1 Samuel 11 - Nobonob Baibel

Saul nug Amon eɗattom

¹ Aria, nakok dimppa Amon dilag king onig Nahas, nug nuhikkud daup ele ag uɗin, Gileat wanppan aab laa onig Jabes, ag aab amu oo mattan, aqaglagnu maadna daaegeg, Jabes danab ag Nahas amegppa appig. “Na ig ele nug tituanta nai qakkagnig dayeb amu, ig nahip maɗi nid daagnig,” aon appig.

² Jabes danab ag Nahas amegppa anam appig, amge Nahas, Amon ted, nug aum. “Am ena, da ag ele nug tituanta nai qakkagnig, amge Israel danab ah oh ag uɗalag eheɗ naunab nekkunu tatam da ag Jabes daatteb, da ag oh amelag naɗiap otuladppi nauhppeg, da ag ele nug tituankkunig,” awa aum.

³ Nahas nug anam a, Jabes ikki danab ag appig. “Na mettid laippu daappe, ig danab nai aon gokkulagnu maadpput goppeg, Israel laa oh ag imunu doona, laa ag ehanigkkulagnu ii uɗiglag dayeb amu, ig nahip nainu ‘Yo’ atata, na eppenppa gokkunig,” aon appig.

⁴ Jabes ikki danab ag Nahas amegppa anam ana, ag heeg, nai awa ukkak danab ag ahan gona, amunu mattiegeg ukke, ag Gibea, Saul appag diig, ag appa tena mattieg, appan danab ag doon, huan gaappig.

⁵ Ag mattieg, ag gaaegeg, haen amuppanab Saul nug dattanu makau dim lamatta uɗia doya, nug oɗ matta aum. “Eheɗ attem beum? Attem beum amunu, danab ah gaatteb?” awa oɗ mattom. Nug anam a amu, ag Jabes danab aɗi aɗi appig, ag amu oh aeg doyom.

⁶ Ag aeg Saul doye, Kayak Ouɗi nuhigppa ɠagattag ele uɗie, Saul nug oo huana nauhom.

⁷ Saul anam doya, nug makau aɗit diiata aqatowa, nug tuqe, maha maha ne, nug maha anen anen nai awa ukkak danab eppelagppa me, ag maon, Israel wan ohppa gona, inam akkulagnu amelagppa aum. “Danab aun laa nug Saul, Samuel ele bannu ii dim lamateb, Saul nug heeb, danab ii ukkom ele amu, nuhikkud makau ag tuqak inambia daaglag!” Saul nug ag anam akkulagnu amelagppa aum. Nug a, ag gona anam heeg, baɗak eheɗ nau ele Yawenu Israel, ahilagppa ne, ag ohnab ahan, Saul toppa uɗippig.

⁸ Ag Besek appa Saul toppa qagmeeg, Saul ebaqatte, Israel danab laa oh 300,000 daaegeg, Judanu am 30,000.

⁹ Israel oh ag anam heeg, Saul aɗi ag nai awa ukkak danab, tatam Jabes Gileatnu uɗin, Amon heppignu aeg dooppig ele amu, ag ag amelagppa inam appig. “Ag eɗun Jabes gona, Jabes danab amelagppa ‘Butti, aam ɠagattag neeb amu, ag ehanittak aoglag,’ appeg doyeg!” aon appig. Aria, ag anam akkulagnu aeg doona, ag gona, Jabes danab amelagppa aeg doon, ag oolag gamag eheɗnab ahom.

¹⁰ Ag nai amu oh doyeg, gamalag ahe, ag Amon danab hambuppualadna, ahilag King Nahas amegppa appig. “Butti ig na eppenppa gokkunig, amu ig amu hepput, na ihinigppa aɗi hekkutnu oot daatte dayeb amu, na anamib hekkut!” aon appig.

¹¹ Aria, wagɗe buttuanab, amahlak laa digma ii beum, haen amuppa Saul nug he, nug daup ag ameg ewam daaegeg, wagkkaɗeɗe ag ahan, Amon daappigppa gona, Amon ele ban hekkulagnu wappig. Ag ban hena, Amon eheɗ aqaeg ukke, belo meum. Aria, belo me, Amon laippu laippu daappig amu ag oolna matatun gona, anen anen oolppig.

¹² Israel ag Amon anam eɗattona, ag gona Samuel amegppa appig. “Aun aɗi ag Saul nug ihinig king daakkunu uuppig amu, na omaladppe uɗippeg, ig aqapput mauheg!” aon appig.

¹³ Ag anam appig, amge Saul nug aum. “Gemu Yawe Nug ig Israel ig ehanikka, ig Amon eppegppanu eɗua awikkom amunu, ig ikka laa qeppeg ii mauhma. Iittanab iitta!” awa aum.

¹⁴ Saul nug anam a, Samuel nug aum. “Ahappeg, ig oh Gilgal gota, appa ig Saul nug king daatte, ig ikka ikka baula atat doognig,” awa aum.

¹⁵ Samuel nug anam aum amunu, Israel oh ag ahan Gilgal gona, appa ag oh Saul nug king daakkunu Yawe noobppa nai qagappig. Appa ag laippu dayaknu ofa manan, Yawe mettona, ag oo gamag ahaknu qagmak okkainab heppig.