ᑎᐱᑦ ᐅᓂᑭᒧᐅᓇ 65 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 65 (Proper-25 Year C)

¹ ᒪᒥᒋᒧᐛᐅᓐ ᒋᑦ ᐊᓯᓂᐛᐃᑯᓐ, ᐅ ᒋᓴᒪᓂᑐᐤ, ᓴᐃᔭᓂᒡ: ᒋᔾ ᒪᒃ ᑲ ᐃᓯ ᒋᒋ ᐃᔨᒥᓇᓄᐅᒡ ᒋᑭ ᐃᑐᑎᒪᑯᐅᓐ᙮

² ᐅ ᒋᔾ ᑲ ᓂᑐᑎᒥᓐ ᐊᔭᒥᐊᐅᓐ, ᒋᔾ ᒋᑭ ᐸᒋ ᓇᑎᑯᒡ ᒥᓯᐛ ᑲ ᐎᔭᓯᒡ᙮

³ ᒥᒐᑎᓯᐅᓇ ᓂ ᓴᐧᑯᒋᐃᑯᓐ; ᓂᐅᓂᑐᑎᒧᐅᓂᓇᓇ ᒪᒃ ᒋ ᑲᓯᐊᓐ᙮

⁴ ᓱᐛᔨᑕᑯᓱᐤ ᐊᓐ ᐃᔪᐤ ᑲ ᐅᐛᑕᐱᒥᑦ, ᑭᔭ ᑲ ᐃᑕᔨᒥᑦ ᒐᒋ ᐸᒋ ᓇᑎᔅᒃ, ᒐᒋ ᑕᑦ ᒋ ᒪᐛᒋᐃᑐᐅᒋᐛᐱᒡ: ᓂᑭ ᑕᐱᒐᔨᑕᓇᓐ ᐊᔅᐱᔅ ᒥᔽᓯᒡ ᒋᒡ, ᒋ ᐸᔭᒋ ᒋᓴᐊᔭᒥᐊᐅᒋᐛᐱᒡ ᐅᑦ᙮

⁵ ᐊ ᑯᔅᑕᑎᒂᒋ ᒐᒂᓇ ᑯᐃᔅᑯᑕᑎᓯᐅᓂᒡ ᒋᑭ ᐅᒋ ᐎᑎᒧᐅᓇᓐ, ᐅ ᒋᓴᒪᓂᑐᐤ ᐛᒋᐱᔨᒡ ᓂᐱᒪᒋᐃᑯᓯᐅᓂᓇᓇ; ᒋᔾ ᐊᐅᒄ ᐊᓐ ᑲ ᐊᔅᐸᔨᒧᑐᑕᑯᑦ ᒥᓯᐛ ᐊᔅᒋᔪᐤ, ᐊᓂᔭ ᑭᔭ ᐛᔪᐤ ᑲ ᑕᔨᒋ ᐎᓂᐸᑯᒡ;

⁶ ᐅᒥᔅᑯᐅᓯᐅᓂᒡ ᑲ ᐊᔨᑎᔅᑕᑦ ᐱᔅᑯᑎᓇᐛ; ᐊ ᐱᒂᑕᐅᔅᑲᐧᒃ ᑭᔅᒋᐅᓂᔪᐤ:

⁷ ᑲ ᒋᐱᑐᐛᒥᑲᑕᑦ ᐎᓂᐸᑯᔪᐤ, ᐊ ᒪᑥᔭᓂᔨᒡ, ᑭᔭ ᐊ ᒋᑕᔎᑯᓯᔨᒋ ᐃᔪᐛ᙮

⁸ ᐊᓐᒡ ᐊ ᐃᔎᔭᔨᒡ ᑲ ᐎᒋᒡ ᑯᔅᑎᒧᒡ ᒋ ᒋᔅᒋᓄᐛᒋᒋᑭᓇ: ᒋ ᒥᔽᑕᒧᑕᓐ ᐊ ᐊᑎ ᒐᒋᓴᐸᔭᒡ ᑭᔭ ᐊ ᐊᑎ ᐅᑕᑯᓯᒡ᙮

⁹ ᒋ ᒧᐅᐱᔅᑕᓐ ᐊᔅᒋᔾ, ᑭᔭ ᒋ ᓂᐱᐎᑕᓐ: ᓇᔅᒡ ᒋ ᐛᔪᒋᑕᓐ ᐅᓯᐱᒪ ᒋᓴᒪᓂᑐᐤ ᐅᒡ, ᑲ ᓴᑭᔅᒋᓇᐸᔭᔨᒡ: ᒋᑦ ᐊᔭᔅᑲᐎᑕᒪᐛᐅᒡ ᒪᑕᒥᓇ, ᐃᔅᐱ ᐊᒋ ᐱᔅᑎᓂᒥᓐ᙮

¹⁰ ᓇᔅᒡ ᒥᔅᑎ ᒋ ᒥᓯᐸᒋᑕᓐ ᐊᓐᑕ ᐊ ᐅᓴᔭᒡ; ᒋ ᐎᔨᔅᑕᓐ ᐊ ᐱᓴᒡ: ᒋ ᔪᔅᒋᑕᓐ ᐊ ᐸᐸᒋᐸᔅᑕᒡ ᐅᒡ: ᒋ ᒥᔪ ᐃᑕᔨᑕᓐ ᐊ ᓴᒋᓂᑕᐅᒋᒡ᙮

¹¹ ᒋ ᐳᔅᑐᑎᓇᑕᓐ ᐊ ᐱᐳᒡ ᒋᒥᔪᑐᑕᒐᐅᓐ ᐅᒡ; ᑭᔭ ᒋᒪᔅᑭᓇᒡ ᐅᒋ ᐸᒋᑎᓐ ᑲ ᐎᔨᔪᐅᒡ᙮

¹² ᐸᒋᑎᓇ ᐊᐅᑯᓐ ᒥᒋᓱᐅᓂᒡ ᐸᐧᑯᑎᔅᑭᒥᑲᒡ; ᑭᔭ ᐱᔅᑯᑎᓇᓴ ᒥᔽᔨᑕᒧᒪᑭᓇ ᒥᓯᐛ ᐊᔨᑐᐤ᙮

¹³ ᐊᐅᑯᓐ ᒥᒋᓱᐅᓂᒡ ᓴᑭᔅᒋᓇᐅᒡ ᒪᔭᑕᓂᓯᒡ ᐅᒡ: ᐊ ᑐᐅᑎᓇᒡ ᐊᒂᓇᒧᐛ ᒪᑕᒥᓇ ᐅᒡ: ᒋᔄᐛᑕᑈᒪᑭᓇ ᐊ ᒧᒋᒐᔨᑎᒧᒥᑲᒋ, ᐊᓯᒡ ᑭᔭ ᓂᑭᒧᒪᑭᓇ᙮