ᒋᔅᒐᔨᑕᑯᑕᒐᐅᓐ 13 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᓂᓱ ᒥᒋ ᐊᐛᓯᓯᒡ 1 ᐊᓐ ᒪᒃ ᒥᔅᑎ ᒥᓐᑐᔅ ᐊᓐᑕ ᓯᓱᒡ ᐎᓂᐸᑯᒡ ᒋ ᓂᐳᐅᐤ᙮ ᐊᑯ ᒂ ᐛᐱᒥᒃ ᒥᒋ ᐊᐛᓯᔅ ᐊᓐᑕ ᐎᓂᐸᑯᒡ ᐊ ᐅᒋ ᓄᑯᓯᒡ᙮ ᓂᔄᐅᑕᒡ ᒋ ᐃᑕᑎᓂᔪᐤ ᐅᔅᑎᒂᓇ ᑭᔭ ᐸᐃᑯᔪᐤ ᒋ ᐃᑕᑎᓯᔪᐛ ᐅᑦ ᐊᔅᑭᓇ᙮ ᒋᓴᐅᒋᒪᐅᑯᓂᔎᐅᓂᔪᐤ ᒋ ᐊᑯᑕᔪᐛ ᐸᐸᐃᒄ ᐊᓐᑕ ᐊᓂᔭᔪᐛ ᐅᑦ ᐊᔅᑭᓇ᙮ ᐸᐸᐃᒄ ᒪᒃ ᐊᓂᔭᔪᐛ ᐅᔅᑎᒂᓇ ᒋ ᒥᓯᓇᑕᔪᐛ ᐊᓐᑕ ᐃᓯᓂᐧᑲᓱᐅᓇ ᐊ ᐸᔅᑕᒥᑯᔨᒋ ᒋᓴᒪᓂᑐᐛ ᐊ ᐃᑎᑕᑯᓂᔨᒋ᙮ 2 ᐊᓐ ᒪᒃ ᒥᒋ ᐊᐛᓯᔅ ᓄᓴ ᒥᔅᑎᐱᓱᐤ ᒋ ᐃᓯᓇᑯᓱᐤ᙮ ᐅᓯᑕ ᒧᔭᒻ ᒋᓴᔭᒄ ᒥᓯᑕ ᒋ ᐃᓯᓇᑯᓂᔪᐛ᙮ ᐅᑐᓐ ᒧᔭᒻ ᒥᓯᐱᓱᐤ ᒥᑐᓂᔪᐤ ᒋ ᐃᓯᓇᑯᓂᔪᐤ᙮ ᐊᑯ ᐊᓐ ᒥᔅᑎ ᒥᓐᑐᔅ ᒂ ᒥᔭᑦ ᐊᓂᔭᔪᐛ ᒥᒋ ᐊᐛᓯᓴ ᐎᔾ ᑎᐱᔨᐛ ᐅᒥᔅᑯᓯᐅᓐ ᑭᔭ ᐎᔾ ᑎᐱᔨᐛ ᐅᑎᐸᔨᒋᒐᐅᓐ᙮ ᒋ ᒥᔭᐤ ᒐᒋ ᐊᐱᔨᒋ ᐊᓐᑕ ᐅᒋᓴᐅᒋᒪᐤ ᑕᑎᐳᐛᑭᓂᒡ᙮ 3 ᐸᐃᒄ ᐊᓂᔭ ᐅᔅᑎᒂᓐ ᐊᓐ ᒥᒋ ᐊᐛᓯᔅ ᒧᔭᒻ ᐊᒋ ᒥᔄᑭᓂᐧᑲᑕᑭᓄᐎᒡ ᒋ ᐃᓯᓇᑯᓂᔪᐤ᙮ ᒥᒄ ᒪᒃ ᓴᔅ ᒋ ᒥᔽᔪᐤ᙮ ᒥᓯᐛ ᒪᒃ ᐊᓐᒡ ᐊᔅᒋᒡ ᐊ ᑕᒡ ᒋ ᒪᒥᔅᑲᑕᔨᒪᐅᒡ ᐊᓂᔭ ᒥᒋ ᐊᐛᓯᓴ ᑭᔭ ᒋ ᓇᓴᐛᐅᒡ᙮ 4 ᒥᒐᑦ ᐊᐛᓐᒋ ᒋ ᐊᔭᒥᐊᔅᑐᐛᐅᒡ ᐊᓂᔭ ᒥᔅᑎ ᒥᓐᑐᓴ ᐊᓂᔭ ᐊᒋ ᒥᔨᑯᔨᒋ ᑎᐸᔨᒋᒐᐅᓂᔪᐤ ᒥᒋ ᐊᐛᓯᓴ᙮ ᑭᔭ ᐊᓂᔭᔪᐛ ᒥᒋ ᐊᐛᓯᓴ ᒋ ᐊᔭᒥᐊᔅᑐᐛᐅᒡ, ᐊ ᐃᔅᒋᔄᒡ, “ᐊᐛᓐ ᐊ ᐃᑕᔨᑕᑯᓯᑦ ᑕᓐ ᐊ ᐃᑕᔨᑕᑯᓯᔨᒋ ᐅᔭ ᒥᒋ ᐊᐛᓯᓴ ? ᐊᐛᓐ ᑲᔅᒋᐅᑦ ᒐᒋ ᒪᓯᐊᑦ ?” 5 ᐊᓐ ᒪᒃ ᒥᒋ ᐊᐛᓯᔅ ᒋ ᐱᔅᑎᓇᑭᓄᐤ ᓇᔅᒡ ᒐᒋ ᒪᒥᒋᒧᑦ ᑭᔭ ᒐᒋ ᐸᔅᑕᒪᑦ ᒋᓴᒪᓂᑐᐛ᙮ ᒋ ᐱᔅᑎᓇᑭᓄᐤ ᑭᔭ ᒐᒋ ᑎᐸᔨᒋᒐᑦ ᓇᐎᔪᐤ ᐊᓱ ᓂᓱ ᐱᓯᒺ ᐃᔅᐱᔅ᙮ 6 ᒋ ᒋᒋ ᐸᔅᑕᒪᐤ ᒋᓴᒪᓂᑐᐛ ᑭᔭ ᒋ ᒪᔭᔨᑎᒺᐤ ᐅᑦ ᐃᓯᓂᐧᑲᓱᐅᓂᔪᐤ᙮ ᒋ ᒪᔭᔨᑎᒺᐤ ᐊᓐᑕ ᐊ ᑕᔨᒋ ᑭᔭ ᒥᓯᐛ ᐊᓂᔭᔪᐛ ᒋᒋᒋᓯᑯᒡ ᐊ ᑕᔨᒋ ᒋ ᒪᔭᔨᒪᐤ᙮ 7 ᒋ ᐱᔅᑎᓇᑭᓄᐤ ᒐᒋ ᒪᓯᐊᑦ ᑲ ᑕᑈᑎᒥᔨᒋ ᑭᔭ ᒐᒋ ᓴᒂᐊᑦ᙮ ᒋ ᒥᔭᑭᓄᐤ ᑎᐸᔨᒐᐅᓂᔪᐤ ᒐᒋ ᐅᒋᒪᐅᑐᑐᐛᑦ ᒥᓯᐛ ᐊ ᐃᑎᔅᑲᓇᓯᔨᒋ ᐊᐛᔪᐛ ᑭᔭ ᒥᓯᐛ ᓂᓇᐧᑯᐤ ᐊ ᐃᓯ ᐃᔨᒥᔨᒋ ᑭᔭ ᒥᓯᐛ ᐊ ᐃᓯ ᒪᒧᑕᐅᓯᔨᒋ᙮ 8 ᐊᑯ ᒪᒃ ᒥᓯᐛ ᐊᐛᓐ ᐊᔅᒋᒡ ᐊ ᑕᑦ ᒋᑭ ᐊᔭᒥᐊᔅᑐᐛᐤ ᐊᓂᔭ ᒥᒋ ᐊᐛᓯᓴ᙮ ᒥᒄ ᐊᓐᒡ ᐱᒪᑎᓯᐤ ᒥᓯᓇᐃᑭᓂᒡ ᑲ ᒥᓯᓇᑕᔨᒋ ᐅᑦ ᐃᓯᓂᐧᑲᓱᐅᓄᐛᐤ, ᐊᓂᔭ ᒥᓯᓇᐃᑭᓂᔪᐤ ᐊᓐᑕ ᑲ ᒥᓯᓇᓱᒡ ᐊᐛᓐᒋ ᐊᔅᒄ ᐊᑲ ᐅᒋ ᐅᓯᑕᑭᓄᐅᒡ ᐊᔅᒋᔾ, ᐊᐅᑯᓐᒡ ᐊᓐᒡ ᓇᒪ ᐅᒋ ᐊᔭᒥᐊᔅᑐᐛᐅᒡ ᐊᓂᔭ ᒥᒋ ᐊᐛᓯᓴ᙮ ᐅ ᒪᒃ ᒥᓯᓇᐃᑭᓐ ᐊᓐ ᒪᔭᑕᓂᔅ ᑲ ᓂᐸᐊᑭᓄᐅᑦ ᑎᐸᔨᑎᒻ᙮ 9 ᒥᓯᐛ ᒋᔨᐛᐤ ᑲ ᓂᑐᑎᒪᒄ ᓱᒃ ᓇᔅᒡ ᐎ ᓂᔅᑐᑎᒧᒄ ᐅ᙮ 10 ᐊᓐ ᐊᐛᓐ ᑲ ᐃᑎᔅᑕᔨᑯᐱᓇ ᒐᒋ ᒋᐸᐛᑭᓄᐅᑦ ᒋᑭ ᒋᐸᐛᑭᓄᐤ, ᑭᔭ ᐊᓐ ᐊᐛᓐ ᑲ ᐃᑎᔅᑕᔨᑯᐱᓇ ᓂᑐᐱᔪᐅ-ᒧᐧᑯᒪᓂᔪᐤ ᐊ ᐊᐱᑎᓂᔨᒡ ᒐᒋ ᓂᐸᐊᑭᓄᐅᑦ ᒐᔅᑎᓇᔅ ᐊᑯᓐ ᒐ ᐃᑐᑐᐛᑭᓄᐅᑦ᙮ ᐊᑯ ᒪᒃ ᐊᓐᒡ ᑲ ᑕᑈᑕᒡ ᓇᑐᐛᔨᑕᑯᓯᒡ ᓱᒃ ᒐᒋ ᓯᐱᔪᐛᓯᒡ ᐊ ᐊᔨᒋᑲᐳᐅᒡ ᑭᔭ ᓱᒃ ᒧᔅ ᒐᒋ ᑕᑈᑕᒡ᙮ ᒥᒋ ᐊᐛᓯᔅ ᐊᔅᒋᒡ ᑲ ᐅᒋ ᒧᔅᒋᐱᔪᐅᑦ 11 ᐊᑯ ᒥᓐ ᑯᑎᒃ ᒥᒋ ᐊᐛᓯᔅ ᒂ ᐛᐱᒥᒃ ᐊᓐᑕ ᐊᔅᒋᒡ ᐊ ᐅᒋ ᒧᔅᒋᐱᔪᐅᑦ᙮ ᒋ ᓂᓯᓂᔪᐛ ᐅᑦ ᐊᔅᑭᓇ ᒧᔭᒻ ᒪᔭᑕᓂᔅ ᐅᑦ ᐊᔅᑭᓇ ᐊ ᐃᓯᓇᑯᓂᔨᒋ, ᐊᑯᓐ ᑲ ᐃᓯᓇᑯᓂᔨᒋ᙮ ᒧᔭᒻ ᒪᒃ ᒥᔅᑎ ᒥᓐᑐᔅ ᐊ ᒋᔅᑐᑦ ᐊᑯᓐ ᑲ ᐃᑎᑕᑯᓯᑦ ᐊ ᒋᔅᑐᑦ᙮ 12 ᐅ ᒪᒃ ᑯᑎᒃ ᒥᒋ ᐊᐛᓯᔅ ᒥᔅᑎ ᒋ ᒥᔨᑯᐤ ᑎᐸᔨᒋᒐᐅᓂᔪᐤ ᐊᓂᔭᔪᐛ ᓂᔅᑎᒻ ᒥᒋ ᐊᐛᓯᓴ, ᐊ ᐅᒋᒪᐅᑦ ᒐᒋ ᐃᑕᐱᒋᐃᑯᑦ ᐊᓐᑕ ᐊ ᑕᔨᒋ᙮ ᐊᑯ ᒂ ᐊᔨᐧᑭᒥᐊᑦ ᒥᓯᐛ ᐊᐛᔪᐛ ᐊᓐᑕ ᐊᔅᒋᒡ ᑲ ᐱᒪᑎᓯᔨᒋ ᒐᒋ ᐊᔭᒥᐊᔅᑐᐛᔨᒋ ᐊᓂᔭ ᓂᔅᑎᒻ ᑲ ᑕᔨᒋ ᒥᒋ ᐊᐛᓯᓴ, ᐊᓂᔭᔪᐛ ᒥᒋ ᐊᐛᓯᓴ ᒋᒋᐛ ᑲ ᒥᓱᐛᑭᓂᐧᑲᑕᑭᓄᐎᒂᓂ ᐅᔅᑎᒂᓂᔨᒡ ᑭᔭ ᑲ ᒥᓏᒋᑕᑭᓄᔨᒋ᙮ 13 ᐊᑯ ᐊᓐ ᑯᑎᒃ ᑲ ᑕᑦ ᒥᒋ ᐊᐛᓯᔅ ᓂᓇᐧᑯᐤ ᒋ ᐃᓯ ᒥᔅᑎ ᒪᒥᔅᑲᒡ ᐃᑐᐤ᙮ ᐛᐛᒡ ᒋ ᐃᑐᑎᒻ ᐃᔅᑯᑕᔪᐤ ᒐᒋ ᐸᒋᑎᓂᔨᒡ ᒋᓯᑯᒡ ᐅᒡ ᐊᓐᑕ ᐃᔅ ᐊᔅᒋᒡ ᒥᓯᐛ ᐊᐛᔪᐛ ᐊ ᑭᓄᐛᐱᒥᑯᑦ᙮ 14 ᐊᓐᒡ ᒪᒃ ᐊᐛᓐᒋ ᐊᓐᑕ ᐊᔅᒋᒡ ᐊ ᑕᒡ ᒋ ᐎᔭᓯᐃᑯᐅᒡ ᐅᔭ ᑲ ᐃᓯ ᐱᔅᑎᓇᑭᓄᔨᒋ ᐅᔭ ᒥᒋ ᐊᐛᓯᓴ ᒐᒋ ᒪᒥᔅᑲᒡ ᑎᔨᒋ ᐊ ᑭᓄᐛᐱᒥᑯᔨᒋ ᐊᓂᔭ ᑯᑎᑲ ᒥᒋ ᐊᐛᓯᓴ᙮ ᐊᓐᒡ ᐊᐛᓐᒋ ᐊᔅᒋᒡ ᑲ ᑕᒡ ᒋ ᐃᑎᑯᐅᒡ ᐊᓂᔭ ᓂᓱ ᐊ ᑕᔨᒋ ᒥᒋ ᐊᐛᓯᓴ ᒐᒋ ᐅᓯᐊᒡ ᒥᓂᑐᐧᑲᓇ ᐊ ᒋᔅᑕᔨᑕᑯᐊᒡ ᐊᓂᔭ ᒥᒋ ᐊᐛᓯᓴ ᒋᒋᐛ ᑲ ᒥᓱᐛᑭᓂᐧᑲᑎᑯᔨᒋ ᓂᑐᐱᔪᐅ-ᒧᐧᑯᒪᓂᔪᐤ ᒥᒄ ᒪᒃ ᐃᔭᐱᒡ ᐊᒋ ᐱᒪᑎᓯᔨᒋ᙮ 15 ᒋ ᐱᔅᑎᓇᑭᓄᐤ ᒪᒃ ᐅ ᒥᒋ ᐊᐛᓯᔅ ᒐᒋ ᐃᑐᑐᐛᑦ ᐊᓂᔭ ᒥᓂᑐᐧᑲᓐ ᒐᒋ ᐃᔪᐎᔨᒋ᙮ ᐊᑯ ᒪᒃ ᒂ ᐃᔨᒥᔨᒋ ᑭᔭ ᒋ ᐃᑐᑐᐛᔪᐛ ᐊᐛᔪᐛ ᐊᑲ ᐎ ᐊᔭᒥᐊᔅᑐᐛᔨᒋ ᐊᓂᔭᔪᐛ ᒥᓂᑐᐧᑲᓇ ᒐᒋ ᓂᐸᐊᑭᓄᔨᒋ᙮ 16 ᐅ ᒪᒃ ᒥᒋ ᐊᐛᓯᔅ ᒋ ᐊᔨᐧᑭᒥᐊᐤ ᒥᓯᐛ ᐊᐛᔪᐛ ᒐᒋ ᒋᔅᒋᓄᐛᒋᓯᓇᐛᑭᓄᔨᒋ ᐅᒥᔪᓂᔨᒡ ᒥᑎᒋᒡ ᒪᒃ ᐅᔅᑲᑎᑯᐎᒡ, ᒥᓯᐛ ᐊᓂᔭ ᑲ ᒋᔅᑕᔨᑕᑯᓯᔨᒋ ᑭᔭ ᐊᓂᔭ ᐊᑲ ᒋᔅᑕᔨᑕᑯᓯᔨᒋ, ᐊᓂᔭᔪᐛ ᑲ ᐛᔪᑎᓯᔨᒋ ᑭᔭ ᐊᓂᔭ ᑲ ᒋᔅᑎᒪᑎᓯᔨᒋ, ᐊᓂᔭᔪᐛ ᑲ ᐅᑦ ᐊᐱᒋᐊᑭᓂᑐᑐᐛᑭᓄᔨᒋ ᑭᔭ ᐊᓂᔭ ᐊᑲ ᐅᑦ ᐊᐱᒋᐊᑭᓂᑐᑐᐛᑭᓄᔨᒋ᙮ 17 ᓇᒪ ᒪᒃ ᐊᐛᓐ ᐅᒋ ᐊᑕᐛᐤ ᑭᔭ ᓇᒪ ᐊᐛᓐ ᐅᒋ ᐅᑎᓇᓱᐤ ᒧᔭᒻ ᐊᑲ ᐅᒋ ᒋᔅᒋᓄᐛᒋᓯᓇᐛᑭᓄᒂ᙮ ᐊᓂᔭ ᒪᒃ ᐊᓐᑕ ᑲ ᒋᔅᒋᓄᐛᒋᓯᓇᐛᑭᓄᐎᒡ, ᐊᓂᔭ ᐊ ᐃᓯᓂᐧᑲᓱᔨᒋ ᐊᓂᔭ ᒥᒋ ᐊᐛᓯᓴ ᑭᔭ ᒪᒃ ᐊᓂᔭ ᐅᑦ ᐊᒋᑕᓱᐅᓂᔪᐛ ᒋ ᒥᓯᓇᑕᔪᐤ ᐊᓐᑕ᙮ 18 ᐊᑯᑕ ᒪᒃ ᐅᑕ ᑭᒐᑕᐛᔨᑎᒧᐅᓐ ᓇᑐᐛᔨᑕᒂᒡ᙮ ᐊᓐ ᒪᒃ ᐊᐛᓐ ᑲᒐᔨᑕᐛᔨᑎᒧᒂ, ᒋᑭ ᒋ ᒋᔅᒐᔨᑎᒻ ᑕᓐ ᐊ ᐃᓯ ᐎᑎᒪᒐᒥᑭᓂᔨᒡ ᐊᓂᔭ ᐊᒋᑕᓱᐅᓂᔪᐤ, ᐛᔅ ᐊᓐ ᐊᒋᑕᓱᐅᓐ ᓇᐸᐤ ᐊᓂᔭ ᐅᑦ ᐃᓯᓂᐧᑲᓱᐅᓐ᙮ ᐊᓱᑕᑕᑐᐤ ᒥᑕᓯᒥᑎᓄᐤ ᐊᓱ ᐊᓱᑕᒡ ᑕᑐᔪᐤ ᐊᓱ ᐊᓱᑕᒡ ᒪᒃ ᐃᑎᓯᓇᑕᔪᐤ ᐅᑦ ᐃᓯᓂᐧᑲᓱᐅᓐ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.