1 King 9 - Nobonob Baibel

Yawe Nug eɗua Solomon toppa neum

¹ Amu Solomon nug Yawenu mettid lag ha malowa, kingnu lag enanagnab ele hewowa, am lag laala buuadkkunu dabmeum, nug amu oh ele buua malowa,

² aria, dimppa Yawe Nug eɗua, ⌊tul niiakppa⌋ Solomon toppa neum. Amu Yawe Nug anukka Gibeon aabppa na heum, amubia aakku heum.

³ Am Yawe Nug Solomon amegppa inam aum. “Da nahip unuqittak, oot ohppa oɗ meɗak ele na da amelppa ame amu, da doomi. Am da na mettid lag imu, na buume amu, da lag amu dahilnu tituana meɗak daakkunu aakku hemi. Haen oh da onil aguppa daakku. Danab nug baekkudppa ele laulagppa daatteb, danab nug lag amu dabmedette, aguppa daakkunu oo huana hette, amubia da lag imunu hanhan dookkul.

⁴ Amu Solomon, nahipnu amu, na da noolppa dabmak oiyak ele tutukkuib dayaknu kobolppa, na genab tutukku hak kobolppa ele na mamen Dawit heum bia oinna, na dahil haknunab anak oh, dahil ɗo iɗu iɗu ele na dim lamidkkut dayeb amu,

⁵ da na mamen, Dawit, da nug amegppa, ‘Da heppi, na buɗunadppanu laa nug na abenam aweb, laa nug Israel dilag gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku,’ awe, dahil nai ɠagattag qein ami bia amu, anamib geha haen oh da heppi, na buɗunppanu laa ag anen anen ahilag haenppa Israel dilag king bena, sia kingppa daaglag.

⁶ Amge Solomon na, amu nahipad nid dimppa bekkulag, amu ele ag da uuiɗna, ag dahil haknunab anak, amu ɗo dahil ele da ag mattami amu, ag ii dim lamidnana, aria ag kayak hambuppuak dim lamadnana, amu laa waalagppa maɗi nid daan, ahilag uɗat henana, ag ag noolagppa dup nona binalag mekkulag dayeb,

⁷ da geha ag Israel danab ah da wan ag mattami imu amu, da wan imuppanu lamatten, mettid lag imu, da onil aguppa daakkunu dahilnu tituana meɗak daakkunu hemi amu, geha da baula amunu ii dabmepa. Am laa ele, wan atu ohppa, danab ah ag Israel ag nau bekkunu at daatte dabmena, ag aon aon aqaglag.

⁸ Amu lag imuam geha nauhak daakku. Anam dayeb, danab ag geha uɗin, ippa oinna anidna amu, ag geha dabmak huanaknab aona, awa awa qettak hena, ag akkulag. ‘Attem daye, Yawe Nug wan imu he nauhe, mettid lag imu ele he, kinipan ameg okkai hume tak daatte?’ akkulag.

⁹ Ag oɗmak anam hebeppeg, laa ag nob mena akkulag. ‘Imu beumnu diig am inam. Israel ag Yawe, ahilag Kayak, ag Nug uuppig. Nug ag mamelkad aɗi anukka Isipnu diia, omalatta uɗiom. Amge ag Yawe, ahilag Kayak, ag Nug uun, ag kayak hambuppuak dim lamadnana, ag noolagppa dup nona binalag meppig. Ag anam heeg, diig amunu Yawe Nug he, uug naunab imu beum.’ ” Yawe Nug Solomon amegppa anam aum.

Solomon nug keeke King Hiram, nuhig daakkunu hamu mettom

¹⁰ Solomon Yawenu mettid lag buua malowa, nuhig lag enanagnab ele buua malom. Nug lag hak uɗat amu oh am maɗ 20 heum.

¹¹ Nug uɗat amu malowa, Solomon nug aab 20, Tair dilag king Hiram, nuhig daaglagnu hamu mettom; aab amu oh am Galili appa daappig. Mettomnu diig am, King Hiram nug King Solomon lag buukkunu ad sida, ad pain ele, gol kuɗum ele, Solomon oo dayom bia nug mette, uɗat amu ha malom.

¹² Aria, haen Hiram nug Tair aab okkaippanu aha, aab Solomon mettom amu anadkkunu uɗia anattom, amge nug aab amunu nug oo ii dayom.

¹³ Amunu nug Solomon oɗ metta, inam aum. “Lai, aab amuam aɗi aab na da meɗame?” Amu diig amuppa danab ag wan laih amunu, wan Kabul appig. Gemu ⌊nai imu yaak haenppa⌋ ele, ag anam atteb.

¹⁴ Hiram nug King Solomon gol mettom am kuɗum, huanaknab. Golnu uug amu 4,000 kilogram.

Solomon nug keeke aɗi aɗi laa heum

¹⁵ Amu King Solomon nug danab kuɗum ag ɗo waappa kingnu uɗat haknuib daappig diiom. Am amunu nai am iikku. Nug diia he, ag Yawenu mettid lag buuona, ag Solomon, nuhig lag enanagnab buuna, amu Jerusalem talilidkkunu aɗ ele itappig. Nug ele he, ag wan itan meeg, aben laa aakku elele beum. Amu Solomon nug he, ag aab Hasor kalan, aab Megido kalan, amu aab Geser ele kalappig.

¹⁶ Aab okkai Geser am Kanan dilag aab anukkanu dayom, amge Paro nug uɗia, ban ha eɗitta awa, Kanan danab aab amunu aqa, aab amu mane ewom. Aria, haen Solomon nug Isipnu king aɗeg awe amu, king amu nug aab Geser, nug aɗeg nuhig daakkunu hamu mettom.

¹⁷ Mette amu, Solomon nug aab Geser eɗua babaittom. Nug babaitta, nug aab Bethoron honap,

¹⁸ aab Balat, amu aab Tatmor ele eɗua bappalattom. Aab Balat, Tatmor ele aa amu, aa Juda wan atu taɗakppa daapiɗ,

¹⁹ amu nug keeke maatte dayaknu aab okkai laala ele kalattom. Laa amu nug bannu karis, hos ele maatteb daaglagnu aab kala, amu keeke laala oh ele nug Jerusalem, Lebanon ele, amu wan oh nug gumom ele, appa hekkunu dabmeum amu, nug aakku heum.

²⁰ Amu Israel wanppa danab ah buɗub laappan, Israel iitta, ag ele daappig. Amuam Amo danab, Hit danab, Peres danab, Hiwi danab amu Jebus danab ele.

²¹ Am anukka Israel ag danab ameg amu heeg, ag Yawenuib nuhig pelemppa daappig, amge ag ohnab heppeg, Yawenuib nuhig pelemppa daaglagnu elele iitta daan, ohnab heeg, Yawenuib, pelemppa ii daappig; aakku gemu laa amu, ag buɗulkad aakku tuɗidna, Israel wanppa daappig. Ag aakku daappig amu, Solomon nug danab amu diia he, ag begbeg maɗi nid daan, nuhig uɗat heppig. Ag anam heeg uɗie, gemu ⌊nai imu yaak haenppa⌋ ele, danab amu ag maɗi nid daan, uɗat aakku hetteb.

²² Amge Solomon nug he, Israel nid laa nug begbeg maɗi nid dayaya, uɗat ii heum. Iitta. Nug Israel amu he, laa ag nuhikkud ban danab daappig, laa ag nuhikkud ehanittak anuqak danab daappig, laa ag ban daup ikki digdig daappig, amu laa ag daup ag bannu karis attan daan, ban heppig, daup ag hos attan daan, ban heppig ele, ag amu dilag ikki danab ele daappig.

²³ Aria, Israel laa amu, ag am Solomon uɗat heumnu ehanittak anuqak danab okkai nuhikkud daappig. Ag ahilag ebqak am 550, amu ag danab uɗat amu heppig ele, ag ahilag gumak danab daappig.

²⁴ Amu Paro aɗeg, Solomon wau, nug Dawitnu Aab amu uua aha, nuhig lag enanagnab bau Solomon heum, amuppa ukkom. Ukke dimppa, Solomon nug aben oolnu noak Jerusalemnu aam bedeppanu dayom amu, nug amu qelakkom.

²⁵ Am maɗ ohppa haen ewam amu Solomon nug qaɗab, nug Yawenu heum, amuppa nug manaknu ofa, amu laippu dayaknu ofa ele haaha, nug kalu danab ile muttuɗig enanag bette ele Yawe noobppa manom. Solomon nug anam haaha amu, amuppa nug Yawenu mettid lagnu ɗo aakku elele mettom.

²⁶ King Solomon nug aab Esiongeba appa nug uub kuɗum ele hattom. Aab Esiongeber am Edom wanppa aab Elat guguittak, Le Kokoɗ ihippa daatte.

²⁷ Amu King Hiram nug uubppanu uɗat nid ag yuppa oiyaknu doyak ena ele nuhikkud amu maatte ukkaeg, ag Solomonnu uɗat nid ele ag oh qagmena, uub amuppa uɗat heppig.

²⁸ Amu ag Opir wanppa gona, appanu 14,500 kilogram gol, amu eɗittak, King Solomonnu akkan uɗidppig.