ᑎᐱᑦ ᐅᓂᑭᒧᐅᓇ 79 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐅ ᒋᓴᒪᓂᑐᐤ, ᐊᑲ ᐊᔭᒥᐊᒡ ᒋ ᐱᑐᒐᐅᒡ ᒋᑎᐱᔨᐛᐅᓯᐅᓂᒡ; ᒋ ᐸᔭᒋ ᒋᓴᐊᔭᒥᐊᐅᒋᐛᐱᔪᐤ ᒋ ᐅᓂᑕᐅᒡ; ᒋ ᐸᐸᔅᑯᔅᑕᐅᒡ ᒋᕈᓯᓕᒥᔪᐤ᙮ 2 ᐊᒋ ᓂᐱᒥᑭᓂᔨᒋ ᐎᔪᔨᐛ ᒋᑦ ᐊᑐᔅᒐᔭᑭᓇ ᒋ ᒥᔭᐅᒡ ᒐᒋ ᐅᒥᒋᒥᔨᒋ ᐱᔭᓯᐛ ᒋᓯᑯᒡ, ᐅᐎᔭᓯᔪᐛ ᒋᐸᔭᒋᓯᒪ ᐊᐛᓯᓴ ᐊᔅᒋᒡ᙮ 3 ᒋ ᓯᒋᓂᒺᐅᒡ ᐅᒥᐧᑯᔪᐤ ᒧᔭᒻ ᓂᐱᔪᐤ ᒥᓯᐛ ᐛᔅᑲ ᒋᕈᓯᓕᒥᒡ; ᓇᒪ ᐅᒋ ᑕᐅᒡ ᐊᐛᓐᒋ ᒪᒃ ᒐᒋ ᓇᐃᐧᑯᐛᒡ᙮ 4 ᓂ ᒥᒋᐃᑎᑯᓇᓐᒡ ᓂᒡ ᐃᔨᒥᓇᓐᒡ, ᓂᒪᔭᔨᒥᑯᓇᓐᒡ ᑭᔭ ᓂᓯᑲᑕᔨᒥᑯᓇᓐᒡ ᐊᓐᒡ ᐛᔅᑲ ᑲ ᐃᑕᒡ᙮ 5 ᑕᓐ ᐃᔅᐱᔅ ᐊᔅᒄ, ᑎᐸᔨᒋᒐᓱᐤ ? ᑲᒋᒡ ᐊ ᒋᑭ ᒋᔄᓯᓐ ? ᒋᑦ ᐅᑕᔨᑎᒧᐅᓐ ᐊ ᒋᑭ ᐃᔎᓯᒐᒥᑭᓐ ᒧᔭᒻ ᐃᔅᑯᑕᐤ ? 6 ᓯᒋᓂᒧᐅᒡ ᒋᑦ ᐊᐧᑯᔪᐛᓯᐅᓂᔪᐤ ᐊᑲ ᐊᔭᒥᐊᒡ ᐊᑲ ᒋᔅᒐᔨᒥᔅᒡ, ᑭᔭ ᐊᓂᔭ ᐅᒋᒪᐅᓇ ᐊᑲ ᓂᓇᑐᒥᑯᔨᓐ᙮ 7 ᐛᔅ ᒋ ᒋᑕᒪᐅᒡ ᒐᑭᐸ, ᑭᔭ ᒋ ᓂᓱᐅᓇᒋᑕᐛᐅᒡ ᐊᓐᑕ ᐊᒋ ᑕᔨᒋ᙮ 8 ᐅ ᐊᑲᐎᔾ ᒋᔅᒋᑐᑎᒧᐅᓇᓐ ᐛᔅᑭᒡ ᒥᒐᑎᓯᐅᓇ: ᐊᑯᔅ ᒋ ᔪᔅᐱ ᓱᐛᔨᒋᒐᐅᓇ ᒋᐃᑉ ᓂᑭ ᐅᑎᑎᑯᓇᓐ; ᐛᔅ ᓇᔅᒡ ᓂᒋ ᒋᔅᑎᒪᐃᑯᐅᓇᓐ᙮ 9 ᐎᒋᐃᓇᓐ, ᐅ ᒋᓴᒪᓂᑐᐤ ᐛᒋᐱᔨᒡ ᓂ ᐱᒪᒋᐃᑯᓯᐅᓇᓇᓐ, ᒐᒋ ᒋᔅᑕᔨᑕᒂᒡ ᒋᑦ ᐃᓯᓂᐧᑲᓱᐅᓐ; ᐱᒪᒋᐃᓇᓐ ᒪᒃ, ᑲᓯᓇ ᑭᔭ ᓂᒥᒋᑐᑎᒧᐅᓇᓇ, ᒋᑦ ᐃᓯᓂᐧᑲᓱᐅᓂᒡ ᐅᒡ᙮ 10 ᒐᒂᔪᐤ ᒋᐸ ᐅᒋ ᐃᔅᒋᔄᐅᒡ ᐊᑲ ᐊᔭᒥᐊᒡ, “ᑕᓐᑕ ᐊ ᑕᔨᒋ ᐅᒋᓴᒪᓂᑐᒧᐛᐛ ?” ᐊᑯᔅ ᒋᑭ ᒋᔅᒐᔨᑕᑯᓱᐤ ᐊᓐᑕ ᐊ ᑕᔨᒋ ᐊᑲ ᐊᔭᒥᐊᔨᒋ ᐅᑎᔅᑯᐤ ᓂᔅᒋᓯᑯᓇᒡ ᐊ ᒋᐛ ᑎᐸᐊᒧᐛᒡ ᐊᒋ ᓯᒋᑯᐎᑕᐛᒡ ᐅᒥᐧᑯᔪᐤ ᒋᑦ ᐊᑐᔅᒐᔭᑭᓇ᙮ 11 ᐊᑯᔅ ᐅᒥᒋᔨᐛᔨᑕᒧᐅᓐ ᒋᐸᐛᑭᓐ ᒋᑭ ᐅᑎᑎᑯᐛᓐ: ᐊ ᐃᔅᐱᔅ ᓇᔅᒡ ᒥᓴᒡ ᒋᑭᔅᒋᐅᓐ ᒥᓇᒋᐃᒡ ᐊᓐᒡ ᑲ ᐃᑎᒋᒪᑭᓄᐅᒡ ᒐᒋ ᓂᐱᒡ᙮ 12 ᑭᔭ ᒥᔨᒡ ᓂᒡ ᐃᔨᒥᓇᓐᒡ ᓂᔄᐅᑕᒡ ᐃᔅᐱᔅ ᐅᐱᔪᒧᐅᓄᐛᒡ, ᐅᒋᑐᓱᐛᐅᓄᐛᐤ, ᑲ ᐅᒋ ᒋᑐᑎᔅᒡ, ᐅ ᑎᐸᔨᒋᒐᓱᐤ᙮ 13 ᓂᔭᓐ ᒪᒃ ᒋᑦ ᐃᔨᒥᒡ ᑭᔭ ᒋᒪᔭᑕᓂᓯᒥᒡ ᒋᑭ ᓂᓇᔅᑯᒥᑎᓇᓐ ᑲᒋᒡ: ᓂᑭ ᐛᐸᑎᔭᓇᓐᒡ ᒋ ᒪᒥᒋᒥᑯᓯᐅᓂᔪᐤ ᒥᓯᐛ ᒐ ᐊᑎ ᐊᔭᓂᔅᒐ ᐱᒪᑎᓯᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.