1 King 16 - Nobonob Baibel

¹ Amu Yawe Nug Basa nug bu aokku, Nug nuhig nai amu Hanani bekka, propet Jehu, nug mette, nug aum.

² “Basa, na doye! Haen na danab onin iitta, keeke hamu laa bia daame amu, da na awitte hei, na dahilad danab ah Israel dilag king beme daattem. Amge Basa, na Jeroboamnu hak dim lamidna, na he, Israel ag ele hipunin heppig. Amu ag hipunin henana heeg, da oppoɗil beum daatte,” awa aum.

³ Nug anam ana, nug nai tuɗitta aum. “Amunu geha da na, amu na baenadppan ele heppi nauhkkulag. Da Nebat bekka Jeroboam baekkudppa dilagppa hemi, amubia da ahilagppa hekkul.

⁴ Amu nahipad laala ag aab okkai ooppa mauhkkulag amu, qai ag gaɗalag lakkulag. Amu laala ag aab okkai dimittim mauhkkulag amu, ai ag gaɗalag lakkulag,” awa aum.

⁵ Amu keeke kuɗum laa ele King Basa heum, nuhig uɗat ɠagattag ele amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte. Yaak amuppa kaya amuam Basa nug uɗat ɠagattag laala hattom, am amunu atte.

⁶ Dimppa Basa mauhe, ag Tirsa aabppa boumppig. Nug mauhe amu, nug bekka Ela nug mameg abenabppa king ba dayom.

⁷ Genab, Basa nug ii mauhom haenppa amu, nug Yawe noobppa hipunin Jeroboam, baekkudppa ele heppig bia heum. Am Basa nug he, Yawe Nug oo huan nauhom. Am laa ele, Basa nug Jeroboamnu danab oh aqom amunu, Yawe Nug nuhig nai Hanani bekka, propet Jehu mette, nug Basa gumitta ukka, amegppa Yawenu nai mattiom.

Ela nug Israel dilag king beum

⁸ Amu Asa nug Juda dilag king dayaya, nuhig king dayaknu maɗ 26ppa Basa bekka Ela, nug Israel dilag king ba dayom. Ela nug king ba, nug maɗ aɗit Tirsa appa king dayom.

⁹ Amge Ela, nug nuhig ban dilag okkai laa onig Simri, nug Ela kekeɗ metta, qeeb mauhkkunu ib madittom. Simri nug nuhig uɗat am kingnu bannu karis ameg laa, nug amu gumadttom. Deɗ laa king nug Tirsa appa, danab laa, nug kingnu lag enanagnabnu gumak danab onig Arsa, nug nug laugppa ukka, nug le lawowa, digma spak meum.

¹⁰ Aakku Simri nug lag amu ooppa noa, Ela qe mauhom. Simri nug Ela qe mauhe, nug Ela abenabppa king ba dayom. Asa nug Juda dilag king dayaya, nug nuhig king dayaknu maɗ 27ppa amu, Simri nug Ela qe mauhom. Ela mauhe amu, Simri nug abenabppa king ba dayom.

¹¹ Simri nug king aben awa, nug pahanab Basa baegppan oh aqe mauhppig. Nug Basa baegppan oh, ag danab daappig, ag Basa ele tiig laippu, o Basa laikkudib, nug ag oh aqe mauhppig. Nug amunu danab laippu laa uue ii dayom.

¹² Simri nug Basa baekkudppan amu oh aqe mauhppig amunu, kobol amu bekkunu Yawe Nug propet Jehu oɗeppa aum amu, Simri heum, kobol amuam nai amu elele mettom.

¹³ Amu beumnu diig am, Basa nug, nug bekka Ela ele aa hipunin digdig heya heeh, Israel danab ah ele ag hipunin amu hadappig. Ag amu henana, Israel ag kayak hambuppuak noolagppa dup nona binag meppig, kayak amu ag ehanadkkulagnu elele iitta amu, ag amu heegeg, Yawe, Israel dilag Kayak, Nug oppoɗi beum.

¹⁴ Amu keeke kuɗum laa ele King Ela heum amu, kaya amuam ag buk laappa,, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

Simri nug Israel dilag king ba dayom

¹⁵ Amu haen Asa nug Juda dilag king dayaya, nuhig king dayaknu maɗ 27ppa, Simri nug Israel dilag king ba, Tirsa aabppa deɗ eblaih aɗitib king dayom. Haen amuppa amu, Israel dilag ban danab ag Pilistia wanppa haen tutu dayaknu aab kalappigppa, aab Gibeton guguittak daappig.

¹⁶ Amu Israel ban danab ag ban henana, Simri nug king qe mauhom, ag nai amu dooppig. Doona amu, ban danab ag deɗ amuppaib ag ahan, ahilag ban daup ikki Omri aon, king meeg, nug Israel dilag king beum.

¹⁷ Aakku Omri, nuhikkud ban danab oh ele ag Gibetonnu ahan, aab amu uun gona, Tirsa aab oo mettan, aqaglagnu daappig.

¹⁸ Haen amuppa am Simri nug Tirsa dayeye, Omrinu ban danab ag nuhig huu amu eɗadna, aab okkai amu aoeg antta, nug kingnu lag enanagnabnu laih laa aɗ ɠagattagnab ele amuppa noa, kingnu lag enanagnab amu amote, lag amu ewa, nug ele ewe mauhom.

¹⁹ Aɗinu kobol amu Simri nuhigppa anam beum? Nug hipunin haaha, nug Yawenu neekkakppa eheɗ heum. Nug Jeroboam, nuhig oiyak dim lamitta, nug Jeroboam hipunin ha he, Israel danab ah ele ag hipunin amu heppig amu, nug amu ele heum.

²⁰ Amu keeke kuɗum laa ele King Simri heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte. Buk amuppa ele, nug King Ela waappa daakkunu uua, King Elanu nai tappe neumnu kaya ele daatte.

Omri nug Israel dilag king ba dayom

²¹ Simri nug mauhe, haen amuppa Israel danab ah ag oppatna, ameg aɗit bena, huu ameg laa ag am Ginat bekka Tipni, nug ahilag king daakkunu oolag dayom. Ameg laa ag am Omri, nug ahilag king daakkunu oolag dayom.

²² Amge danab ah Omri nug ahilag king daakkunu oolag dayom ele, ag am danab ah Ginat bekka Tipninu huu amu eɗadppig. Eɗatteg, Tipni mauhe, amu Omri aakku ahilag king dayom.

²³ Asa nug Juda dilag king dayaya, nuhig king dayaknu maɗ 31ppa amu, Omri nug Israel dilag king ba, nug maɗ 12 king dayom. Tatam maɗ eblaih laippu ele nug Tirsa appa king dayom.

²⁴ Dimppa amu Omri nug Samaria qauko nakok, wan amu mameg Semer eppegppanu daden meum. Nug silwa 70 kilogram, amuppa daden meum. Nug daden ma, qauko nakok amuppa nug aab okkai laa kalom. Omri nug Semer onig dabmaama, nug aab amu onig Samaria ataɗom.

²⁵ Amge Omri nug Yawenu neekkakppa eheɗ heum. Nuhig hipunin hak am king oh tatam daappig, ag hipunin heppig, amu eɗattak.

²⁶ Nug Nebat bekka Jeroboam, nug nuhig oiyak oh dim lamitta, amu nug Jeroboam hipunin ha he, Israel danab ah ele ag hipunin amu heppig amu, nug amu ele heum. Nug anam he, Israel ag hipunin amu henana, ag kayak hambuppuak dottolag, ag ehanadkkulagnu elele iitta noolagppa dup nona binalag meppig amu, amuppa ag heeg, Yawe, Israel dilag Kayak, Nug oppoɗi beum.

²⁷ Amu keeke kuɗum laa ele King Omri heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte. Kaya amuam Omri nug uɗat ɠagattag oh heum, am amu ippunigtte.

²⁸ Omri nug mauhe, ag nug Samaria aabppa boumppig. Nug mauhe, nug bekka Ahap nug abenabppa king ba dayom.

Ahap Nug Israel dilag king ba dayom

²⁹ Asa nug Juda dilag king dayaya, nuhig king dayaknu maɗ 38ppa amu, Omri bekka Ahap nug Israel dilag king ba dayom. Nug king ba, nug maɗ 22 Samaria appa king dayom.

³⁰ Omri bekka Ahap nug Yawenu neekkakppa eheɗ huanak heum. Ahapnu eheɗ hak amu huanaknab, king laala tatam daappig, amu dilag eɗattak heum.

³¹ Nug Nebat bekka Jeroboamnu kobol awa, nug hipunin heum amubia nug heum. Nug amu heum, amge nuhig dabmakppa amuam keeke hamu, nug nuhig haknu uug ii doyom. Iitta! Nug nau hak amu nug tuɗitta, nug Saidon aab okkainu King Etbal aɗeg Jesebel awa, am nug Saidon dilag kayak hambuppuak Bal noobppa dup noa binag meum.

³² Ahap nug kayak hambuppuak Bal laug laa Samaria buua, lag amu ooppa amu nug kayak hambuppuak Bal binag maknu qaɗab laa qeum.

³³ Am laa ele, Ahap nug kayak hambuppuak Aserah dabmekkulagnu biidod qappom. Ahap nug hipunin okkainab amu heum amunu, Yawe, Israel dilag Kayak, Nug oppoɗi beum. Ahapnu hipunin amu okkainab, Israel dilag king laala tatam daappig, amu dilag hipunin am eɗattak.

³⁴ Ahap king dayom, haen amuppa amu Hiel, Betel aabppanu, nug eɗua Jeriko kalom. Haen Hiel nug uɗat amu digma heehe amu, nug bekka Abiram, nid danab tatamnu, nug mauhom. Aria nug aabnu aɗ od okkai amu heehe, nuhig nid danab huh bieg, Segup, nug mauhom. Hiel, nuhigppa keeke beum, amuam anukka Yawe Nug Nan bekka Josua oɗeppa aum, nai amu elele mettom.