ᒪᑎᔪᐤ 26 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑲ ᐊᔨᒧᑕᑭᓄᐎᒡ ᒐᒋ ᒪᑯᓇᑭᓄᐅᑦ ᒋᓴᔅ ᒪᕐᒃ 14.1 , 2 ; ᓗᒃ 22.1 , 2 ; ᒠᓐ 11.45-53 1 ᐃᔅᐱ ᒪᒃ ᑲᒋ ᐃᓯ ᒋᔅᑯᑎᒪᒐᑦ ᒋᓴᔅ, ᒋ ᐃᑕᐤ ᐊᓂᔭ ᐅᒋᔅᒋᓄᐊᒧᐛᑭᓇ, 2 “ᒋ ᒋᔅᒐᔨᑕᓇᐛᐤ ᓂᓱ ᒋᓯᑲᐛ ᐃᔅᐱᔅ ᐊᑯ ᒐ ᒋᒋᐱᔨᒡ ᐎᒪᔅᑲᒐᐅ-ᒥᑯᓴᐅᓐ᙮ ᐊᑯᑕ ᒪᒃ ᐊᓐ ᒪᒂᒡ ᐃᔅᐱᔨᒐ ᒐ ᐱᔅᑎᓇᑭᓄᐅᑦ ᐃᔪᐤ ᐅᑯᓯᓴᓐ ᒐᒋ ᒋᔅᑕᔎᑕᑭᓄᐅᑦ᙮” 3 ᐊᑯ ᐊᓐᒡ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓐᒡ ᑲ ᓂᑲᓂᔅᑯᐛᒡ ᐃᔪᐛ ᑲ ᒪᒧᐎᒡ ᐊᓐᑕ ᒋᓴᐊᔭᒥᐊᐅᒋᒪᐛ ᑲᔭᐸᓴ ᐅᒋᓴᐅᒋᒪᐅᒋᐛᐱᒡ᙮ 4 ᐊᑯ ᒂ ᐛᑕᔨᑕᒡ ᒋᒧᑦ ᒐᒋ ᒪᑯᓇᒡ ᒋᓴᓴ ᑭᔭ ᒐᒋ ᓂᐸᐊᒡ᙮ 5 ᒋ ᐃᑕᐅᒡ ᒪᒃ, “ᓇᒪ ᐎ ᒪᒂᒡ ᐅ ᒥᑯᓴᓄᐅᒐ ᒋᑭ ᒋ ᒪᑯᓇᓄᐤ, ᐛᔅ ᒂᔄᓐ ᒋᑭ ᒥᔅᑎ ᒋᔄᓱᐅᒡ ᐃᔪᒡ ᒋᑭ ᒋ ᐃᓯᓇᑯᓐ ᒋᒋᐛ ᒐᒋ ᒥᒋᐱᔨᓇᓄᐅᒡ᙮” ᑲ ᓂᑲᓐ ᑐᒥᔅᑯᓇᑭᓄᐅᑦ ᒋᓴᔅ ᒪᕐᒃ 14.3-9 ; ᒠᓐ 12.1-8 6 ᐸᑕᓂᒡ ᒋ ᑕᐤ ᒋᓴᔅ, ᐊᓐᑕ ᓴᐃᒥᓇ ᐎᒋᔨᒡ᙮ ᐅ ᓴᐃᒥᓐ ᐊ ᒪᔭᑎᓂᔨᒡ ᐊᐧᑯᓱᐅᓂᔪᐤ ᐅᓯᑲᒡ ᐛᔅᑭᒡ ᒋ ᐃᑕᐧᑯᓱᐤ᙮ 7 ᒪᒂᒡ ᒪᒃ ᒋᓴᔅ ᐊ ᒥᒋᓱᑦ, ᒋ ᐅᒋ ᐱᒐᔪᐛ ᐃᔎᐛ ᐊ ᐸᒋ ᑕᐧᑯᓂᒥᔨᒋ ᓇᔅᒡ ᐊ ᒥᔽᓯᔨᒡ ᐳᑕᔪᐤ ᐊ ᐱᒋᑎᓂᔨᒡ ᐊᓐᑕ ᒪᐅᒡ ᑲ ᓱᓇᔭᐎᔨᒡ ᐊ ᐎᒋᒪᑯᓯᔨᒡ ᑐᒥᓂᑭᓂᔪᐤ᙮ ᒋᓴᓴ ᒪᒃ ᐅᔅᑎᒂᓂᔨᒡ ᐅᔭ ᒋ ᑯᑎᐱᓂᒺᐤ᙮ 8 ᐃᔅᐱ ᒪᒃ ᐊᓐᒡ ᒋᔅᒋᓄᐊᒧᐛᑭᓐᒡ ᐎᔭᐱᒪᒡ ᐅᔭ ᐊ ᐃᑎᔨᒋ, ᒋ ᒋᔄᐃᑯᐅᒡ, ᐊ ᐃᔅᒋᔄᒡ, “ᑕᑈ ᐃᔭᔪᑕᐤ ᐊᓂᔭ ᐊ ᐎᒋᒪᑯᓯᔨᒡ ᑐᒥᓂᑭᓂᔪᐤ᙮ 9 ᒋ ᐸᒋ ᐊᑕᐛᒐᓄᔪᐤ ᐊᓂᔭ ᐊ ᐎᒋᒪᑯᓯᔨᒡ ᑐᒥᓂᑭᓂᔪᐤ ᑭᔭ ᒋ ᐸᒋ ᒥᔭᑭᓄᐎᒡ ᐊᓂᔭ ᓱᓇᔭᔪᐤ ᐊᓐᒡ ᐊᐛᓐᒋ ᑲ ᒋᔅᑎᒪᑎᓯᒡ᙮” 10 ᒋᓴᔅ ᒪᒃ ᒋ ᒋᔅᒐᔨᒪᐤ ᑕᓐ ᐊ ᐃᑎᑐᔨᒋ, ᐊᑯ ᐊᑕᑦ, “ᒐᒂᓐ ᐛᒋ ᐊᔨᒪᔨᑎᒪᒄ ? ᒥᔅᑎ ᒥᔽᓯᔪᐤ ᐊᓂᔭ ᐊᒋ ᐃᑐᑐᐅᑦ᙮ 11 ᒧᓯᓇᐤ ᒋᑭ ᑕᐅᒡ ᑲ ᒋᔅᑎᒪᑎᓯᒡ ᐅᑕ ᐊ ᑕᔭᒄ, ᓂᔾ ᒪᒃ ᓇᒪ ᒧᔅ ᓂᑭ ᐅᒋ ᑕᓐ ᐅᑕ ᐊ ᑕᔭᒄ᙮ 12 ᐅᔭ ᑲ ᐃᓯ ᐸᒋ ᐃᑐᑐᐅᑦ ᑲ ᐸᒋ ᑯᑎᐱᓇᐧᒃ ᐊ ᐎᒋᒪᑯᓯᔨᒡ ᑐᒥᓂᑭᓂᔪᐤ ᐅᑕ ᐊ ᑕᐅᒡ, ᒧᔭᒻ ᐊ ᐊᔭᔅᑯᐎᐧᑲᐧᒃ ᐊᓂᔭᔪᐤ ᒐ ᓇᐅᔅᑕᑭᓄᐎᒡ ᐊᑯᓐ ᐊ ᐃᓯᓇᑯᓂᔨᒡ ᐅᔭ ᑲ ᐃᑎᑦ᙮ 13 ᑕᑈ ᒋᑦ ᐃᑎᓇᐛᐤ, ᑕᓐᑕ ᒥᒄ ᒐ ᑭᒐᔅᒋᒧᓇᓄᐅᒂ ᐊ ᐛᐎᑕᑭᓄᐅᒡ ᒥᔽᒋᒧᐅᓐ ᒥᓯᐛ ᐊ ᐃᔅᐱᑎᔅᑭᒥᑲᒡ ᐅ ᐊᔅᒋᔾ ᒋᑭ ᐎᑕᑭᓄᐅᔪᐤ ᐅᔭ ᑕᓐ ᑲ ᐃᑎᑦ ᐊ ᒋᔅᒋᓯᑐᐛᑭᓄᐅᑦ ᐅ ᐃᔎᐤ᙮” ᒍᑎᔅ ᑲ ᓂᔅᑯᒧᑦ ᒐᒋ ᐎᔭᓯᐱᔅᑎᓇᑦ ᒋᓴᓴ ᒪᕐᒃ 14.10 , 11 ; ᓗᒃ 22.3-6 14 ᐊᑯ ᐸᐃᒄ ᐊᓐᑕ ᐊ ᓂᓱᓴᐳᒡ ᐊᓐᒡ ᒋᔅᒋᓄᐊᒧᐛᑭᓐᒡ ᒍᑎᔅ ᐃᔅᑲᕆᔭᑦ ᑲ ᐃᓯᓂᐧᑲᓱᑦ ᒋ ᓂᑐᐛᐱᒪᐤ ᐊᓂᔭ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ᙮ 15 ᐊᑯ ᒂ ᐃᑕᑦ, “ᒐᒂᓐ ᒐ ᒥᔨᔭᒄ ᐎᒋᐃᑎᑯᒐ ᒐᒋ ᒪᑯᓇᒄ ᒋᓴᔅ ?” ᓂᔅᑐᔪᐤ ᒪᒃ ᓱᓇᔭᐱᔎ ᒋ ᐛᐸᑎᔨᑯᐤ ᐊᑯ ᒂ ᐃᑎᑯᑦ, ᒪᐅ ᓱᓇᔭᐤ ᒐ ᒥᔨᑕᒡ᙮ 16 ᐊᑯᑕ ᒪᒃ ᐊᓐᑕ ᐃᔅᐱ ᒧᔅ ᑲ ᓇᓂᑐᐛᔨᑎᒺᑦ ᒍᑎᔅ ᑕᓐᑕ ᒐᒋ ᓇᐃᐱᔨᒡ ᒐᒋ ᐱᔅᑎᓇᑦ ᒋᓴᓴ ᒐᒋ ᒪᑯᓇᑭᓄᔨᒋ᙮ ᒋᓴᔅ ᑲ ᐎᒋᒥᒋᓱᒪᑦ ᐅᒋᔅᒋᓄᐊᒧᐛᑭᓇ ᒪᕐᒃ 14.12-21 ; ᓗᒃ 22.7-13 , 21-23 ; ᒠᓐ 13.21-30 17 ᐊᓐ ᒪᒃ ᓂᔅᑎᒻ ᐊ ᒋᓯᑲᒡ ᐊᓐᑕ ᐊᓂᔭᔪᐛ ᐊ ᐊᑎ ᒋᓯᑲᒋ ᐊᑲ ᐅᐱᔨᑦ ᐸᒂᓯᑭᓐ ᑲᒋ ᒧᐛᑭᓄᐅᑦ, ᒋᓴᔅ ᒋ ᐸᒋ ᓂᑐᐛᐱᒥᑯᐤ ᐅᒋᔅᒋᓄᐊᒧᐛᑭᓇ ᐊᑯ ᒂ ᐃᑎᑯᑦ, “ᑕᓐᑕ ᓇᑐᐛᔨᒥᔭᒡ ᒐᒋ ᐊᔭᔅᑯᔅᑎᒪᑕᒡ ᐎᒪᔅᑲᒐᐅ-ᒥᑯᓴᓐ ᒐᒋ ᒥᒋᔨᓐ ?” 18 ᒋ ᐃᑕᐤ ᒪᒃ, “ᐃᑐᑕᒄ ᐊᓐᑕ ᐅᑕᓇᒡ, ᒐ ᓂᑐᐛᐱᒪᒄ ᐸᐃᒄ ᓇᐸᐤ ᐊᑯ ᒐ ᐃᑕᒄ, ‘ᐃᔅᒋᔄᐤ ᒋᔅᑯᑎᒪᒐᓱᐤ, ᓴᔅ ᐎᐱᒡ ᒋᑭ ᐅᑎᒋᐱᔪᐤ ᒐ ᓂᑭᑎᒪᓐ ᐅ ᐊᔅᒋᔾ᙮ ᐊᓐᑕ ᒋᒋᒡ ᓂᒋᔅᒋᓄᐊᒧᐛᑭᓐᒡ ᓂᑭ ᐸᒋ ᒥᑯᓴᓇᓐ ᐊᓐ ᐎᒪᔅᑲᒐᐅ-ᒥᑯᓴᓐ᙮’ ” 19 ᐅᒋᔅᒋᓄᐊᒧᐛᑭᓇ ᒪᒃ ᒋ ᐃᑐᑎᒥᔪᐛ ᐊᓂᔭ ᑕᓐ ᑲ ᐃᑎᓱᒪᑦ, ᑭᔭ ᒋ ᐊᔭᔅᑯᔅᑕᔪᐛ ᐊᓂᔭ ᒥᑯᓴᓂᔪᐤ᙮ 20 ᐊᓂᔭ ᒪᒃ ᐛᑕᑯᓯᔨᒡ, ᒋᓴᔅ ᑭᔭ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᒋ ᐃᑐᑕᐅᒡ ᐊᓐᑕ ᒐ ᒥᑯᓴᒡ᙮ 21 ᒪᒂᒡ ᒪᒃ ᐊ ᒥᒋᓱᒡ, ᒋᓴᔅ ᒋ ᐃᑕᐤ, “ᑕᑈ ᒋᑦ ᐃᑎᓇᐛᐤ, ᐸᐃᒄ ᐅᑕ ᐊ ᑎᓯᔭᒄ ᓂᑭ ᐎᔭᓯᐱᔅᑎᓂᒄ᙮” 22 ᐊᓐᒡ ᒪᒃ ᒋᔅᒋᓄᐊᒧᐛᑭᓐᒡ ᒋ ᒥᓯᒪᔨᑎᒧᒡ ᐊᓂᔭ ᐊ ᐃᔅᒋᔄᔨᒋ ᐊᑯ ᐸᐸᐃᒄ ᒂ ᐃᑕᒡ, “ᐅᑎᐸᔨᒋᒐᐤ, ᓂᔾ ᐊ ᑲ ᐃᓯᔨᓐ ?” 23 ᐊᑯ ᒋᓴᔅ ᐊᑕᑦ, “ᐊᓐ ᐊᐛᓐ ᒐ ᐸᐃᑯᑕᐛᐛᒐ ᐎᔭᑭᓐ ᐊ ᐊᑯᒋᒥᒋᒡ ᓂᐸᒂᓯᑭᓂᒥᓇᓐ ᐊᐅᑯᓐ ᐊᓐ ᒐ ᐎᔭᓯᐱᔅᑎᓂᑦ᙮ 24 ᒋᑭ ᓂᐸᐊᑭᓄᐤ ᐃᔪᐤ ᐅᑯᓯᓴᓐ ᐊᓂᔭ ᐊᓐ ᑕᓐ ᑲ ᐃᓯ ᐸᒋ ᒥᓯᓇᐃᑭᓄᐎᒡ ᒥᓯᓇᐃᑭᓂᒡ ᐊᓐᑕ ᐅᑕᒡ᙮ ᒥᒄ ᒪᒃ ᑕᑈ ᒋᑭ ᐊᒂᒡ ᒥᒋᐱᔪᐤ ᐊᓐ ᐊᐛᓐ ᒐ ᐎᔭᓯᐱᒋᔅᑎᓇᑦ ᐃᔪᐤ ᐅᑯᓯᓴᓇ᙮ ᐃᐛᒃ ᒋᐸ ᒥᔽᔨᑯᐱᓇ ᐊᓐ ᐊᐛᓐ ᐊᑲ ᐛᐛᒡ ᐅᒋ ᐱᒪᑎᓯᑯᐱᓇ᙮” 25 ᐊᑯ ᒍᑎᔅ ᐊᓐ ᒐ ᐎᔭᓯᐱᔅᑎᓇᑯᐱᓇ ᒋᓴᓴ ᒂ ᐃᔅᒋᔄᑦ, “ᓂᔾ ᐊ ᑲ ᐃᓯᔨᓐ ?” ᐊᑯ ᒋᓴᔅ ᐊᑕᑦ, “ᓂᐦᐃ, ᐊᐅᑯᓐ ᐛᔅ ᑭᑈ ᐊ ᐃᔅᒋᔄᔨᓐ᙮” ᒋᓴᔅ ᒪᔅᑕᔾ ᑲ ᐎᒋᒥᒋᓱᒪᑦ ᐅᒋᔅᒋᓄᐊᒧᐛᑭᓇ ᒪᕐᒃ 14.22-26 ; ᓗᒃ 22.14-20 ; 1 ᑯᕆᓐᑎᔭᓇ 11.23-25 26 ᐊᓂᔭ ᒪᒃ ᐊ ᒥᒋᓱᒡ, ᒋᓴᔅ ᒋ ᐅᑎᓇᐤ ᐸᒂᓯᑭᓇ ᐊᑯ ᒂ ᓂᓇᔅᑯᒪᑦ ᒋᓴᒪᓂᑐᐛ᙮ ᐃᔅᐱ ᒪᒃ ᑲ ᓂᓇᔅᑯᒧᑦ ᐊᑯ ᒂ ᐸᒂᓇᑦ ᐊᓂᔭ ᐸᒂᓯᑭᓇ ᐊᑯ ᒂ ᒥᔭᑦ ᐅᒋᔅᒋᓄᐊᒧᐛᑭᓇ ᐊ ᐃᑕᑦ, “ᐅᑎᓇᐧᒄ ᐅ, ᒧᐛᐧᒄ, ᐊᐅᒄ ᐅ ᓂᔪᐤ᙮” 27 ᐊᑯ ᐊᓂᔭ ᒥᓂᒂᑭᓂᔪᐤ ᒂ ᐅᑎᓇᐧᒃ, ᒂ ᓂᓇᔅᑯᒪᑦ ᒋᓴᒪᓂᑐᐛ, ᐊᑯ ᒂ ᒥᔭᑦ ᐊᓂᔭ ᐅᒋᔅᒋᓄᐊᒧᐛᑭᓇ ᐊ ᐃᑕᑦ, “ᐊᑎ ᒪᒥᔨᑐᒄ ᐅ ᒐᒋ ᒥᓂᔭᒄ ᒥᓯᐛ ᐊ ᑎᓯᔭᒄ᙮ 28 ᐛᔅ ᐊᐅᑯᓐ ᐅ ᓂᒥᐧᒄ ᒐ ᐅᒋ ᐅᔅᒋᑕᑭᓄᐅᒡ ᓂᔅᑯᒧᐅᓐ, ᐊᐅᒄ ᓂᒥᐧᒄ ᒐ ᓯᒋᓂᑲᑕᒡ ᒐᒋ ᐅᒋ ᐛᐸᔨᑎᒧᐛᑭᓄᐎᒡ ᒥᒐᑦ ᐊᐛᓐᒋ ᐅᒥᒋᑥᐅᓄᐛᐛ᙮ 29 ᒋ ᐎᑎᒪᑎᓇᐛᐤ ᒪᒃ ᓇᒪ ᒥᓐ ᓂᑭ ᐅᒋ ᒥᓐ ᓱᒥᓇᐳᔾ ᐅᑕ ᐎ ᐸᑐᔅ ᐊᓐᑕ ᓄᑕᐎᔾ ᐅᒋᓴᐅᒋᒪᐅᓂᒡ ᒥᓐ ᒪᒧᐤ ᒥᓂᔭᒂ᙮” 30 ᐃᔅᐱ ᒪᒃ ᑲ ᓂᑭᒧᒡ ᐊᔭᒥᐊᐅ-ᓂᑭᒧᐅᓂᔪᐤ ᐊᑯ ᒂ ᐃᑐᑕᒡ ᐊᓐᑕ ᐊᓕᐱᔅ ᑲ ᐃᓯᓂᐧᑲᑕᔨᒡ ᐱᔅᑯᑎᓇᔪᐤ᙮ ᒋᓴᔅ ᑲ ᓂᑲᓂᐎᑕᐧᒃ ᑕᓐ ᒐ ᐃᑎᔨᒋ ᐱᑕᕋ ᒪᕐᒃ 14.27-31 ; ᓗᒃ 22.31-34 ; ᒠᓐ 13.36-38 31 ᐊᑯ ᒋᓴᔅ ᒂ ᐃᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ, “ᐅ ᐊᓄᒡ ᒐ ᑎᐱᔅᑲᒡ ᒥᓯᐛ ᐊ ᑎᓯᔭᒄ ᒋᑭ ᓇᑭᓯᓇᐛᐤ, ᐊᓐ ᐅᒋ ᑕᓐ ᒐ ᐃᑐᑕᑯᔭᓐ, ᐛᔅ ᐃᑎᔅᑕᔪᐤ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᓂᑭ ᓂᑕᐛᐤ ᐊᓐ ᒪᔭᑕᓂᓯᐅ-ᐃᔪᐤ, ᐊᑯ ᐊᓐᒡ ᒪᔭᑕᓂᓯᒡ ᒐ ᐃᒐᔭᒧᒐᓄᐎᒡ᙮” 32 ᐊᑯ ᒋᓴᔅ ᒥᓐ ᑲ ᐊᑎ ᐃᑕᑦ, “ᐃᔅᐱ ᒪᒃ ᒋ ᐅᓂᔅᑲᓂᑯᐅᔭᓇ ᓂᐳᐅᓂᒡ ᐅᒡ ᐊᓐᑕ ᑲᓕᓕᒡ ᓂᑭ ᐃᑐᑕᓐ᙮ ᐊᑯᑕ ᐊᓐᑕ ᒐ ᐊᓱᐛᐱᒥᑎᑯᒡ᙮” 33 ᐱᑕᕐ ᒪᒃ ᒋ ᐃᑕᐤ, “ᐊᑎ ᒥᓯᐛ ᐊᐛᓐ ᓂᑭᑎᔅᒐ ᐊᓐ ᒐ ᐃᑐᑕᑯᔨᓐ ᓇᒪ ᐎ ᓂᔾ ᓂᑕ ᒋᑭ ᐅᒋ ᓂᑭᑎᑎᓐ᙮” 34 ᒋᓴᔅ ᒂ ᐃᑕᑦ ᐊᓂᔭ ᐱᑕᕋ, “ᒋᒋᐛ ᒋᑦ ᐃᑎᓐ᙮ ᐊᓄᒡ ᐅ ᒐ ᑎᐱᔅᑲᒡ ᓂᔍᐤ ᒋᑭ ᐃᔅᒋᔄᓐ ᐊᑲ ᒋᔅᒐᔨᒥᔨᓐ ᐊᔅᒄ ᐊᑲ ᒋᔅᑐᑦ ᓇᐸ ᐱᑲᒂᓐ᙮” 35 ᐱᑕᕐ ᒪᒃ ᒋ ᐃᑕᐤ, “ᐊᑎ ᑭᔭ ᓂᔾ ᐎ ᓂᐸᐃᑯᔭᓇ ᐃᔅᐱ ᓂᐸᐃᑯᔨᓇ ᓇᒪ ᐃᔭᐱᒡ ᓂᑭ ᐅᒋ ᐃᔅᒋᔄᓐ ᐊᑲ ᒋᔅᒐᔨᒥᑕᓐ᙮” ᐊᑯ ᐊᓐᒡ ᑯᑎᑭᒡ ᒋᔅᒋᓄᐊᒧᐛᑭᓐᒡ ᐊᑯᓐ ᑭᔭ ᐎᔨᐛᐤ ᑲ ᐃᔅᒋᔄᒡ ᐊᓂᔭ ᑲ ᐃᔅᒋᔄᔨᒋ ᐱᑕᕋ᙮ ᒋᓴᔅ ᑲ ᐊᔭᒥᐊᑦ ᐊᓐᑕ ᑲᑦᓴᒪᓂᒡ ᒪᕐᒃ 14.32-42 ; ᓗᒃ 22.39-46 36 ᐊᑯ ᒋᓴᔅ ᒂ ᐎᒐᐛᑦ ᐊᓂᔭ ᐅᒋᔅᒋᓄᐊᒧᐛᑭᓇ ᐊᓐᑕ ᓂᑕᐅᒋᑕᑭᓐ ᐊᔅᒋᔪᐤ ᑲᑦᓴᒪᓂ ᑲ ᐃᓯᓂᐧᑲᑕᔨᒡ ᐊᑯᑕ ᑲ ᐃᑐᑕᒡ, ᐊᑯ ᐊᓂᔭ ᐱᑕᕋ ᑭᔭ ᓂᓱ ᐊᓂᔭ ᓴᐱᑎ ᐅᑯᓯᔪᐛ ᐅᔅᑕᓯᔅ ᐊᓐᑕ ᑎᐸᓐ ᑲ ᐃᑐᑕᐊᑦ ᐊᑯ ᒂ ᐃᑕᑦ, “ᐊᑯᑕ ᐅᑕ ᐊᐱᒄ, ᓇᑕ ᓂᑭ ᐃᑐᑕᓐ, ᓂᑭ ᓇᒋ ᐊᔭᒥᐊᓐ᙮” 37 ᓇᔅᒡ ᒪᒃ ᒋ ᒥᓯᒪᔨᑎᒻ ᒋᓴᔅ ᑭᔭ ᓇᔅᒡ ᒋ ᑯᓯᑯᑕᐊᐤ᙮ 38 ᐊᑯ ᒂ ᐃᑕᑦ ᐊᓂᔭ ᑲ ᐎᒐᐛᑦ, “ᓇᔅᒡ ᑕᑈ ᒥᓯᒪᔨᑎᒻ ᓂᑦ ᐊᒐᐧᒄ, ᒧᔭᒻ ᐊ ᓂᐱᔭᓐ ᓂᑦ ᐃᑎᒪᒋᔪᓐ, ᐊᑯᑕ ᐅᑕ ᑕᒄ ᒥᒄ ᒪᒃ ᐊᑲᐎᔾ ᓂᐸᒄ ᐊ ᐊᓱᐛᐱᒥᔭᒄ᙮” 39 ᐊᑯ ᐊᓐᑕ ᐛᔪᐎᔅ ᐎᔾ ᒂ ᐃᑐᑕᑦ, ᒋ ᐅᒋᒋᐧᑯᓂᐳᐤ ᒪᒃ, ᒂ ᐊᔭᒥᐊᑦ ᐊ ᐃᔅᒋᔄᑦ, “ᓄᑕ, ᒐᒋ ᐃᓯᓇᑯᓂᒂ ᐸᒋ ᐃᒐᓂᒧᐎ ᐅ ᑕᓐ ᒐ ᐃᓯ ᐛᐎᓯᒐᔨᑎᒪᓐ, ᒥᒄ ᒪᒃ ᒋᔾ ᒋᑦ ᐃᑕᔨᑎᒧᐅᓐ ᒋᑭ ᐃᑐᑕᑭᓄᐤ, ᓇᒪᐎᔾ ᓂᔾ ᓂᑦ ᐃᑕᔨᑎᒧᐅᓐ᙮” 40 ᒋ ᐱᓯᑯᐤ ᒪᒃ ᑲᒋ ᐃᓯ ᐊᔭᒥᐊᑦ, ᑲᐤ ᒂ ᓂᑐᐛᐱᒪᑦ ᐊᓂᔭ ᐅᒋᔅᒋᓄᐊᒧᐛᑭᓇ ᑲ ᐊᓱᐛᐱᒥᑯᑦ, ᐛᑎᑕᑦ ᒪᒃ ᒐᒂᔪᐤ ᑲ ᓂᐸᔨᒋ, ᐊᑯ ᒂ ᐃᑕᑦ ᐊᓂᔭ ᐱᑕᕋ, “ᑕᓐ ᐊ ᐃᑎᔭᒄ ᐛᒋ ᐊᑲ ᐛᐛᒡ ᐸᐃᑯ ᑎᐸᐃᑭᓇ ᐅᒋ ᐃᔅᐱᔅ ᐊᓱᐛᐱᒥᔭᒄ ? 41 ᐃᔭᒂᒥᒄ ᑭᔭ ᐊᔭᒥᐊᒄ ᒐ ᐊᑲ ᒋ ᓴᐧᑯᒋᐃᑯᔭᒄ ᑯᒂᒋᐃᐛᐅᓐ᙮ ᐛᔅ ᒋᑦ ᐊᒐᐧᑯᐛᒡ ᓇᔅᒡ ᑕᑈ ᑯᐃᔅᒄ ᒋ ᐎ ᐃᑎᓇᐛᐤ ᒥᒄ ᒪᒃ ᒋᔭᓱᐛᒡ ᓇᒪ ᓇᔅᒡ ᒋᓴᐱᓯᓇᐛᐤ᙮” 42 ᐊᑯ ᒥᓐ ᒂ ᐊᔭᒥᐊᑦ ᒋᓴᔅ ᒂ ᐃᔅᒋᔄᑦ, “ᓄᑕ ᒐ ᐊᑲ ᒋ ᐃᒐᓂᑭᓄᐅᒂ ᐅ ᒐ ᐃᓯ ᐎᓯᒐᔨᑎᒪᓐ ᐊᐅᑯᓐ ᑭᑈ ᒐ ᐃᓯ ᐃᑐᑎᒪᓐ, ᒋᔾ ᒋᑦ ᐃᑕᔨᑎᒧᐅᓐ ᒐᒋ ᐃᑐᑕᑭᓄᐅᒡ᙮” 43 ᒥᓐ ᒂ ᓂᑐ ᒋᔅᒐᔨᒪᑦ ᐊᓂᔭ ᐅᒋᔅᒋᓄᐊᒧᐛᑭᓇ, ᒐᒂᔪᐤ ᐊᔅᒄ ᓂᐸᔪᐛ, ᐛᔅ ᓴᔅ ᓇᒪ ᐅᒋ ᐃᑎᔪᐛ ᒐ ᐊᑲ ᒋ ᓂᐸᔨᒋ᙮ 44 ᒋᓴᔅ ᒂ ᓂᑭᑕᑦ, ᒥᓐ ᒂ ᐊᔭᒥᐊᑦ᙮ ᐊᐅᑯᐤ ᓂᔍᐤ ᑲ ᐸᐃᑯᓂᔨᒡ ᐊᓂᔭ ᐊ ᐃᓯ ᐊᔭᒥᐊᑦ᙮ 45 ᐊᑯ ᒥᓐ ᑲᐤ ᒂ ᓂᑐᐛᐱᒪᑦ ᐊᓂᔭ ᐅᒋᔅᒋᓄᐊᒧᐛᑭᓇ, ᒂ ᐃᑕᑦ, “ᐊᔅᒄ ᐊ ᒋ ᓂᐸᓇᐛᐤ ? ᐊᔅᒄ ᐊ ᒋᑦ ᐊᔅᑕᔭᔅᑯᓯᓇᐛᐤ ? ᐃᑕᐱᒄ ᒪ, ᓴᔅ ᐅᑎᒋᐱᔪᐤ ᐊᓐ ᑎᐸᐃᑭᓐ ᐃᔪᐤ ᐅᑯᓯᓴᓐ ᒐ ᐎᔭᓯᐱᔅᑎᓇᑭᓄᐅᑦ ᐅᒥᒋᑥᐛ ᐅᑎᒋᔨᒡ᙮ 46 ᐅᓂᒄ, ᒪᒋᑕᐤ ᐊᑯ, ᐛᔅ ᓴᔅ ᑎᑯᓯᓄᐤ ᐊᓐ ᓇᐸᐤ ᒐ ᐎᔭᓯᐱᔅᑎᓂᑦ᙮” ᒋᓴᔅ ᑲ ᒪᑯᓇᑭᓄᐅᑦ ᒪᕐᒃ 14.43-50 ; ᓗᒃ 22.47-53 ; ᒠᓐ 18.3-12 47 ᐊᔅᒄ ᒪᒃ ᒪᒂᒡ ᐊ ᐃᔨᒥᑦ ᒋᓴᔅ ᒋ ᐅᒋ ᑎᑯᓯᓂᔪᐛ ᐸᐃᒄ ᐊᓂᔭ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ ᒍᑎᔅ ᑲ ᐃᓯᓂᐧᑲᓱᔨᒋ᙮ ᒋ ᐸᒋ ᐎᒐᐅᑯᔪᐛ ᒥᒐᑦ ᐊᐛᔪᐛ ᐊᒋ ᐸᒋ ᐃᑎᓴᐅᑯᔨᒋ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᐃᔪᐛ ᑲ ᓂᑲᓂᔅᑯᐛᔨᒋ᙮ ᒋ ᐸᒋ ᑕᐧᑯᓂᒧᒡ ᒪᒃ ᓂᑐᐱᔪᐅ-ᒧᐧᑯᒪᓇ ᑭᔭ ᐅᑕᒥᐃᑭᓇᑎᒂ᙮ 48 ᐊᓐ ᒐ ᐎᔭᓯᐱᔅᑎᓇᑦ ᒋᓴᓴ ᓂᑲᓐ ᒋ ᐎᑎᒧᐛᐤ ᐊᓂᔭᔪᐛ ᑲ ᐎᒐᐅᑯᑦ ᑕᓐ ᒐ ᐃᑎᑦ᙮ ᐊ ᐃᔅᒋᔄᑦ, “ᐊᓐ ᒐ ᓱᐛᔨᒥᒃ ᐊᐅᑯᓐ ᐊᓐ ᓇᐸᐤ ᓇᑐᐛᔨᒪᒄ᙮ ᐊᐅᑯᓐ ᐊᓐ ᒐ ᒪᑯᓇᒄ᙮” 49 ᒍᑎᔅ ᒪᒃ ᑯᐃᔅᒄ ᒋ ᓂᑐᐛᐱᒪᐤ ᐊᓂᔭ ᒋᓴᓴ, ᐊᑯ ᒂ ᐃᑕᑦ, “ᐛᒋᔭ, ᒋᔅᑯᑎᒪᒐᓱᐤ᙮” ᐊᑯ ᒂ ᓱᐛᔨᒪᑦ᙮ 50 ᐊᑯ ᒋᓴᔅ ᒂ ᐃᑕᑦ, “ᓂᐎᒐᐛᑭᓐ, ᐃᑐᑕ ᑭᑈ ᑕᓐ ᑲ ᐎ ᐃᑎᔨᓐ᙮” ᐊᑯ ᐊᓐᒡ ᐃᔪᒡ ᒂ ᒪᑯᓇᒡ ᒋᓴᓴ ᐊᑯ ᒂ ᐃᑐᑐᐛᒡ ᑕᓐ ᑲ ᐎ ᐃᑐᑐᐛᒡ᙮ 51 ᐸᐃᒄ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᒋ ᐅᒋ ᔭᔨᔅᒋᐱᑎᒥᔪᐛ ᐊᓯᒪᑭᓂᓯᔪᐤ ᒧᐧᑯᒪᓂᔪᐤ ᒂ ᒋᒥᑐᑭᔭᔄᑦ ᒋᓴᐊᔭᒥᐊᐅᒋᒪᐛ ᐅᑦ ᐊᐱᒋᐊᑭᓂᔪᐛ᙮ 52 ᐊᑯ ᒋᓴᔅ ᒂ ᐃᑕᑦ, “ᓇᐅᔅᑕ ᐊᓐ ᒋᓂᑐᐱᔪᐅ-ᒧᐧᑯᒪᓐ, ᐛᔅ ᒥᓯᐛ ᐊᐛᓐ ᑲ ᐊᐱᒋᑕᑦ ᓂᑐᐱᔪᐅ-ᒧᐧᑯᒪᓂᔪᐤ ᒐᒋ ᓂᐸᐊᑦ ᐊᐛᔪᐛ ᐊᔪᐅᒄ ᐅᔭ ᒐ ᐊᐱᑎᓂᔨᒡ ᓂᐸᐊᑭᓄᐅᒐ ᑭᔭ ᐎᔾ᙮ 53 ᓇᒪᐎᔾ ᐊ ᒋ ᒋᔅᒐᔨᑕᓇᐛᐤ ᓂ ᐸᒋ ᓂᑐᑎᒧᐛᐤ ᓄᑕᐎᔾ ᒐᒋ ᓇᑕᒧᐅᑦ, ᑎᐛᒡ ᒪᒃ ᒋᐸ ᒋ ᐸᒋ ᐃᑎᓴᐛᐤ ᐅᔅᑕ ᒥᒐᑥᐤ ᒐᓯᐱᔪᐤ ᐊᓐᒋᓇ ᒐᒋ ᐸᒋ ᓇᑕᒧᔨᒋ ? 54 ᒥᒄ ᒪᒃ ᐊᓐ ᐃᑎᔭᓇ, ᑕᓐᑕ ᒐᒋ ᐅᒋ ᐃᔅᐱᔨᒡ ᐊᓐ ᑲ ᐃᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐊᓐ ᒋᐸ ᐃᔅᐱᔪᐤ ?” 55 ᐊᑯ ᒋᓴᔅ ᒂ ᐃᑕᑦ ᐊᓂᔭ ᐃᔪᐛ, “ᒧᔭᒻ ᑕᑈ ᑲ ᐊᒂᑎᓯᑦ ᑲᒋᒧᑎᑦ ᐊ ᐃᑐᑐᔭᒄ ᐊ ᐸᒋ ᓂᑐᐛᐱᒥᔭᒄ ᐊ ᑕᐧᑯᓂᒪᒄ ᓂᑐᐱᔪᐅ-ᒧᐧᑯᒪᓇ ᑭᔭ ᐅᑕᒪᐃᑭᓇᑎᒂ᙮ ᐛᔅ ᓴᔅ ᒋ ᐸᒋ ᒪᑯᓇᐛᐤ ᐊᓐᑕ ᒋᓴᐊᔭᒥᐊᐅᒋᐛᐱᒡ ᑲᒋ ᑕᔭᐧᒄ ᐊᓯᑯᒻ ᒋᓯᑲᐛ ᐊ ᒋᔅᑯᑎᒪᒐᔭᓐ, ᓇᒪ ᒪᒃ ᓂᑕ ᒋ ᐅᒋ ᑯᒂᑕᔨᑕᓇᐛᐤ ᒐᒋ ᒪᑯᓂᔭᒄ᙮” 56 ᒥᒄ ᒪᒃ ᐛᔅ ᒥᓯᐛ ᑎᐱᐱᔪᐤ ᑕᓐ ᑲ ᐃᓯ ᒥᓯᓇᐊᒡ ᐊᓐᑕ ᒋᓴᒪᓂᑐᐛ ᐅᑦ ᐃᔨᒧᐅᓂᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ᙮ ᐃᔅᐱ ᒪᒃ ᐅᔭ ᑲ ᐃᑕᑦ ᐊᑯ ᒥᓯᐛ ᐅᒋᔅᒋᓄᐊᒧᐛᑭᓇ ᒂ ᒋᑎᓯᒧᔨᒋ ᐊ ᓂᑭᑎᑯᑦ᙮ ᒋᓴᔅ ᑲ ᐅᑎᔅᑯᑲᐳᔅᑐᐛᑦ ᒋᓴᐊᔭᒥᐊᐅᒋᒪᐛ ᒪᕐᒃ 14.53-65 ; ᓗᒃ 22.54 , 55 , 63-71 ; ᒠᓐ 18.13 , 14 , 19-24 57 ᐊᓐᒡ ᒪᒃ ᑲ ᒪᑯᓇᒡ ᒋᓴᓴ ᒋ ᐃᑐᑕᐊᐅᒡ ᐊᓐᑕ ᒋᓴᐊᔭᒥᐊᐅᒋᒪᐛ ᑲᔭᐸᔅ ᐊ ᑕᔨᒋ᙮ ᓴᔅ ᒪᒃ ᒋ ᒪᒧᐎᔪᐛ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ ᑭᔭ ᐊᓂᔭ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ ᐊᓐᑕ ᐊᓂᔭ ᒋᓴᐊᔭᒥᐊᐅᒋᒪᐛ ᐎᒋᔨᒡ᙮ 58 ᐱᑕᕐ ᒪᒃ ᐛᔪᐤ ᐊᓐᑕ ᒋ ᐅᒋ ᓇᓴᐛᐤ ᐊᓂᔭ ᑲ ᒪᑯᓇᔨᒋ ᒋᓴᓴ, ᐱᐃᒻ ᑲ ᐅᑎᑕᒡ ᒋᓴᐊᔭᒥᐊᐅᒋᒪᐛ ᐎᒋᔪᐤ᙮ ᐊᓐᑕ ᒪᒃ ᐎᐎᑎᒥᒡ ᐊᑯᑕ ᑲ ᑕᑦ ᐎᔾ ᐱᑕᕐ, ᒂ ᐎᑎᐱᒪᑦ ᐊᓂᔭ ᑲ ᓂᓇᑭᑐᐛᐸᑎᒥᔨᒋ ᒋᓴᐊᔭᒥᐊᐅᒋᒪᐛ ᐎᒋᔪᐤ ᐊ ᐎ ᐛᐸᑕᐧᒃ ᑕᓐ ᒐ ᐃᑎᓇᓄᔨᒂ᙮ 59 ᐊᓐᒡ ᒪᒃ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓐᒡ ᑲ ᓂᑲᓂᔅᑯᐛᒡ ᒍᐤ ᐃᔪᐛ ᒋ ᐎ ᓇᓂᑐᐤ ᐅᑎᓂᒧᒡ ᑕᓐ ᒐᒋ ᐃᓯ ᑭᑭᒋᔭᐅᐛᑕᒋᒪᒡ ᒋᓴᓴ ᒐᒋ ᐅᒋ ᓂᐸᐊᑭᓄᔨᒋ᙮ 60 ᒥᒄ ᒪᒃ ᓇᒪ ᐅᒋ ᒥᔅᑯᒺᐅᒡ ᒐᒂᔪᐤ ᐊᒋ ᐃᑎᔨᒋ ᐊᓐᑕ ᒐᒋ ᐅᒋ ᐱᔅᑎᓱᐛᑎᑯᒡ ᐎᓱᐛᐅᓂᔪᐤ ᒐᒋ ᓂᐸᐊᒡ ᒋᓴᓴ, ᐊᑎ ᒥᒐᑦ ᐊᒋ ᑎᑯᓯᓂᒡ ᐊ ᑭᑭᒋᔭᐅᐛᑕᒋᒪᒡ᙮ ᒐᒃ ᒪᒃ ᓂᓱ ᓇᐸᐅᒡ ᒂ ᑎᑯᓯᒡ᙮ 61 ᐊᑯ ᒂ ᐃᔅᒋᔄᒡ, “ᐅ ᓇᐸᐤ ᒋᓴᔅ ᓂᒋ ᐸᑐᐛᓇᓐ ᐊ ᐃᔅᒋᔄᑦ, ‘ᓂᑭ ᒋ ᓂᓱᐅᓇᒋᑕᐛᓐ ᒋᓴᒪᓂᑐᐤ ᐅᒋᓴᐊᔭᒥᐊᐅᒋᐛᑉ, ᒥᒄ ᒪᒃ ᓂᔅᑐ ᒋᓯᑲᐛ ᐃᔅᐱᔅ ᓴᔅ ᒥᓐ ᓂᑭ ᒋ ᐎᔨᑲᐳᐅᑕᐛᓐ᙮’ ” 62 ᐊᑯ ᐊᓐ ᒋᓴᐊᔭᒥᐊᐅᒋᒪᐤ ᒂ ᐱᓯᑯᑦ, ᒂ ᐃᑕᑦ ᐊᓂᔭ ᒋᓴᓴ, “ᑕᓐ ᒪᒃ ᒐᒋ ᐃᔅᒋᔄᔨᓐ ᑲ ᐃᑕᒋᒥᑯᔨᓐ ?” 63 ᒋᓴᔅ ᒪᒃ ᓇᒪ ᐅᒋ ᒋᔅᑐᐤ᙮ ᐊᑯ ᒥᓐ ᒂ ᐃᑎᑯᑦ ᐊᓂᔭ ᒋᓴᐊᔭᒥᐊᐅᒋᒪᐛ, “ᑯᐃᔅᒄ ᒪ ᐸᒋ ᐎᑎᒧᐅᓇᓐ ᐊ ᐸᑕᔅᒃ ᐊᓐ ᐸᒪᑎᓯᑦ ᒋᓴᒪᓂᑐᐤ, ᐊᐅᒄ ᐊ ᒋᔾ ᑕᑈ ᙭, ᒋᓴᒪᓂᑐᐤ ᐅᑯᓴ ?” 64 ᒋᓴᔅ ᒋ ᐃᑕᐤ, “ᐊᐅᑯᓐ ᐊ ᐃᔅᒋᔄᔨᓐ᙮ ᒥᒄ ᒪᒃ ᒋ ᐎᑎᒪᑎᓇᐛᐤ ᒋᑭ ᐛᐱᒪᐛᐤ ᐃᔪᐤ ᐅᑯᓯᓴᓐ ᐊ ᐊᐱᑦ ᐊᓐᑕ ᑲ ᓱᐧᑲᑎᓯᔨᒋ ᐅᒥᔪᓂᔨᒡ ᐃᑕᒐ ᐊ ᑕᔨᒋ᙮ ᑭᔭ ᒋᑭ ᐛᐱᒪᐛᐤ ᐸᒋ ᑎᑯᓯᓂᒐ ᒋᒋᒋᓯᒄ ᑭᔅᑯᐅᓂᔅᑯᒡ ᐊ ᐅᒋ ᓄᑯᓯᑦ᙮” 65 ᐊᑯ ᐊᓐ ᒋᓴᐊᔭᒥᐊᐅᒋᒪᐤ ᒂ ᐱᑯᐱᑕᐧᒃ ᐅᑦ ᐊᐱᒋᑕᐅᓇ ᐊ ᐃᔅᒋᔄᑦ, “ᐊᑯᓐ ᐊᑯ ᒐ ᐃᔅᐱᔅ ᐊᑐᐎᔅ ᐃᔅᒋᔄᑦ᙮ ᓇᒪ ᒋ ᓂᑐᐛᔨᑎᒺᓇᓄᐤ ᐊᑐᐎᔅ ᒐᒋ ᑎᐸᒋᒪᑭᓄᐅᑦ᙮ ᐛᔅ ᒋᔭᓄᐤ ᓴᔅ ᓇᔅᒡ ᔅᒋ ᐸᑐᐛᓄᐤ ᑕᓐ ᐊᔅᐱᔅ ᐸᔅᑕᒧᑦ᙮ 66 ᑕᓐ ᐊ ᐃᑕᔨᑎᒥᐃᑯᔭᒄ ᐊᓂᔭ ᑲ ᐃᓯ ᐸᑐᐛᒄ ?” ᐊᑯ ᒂ ᐃᔅᒋᔄᒡ, “ᑎᑯᓂᔪᐤ ᑭᑈ ᑕᓐ ᐊ ᐃᓯ ᐅᓂᑐᑕᐧᒃ ᐃᑕᔨᑕᑯᓂᔪᐤ ᒪᒃ ᒐᒋ ᓂᐸᐊᑭᓄᐅᑦ᙮” 67 ᒋ ᓯᔅᑎᒂᑕᐅᒡ ᐅᑕᔅᑎᒥᐧᑯᔨᒡ ᐊᔪᐤ ᒋ ᐅᑕᒪᐛᐅᒡ ᑭᔭ ᒋ ᐅᑎᑕᒥᒂᐛᐅᒡ᙮ 68 ᒋ ᒪᔭᔨᒪᐅᒡ ᐊ ᐃᑕᒡ, “᙭, ᒋᔅᒋᐛᐃᒐ ᒪ, ᐎᑎᒧᐅᓇᓐ ᒪ ᐊᐛᓐ ᑲ ᐅᑕᒧᐅᔅᒃ ?” ᐱᑕᕐ ᑲ ᑭᑭᒋᔭᑦ ᐊ ᐃᔅᒋᔄᑦ ᐊᑲ ᒋᔅᒐᔨᒪᑦ ᒋᓴᓴ ᒪᕐᒃ 14.66-72 ; ᓗᒃ 22.56-62 ; ᒠᓐ 18.15-18 , 25-27 69 ᒪᒂᒡ ᒪᒃ ᐊ ᒪᔭᔨᒪᑭᓄᔨᒋ ᒋᓴᓴ, ᐱᑕᕐ ᒋ ᐊᐳᐤ ᐊᓐᑕ ᐊ ᐅᒋ ᐱᒐᓄᐎᒡ ᐊᓂᔭᔪᐛ ᒋᓴᐊᔭᒥᐊᐅᒋᒪᐛ ᐎᒋᔪᐤ, ᐸᐃᒄ ᒪᒃ ᐊᓂᔭ ᒋᓴᐊᔭᒥᐊᐅᒋᒪᐛ ᐅᑯᐸᓇᔎᒥᔪᐛ ᒋ ᐸᒋ ᓂᑐᐛᐱᒥᑯᐤ ᒂ ᐃᑎᑯᑦ, “ᒋᔾ ᑭᔭ ᔅᒋ ᐱᐸᐎᒐᐛᐤ ᒋᓴᔅ ᐊᓐ ᓇᐸᐤ ᑲᓕᓕ ᐊᔅᒋᒡ ᑲ ᐅᒋᑦ᙮” 70 ᐱᑕᕐ ᒪᒃ ᒋ ᑭᑭᒋᔭᐤ ᐊ ᐃᔅᒋᔄᑦ, ᐊ ᐸᑕᑯᑦ ᒥᓯᐛ ᐊᓐᑕ ᑲ ᑕᔨᒋ, “ᓇᒪ ᓂ ᒋᔅᒐᔨᑕᓐ ᒐᒂᓐ ᑲ ᐊᔨᒧᑎᒥᓐ᙮” 71 ᐊᑯ ᒂ ᐊᑎ ᐎᐎᑦ ᐊᓐᑕ ᐊ ᐅᒋ ᐱᒐᓄᐎᒡ ᐊᓐᑕ ᐊᓂᔭ ᑲ ᐃᑕᓄᐎᒡ᙮ ᐊᑯ ᒥᓐ ᑯᑎᑲ ᑯᐸᓇᔎᓴ ᒂ ᐛᐱᒥᑯᑦ, ᐊᑯ ᐊᓐ ᐃᔎᔅ ᒂ ᐃᑕᑦ ᐊᓂᔭ ᓇᐸᐛ ᐊᓐᑕ ᑲ ᑕᔨᒋ, “ᐅ ᓇᐸᐤ ᑭᔭ ᐎᔾ ᒋ ᐱᐸᐎᒐᐛᐤ ᒋᓴᓴ, ᓇᓴᕆᑎᒡ ᑲ ᐅᒋᔨᒋ᙮” 72 ᒥᓐ ᒪᒃ ᒋ ᑭᑭᒋᔭᐤ ᐱᑕᕐ ᐊ ᐃᔅᒋᔄᑦ, “ᓂ ᑕᑈᓐ ᐊ ᐃᔅᒋᔄᔭᓐ ᓇᒪ ᓂ ᒋᔅᒐᔨᒪᐤ ᐊᓐ ᓇᐸᐤ᙮” 73 ᓇᓇᒐᓯᔅ ᒪᒃ ᐊᓐᒡ ᐃᔪᒡ ᐊᓐᑕ ᑲ ᓇᓂᐳᐅᒡ ᒋ ᐸᒋ ᓂᑐᐛᐱᒪᐅᒡ ᐊᓂᔭ ᐱᑕᕋ ᒂ ᐃᑕᒡ, “ᓇᔅᒡ ᐊ ᒐᔅᑎᓇᐅᔭᒡ ᑭᔭ ᒋᔾ ᐊᑯᑕ ᑲ ᐎᒋᐃᐛᔨᓐ, ᐛᔅ ᐊᑯᓐ ᒧᔭᒻ ᐊ ᐃᑎᑕᑯᓯᔨᓐ ᑭᔭ ᒋᔾ ᐊ ᐊᔨᒥᔨᓐ᙮” 74 ᐱᑕᕐ ᒪᒃ ᒋ ᐃᑕᐤ, “ᑕᑈ ᐛᔅ ᐊᓐ, ᓇᒪ ᓂ ᒋᔅᒐᔨᒪᐤ ᐊᓐ ᓇᐸᐤ᙮ ᐊᑯᔅ ᓂᑭ ᐛᐛᓯᐃᒄ ᒋᓴᒪᓂᑐᐤ ᓂᑎᒥᒄ ᐊ ᐃᔅᒋᔄᐛᓇ᙮” ᐊᑯᑕ ᒪᒃ ᐊᓐᑕ ᑎᐛᒡ ᒂ ᐅᒋ ᒋᔅᑐᑦ ᓇᐸ ᐱᑲᒂᓐ᙮ 75 ᐊᑯ ᐱᑕᕐ ᒂ ᒋᔅᒋᓯᑦ ᑕᓐ ᑲ ᐃᑎᑯᑦ ᒋᓴᓴ, “ᐊᔅᒄ ᐊᑲ ᒋᔅᑐᑦ ᓇᐸ ᐱᑲᒂᓐ ᐊᓄᒡ ᑲ ᒋᓯᑲᒡ ᓂᔍᐤ ᒋᑭ ᐃᔅᒋᔄᓐ ᐊᑲ ᒋᔅᒐᔨᒥᔨᓐ᙮” ᐊᑯ ᒪᒃ ᒂ ᐎᐎᑦ ᒂ ᒪᑦ, ᓱᒃ ᐊ ᒪᑦ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.