1 Samuel 13 - Nobonob Baibel

Saul Pilistia ele ag ban heppig

¹ Saul nug maɗ 30 dayaya, nug king ba dayom. Nug ba daye, maɗ aɗit ukke,

² Saul nug Israel danab 3,000, ag nuhig daupnab daaglagnu tituanattom. Nug anam tituanatta, nug he, danab 2,000 ag nug ele aab onig Mikmas appa, amu laih qauko qauko ele, aab onig Betel taliliak, danab 2,000 ag nug ele aben aɗit amuppa daaglagnu aum. Aria, 1,000 laa amu, ag nug bekka Jonatan ele Benyamin wanppa aab onig Gibea, ag appa daaglagnu aum. Saul nug anam awowa, nug danab laa oh ag eɗun, lakka gona daaglagnu a, ag eɗun goppig.

³ Saul he, Israel dilag daup ag anam daanna, Pilistia dilag daup laa, ag aab onig Geba appa daappig amu, Jonatan, nuhikkud daup ele ag ahan, Pilistia amu ele ban heppig. Jonatan aɗi ag anam heeg, Pilistia laa ag doon, ag oolag nauhom amunu, Saul nug aabaabppa Israel danab ag bannu uɗiglagnu nai dooglagnu, nug nai awa ukkak danab ag gona, trampet iwalkkulagnu maatte gona iwalppig.

⁴ Nai awa ukkak danab ag goppig amunu, Israel oh ag, “Saul nug Pilistia dilag daup Geba daatteb, nug ag banelag ukkom amunu, gemu Pilistia ag ig Israel, ag ihinignu eheɗ nau dootteb,” ag nai amu dooppig. Ag doon, ag ahan gona, Gilgal appa Saul toppa qagmeppig.

⁵ Israel ag appa qagmeegeg, Pilistia ag Israel ele ban hekkulagnu ele aab onig Betawennu kaɗag uɗitteppanu Mikmas appa qagmeppig. Pilistia qagmeppig ele am inam: daup ag bannu karis attan daan, ban hetteb am, 3,000, daup ag hos attan daan, ban hetteb am, 6,000, amu daup ag baelagppa oinna, ban hetteb ele amu, ag am huanaknab, abuɗ yu daugppa daatte, amubia.

⁶ Ag haen tutu dayaknu aab kalak ahilag anen anen heeg, anam dayeye, Pilistia ag Israel lamadkkulagnu wagai mena daappig amunu, Israel danab ah ag uug naunab ele daappig doon, laa ag wan oɗeppa gona, lokkumna daanna, laa ag gona, ad naunau gamagppa, o men okkai gamagppa lokkumna daanna, laa ag gona, moɗ digdig danab buuppig ele amu, ag aguppa lokkumna daappig.

⁷ Israel laa ag anam lokkumna daanna, laa ag ahan, Jodan leppa, le baag qak daattebppa, ag appa le mataɗna, Israel dilag wan laih laa, am Israel dilag huu okkai Gadnu wan, amu Israel wannu laih Gileat, ag appa ele gona, lokkumna daappig. Amu Israel danab laa ag gona, anam lokkumna daaegeg, Saul nug Gilgal appa dayeye, nuhikkud daup laa, ag lokkumak daaglagnu ii oolppig amu, ag appa nug ele daappig amge ag huan baɗaeg, beɗulag hahaɗom.

⁸ Ag anam daappig, amge Samuel nug matu Saul amegppa, “Na Gilgal gona, deɗ eblaih aɗit ele da amel men daappe, da nahip-ppa gokkul,” aum, amunu Saul nug Samuel deɗ eblaih aɗit ele ameg ma dayom, amge Samuel nug ii uɗiom. Nug ii uɗie, Saulnu daup laa appanu, ag ele ahan oolkkulagnu digmen heppig.

⁹ Ag digmen oolppig amunu, Saul nug aum. “Ag manaknu ofanu doɗ, amu laippu dayaknu ofanu doɗ ele akkan doppeg, da manaten, Kayak medakkul,” awa aum. Nug anam a, ag aon doeg, nug manaknu ofa heum.

¹⁰ Saul nug manaknu ofa amu mana male, haen amuppanab Samuel nug beum. Nug be, Saul humidkkunu gumitta waum.

¹¹ Amge Samuel nug Saul amegppa oɗ metta aum. “Na aɗi heme?” awa aum. Nug anam ana oɗ mette amu Saul nug oɗeppa awa aum. “Iitta! Da dahilad danab ag ahan, uuiɗna ukkaegeg antten, na ele haen uɗikkutnu ame amu, na haen amuppa ii uɗime anttena, Pilistia danab ele ag Mikmas appa qagmeegeg anidmi

¹² amunu, da dabmemi. ‘Pilistia ag ahan, Gilgal ippa uɗin lamigkkulagnu hekkulag, me da Yawe dahilnu ena doya ehanigkkunu doɗ laa ii mane mettami.’ Da amu dabmemi amunu, da manaknu ofa Nug medakkulnunab doyen hemi,” awa aum.

¹³ Saul nug Samuel amegppa anam a amu, Samuel nug eɗua, nug amegppa aum. “Na heme amu, amuppa na dabmak tutukku iittappa heme. Na Yawe, nahip Kayak, na nuhig nai ii dim lamidme. Na dim lamidlom amu Nug heeb, na, amu na buɗun ele ag hanhan Israel gumalob.

¹⁴ Amge na eheɗ heme, diig amunu amu, na, amu na buɗun ele ag Israel hanhan ii gumamna. Na Yawenu nai ii dim lamidme amunu, Yawe Nug danab laa, danab amu nug Yawe aɗi dabmak aotte, nug ele amuib aokkunu hette amu, Yawe Nug danab laa amu nug king daakkunu aakku antta mala, nug king daakkunu tituanom,” awa aum.

¹⁵ Samuel nug Saul amegppa anam awowa, nug aha, Gilgal uua, Gibea, Benyamin wanppa ukkom. Amu Saul nug danab nug ele daappig am ebqe, ahilag ebqak am 600 keeke. ⌊Amu Saul danab amu ele ag ahan, ag ele Gibea, Jonatan dayomppa, appa goppig.⌋

Israel ag am ban haknu keeke iitta

¹⁶ Aria Saul, nug bekka Jonatan, amu ahilti daup ele ag Benyamin wanppa, aab onig Gibea, appa daappig; Pilistia danab ag am Mikmas appa haen tutu dayaknu aab kalan daappig.

¹⁷ Amu Pilistia danab ag oppatna, huu ewam daanna, ag aben anen anen gona, ag Israel danab ah ele ban henana, aqana, ag Israel dilag keeke agappig. Huu laa ag ahan, aab onig Opra goppig. Amuam wan maha nakok laa onig Sual, appanu aab.

¹⁸ Huu laa ag ahan, aab onig Bethoron, ag aben amuppa ukkaeg, huu laa ag ahan, aben laa, aben amuam oolnu noak onig Qai Dakkuɗ Dilag Oolnu Noak, danab appa dayaya, neekkeb ukkeb, atu taɗak anidkku amu, ag oolnu noak amu daugppa goppig.

¹⁹ Amu Pilistia ag Israel laa nug aha, qep elab, o ban aenppa hak hekkunu uun autna aoppig amunu, ⌊ag heeg,⌋ Israel wanppa danab nug keeke laa aenppa hekkunu laa ii dayom.

²⁰ Amunu Israel oh ag hebeb, o wan buuaknu keeke, o sarip, o halu ahilag uɗikkaknu amu, ag ahan, maon gona, Pilistia danab laa mattaeg, nug uɗigttom.

²¹ Amge nug hamu ii uɗigttom. Iitta. Nug silwa awawa uɗigttom. Am nuhig noob anen anen am inam: wan buuaknu keeke, o halu uɗikkaknu am 8 gram silwa; amu hebeb, o huɗup elab aeg laippu ele, o aeg ewam ele, o ad laa noobppa aen ele danab ag amuppa makau okkai ebehi ele yaalatteg uɗat hetteb, amu uɗikkaknu am 4 gram silwa.

²² Anam dayom amunu, ban haenppa Israel danab laa nug qep elab, o ban laa iitta. Iitta! Saul, Jonatan ele aakkuib, aa am ele.

Jonatan nug Pilistia banelag ukkom

²³ Keeke anam dayom amu, Pilistia dilag okkai ag heeg, ahilag daup laa ag gona, ag ib Mikmas guguittak, qauko ikki oppoɗu noakppa ib meidna daaglagnu gona daappig.