ᑎᐱᑦ ᐅᓂᑭᒧᐅᓇ 57 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒋᔅᑎᒪᒐᔨᒥ, ᐅ ᒋᓴᒪᓂᑐᐤ, ᒋᔅᑎᒪᒐᔨᒥ: ᐛᔅ ᓂᑦ ᐊᒐᐧᒄ ᒋ ᒪᒥᓯᑐᑕᒄ: ᓂᐦᐃ, ᐊ ᐊᑯᓇᐎᓐ ᒋᑎᑎᑭᓇ ᓂᑭ ᒋᔅᐸᐛᑎᑯᓐ, ᐃᔅᐱ ᐅᔭ ᐊᔨᒥᓯᐅᓇ ᒋ ᐎᒪᐱᔨᒂᐛ᙮ 2 ᓂᑭᒧᔅᑯᐛᑕᐤ ᒋᓴᒪᓂᑐᐤ ᒪᐅᒡ ᒋᔅᑎᓯᑦ; ᒋᓴᒪᓂᑐᐤ ᒥᓯᐛ ᒐᒂᓇ ᑲ ᐃᑐᑎᒧᐎᔨᒥᑦ᙮ 3 ᒋᒋᒋᓯᑯᒡ ᒋᑭ ᐅᒋ ᐸᒋᑎᓴᐅᐛᐤ, ᓂᑭ ᐱᒪᒋᐃᒄ ᒪᒃ ᐅᒋᑐᓱᐛᐅᓂᔪᐤ ᐅᒋ ᑲ ᐎ ᒥᓱᐛᐸᔨᐃᔨᒋ᙮ ᒋᓴᒪᓂᑐᐤ ᒋᑭ ᐸᑎᓴᐅᒻ ᐅᓱᐛᔨᒋᒐᐅᓐ ᑭᔭ ᐅᑕᑈᐅᓐ᙮ 4 ᓂᑦ ᐊᒐᐧᒄ ᒥᓯᐱᓱᓇᒡ ᑕᐤ: ᑭᔭ ᒥᒄ ᓂ ᐎᒋᐱᒥᓯᒪᐅᒡ ᐊᐛᓐᒋ ᑲ ᐛᐃᓱᒡ, ᐃᔪᐤ ᐅᑯᓯᓴᓐᒡ ᐅᑦ, ᐎᐱᑐᐛᐛ ᑲ ᐊᓯᒪᑭᓄᐎᔨᒋ ᑭᔭ ᑲ ᐊᑲᔅᑯᐛᓂᐎᔨᒋ, ᑭᔭ ᐅᑕᔨᔪᐛᐛ ᐊ ᑲᓴᔨᒡ ᓂᑐᐱᔪᐅ-ᒧᐧᑯᒪᓂᔪᐤ᙮ 5 ᐃᔅᐸᔨᑕᑯᓯ, ᐅ ᒋᓴᒪᓂᑐᐤ, ᐃᔅᐱᔅ ᒋᓯᒂ; ᐊᑯᔅ ᑭᔭ ᒋᒋᔅᑕᔨᑕᑯᓱᐅᓐ ᐃᔅᐱᔅ ᒥᓯᐛ ᐊᔅᒋᔾ᙮ 6 ᒋ ᐃᔭᔭᐅᒡ ᐊᐃᐱᔭ ᐅᑕ ᐊ ᑕᑕᑯᔅᒐᔭᓐ; ᓂᑦ ᐊᒐᐧᒄ ᐸᑕᐳᐤ: ᓂᒋ ᒧᓇᐊᒪᑯᒡ ᐊᐱᑯᓇᔅᑭᒥᑲᐃᒡ ᑕᑕᐅᒡ, ᐊᑯᑕ ᒪᒃ ᐎᔨᐛᐤ ᒋᒋᐛ ᒋ ᐳᒋᐱᔪᒡ᙮ 7 ᐊᔨᑎᔅᑕᐤ ᓂᑕᐃ, ᐅ ᒋᓴᒪᓂᑐᐤ, ᐊᔨᑎᔅᑕᐤ ᓂᑕᐃ: ᓂᑭ ᓂᑭᒧᓐ ᑭᔭ ᓂᑭ ᒪᒥᒋᒧᐛᓐ᙮ 8 ᑯᔅᑯᓯ, ᓂᒋᔅᑕᔨᑕᑯᓱᐅᓐ; ᑯᔅᑯᓯ, ᐊᓴᑭᓇᔭᐱ ᒋᔍᐛᐱᒋᑭᓂᔅ ᑭᔭ ᓴᑭᓇᔭᐱᔾ ᒋᔍᐛᐱᒋᑭᓐ; ᓂᔾ ᒋᒋᐛ ᐎᐱᒡ ᓂᑭ ᐸᑯᐱᔨᓐ᙮ 9 ᒋᑭ ᒪᒥᒋᒥᑎᓐ, ᐅ ᑎᐸᔨᒋᒐᓱᐤ, ᐅᑕ ᐊ ᐃᑕᒡ ᐃᔪᒡ: ᒋᑭ ᓂᑭᒧᔅᑕᑎᓐ ᐅᑕ ᐊ ᐃᑕᒡ ᐸᐱᑐᔅ ᐊ ᐃᑎᔅᑲᓇᓯᒡ ᐃᔪᒡ᙮ 10 ᐛᔅ ᒋᓱᐛᔨᒋᒐᐅᓐ ᒥᔅᑎ ᐃᑕᔨᑕᑯᓐ ᒋᓯᑯᒡ ᐃᓯ, ᑭᔭ ᒋᑕᑈᐅᓐ ᒋᓯᑯᒡ ᐃᓯ᙮ 11 ᐃᔅᐸᔨᑕᑯᓯ, ᐅ ᒋᓴᒪᓂᑐᐤ, ᐃᔅᐱᔅ ᒋᓯᒂ; ᐊᑯᔅ ᑭᔭ ᒋᒋᔅᑕᔨᑕᑯᓱᐅᓐ ᐃᔅᐱᔅ ᒥᓯᐛ ᐊᔅᒋᔾ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.