg, Samuel amelagppa aum. “Ao, da ool maɗoɗ ele uɗimi. Da doɗ laa mane, Yawe medakkulnu uɗimi amunu, ag Yawenu tituana mettak daaglagnu hena daan, ag da ele mana mettak amuppa gota daagnig,” awa aum. Samuel nug nai amu mattia mala, nug Jesi, bekkod ele ag Kayaknu tituana mettak daaglagnu ha, Samuel nug ag ele mana mettak amuppa daaglagnu oɗ mattom.

⁶ Samuel nug anam amelagppa a amu, dimppa Jesi bekkod ele aakku mana mettakppa uɗippig. Uɗieg, Samuel nug ⌊Jesi bekka tatamnu⌋ Eliap antta, Samuel nug ooppa inam aum. “Yawe Nug danab imu, nug Israel dilag king daakkunu goɗen gokkaɗakppa tituanom,” awa aum.

⁷ Samuel nug ooppa anam aum, amge Yawe Nug Samuel amegppa aum. “Na nid imu, nug beɗu, iɗu ele ena anidna, ‘Imuam king daakku,’ aib ame! Aɗinu? Da nug king daakkunu geɗidmi. Da amu heminu diig am, da danab keeke anidna epeɗitteb, da amubia ii hettem. Iitta. Ag am keeke dimittim amuib anidna epeɗitteb. Da am danab oolag anidttem,” awa aum.

⁸ Yawe Nug Samuel amegppa anam a amu, Jesi nug bekka Eliap dimugppan, Abinadab, nug nug onigppa e do, omala Samuel gumitta waum. Omala wa, Samuel nug aum. “Iitta. Nug ele king daakkunu Yawe ii tituanom,” awa aum.

⁹ Amu dimppa Jesi nug bekka Sama omala Samuel gumitta wa, Samuel nug aum, “Iitta. Nug ele king daakkunu, Yawe ii tituanom,” awa aum.

¹⁰ Kobol amuppa Jesi nug bekkod eblaih aɗit ele ag Samuel gumidna haen anen anen wappig, amge Yawe Nug nid danab amu laa, nug king daakkunu elele iitta aum amunu, Samuel nug Jesi amegppa aum. “Yawe Nug imunu laa king daakkunu ii tituanom;

¹¹ nahip nid danab imu iikkuibte? Da gumiɗna doppig amu, ag am nid danab nahip ohte, o iitta laa ele daattebte?” oɗ mettom. Nug anam a amu, Jesi nug aum. “Laippu laa daatte, nug am huh bieg dahil. Nug aab dimittim sipsip gumattatta daatte,” awa aum. Jesi nug anam a amu, Samuel nug aum, “Nid laa appe ukka, omala uɗiaɗ! Aɗinu? Ig paha mana mettak ii hemata. Iitta. Nug uɗieb, dimppa ig geha mana mettak hekkunig,” awa aum.

¹² Samuel nug anam a amu, Jesi nug nid laa ukka, Dawit omala uɗikkunu he ukka, omala uɗiom. Dawit iɗu am anttaknu enanag, beɗu ele ena, ɠagattag, amu nug ameg ele ena amahaltte. Nug uɗia do, Yawe Nug Samuel amegppa aum. “Nug aakku, da nug king daakkunu tituanmi amunu, na nug king daakkunu goɗen gokkaɗakppa tituane!” awa aum.

¹³ Yawe Nug Samuel anam hekkunu amegppa a, Samuel nug goɗen awa, Dawit awakkud noolagppa Dawit nug king bekkunu goɗen gokkaɗakppa tituanom. Samuel nug Dawit goɗen gokkaɗakppa tituane, Yawenu Ouɗi Nug Dawit, nuhigppa ɠagattag ele uɗiom. Yawenu Ouɗi Nug uɗia daya, Dawit ii uuittom. Iitta! Nug anam dayom. Amu Samuel nug eɗua, Rama ukkom.

Dawit nug ukka, Saul laugppa nug ehanidkkunu ukkom

¹⁴ Amge Yawenu Ouɗi Nug Saul uuittom; Nug Saul ele ii daaeh, ouɗi nau Yawe noobppanu ukka, uug nau Saul mettom.

¹⁵ Anam daye, danab ag Saul ehanidtteb ele ag nug amegppa appig. “Antte! Imuam ouɗi nau laa Kayak noobppanu uɗia, na uug nau mette nauhme,” aon appig.

¹⁶ Anam anana, ag tuɗidna nug amegppa appig. “Naɗi, ig nahip maɗi nid amu, na ig amenigppa appe, ig gota, danab laa harp-ppa musik qekkunu dootte ele laa anidta, aopput daakku; aria haen ouɗi nau Kayak noobppanu uɗitte ele, nug uɗia, na uug metteb, danab amu nug geha harp-ppa musik qeeb, na eɗun ena daakkut,” aon appig.

¹⁷ Ag Saul amegppa anam aeg, nug nob ma ag amelagppa aum. “Amu ena, ag gona, danab laa harp qaknu doyak ena ele laa anidna aoppeg, ippa da noolppa uɗiaɗ!” awa aum.

¹⁸ Saul nug ag amelagppa anam a, Saulnu maɗi nid laa nug Saul amegppa aum. “Da Betlehem ted Jesi bekka laa anidmi. Nid amu nug harp qaknu, enanag hette. Danab amu nug ooppa ɠagattag doyak ele; nug am banppa ban ena hette ele. Nuhig mattiak am ena; nug iɗu ele am tuqak ele. Laa ele amu, Yawe nug ele daattep,” awa aum.

¹⁹ Saulnu maɗi nid amu nug anam a, Saul nug nuhikkud danab laa ag appa gokkulagnu he, ag Jesi gumidna gona amegppa inam appig. “Saul nug nahipnu, ‘Na nid nahip Dawit, sipsip gumadtte ele, na nid amu meppe, da gumiɗa uɗiaɗ!’ atte,” aon appig.

²⁰ Saul nug nai anam me, Jesi toppa ukke doya, Jesi nug aha, bret awa, wain doɗ gaɗappa inak laippu ele awa, donki laa attan mewowa, nug meeme nag nakok okkai meum laa ele awa, bekka Dawit mette aɗa he, Saul gumitta ukkom.

²¹ Saul nug nai anam me ukke, Dawit ukka, Saul gumitta ta, nug aakku digma, Saul ehanittom. Amu Saul nug Dawitnu oo huan daye, nug he, Dawit nug nuhig daup laa, ag Saulnu bannu keeke maoppig ele, Dawit ele nug amu oolagppanu laa aakku dayom.

²² Am Dawit nug keeke anam heehe amu, Saul nug Jesi toppa nai me ukke aum. “Da Dawitnu oolppa ena doottem amunu, nug da ele ippa daaɗa, da ehaniɗkkunu oɗ medattem,” awa aum.

²³ ⌊Saul nug nai anam me, Jesi toppa ukke, Jesi nug Saul aum, nug amunu ena doye, Dawit nug Saul ele daaeheh,⌋ haen ouɗi nau amu, Kayak Nug ib oo ii neum ele amu, haen nug Saul nuhigppa uɗia, Saul nau mette daye, Dawit nug harp qe, ouɗi nau amu Saul uuitte, eɗua ena dayom.