1 King 19 - Nobonob Baibel

Elaiya oola, Horep ukkom

¹ Aria, Ahap nug Jesril aabppa ta, nug ah nuhig, Jesebel, nug gumitta ukka, Elaiya keeke aɗi hewowa, nug Balnu propet oh qep elabppa aqomnu mattie doyom.

² Nug a doye amu, Jesebel nug nai inam me, Elaiya toppa ukkom. “Na gemu dahil kayaknu propet kuɗum aqee, ag mauhppig daatteb amunu, da heppi, butti haen inamppa batak amu, na ag oolagppanu laa daatte bia ii daakkut dayeb amu, kayak laala ag bu okkainab meɗaglagnu ool daatte.” Nug nai amu me ukkom.

³ Nug nai amu me ukke, Elaiya doyowa, nug baɗa aha, mauhmanu oola ukkom. Nug oola ugakka, nug Juda wanppanu aab laa onig Berseba, appa tewowa nug he, nuhig maɗi nid nug appa dayom.

⁴ Nug maɗi nid nuhig uue dayeye, Elaiya nukka nug aha, atu taɗak ooppa aam laippu ukke ukke, tueb me, nug aben laa, ad brum laa aben amuppa dayom ele amu, Elaiya nug appa ta, ad amu waappa dayaya, nug Yawe amegppa mauhkkunu inam aum. “O Yawe, elele! Da, da mamelad aɗi ii eɗadttem amunu, na heppe, da mauhkkulnu oɗ medattem,” awa aum.

⁵ Elaiya nug anam ana, nug ad amu waappa na qa niieye, Yawenu engel laa nug uɗia, Elaiya aɗe, Elaiya ameg oppate, engel nug Elaiya amegppa aum. “Ahan ee la!” awa aum.

⁶ Engel nug anam a, Elaiya nug niiak abenppa niiaya, neekke ukke, nug ikki guguittak bret batappatak men gakkaɗakppa manak, amu le hinaippa itak ele anttom. Nug antta, nug aha, ee, le ele lawowa, nug eɗua niiom.

⁷ Niieye, Yawenu engel nug baula uɗia aɗa, amegppa aum. “Ukkak nahip am okkai, na ɠagattag nahip-ppaib gokkutnu elele iitta amunu, na ahan, ee la!” awa aum.

⁸ Engel nug anam a, Elaiya nug ee, le ele baula lawowa, nug aha, ee, le ele amu ɠagattag mette, deɗ 40, tuqan 40 ele ukka ukka, Kayaknu qauko onig Horep, appa ukkom.

Yawe Elaiya gumitta neum

⁹ Aria, Elaiya nug Horep ukka, nug appa men oɗe laa antta, nug men oɗe amu ooppa ukka, tuqan niiom. Niia ahe, Yawe Nug nuhig nai imu mettom. “Elaiya, na ippa aɗi hettem?” awa oɗ mettom.

¹⁰ Yawe Nug anam oɗ mette, Elaiya nug nob ma aum. “O Yawe Kayak Nakka Ɠagattag Oh Ele, da na oɗen haen oh dim lamidkkulnu yag-nab-bak doyen hettem, amge Israel danab ah ag na hee, na ag ele ag nug tituanna nai qagappig amu, ag nai amu tippalna ii dim lamidtteb. Ag amu henana, ag qaɗab nahip ele loppaɗna, ag nahipad propet laa oh ele qep elabppa aqaeg mauhppig; da dakka iikku daattem, amu gemu ag da ele iuppeg mauhkkulnu mattiɗtteb,” awa aum.

¹¹ Elaiya nug anam a amu, Yawe Nug aum. “Na ahan dimittim gona, qaukoppa da noolppa daappe, da laihnu uɗien, na noomppa laih gokkul,” awa aum. Nug anam a, ulah okkai naɗi uɗia he, qauko amu, amu qauko amunu men ele Yawe noobppa aoɗppig, amge Yawe Nug ulah amuppa ii dayom. Ulah amu uɗia ukke, mim laa neum, amge Yawe Nug mim amuppa ii dayom.

¹² Amu mim amu na ukke, aab okkai dittiom, amge Yawe Nug aab ewak amuppa ele ii dayom. Aria, aab ewak dimppa oqotti laa, am danab baag ɠagattag iitta, bodoettaknab, nug amu doyom.

¹³ Baag bodoettak amu nai mattie, haen Elaiya nug doya amu, nug iɗu nuhig lamenppa hauta, nug dimittim ukka, men oɗe amu oɗeppa hibaitta dayom. Dayeye, baag laa nug inam nug amegppa aum. “Elaiya, na ippa aɗi hettem?” awa aum.

¹⁴ Yawe Nug anam oɗ mette, Elaiya nug nob ma aum. “O Yawe Kayak Nakka Ɠagattag Oh Ele, da na oɗen haen oh dim lamidkkulnu yag-nab-bak doyen hettem, amge Israel danab ah ag na hee, na ag ele ag nug tituanna nai qagappig amu, ag nai amu tippalna ii dim lamidtteb. Ag amu henana, ag qaɗab nahip ele loppaɗna, ag nahipad propet laa oh ele aqaeg mauhppig; da dakka iikku daattem, amu gemu ag da ele iuppeg mauhkkulnu hetteb,” awa aum.

¹⁵ Elaiya nug anam a, Yawe Nug nob ma aum. “Na ahan, ib na aon uɗime ele amu, na ib amuppaib eɗun ukke! Na gona, Damaskusnu Atu Taɗak, na amuppa gona, appa na danab laa onig Hasael, nug Aram dilag king daakkunu na nug goɗen gokkaɗakppa tituane!” awa aum.

¹⁶ Yawe Nug anam anana amu, Nug nai tuɗitta aum. “Na nug goɗen gokkaɗakppa tituanona, na Nimsi bekka Jehu, nug Israel dilag king daakkunu goɗen gokkaɗakppa tituane! Na nug goɗen gokkaɗakppa tituanona amu, na Sapat bekka Elisa, nug am Abel Mehola ted, nug na abenam awa, propet daakkunu, na nug goɗen gokkaɗakppa tituankkut.

¹⁷ Am inam bekku. Aun nug Hasael eppegppa ii mauhkku amu, nug Jehu eppegppa mauhkku. Am aun nug Jehu eppegppa ii mauhkku amu, nug Elisa eppegppa mauhkku.

¹⁸ Ag mauhkkulag, amge da heppi, Israel ooppa danab 7,000, da ag aɗualatti, ag dahilad daatteb. Danab amu ag kayak hambuppuak Bal noobppa dup ii nona binag ii meppig; ag nug onig okkai mettaglagnu nug dottog ele ii ootuqidppig,” awa aum.

¹⁹ Yawe Nug anam Elaiya amegppa aum amunu, Elaiya nug appanu aha ukka, nug Sapat bekka Elisa gumitta ukkom. Elisa nug plau eeɗaknu makau 24 mamelag dayom. Makau amu ag aɗit aɗit plau anen anen eeɗattegeg, danab 11 Elisa ele ag gumadnan lamadppig. Danab laa ag anuqna ukkaegeg, Elisa nug makau nuhikuɗ lamatata, danab laa oh dim lamatta, wan buuom. Nug buuewe, Elaiya nug uɗia, qe-eɗidkkunu haaha, nug lamen nuhig Elisa beɗuppa meum.

²⁰ Elaiya nug anam he, Elisa nug makau nuhikuɗ uuata, qaietta dim lamitta ukka, guguitta ta, nug amegppa aum. “Na, ‘Yo,’ appe, da eɗuen ukken, da anil, mamel ele otuqatoya, da eɗuen, na dim lamidkkul,” awa aum. Nug anam a, Elaiya nug aum. “Da nahipnu aɗi keeke ii hemi amunu, na eɗun ukke!” awa aum.

²¹ Elaiya nug anam a, Elisa nug eɗua, uɗat heumppa ukka, nug makau aɗit nuhikuɗ diiata, baalah otaɗata, plau eeɗaknu ad, nug amu awa, ad amuppa aab ila, teppulah battiowa, appan danab ah matte, ag ee amu lappig. Elisa nug amu ha malowa, nug aha, Elaiya dim lamitta, nug ehanittom.