1 Samuel 10 - Nobonob Baibel

Samuel nug goɗen gokkaɗakppa Saul king daakkunu tituanom

¹ Maɗi nid nug anuqa ukke, Samuel nug id nakok goɗen inak ele awa, goɗen gokkaɗe, Saul igippa no, Samuel nug Saul ootuqitta aum. “Yawe Nug na, na nuhikkudnab danab ah gumadkkutnu iikku iite goɗen gokkaɗakppa tituanittom.

² Amu gemu na da uuiɗna gona, na Benyamin wanppa aab onig Selsa, appa Rahelnu boumak aben guguittak, na danab aɗit uɗalah tekkut. Na uɗalah teppe, aa na amenppa akkulah. ‘Na mamennu donki madikkutnu ahan oime amu, laa ag donki amu eɗun anadppig amunu, na mamen nug donki dilag gemu ii dabmette. Iitta. Nug nahipnu oo uug dayeye, “Da bekkalnu amu, da attem hekkul?” awa atte.’ Aa na amenppa anam akkulah.

³ Aria, aa na amenppa anam apeɗ amu, na tuɗidna gona, na aab onig Tabor, appa ad ok daatte, ad amuppa amu danab ewam, ag doɗ main, Kayak mettaglagnu, keeke laala ele mettaglagnu, ag Betel tekkulagnu gonana, ag na uɗan tekkulag. Laa nug meeme nakkud ewam diia ukkebeb, laa nug bret kunum ewam mawebeb, laa nug wain doɗ gaɗappa inak ele laippu mawebeb anadkkut.

⁴ Anadppe, ag humittona, ag na bret kunum aɗit mettaglagnu hekkulag. Ag anam heppeg, na aib uume. Iitta. Na ag eppelagppanu aokkut.

⁵ Keeke amu beeb, dimppa amu na gona, Kayaknu aab Gibea, Pilistia danab ag appa daup dayaknu aben bappaidppig daatteb amu, na gona, aab amu gukkuidppeppe, propet danab laala ag aabnu mettid lag nakokppanu nebeppeg, huu laa ag propet noolag aon, musik haknu keeke digdig onig laia, tambarin, dumuttum, harp ele hebeppeg amu, propet ag propet nai mattiglag.

⁶ Ag anam hebeppeg anadna, Yawenu Ouɗi Nug ɠagattag ele nahip-ppa ukkeb, na ele propet nai madikkut. Amu na eɗun, danab laa daakkut.

⁷ At amu oh nahip-ppa beeb amu, na aakku dookkut, Kayak Nug na ele daattep amunu, ⌊na nuhikkud danab ah tutukku gumadkkutnu⌋ aɗi uɗat laa anidkkut amu, na aakkud he!

⁸ Amu na anuqna Gilgal goppe, da dimppa gokkul. Amge na gona, deɗ eblaih aɗit ele da amel men daappe, da ukken, da manaknu ofa, amu laippu dayaknu ofa ele manen, Kayak medakkul. Amu da ele na aɗi hekkutnu appi dookkut,” awa aum.

Saul eɗua, lakka ukkom

⁹ Samuel nug anam a, Saul nug eɗua, Samuel uuitta gokkunu heehe, Kayak he, Saul oo eɗuom. Amu deɗ amuppa Samuel nug aɗi kobol bekkulagnu aum amu, at oh ag bena malappig.

¹⁰ Saul, amu nuhig maɗi nid ele aa Gibea goya teeheh, propet danab laala ag Saul uɗa teppig. Uɗa teeg, Kayak Ouɗi Nug Saul, nuhigppa ɠagattag ele uɗia he, Saul nug digme, ag ele propet nai madippig.

¹¹ Saul nug propet ameg laa amu, nug ag ele oh propet nai mattiegeg, haen danab laala ag Saul matu dooppig ele, ag amu anidna, akka akka nug oɗ medappig. “Kis bekka Saul amu, nuhigppa attem beum? Nug ele propet oolagppa propet laate?” aon appig.

¹² Aon aeg, danab laa nug appa dayom ele, nug oɗmak laa ha aum. “Propet danab imu amu, ag mamelag am aun?” awa aum. Nug anam aum amunu, nai tutu meu ele laa amuppa beum. Nai amuam “Saul Nug ele propet oolagppa propet laate?”

¹³ Aria, Saul nug propet nai mattia mala, nug aabnu mettid lag nakokppa ukkom.

¹⁴ Amu Saul nug anam he ukke, dimppa Saul mameg nakok nug Saul nuhig maɗi nid ele anata, oɗ matom. “Aa adeppa daapiɗ?” oɗ matom. Oɗ mate, Saul nug aum. “I da mamelnu donki mattialadɗaɗa oimuɗ, amge i ii anadmuɗ amunu, i Samuel anidkkunihnu gomuɗ,” awa aum.

¹⁵ Saul anam a amu, nug mameg nakok nug aum. “Samuel nug na amenppa aɗi aum?” awa oɗ mettom.

¹⁶ Nug Saul oɗ mette, Saul nug aum. “Nug laa ag donki eɗun anadppig a doomuɗ,” awa aum. Saul anam aum, amge nug king ba daakkunu, Samuel amunu aum amu, nug nai amu, nug mameg nakok amegppa nakok laa ii aum.

Yawe he, Israel oh ag Saul nug king daakku dooppig

¹⁷ Aria, Saul anam he, Samuel nug Israel oh ag aab onig Mispa, appa Yawe noobppa qagmekkulagnu onilagppa e, ag doeg,

¹⁸ Samuel ag amelagppa aum. “Yawe, Nug ig Israel, ihinig Kayak, Nug atte. ‘Da ag Israel, da ag Isip wanppanu omalatti uɗippig. Ao, da ag Isip eppelagppanu diiatten, danab laala, ag eheɗ hadappig ele, da ag eppelagppanu ele diiadmi,’ awa atte.

¹⁹ Amge gemu ag Kayak ahilag, Nug aɗi uug nau, aɗi keeke ninig ele ahilagppa bette amu, Nug amuppa ehanatte, ag ena daatteb, ag Nug dimettan, Nug amegppa, ‘Na king laa mekke!’ aon atteb. Ag anam atteb amunu, Kayak Nug ahilag king am aun ippunadkkunu ag oh Israel dilag huu okkai 12 anen anenppa, amu huu amu anen anen oolagppa aab ikki anen anenppa ele, ag uɗin, Yawe gumidna wana dayeg!” awa aum.

²⁰ Samuel nug anam anan, nug he, Israel dilag huu okkai 12 ag anen anen ahan dona, Yawe noobppa daaegeg, Yawe Nug Israel dilag huu okkai Benyamin tituanom.

²¹ Yawe nug Israel dilag huu okkai Benyamin tituane, Samuel he, Benyamin huu ooppa aab ikki anen anen ag Yawe noobppa doeg, Yawe Nug Matrinu aab ikki am tituana, Nug amuppanu Saul, Kis bekka, tituanom. Yawe Nug Saul tituanom, amge haen danab ah ag nug anidkkulagnu mattinna, ag nug ii anidppig; nug appa miag ii dayom.

²² Ag ii anidppig amunu, ag Yawe oɗ mettan, “Danab amu nug uɗiom daattete?” aon appig. Ag oɗ mettaeg, Yawe aum. “Yo, nug ahilag keeke ooppa, nug nukka appa lokkumom daatte,” awa aum.

²³ Yawe Nug anam a, ag qaiettan gona, Saul anidna omalna uɗieg, nug danab oolagppa dayeye, ag anidppig; nug am danab elab. Elab nuhig am danab laa oh eɗatta, 35 sentimita keeke batom.

²⁴ Nug dayeye, Samuel nug danab ah oh amelagppa aum. “Danab imu amu, Yawe nug king daakkunu tituanom. Ig oonigppa amu, danab laa nugbia ii daatte,” awa aum. Nug amu a, danab ah oh ag baalag okkaippa, “King nug haen elab bau dayaɗ!” ena appig.

²⁵ Eeg amu, Samuel nug king dayaknu ɗo tutukku oh ag amelagppa awowa, nug nai amu oh bukppa ye dayeye, nug buk amu Yawenu mettid lag, amuppa me niiom. Nug amu ha malowa, nug he, danab ah oh ag eɗun, laulagppa goppig.

²⁶ Saul ele eɗua, nug laugppa Gibea ukkom. Amu danab laala, ag am danab ɠagattag, Kayak Nug he, ag oolag Saul medappig ele amu, ag Saul ele oh nug ehanidkkulagnu nug laugppa goppig.

²⁷ Amge hib guitta danab laa ag appig. “Saul nug attem heeb, ig ehanittak aognig? Nug elele iitta!” aon appig. Ag Saulnu ena iinab dooppig amunu, ag amu mattinna, ag ɗo ii medappig. Ag anam heppig, amge Saul nug ag amelagppa nai laa ii mattiom.