ᑎᐱᑦ ᐅᓂᑭᒧᐅᓇ 78 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᑐᑎᒧᒄ, ᐅ ᓂᑦ ᐃᔨᒥᑐᒄ, ᓂᐎᓱᐛᐅᓐ: ᐱᓯᒋᑎᒧᒄ ᑲ ᐃᔭᓐ᙮ 2 ᓂᑭ ᐸᔅᒋᑐᓇᔨᓐ ᐊ ᓂᔅᐱᑐᐛᐤ ᐊᑎᔪᒐᔭᓐ: ᓂᑭ ᐎᑕᓐ ᐎᐱᒡ ᐅᓂᑎᐱᔅᑲᐤ ᐃᔨᒧᐅᓇ; 3 ᑲ ᐸᑎᒪᐧᒄ ᑭᔭ ᑲ ᒋᔅᒐᔨᑎᒪᐧᒄ, ᑭᔭ ᑲ ᐎᑎᒪᑕᐧᑯᒡ ᒍᑕᐎᓄᐅᒡ᙮ 4 ᓇᒪᐎᔾ ᒋᑭ ᑲᑐᐅᒪᓄᐛ ᐅᑦ ᐊᐛᓯᒥᓱᐛᐛ, ᐊ ᐛᐸᑎᔭᐧᑯᒡ ᒐ ᐸᒋ ᐊᓂᔅᒐ ᐱᒪᑎᓯᒡ ᐅᒪᒥᒋᒥᑯᓯᐅᓂᔪᐤ ᑎᐸᔨᒋᒐᓱᐛ, ᑭᔭ ᐅᒥᔅᑯᐅᓯᐅᓂᔪᐤ, ᑭᔭ ᐅᒪᒥᔅᑲᒡ ᐊᑐᔅᒐᐅᓇ ᑲ ᐃᑐᑕᐧᒃ᙮ 5 ᐛᔅ ᒋ ᐊᔨᑎᔅᑕᐤ ᑎᐸᒋᒧᐅᓂᔪᐤ ᒐᑭᐱᒡ, ᑭᔭ ᒋ ᐃᑎᔅᑕᐤ ᐃᑎᓱᐛᐅᓂᔪᐤ ᐃᔅᕋᐃᓕᒡ, ᑲ ᐎᓱᐛᑕᑦ ᒍᑕᐎᓄᐛ ᒐᒋ ᒋᔅᒐᔨᑎᒥᐊᔨᒋ ᐅᑦ ᐊᐛᓯᒥᓯᔪᐛ; 6 ᒐ ᐸᒋ ᐊᓂᔅᒐ ᐱᒪᑎᓯᒡ ᒐᒋ ᒋᔅᒐᔨᑕᒡ, ᐊᓐᒡ ᐊᐛᓯᒡ ᐅᑎ ᐊᔅᒄ ᒐ ᓂᑕᐅᒋᒡ, ᐅᒋ ᐊ ᐱᓯᑯᒡ ᒐᒋ ᐎᑎᒧᐊᒡ ᐅᑦ ᐊᐛᓯᒥᓱᐛᐛ: 7 ᒐᒋ ᐊᔅᐸᔨᒧᑐᑐᐛᒡ ᒋᓴᒪᓂᑐᐛ, ᐊᑲ ᑭᔭ ᒐᒋ ᐅᓂᒋᔅᒋᑎᒺᒡ ᐅᑦ ᐊᑐᔅᒐᐅᓂᔪᐤ ᒋᓴᒪᓂᑐᐛ, ᒪᒃ ᒐᒋ ᑭᓄᐛᔨᑎᒺᒡ ᐅᑦ ᐃᑎᓱᐛᐅᓂᔪᐛ᙮ 8 ᒐ ᐊᑲ ᒋ ᓂᔅᐱᑐᐛᒡ ᐅᑕᐎᐛᐛ, ᑲ ᒥᔅᑯᐅᔅᑎᒂᓇᔨᒋ ᑭᔭ ᑲ ᐊᔨᐛᒧᑐᑕᒐᔨᒋ ᐊᔭᓂᔅᒐ ᐊ ᐱᒪᑎᓯᓇᓄᐎᔨᒡ; ᑲ ᐊᔭᓂᔅᒐ ᐱᒪᑎᓯᒡ ᐊᑲ ᓇᐃᑎᔅᑕᒡ ᐅᑕᐃᐛᐛ, ᑭᔭ ᐊᑲ ᑲ ᐊᔨᑎᓯᔅᑐᐛᒡ ᒋᓴᒪᓂᑐᐛ ᐅᑦ ᐊᒐᐧᑯᐛᒡ᙮ 9 ᐊᓐᒡ ᐅᑦ ᐊᐛᓯᒥᓴ ᐃᑉᕋᐃᒻ, ᐊ ᓂᑐᐱᔪᐅᒡ, ᑭᔭ ᐊ ᐱᒥᑕᐧᑯᓇᒡ ᐊᒐᐱᔭ, ᒋ ᒋᐛᐅᒡ ᐊ ᒪᓯᐃᑐᐅ-ᒋᓯᑲᔨᒡ᙮ 10 ᓇᒪᐎᔾ ᐅᒋ ᑭᓄᐛᔨᑎᒺᐅᒡ ᐅᓂᔅᑯᒥᑐᐅᓂᔪᐤ ᒋᓴᒪᓂᑐᐛ, ᒋ ᐊᓏᑎᒧᒡ ᑭᔭ ᒐᒋ ᐱᒧᑕᑎᒺᒡ ᐅᐎᓱᐛᐅᓂᔪᐤ᙮ 11 ᒋ ᐅᓂᒋᔅᒋᑎᒺᐅᒡ ᑭᔭ ᐅᑦ ᐊᑐᔅᒐᐅᓂᔨᐛ, ᑭᔭ ᐅᒪᒥᔅᑲᒡ-ᐃᑐᐅᓂᔨᐛ ᑲᒋ ᐛᐸᑎᔨᑯᒡ᙮ 12 ᒪᒥᔅᑲᒡ ᒐᒂᓇ ᒋ ᐃᑐᑎᒻ ᐊ ᐛᐸᑎᒥᔨᒋ ᒍᑕᐎᓄᐛ, ᐃᒋᑉᑦ ᐊᔅᒋᒡ, ᓱᐊᓐ ᓂᑕᐅᒋᒋᑭᓂᒡ᙮ 13 ᒋ ᐸᐸᔅᒋᑕᓂᒻ ᐎᓂᐸᑯᔪᐤ, ᑭᔭ ᒋ ᓴᐳᑕᐛᔅᑯᒧᑕᐊᐤ, ᒋ ᐱᔅᑯᑲᐳᐎᑕᐤ ᓂᐱᔭ᙮ 14 ᒪᒂᒡ ᐊ ᒋᓯᑲᔨᒡ ᑭᔭ ᒋ ᐱᒧᑕᐊᐤ ᑭᔅᑯᐅᓂᒡ ᐅᒋ, ᑭᔭ ᐃᔅᑭᓐ ᑎᐱᔅᑲᐛ ᐊ ᐛᔅᑕᔨᒡ ᐃᔅᑯᑕᔪᐤ ᐅᒋ᙮ 15 ᒋ ᑕᔅᑲᐱᔅᒋᑕᐤ ᐊᓯᓂᔭ ᐸᐧᑯᑎᔅᑭᒥᑲᒡ, ᑭᔭ ᒋ ᒥᓇᐊᐤ ᒧᔭᒻ ᐊ ᒥᔅᑎ ᒋᔅᑲᔪᐛᔨᒡ ᐅᒋ᙮ 16 ᑭᔭ ᒋ ᐱᒥᒋᐛᓂᑕᐤ ᒋᔅᑕᐱᔅᑯᒡ ᐅᒋ, ᑭᔭ ᒋ ᔭᓯᐱᔨᑕᐤ ᓂᐱᔪᐤ ᒧᔭᒻ ᓯᐱᔭ᙮ 17 ᐊᔭᔅᒃ ᒋ ᒥᒋᑐᑐᐛᐅᒡ ᒪᒃ, ᐊ ᒋᔄᐊᒡ ᒪᐅᒡ ᒐᔅᑎᓯᔨᒋ ᐸᐧᑯᑎᔅᑭᒥᑲᒡ᙮ 18 ᒋ ᑯᒂᒋᐊᐅᒡ ᒪᒃ ᒋᓴᒪᓂᑐᐛ ᐅᑕᐃᐛᒡ, ᐊ ᓂᑐᑎᒪᒡ ᒥᒋᒥᔪᐤ ᐅᒥᒋᐃᑕᔨᑎᒧᐅᓄᐛᐤ ᐅᒡ᙮ 19 ᓂᐦᐃ ᒋ ᒥᒋ ᐊᔨᒧᒪᐅᒡ ᒋᓴᒪᓂᑐᐛ: ᒋ ᐃᔅᒋᔄᐅᒡ, “ᑭᔅᒋᑕᐤ ᐊ ᒋᓴᒪᓂᑐᐤ ᒐᒋ ᐅᑎᓂᒪᒐᑦ ᒥᒋᓱᓇᑎᑯᔪᐤ ᐸᐧᑯᑎᔅᑭᒥᑲᒡ ? 20 ᐛᐸᑎᒧᒄ, ᒋ ᐅᑕᒪᐧᑲᒻ ᐊᓯᓂᔪᐤ, ᑲ ᐅᒋ ᓱᒋᒋᐛᓂᔨᒋ ᓂᐱᔭ, ᑭᔭ ᐸᔅᑎᐸᔨᒋ ᐊ ᐃᓯᒋᐛᓂᔨᒋ; ᑭᔅᒋᑕᐤ ᐊ ᐸᒂᓯᑭᓇ ᑭᔭ ᒐᒋ ᒥᔨᐛᑦ ? ᑭᔅᒋᑕᐤ ᐊ ᐎᔭᓯᔪᐤ ᒐᒋ ᐅᑎᓂᒧᐛᑦ ᐅᑦ ᐃᔨᒪ ?” 21 ᑎᐸᔨᒋᒐᓱᐤ ᒪᒃ ᐅᔭᔪᐤ ᐊ ᐸᑕᐧᒃ, ᒋ ᐊᐧᑯᔪᐛᓱᐤ; ᐃᔅᑯᑕᔪᐤ ᒪᒃ ᒋ ᓯᔅᑲᐊᒧᐛᑭᓄᐤ ᒐᑭᑉ, ᑭᔭ ᒋᔄᓯᐅᓂᔪᐤ ᒋ ᐅᑕᒥᔅᑲᑯᐤ ᐃᔅᕋᐃᓪ; 22 ᐛᔅ ᓇᒪᐎᔾ ᐅᒋ ᑕᑈᔭᔨᒪᐅᒡ ᒋᓴᒪᓂᑐᐛ, ᓇᒪ ᑭᔭ ᐅᒋ ᒪᒥᓯᑐᑎᒺᐅᒡ ᐅᐱᒪᒋᐃᐛᐅᓂᔪᐤ᙮ 23 ᐊ ᐊᑕ ᐃᑎᓱᐛᑕᔨᒋ ᑭᔅᑯᐅᓇ ᐃᔅᐱᒥᒡ ᐅᒡ, ᑭᔭ ᐊᒋ ᔪᑕᓇᒥᔨᒋ ᒋᓯᑯᐎ ᐃᔎᑕᒥᔪᐤ, 24 ᑭᔭ ᐊᒋ ᒋᒧᓂᑕᒪᑯᒡ ᒪᓇ ᒐᒋ ᒧᐛᒡ, ᐊᒋ ᒥᔨᑯᒡ ᒋᓯᑯ ᒪᑕᒥᓇ᙮ 25 ᐃᔪᐤ ᒋ ᒥᒋᐛᐤ ᐊᓐᒋᓇ ᐅᒥᒋᒥᔪᐤ, ᒋ ᐃᓯᑎᓴᐊᒧᐛᐤ ᒥᒋᒥᔪᐤ ᒐᒋ ᒋᔅᐳᔨᒋ᙮ 26 ᒋ ᐃᑐᑎᒻ ᒐᒋ ᐛᐸᓂᔪᑎᓂᔨᒡ ᒋᓯᑯᒡ, ᑭᔭ ᐅᓱᐧᑲᑎᓯᐅᓂᒡ ᒋ ᐸᐱᔨᑕᐤ ᐊ ᓴᐅᓂᐃᓂᔨᒡ᙮ 27 ᒋ ᒋᒧᓂᑐᒧᐛᐤ ᐎᔭᓯᔪᐤ ᒧᔭᒻ ᒥᒋᐸᑯᓴ, ᑭᔭ ᐱᔭᓯᐛ ᒧᔭᒻ ᐃᔭᑲᐤ ᐎᓂᐸᑯᒡ᙮ 28 ᒋ ᔭᓯᐸᔨᑕᐤ ᑕᑕᐅᒡ ᐊ ᐎᒋᔨᒋ, ᐛᔅᑲ ᐊ ᐃᑕᔨᒋ᙮ 29 ᒋ ᒥᒋᓱᐅᒡ ᒪᒃ ᑭᔭ ᒋ ᑕᐱ ᒋᔅᐳᐅᒡ: ᐛᔅ ᒋ ᒥᔨᑯᐅᒡ ᑲ ᐃᓯ ᓂᑐᐛᔨᑕᒡ; 30 ᓇᒪᐎᔾ ᐅᒋ ᐃᔅᑕᔭᔨᑎᒧᒡ ᐅᒥᒋᐃᑕᔨᑎᒧᐅᓄᐛᐤ ᐅᒡ: ᒪᒃ ᒪᒂᒡ ᐅᒥᒋᒧᐛᐤ ᐊᔅᒄ ᐅᑐᓄᐛᒡ ᐊ ᑎᒂᓂᔨᒡ, 31 ᐅᑦ ᐊᐧᑯᔪᐛᓱᐅᓐ ᒋᓴᒪᓂᑐᐤ ᒋ ᐅᑎᑎᑯᔪᐛ, ᒋ ᓂᐸᐃᑯᔪᐛ ᒪᒃ ᐊᓂᔭᔪᐛ ᒪᐅᒡ ᑲ ᐎᔪᐅᒡ, ᑭᔭ ᒋ ᐅᑕᒥᔅᑲᑯᐅᒡ ᑲ ᐎᔭᐱᒪᑭᓄᐅᒡ ᐃᔅᕋᐃᓪ ᐃᔪᒡ᙮ 32 ᐊᑎ ᒥᓯᐛ ᐅᔭᔪᐤ ᐅᒋ ᐃᔭᐱᒡ ᒋ ᒥᒋᑐᑎᒧᒡ, ᓇᒪ ᑭᔭ ᐅᒋ ᑕᑈᑎᒺᐅᒡ ᐅᒪᒥᔅᑲᒡ ᐊᑐᔅᒐᐅᓂᔪᐛ᙮ 33 ᐊᔪᐅᒄ ᐛᒋ ᓂᓱᐅᓇᒋᑕᐛᑦ ᐅᒋᓯᑲᒥᔨᐛ ᐊ ᐊᑲ ᐎᔭᔅᑕᐱᑎᓂᔨᒡ, ᑭᔭ ᐅᐱᒪᑎᓯᔪᓂᐛ ᒥᑯᔅᑲᑕᔨᑎᒧᐅᓂᒡ᙮ 34 ᐃᔅᐱ ᐱᔅᒐ ᓇᐸᐊᑦ, ᑯᑎᑲ ᒋ ᓇᓂᑐᐛᔨᒥᑯᐤ: ᑭᔭ ᐊ ᒋᐛᑲᐳᐎᔨᒋ ᒋᓴᒡ ᒋ ᓇᓂᑐᐛᔨᒪᔪᐛ ᒋᓴᒪᓂᑐᐛ᙮ 35 ᒋ ᒋᔅᒋᓱᐅᒡ ᒪᒃ ᒋᓴᒪᓂᑐᐛ ᐊᒋ ᐅᒋᔅᑕᐱᔅᑯᒥᒡ, ᑭᔭ ᒐᔅᑎᓯᔨᒋ ᒋᓴᒪᓂᑐᐛ ᐊᒋ ᐅᐱᒪᒋᐃᐛᒥᒡ᙮ 36 ᐃᔭᐱᒡ ᒪᒃ ᒋ ᒥᒋᐃᔨᒧᐅᒡ ᐅᑐᓄᐛᐛᐅᒡ, ᑭᔭ ᒋ ᑭᑭᒋᔭᒪᐅᒡ ᐅᑕᔨᔪᐛᐛ ᐅᒡ᙮ 37 ᐛᔅ ᓇᒪᐎᔾ ᒋ ᑯᐃᔅᑯᑕᐊᔅᑐᐛᐅᒡ, ᓇᒪ ᑭᔭ ᐅᒋ ᐊᔨᒋᑲᐳᔅᑕᒺᐅᒡ ᐅᓂᔅᑯᒥᑐᐅᓂᔪᐤ᙮ 38 ᒪᒃ ᐎᔾ, ᐊ ᓴᑭᔅᒋᓇᔅᑲᑯᑦ ᒋᔅᑎᒪᒐᔨᒋᒐᐅᓂᔪᐤ, ᒋ ᐛᐸᔨᑎᒺᐤ ᐅᒥᒐᑎᓯᐅᓂᔪᐛ, ᓇᒪ ᑭᔭ ᐅᒋ ᓂᓱᐅᓇᒋᐊᐤ: ᓂᐦᐃ, ᒥᒐᑥᐤ ᒋ ᐃᒐᓂᒻ ᐅᒋᔄᓯᐅᓐ, ᓇᒪ ᑭᔭ ᐅᒋ ᒧᔅᒋᐱᑕᐤ ᒥᓯᐛ ᐅᑦ ᐊᐧᑯᔪᐛᓱᐅᓐ᙮ 39 ᐛᔅ ᒋ ᒋᔅᒋᓯᐤ ᐊ ᐎᔭᓱᐎᔨᒋ ᐱᓯᓯᒄ, ᐊ ᔪᑎᓂᔨᒡ ᑲ ᐛᐱᐸᔨᔨᒡ, ᐊᑲ ᑭᔭ ᒥᓐ ᑲ ᐸᒋ ᒋᐛᐱᔨᒡ᙮ 40 ᑕᑈ ᒥᒐᑥᐤ ᒋ ᒋᔄᐊᐅᒡ ᐸᐧᑯᑎᔅᑭᒥᑲᒡ, ᑭᔭ ᒋ ᒪᒥᓴᒪᔨᑎᒥᐊᐅᒡ ᐊ ᒋᐛᑕᔨᑕᑯᓂᔨᒡ ! 41 ᓂᐦᐃ, ᐊ ᒋᐛᑲᐳᐅᒡ ᒋ ᑯᒂᒋᐊᐅᒡ ᒋᓴᒪᓂᑐᐛ, ᑭᔭ ᒋ ᐊᐱᔅᑕᐃᒥᒪᐅᒡ ᐅᐸᔭᒋᓯᒥᔪᐤ ᐃᔅᕋᐃᓚ᙮ 42 ᓇᒪᐎᔾ ᐅᒋ ᒋᔅᒋᑎᒺᐅᒡ ᐅᑎᒋᔪᐤ, ᓇᒪ ᑭᔭ ᐊᓂᔭᔪᐤ ᒐᓯᑲᔨᒡ ᑲ ᐎᐧᑯᒋᐃᑯᒡ ᐅᐧᑲᓱᐛᐛ ᐅᒡ᙮ 43 ᑲᒋ ᐃᓯ ᒋᔅᒋᓄᐛᒡ ᐛᐸᑎᔨᐛᔨᒋ ᐃᒋᑉᑎᒡ, ᑭᔭ ᑲ ᐃᓯ ᒥᒪᑕᐅ-ᐃᑎᔨᒋ ᓱᐊᓐ ᓂᑕᐅᒋᒋᑭᓂᒡ; 44 ᑭᔭ ᐅᓯᐱᒥᔪᐛ ᐊᒋ ᒥᐧᑲᑲᒥᑕᔨᒋ; ᑭᔭ ᐅᓂᐱᒥᔪᐛ, ᒐ ᐊᑲ ᒋ ᒥᓂᔨᒋ᙮ 45 ᒋ ᐃᓯᑎᓴᐊᒧᐛᐤ ᒥᒐᑦ ᒥᓐᑐᓴ ᑲ ᐱᐸᒥᔭᔨᒋ, ᑲ ᒧᑯᔨᒋ; ᑭᔭ ᐃᔨᑲ ᑲ ᓂᓱᐅᓇᒋᐃᑯᔨᒋ᙮ 46 ᒋ ᒥᔨᒥᒪᐤ ᑭᔭ ᐅᐛᔪᑎᓯᐅᓂᔪᐛ ᒧᑕᐛ, ᑭᔭ ᐅᑦ ᐊᑐᔅᒐᐅᓂᔪᐤ ᑲ ᒂᔅᑯᑎᔨᒋ ᒥᓐᑐᓴ᙮ 47 ᒋ ᓂᓱᐅᓇᒋᐃᒪᐤ ᐅᓱᒥᓇᑎᑯᒥᔪᐛ ᐊᒂᑯᑲᐛᑕᓂᔨᒡ ᐅᒡ, ᑭᔭ ᐅᓯᑲᒧᐛᑎᑯᒥᔪᐛ ᐊᒋᑯᐱᔨᒡ ᐅᒡ᙮ 48 ᐊᑯᐅᑭᔅᑕᔨᒡ ᑭᔭ ᒋ ᐱᔅᑎᓂᒺᐤ ᐅᑦ ᐅᐧᑲᓂᒥᔪᐛ, ᑭᔭ ᐅᒪᓂᔅᒐᓂᓯᒥᔨᐛ ᒋᓯᑕᐤ ᐅᓂᒥᔅᒋᐛ᙮ 49 ᒋ ᐛᐱᓂᒧᐛᐤ ᐊᔅᐱᔅ ᐊᒂᑎᓯᒥᑭᓂᔨᒡ ᐅᒋᔄᓯᐅᓐ, ᐅᑦ ᐊᐧᑯᔪᐛᓱᐅᓐ, ᑭᔭ ᐅᔭᔅᑕᔨᑎᒧᐅᓐ, ᑭᔭ ᐅᒥᑯᔅᑲᑕᔨᑎᒧᐅᓐ, ᒥᒋ ᐊᓐᒋᓇ ᐊ ᐃᑎᓴᐊᒧᐛᑦ᙮ 50 ᒋ ᑕᐅᓂᒻ ᒐ ᐃᔅᐱᔨᒡ ᐅᒋᔄᓯᐅᓐ; ᓇᒪᐎᔾ ᒋ ᒥᓇᒋᐃᒪᐤ ᐅᑦ ᐊᒐᐧᑯᔪᐛ ᒐ ᐊᑲ ᒋ ᓂᐱᔨᒋ, ᒪᒃ ᒋ ᐸᒋᑎᓇᒺᐤ ᐅᐱᒪᑎᓯᐅᓂᔪᐤ ᐊᐧᑯᐃᑕᔅᐱᓇᐅᓂᒡ; 51 ᒋ ᓂᐸᐊᐤ ᑭᔭ ᒥᓯᐛ ᓂᔅᑎᒧᓴᓇ ᐃᒋᑉᑎᒡ; ᑲ ᓂᑲᓇᔨᑕᑯᓯᔨᒋ ᐅᒥᔅᑯᐅᓯᒥᔪᐛ ᐅᒥᒋᐛᐱᒥᒡ ᐦᐊᒻ ᐅᒋ; 52 ᒪᒃ ᒋ ᐎᐎᑕᐊᐤ ᑎᐱᔨᐛ ᐅᑦ ᐃᔨᒪ ᒧᔭᒻ ᒪᔭᑕᓂᓴ, ᑭᔭ ᒋ ᒋᔅᒋᓄᑕᐊᐤ ᐸᐧᑯᑎᔅᑭᒥᑲᒡ ᒧᔭᒻ ᒪᔭᑕᓂᓴ᙮ 53 ᒋ ᒥᔪ ᐱᒧᑕᐊᐤ ᒪᒃ, ᐊᑲ ᑯᔅᑕᒋᔨᒋ: ᒪᒃ ᑲ ᐎᐎᔭᔅᑐᑕᑯᔨᒋ ᒋ ᓂᓱᐅᓇᒋᐃᑯᔪᐛ ᐎᓂᐸᑯᔪᐤ᙮ 54 ᒋ ᐸᓱᐛᐤ ᒪᒃ ᐊᐃᔎᔭᔨᒡ ᐅᐸᔭᒋ-ᒥᒋᐛᐱᒡ, ᐎᔾ ᐅᐱᔅᑯᑎᓇᒻ ᐃᔅᑯ, ᐅᒥᔪᐅᓂᒡ ᑲ ᐅᒋ ᐅᑎᓇᐧᒃ᙮ 55 ᓂᑲᓐ ᒪᒃ ᒋ ᐎᐎᐛᐱᓂᒪᐛᐤ ᐊᑲ ᐊᔭᒥᐊᔨᒋ, ᑭᔭ ᒋ ᒪᑎᓂᒧᐛᐤ ᑎᐱᔨᐛᐅᓯᐅᓂᔪᐤ ᐊ ᑎᐸᐸᑕᐧᒃ, ᑭᔭ ᒋ ᑐᑐᐛᐤ ᑲ ᑕᑐᑕᐎᓯᔨᒋ ᐃᔅᕋᐃᓚ ᒐᒋ ᐎᒋᒋ ᐅᒥᒋᐛᐱᒥᔨᒡ᙮ 56 ᐃᔭᐱᒡ ᒪᒃ ᒋ ᑯᒂᒋᐊᐅᒡ ᑭᔭ ᒋ ᒋᔄᐊᐅᒡ ᑲ ᒪᐅᒡ ᒋᔅᑎᓯᔨᒋ ᒋᓴᒪᓂᑐᐛ, ᓇᒪ ᑭᔭ ᐅᒋ ᑭᓄᐛᔨᑎᒺᐅᒡ ᐅᑎᐸᒋᒧᐅᓂᔪᐤ; 57 ᒪᒃ ᐊ ᐊᑎᒥᑲᐳᐅᒡ, ᒋ ᒥᒋᑐᑕᒧᒡ ᒧᔭᒻ ᐅᑕᐎᐛᐛ: ᒋ ᐱᔅᒐᐱᔪᐅᒡ ᒧᔭᒻ ᑭᑭᒋᔭᓯᐤ ᐊᒐᐱᔾ᙮ 58 ᐛᔅ ᒋ ᒋᔄᐊᐅᒡ ᐅᑦ ᐊᔅᐸᓂᓯᐎᓂᐛᐛ ᐅᒡ, ᑭᔭ ᒋ ᐅᑕᔨᑎᒥᐊᐅᒡ ᐅᒥᓂᑐᐧᑲᓂᒧᐛᐛ ᐅᒡ᙮ 59 ᐃᔅᐱ ᐅᔭᔪᐤ ᐱᔭᑕᐧᒃ ᒋᓴᒪᓂᑐᐤ, ᒋ ᐊᐧᑯᔪᐛᓱᐤ, ᓇᔅᒡ ᑭᔭ ᒋ ᐛᐧᑲᑕᐤ ᐃᔅᕋᐃᓚ: 60 ᐊᑯ ᓇᑭᑕᐧᒃ ᓴᐃᓗᐤ ᒥᒋᐛᐱᔪᐤ, ᐊᓂᔭᔪᐤ ᒥᒋᐛᐱᔪᐤ ᑲ ᒋᒥᑕᑦ ᐊᓐᑕ ᐊ ᑕᔨᒋ ᐃᔪᐛ: 61 ᒋ ᐸᒋᑎᓇᒺᐤ ᒪᒃ ᐅᒥᔅᑯᐅᓯᐅᓂᔪᐤ ᒪᒪᒋᑯᓂᑯᓯᐅᓂᒡ, ᑭᔭ ᐅᒋᔅᑕᔨᑕᑯᓱᐅᓂᔪᐤ ᐅᐛᐧᑲᓱᐛᐛ ᐅᑎᒋᔨᒡ᙮ 62 ᒋ ᐸᒋᑎᓇᐤ ᐅᑦ ᐃᔨᒪ ᒐᒋ ᓂᐸᐃᑯᔨᒋ ᓂᑐᐱᔪᐅ-ᒧᐧᑯᒪᓂᔪᐤ, ᑭᔭ ᒋ ᐊᐧᑯᔪᐛᓯᔅᑐᐛᐤ ᐅᑎᐸᔨᒪᑭᓇ᙮ 63 ᒋ ᐃᔎᓱᔪᐛ ᐅᑦ ᐅᔅᒋᓂᒋᓱᒧᐛᐛ; ᑭᔭ ᐅᑦ ᐅᔅᒋᓂᒋᔎᒧᐛᐛ ᓇᒪᐎᔾ ᐅᒋ ᓂᐳᐛᑭᓄᐎᐛ᙮ 64 ᐅᑦ ᐊᔭᒥᐊᐅᒋᒪᒧᐛᐛ ᒋ ᐸᒋᓯᒥᑯᔪᐛ ᓂᑐᐱᔪᐅ-ᒧᐧᑯᒪᓂᔪᐤ; ᑭᔭ ᐅᒋᔅᑎᒪᒋᔎᒧᐛᐛ ᓇᒪᐎᔾ ᐅᒋ ᓇᓇᐧᑲᒋᒧᔪᐛ᙮ 65 ᐊᑯ ᑎᐸᔨᒋᒐᓱᐤ ᐱᔭᑯᐱᔨᑦ ᒧᔭᒻ ᐊᐛᓐ ᐊᒋ ᓂᐸᑦ, ᑭᔭ ᒧᔭᒻ ᐊ ᓱᐧᑲᑎᓯᑦ ᐃᔪᐤ ᑲ ᒋᔄᐛᑕᑈᑦ ᓱᒥᓇᐳᔪᐤ ᐊᒋ ᒥᓂᑦ᙮ 66 ᒋ ᐎᔭᔅᑐᑐᐛᐤ ᒪᒃ ᑲ ᐛᐧᑲᑎᑯᑦ ᓂᑕᒡ ᐎᔭᔨᒡ: ᓇᔅᒡ ᑕᑈ ᒪᒃ ᒋᒋᐛ ᒋᓴᒂᔨᒧᐊᐤ᙮ 67 ᑭᔭ ᒪᒃ ᒋ ᐊᑐᐛᔨᑎᒺᐤ ᐅᒥᒋᐛᐱᒥᔪᐤ ᒍᓯᐸ, ᓇᒪ ᑭᔭ ᐅᒋ ᐛᐛᔭᐱᒪᐤ ᐃᑉᕋᐃᒪ ᐅ ᐸᔭᑯᑕᓯᒥᔪᐛ: 68 ᒪᒃ ᒋ ᐛᐛᔭᐱᒪᐤ ᒍᑕ ᐊ ᐸᔭᑯᑕᐎᓯᔨᒋ, ᓴᐃᔭᓐ ᐱᔅᑯᑎᓇᔪᐤ ᑲᒋ ᓴᒋᑕᑦ᙮ 69 ᒋ ᐅᓯᑕᐤ ᒪᒃ ᐅᐸᔭᒋ-ᒥᒋᐛᑉ ᒧᔭᒻ ᒋᓴᐅᒋᒪᐅᒋᐛᑉ, ᒧᔭᒻ ᐊᔅᒋᔪᐤ ᑲᒋ ᐊᔨᑎᔅᑕᑦ ᑲᒋᒡ᙮ 70 ᒋ ᐛᐛᔭᐱᒪᐤ ᑭᔭ ᐅᑦ ᐊᑐᔅᒐᔭᑭᓇ ᑎᐱᑕ, ᒋ ᐅᒋ ᐅᑎᓇᐤ ᒪᒃ ᒪᔭᑕᓂᓯᐅᒋᐛᐱᒡ; 71 ᐊ ᐸᐸᐎᒐᐛᔨᒋ ᓄᓴ ᒪᔭᑕᓂᓴ ᓴᔅ ᐊ ᐎ ᐅᑯᓯᔨᒋ, ᒋ ᐸᓱᐛᐤ ᒐᒋ ᐊᓴᒪᔨᒋ ᐅᑦ ᐃᔨᒪ ᒐᑭᐸ, ᑭᔭ ᐃᔅᕋᐃᓚ ᐅᑎᐸᔨᒪᑭᓇ᙮ 72 ᒋ ᐊᓴᒪᐤ ᒪᒃ ᑲ ᐃᓯ ᑯᐃᔅᑯᑕᐊᑦ: ᑭᔭ ᒋ ᒋᔅᒋᓄᑕᐊᐤ ᑲ ᐃᓯ ᑭᒐᑕᐅᑐᑕᐧᒃ ᐅᑎᒋᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.