1 King 7 - Nobonob Baibel

Solomon nuhig lag enanagnab heumnu nai

¹ Solomon nug nuhig lag enanagnab, ⌊laih anen anen oh⌋ ha malakkunu amu, nug maɗ 13 uɗat haaha, nug lag amu malom.

² Nug laug enanagnab amu buuom, lag amunu laih laa am onig, “Lebanon Dubuppan Lag”. Lag amu elab nuhig amu 44 mita, emaitak nuhig amu 22 mita, amu nuhig attan tak am 13 mita maha ele. Lag amuppa nug biidod ad sidappa hak huu waɗele me daaegeg, ad sida plang gikkiak okkai ele biidod ikkilkadppa mak daappig.

³ Nug anam hewowa amu, nug sida plang laa ele awa, nug lag amunu sida plang gikkiak okkai ele qaɗeppa sida plang amu ma, nug amuppa lag amu tonom. Ad sida plang gikkiak okkai ele, ag oh ahilag ebqak am 45. Huu anen anen plang gikkiak okkai ele am ebqak 15.

⁴ Lag amunu gililppa ulah ippu amu haug maattak guguittakppa lain ewam maadppig. Ag gililppa ulah ippu amu lainppa elelenab maatteg ukkom amunu, gililppa ulah ippu gilil laih daatteb amu, ag lain gilil laih daatteb, amu ele elelenab daaeg ukkom.

⁵ Lag amunu od oh, amu gililppa ulah ippu oh ele am guhilag waɗele. Am gililppa ulah ippu gilil laihppa, huu ewam daappig amu gilil laihppa gililppa ulah ippu ele anamib daappig.

⁶ Solomon nug lag enanagnab amuppa lag okkai laa ele tuɗitta buuom. Amu lag amunu ag onig, “Lag Biidod Okkai Okkai Ele,” aon adappig. Lag amu, elab nuhig amu 22 mita, emaitak nuhig amu 13 mita maha ele. Lag amu noobppa, oo laa, veranda bia laa dayom. Oo veranda bia amunu tonaknu keeke ele dayom.

⁷ Aria, Solomon nug lag laa ele heum, am lag amunu ag, “Nai Doya Mala, Hettoɗia, Epeɗia, Elele Mettak Lag,” aon atteb. Solomon nug lag amuppa sia kingppa dayaya, nug danab ah dilag hettoɗiak dookku. Nug lag amunu ooppanu gilil oh ad sida plangppa geɗiom, honapnu digma, geɗie ukka, attan palaippa teum.

⁸ Amu Solomon nug dayaya niikkunu, ee ele lakkunu lag enanagnab, lag amuam Nai Doya Mala, Hettoɗia, Epeɗia, Elele Mettak Lag dimugppa daatte ele amu, lag amuppa nug Nai Doya Mala, Hettoɗia, Epeɗia, Elele Mettak Lag geɗiak bia aguppa ele heum. Amu Paro aɗegnu lag enanagnab, Solomon nug ah amu awom ele amu, nug laug ele Solomon nug Nai Doya Mala, Hettoɗia, Epeɗia, Elele Mettak Lag geɗiom bia heum.

⁹ Ag men otaɗa babaittak enanag aon, men amuppaib lag amu heppig. Ag men enanag amuppa ag lagnu gilil oh honap wanppanu geɗieg ukka, palaippa tak heppig. Haɗap naɗi daugppa ele am men amuib meppig. Ag men amu melemelppa otaɗadna, men guhig laih dimittimnu, laih ooppanu ele amu soppa tutukkunab okkuladppig.

¹⁰ Keeke laa amu, ag men nau aon, lag ukku, amuppa ii heppig. Iitta. Ag amunu ele men enappa heppig. Men amu, laala amu okkainu melemel ahilag am 3 mita maha ele. Am laala amu okkainu melemel ahilag am 4 mita maha ele.

¹¹ Ag men maha okkai okkai amu unuqag maatteg ukke, amu qaɗep amu men otaɗa babaittak enanag ag pehettan tutukkunab otaɗadna, bappaladna autna aona, ad sidanu plang gikkiak okkaippa lag amu heppig.

¹² Amu haɗap naɗi daugppa amu, ag men otaɗa babaittak ele akkan, huu ameg ewam, laa am laa qaɗeppa mak amu, maatteg ukke, ag men aɗ amu attan ad sidanu plang gikkiak okkai ele meeg ukkom. Amuam Yawenu mettid lagnu ooppan haɗap bia, nuhig oo laa, veranda bia ele.

Huramnu uɗat

¹³ King Solomon nug ⌊Yawenu mettid lag heum, haen amuppa amu nug⌋ Tair aab okkaippanu danab laa onig Huram, nug uɗikkunu nai me ukke, nug Solomon ehanidkkunu uɗiom.

¹⁴ Huram nug am danab keeke brasppa haknu doyak okkai ele. Ge, Huram nug brasppa uɗat digdig kuɗum amu, nug doya autanab awom. Huram mameg nug am Tair ted, nug ele am brasppa keeke haknu doyak danab. Huram anig nug Israel dilag huu okkai Naptalinu ah laa. Huram mameg mauhe, anig am ah qab dayom. Aria, King Solomon nug Huramnu nai me ukke uɗia, keeke brasppa haknu amu, Solomon aum bia nug amu oh heum.

¹⁵ Huram nug uɗia, uɗat haaha amu, nug biidod okkai aɗit brasppa haatom. Biidod aɗit amu, aa melemel laippu ele; elab ahilah am 8 mita, amu taliliak ahilah am 5 mita, 30 sentimita ele.

¹⁶ Laa amu, nug biidod aɗit anen anen ikki tonaknu keeke brasppa ele haatom. Ikki tonaknu keeke amu, attan tak ahilah anen anen am 2 mita, 20 sentimita ele.

¹⁷ Ikkilah tonaknu keeke bala matakkunu amu, nug ikki tonaknu keeke anen anen amu taliliatak sen lo akkak bia huu eblaih aɗit ele ha,

¹⁸ nug ikki tonaknu keeke anen anen taliliatak pomigranet meu dottog bia huu aɗit ele heum.

¹⁹ Amu Yawenu mettid lagppanu oo laa, veranda bia, oo amuppanu biidod oh ikkilkadppa amu bala lili enanag ba mapata daatte bia daappig. Bala amu, attan tak ahilag melemel am, 1 mita, 80 sentimita ele.

²⁰ Biidod aɗit oh ikkilah am nakok waa oɗe bia daapiɗ, amge oɗenu okkai am biidodnu okkai laa oh eɗittak, amu ikki tonaknu keekeppa sen lo akkak bia daapiɗ amu, sen amuam biidod ikkilah nakokib attan daapiɗ. Biidod aɗit anen anen oh ikkilah tonaknu keekeppa amu, ad pomigranet meu dottog 200 ele huu aɗitppa daappig.

²¹ Huram nug amu ha mala, nug biidod laa awa, Kayaknu mettid lag odppa, oo laa, veranda bia daatte, oo amu odppanu nug yau uɗitteppanu, appa qappom. Nug laa am awa, oo amu odppanu yawalti uɗitteppanu, appa qappom. Nug qappalata, nug laa yau uɗitteppanu daatte am onig Jakin ataɗom. Yawalti uɗitteppanu amu, onig Boas ataɗom.

²² Biidod ikkilagppa bala daatte amu, bala amuam bala lili haɗag bia daappig. Aakku nug biidodnu uɗat aakku ha malom.

Huram nug le daakkunu tappiɗ okkainab heum

²³ Huram nug le daakkunu tappiɗ naɗi okkai brasppa hak onig Yu heum. Keeke amuam tappiɗ naɗi. Laihnu laih ukkak am 4 mita, 40 sentimita ele. Attan tak nuhig am 2 mita, 20 sentimita ele. Tappiɗ akka talilia ukkak am 13 mita, 50 sentimita ele.

²⁴ Akka waappa amu, Solomon nug gub dottolag maattom. Nug 50 sentimita ohppa gub dottog eblaih laih ele huu aɗitppa, laa attan laa honap, hattom. Nug bras tappiɗ naɗi, gub dottog ele hattatta, nug bras amu aab aɗuppa me dayaya, gakkaɗaɗa, le me, tappiɗ dottogppa gokkaɗe noa, oug ma, anam dayom. Haen nug amu heum, haen amuppa nug gub dottolag, tappiɗ naɗi ele laippu heum.

²⁵ Amu tappiɗ naɗi okkai brasppa hak onig Yu, amu maoglagnu Huram nug makau dawai 12 dottolkad brasppa hatte daaegeg, ag makau amu gomelag qaɗeppa tappiɗ naɗi okkai brasppa hak onig Yu, ag amu meeg dayom. Makau gomelag, bitolag ele amu, tappiɗ bitob waappa daappig. Ag anam daanna, ag aben ohppa neegnana daappig. Makau ewam amu, ag neekkeg, laih ulah yawalti uɗitteppanu ukke, ewam laa amu, ag neekkeg, laih aam nodeppanu ukke, ewam laa amu, ag neekkeg, laih yau uɗitteppanu ukke, am ewam laa amu, ag neekkeg, laih aam bedeppanu ukke daappig.

²⁶ Tappiɗ naɗi okkai brasppa hak onig Yu nug heum ele amu, tappiɗ amunu brasnu teppu am melemel 8 sentimita. Tappiɗ amu oɗeppa, amuam akka attan ukka, guhig batakppa batak amu, aben amuam kap bala lili haɗag bia hak dayom. Tappiɗ amuppa amu le 40,000 lita daakkunu elele.

²⁷ Huram nug brasppa balal 10, ag le tappiɗ aguppa maadppeg daaglagnu ele hattom. Balal heqo waɗele, amu oh am melemel laippu; amuam 1 mita, 80 sentimita ele. Attan ahilag melemel am 1 mita, 30 sentimita ele.

^28-29 Nug balal amu inam anen anen hattom. Tatam nug balal ebehi hewowa, amu dimppa nug bras maha otala nakok okkai ele, nug amuppa laion dottog, makau dawai dottog, am engel okkai-kerubim dottog kuɗum ele hatta, nug akka, balal ebehi heum, amu heqo waɗele, amuppa ebehi gamagppa qata-aqattom. Ebehi honap ukka attan batak oh eleppa nug bala bras otala eleppa hak bia, nug laion dottog, makau dawai dottog, engel okkai-kerubim dottog kuɗum ele hattom. Aria, laion, makau ele dottog kuɗum attan, waappa ele nug hamappa bala uɗug akkak hattom.

³⁰ Balal anen anen oh am baelag wil bras waɗele, amu bar bras aɗit laa ele hattom; bar anen anen wil aɗit aɗat-tte. Balal anen anen ebehi daug waɗele, amu ohppa amu, bras maha waɗele maattom. Keeke amuam le tappiɗ maweb aɗa daakkunu ukku aakku. Huram nug tappiɗ aɗa daakkunu ukku, amuppa nug bala uɗug akkak ele heum.

³¹ Bras maha waɗele amu ooppa taliliadkkunu, doɗo laa ring bia tappiɗ aɗa daakkunu, ring amu bras maha waɗele amu aɗualadtte. Tappiɗ amu ring amu ooppa daatte. Balal qaɗeppanu ukka ring bitobppa batak am melemel 22 sentimita. Amu balal qaɗeppanu ringnu akka attan tak batak am 45 sentimita. Ring amu qaɗeppa amu, gililppa ulah ippu dottog ringppa talilittak ringppa otaɗak daatteb. Ulah ibuppa amu keeke iɗu iɗu dottolkad amuppa ele otaɗak daatteb. Bras maha otala nakok okkai ele amu, ag am ring bia iitta; ag anen anen am guhilag waɗele.

³² Balalnu wil amu, okkai ahilagnu melemel am 67 sentimita, amu bar bras wil aɗatte, amuam Huram nug piɗe hatta ii maattom. Iitta. Nug balal heum, haen amuppa nug amu ele tuɗitta heum. Wil amu laion aɗi dottolkad, amu waalagppa daatteb.

³³ Nug wil amu bannu karis dilag wil, amubia heum. Huram nug wil oh, amu wilnu keeke oh ele bras huana gakkaɗa, le meum, nug amuppaib hattom.

³⁴ Aria, balal oh anen anen am oqaɗ waɗele ele, amu oqaɗ oh anen anen ag am balal daug daug waɗeleppa daappig.

³⁵ Amu balal qaɗeppa amu Huram nug ring heum. Ring amu nug bitobppanu attan tak am 22 sentimita. Amu Huram nug ring, amu ukku qappak daug waɗeleppa, tappiɗ mawa daakkunu piɗe ha, balalppa ii qakkom. Iitta. Nug keeke amu, aria balal ele oh laippu heum.

³⁶ Huram nug engel okkai-kerubim dottog, laion dottog, am ad det dottog ele ukku amu bras maha otala nakok okkai ele qaɗeppa, aben attemun aben nakok dayomppa amu, nug dottog amu anam otaɗattom. Keeke dottog amu ha, nug bala uɗug akkak bia balal talilittak amuppa maatta taliliom.

³⁷ Huram nug balal 10 hattom amu, am oh iɗulag laippu, ahilag melemel ele am laippu.

³⁸ Huram nug balal anen anen ohppa le tappiɗ daaglagnu, nug le tappiɗ 10 hattom. Tappiɗ amu oh okkai ahilag am 1 mita, 80 sentimita ele. Tappiɗ amu oh anen anen am, 800 lita le tappiɗ amuppa daakkunu elele.

³⁹ Huram nug amu ha mala amu, nug Yawenu mettid lagnu haɗap-ppa heqo laih ulah yau uɗitteppanu, aɗ guguittak nug balal tanig ele amu appa maattom. Amu heqo laih ulah yawalti uɗitteppanu, aɗ guguittak amu balal tanig ele laa amu appa maattom. Aria, tappiɗ naɗi okkai brasppa hak onig Yu amu, nug lag amu daug laih batakppanu, ulah kaɗag, yau ele uɗitteppanu, amuppa meum.

⁴⁰ Amu Huram nug tappiɗ, sabol naunau, amu tiig amuppanu awa tauɗeb ukkaknu tappiɗ ele hattom. Amu Huram nug aakku uɗat oh King Solomon nug Yawenu mettid lag, nug amuppa hekkunu nug mettom amu, nug aakku ha malom.

⁴¹ Keeke nug hattom am inam: biidod okkai aɗit; biidod aɗit ikkiltinu ikki tonaknu keeke tappiɗ bia aɗit; ikki tonaknu keeke tappiɗ bia aɗitnu sen lo akkak bia aɗit;

⁴² ad pomigranet meu dottog 400, sen lo akkak bia aɗit, amuppa anen anenppa huu aɗitppa me ukkak aɗitppa ikkiltinu ikki tonaknu keeke tappiɗ bia aɗit bala mataknu daaglagnu;

⁴³ balal eblaih laih ele; balal amunu tappiɗ eblaih laih ele;

⁴⁴ tappiɗ naɗi okkai brasppa hak onig Yu, makau dawai dottolkad 12 tappiɗ amu maotteb;

⁴⁵ waa ⌊brasppa hak⌋; sabol; amu tiig amuppanu awa tauɗeb ukkaknu tappiɗ ele. King Solomon nug Huram Yawenu mettid lagnu keeke aɗi aɗi hadakkunu aum amu, nug keeke amu oh bras amemɗi aotte eleppa heum.

⁴⁶ King Solomon nug Huram amegppa keeke amu oh le Jodannu oolnu noakppa amunu dottolkad waa haknu wanppa hewowa, amuppa keeke amu oh hadakkunu a, nug appa dayaya, keeke amu oh hattom. Nug aab aɗit Sukot, Saretan ele gamalahppa, uɗem amuppa nug uɗat amu heum.

⁴⁷ Huram nug keeke amu oh brasppa hattom, keeke amu kuɗum hattom amunu, Solomon nug bras amunu uug gane doyaknu skelppa ii meum. Nug skelppa ii meum amunu, auntai laa nug keeke amunu uug ii dootte.

⁴⁸ Solomon nug Yawenu mettid lagnu keeke imu oh ele heum: qaɗab golppa hak; Kayak Nug ina daatte ippuanattaknu bretnu balal golppa hak;

⁴⁹ lam maattaknu balal eblaih laih ele, tanig ele am Oo Gunnab Ele ukkaknu odppa gilil laih naɗiappanu, tanig ele laa amu gilil laih nanehppanu, am amu oh am gol ena dubuttid iitta eleppa hak; lam, lamnu bala haɗag golppa hak ele; amu hoqap ele golppa hak;

⁵⁰ tappiɗ gol ena dubuttid iitta eleppa hak; lamnu wik babaittaknu keeke; tiig amuppanu awa tauɗeb ukkaknu tappiɗ, tappiɗ naunau, amu tappiɗ danab amuppa kalu danab ile muttuɗig enanag bette ilappig ele, amu oh am gol ena dubuttid iitta eleppa hak; mettid lag Oo Gunnab Ele, amunu odnu hinsis, amu Kayaknu mettid lag, amunu odnu hinsis ele golppa hak.

⁵¹ Amu Yawenu mettid lagnu uɗat, King Solomon heum ele, amu malak daye, Solomon nug mameg Dawit nug keeke Yawenu tituana mettom ele, nug keeke amu oh awa, Yawenu mettid lag, amuppa en maknu oo anen anen, nug amuppa meum. Keeke amuam silwa, gol, amu Yawenu mettid lagnu keeke laala ele.