ᒪᑎᔪᐤ 19 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᔅ ᑲ ᐊᔨᒧᑕᐧᒃ ᐊ ᐛᐱᓂᑐᓇᓄᐎᒡ

¹ ᐃᔅᐱ ᒪᒃ ᒋᓴᔅ ᑲᒋ ᐎᑕᐧᒃ ᐅᔭ ᒋ ᔅᑐᑕᐤ ᐊᓐᑕ ᑲᓕᓕᒡ ᐅᒋ, ᐊᑯ ᐊᓐᑕ ᒍᑎᔭ ᐊᔅᒋᒡ ᒂ ᐃᑐᑕᑦ ᒂᔅᑕᒐᑲᒻ ᐊᓂᔭ ᒠᕐᑕᓐ ᓯᐱᔪᐤ᙮

² ᒋ ᒥᒐᑎᔪᐛ ᒪᒃ ᐃᔪᐛ ᐊ ᓇᓴᐅᑯᑦ, ᐊᑯᑕ ᐊᓐᑕ ᑲ ᒥᓏᒋᐊᑦ᙮

³ ᐱᔅᒐ ᒪᒃ ᐸᕆᓯᐊ ᒋ ᐸᒋ ᓂᑐᐛᐱᒥᑯᐤ ᐊ ᐎ ᑯᒂᒋᐃᑯᑦ᙮ ᒋ ᐃᑎᑯᐤ ᒪᒃ, “ᐎᑎᒧᐅᓇᓐ ᒪ, ᐃᑎᔅᑕᐤ ᐊ ᐎᓱᐛᐅᓂᒡ ᒐ ᐱᔅᑎᓇᑭᓄᐅᑦ ᓇᐸᐤ ᒐᒋ ᐛᐱᓇᑦ ᐎᐛ ?”

⁴ ᐊᑯ ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᓇᒪᐎᔾ ᐊ ᒋ ᐅᒋ ᐃᔨᒥᑕᓇᐛᐤ ᒥᓯᓇᐃᑭᓂᒡ ᐊᓐᑕ ᑲ ᐃᑎᔅᑕᒡ, ᓂᔅᑎᒻ ᐃᔪᐛ ᑲ ᐅᓯᐊᑦ ᒋᓴᒪᓂᑐᐤ, ᓇᐸᐛ ᑭᔭ ᐃᔎᐛ ᒋ ᐅᓯᐊᐤ᙮

⁵ ᒋ ᐃᔅᒋᔄᐤ ᒪᒃ ᒋᓴᒪᓂᑐᐤ, ‘ᐅ ᐅᒋ, ᓇᐸᐤ ᒋᑭ ᓂᑭᑕᐤ ᐅᓂᒋᐃᒂ ᒐ ᐎᒋᒪᑦ ᐎᐛ ᑭᔭ ᒐ ᐸᐃᑯᐎᔭᓯᒡ᙮’ ᐊᔪᐅᒄ ᐅᔭ ᑲ ᐃᔅᒋᔄᒂ ᒋᓴᒪᓂᑐᐤ᙮

⁶ ᓇᒪ ᓴᔅ ᐊ ᓂᓯᒡ ᐊᐛᓐᒋ ᒋᑭ ᐅᒋ ᐃᓯᓇᑯᓱᐅᒡ, ᒪᒃ ᒥᒄ ᐊ ᐸᐃᑯᓯᑦ ᐊᐛᓐ ᒋᑭ ᐃᓯᓇᑯᓱᐅᒡ᙮ ᐊᓂᔭ ᒪᒃ ᐊᐛᔪᐛ ᒋᓴᒪᓂᑐᐤ ᑲ ᐸᐃᒂᐊᑦ, ᓇᒪ ᐊᐛᓐ ᒋᐸ ᐅᒋ ᑕᑎᐸᓇᐤ᙮”

⁷ ᐊᑯ ᒂ ᐃᑎᑯᑦ ᐊᓂᔭ ᐸᕆᓯᐊ, “ᒐᒂᔪᐤ ᒪᒃ ᐛᒋ ᐎᔅᑕᑦ ᐅᔭ ᐎᓱᐛᐅᓂᔪᐤ ᒧᓱᔅ ᐊ ᐃᑎᔅᑕᔨᒡ, ‘ᓇᐸᐤ ᐎ ᐛᐱᓇᒐ ᐎᐛ ᔭᐃᑕᔾ ᓂᑲᓐ ᒋᑭ ᐎᑎᒧᐛᐤ ᒥᓯᓇᐃᑭᓂᔪᐤ ᐊ ᒥᔭᑦ, ᐊᑯ ᐃᔭᒄ ᒐ ᓂᑭᑕᑦ’ ?”

⁸ ᐊᑯ ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᒧᓱᔅ ᔅᒋ ᐱᔅᑎᓂᑯᐛᐤ ᒐᒋ ᐛᐱᓂᒪᑯ ᒋᐅᐛᐛ ᐛᔅ ᒋ ᒋᔅᒐᔨᑎᒻ ᐊ ᓯᐱᑎᒺᒄ᙮ ᓇᒪ ᒪᒃ ᐎᔾ ᒋᓴᒪᓂᑐᐤ ᐅᒋ ᓂᑐᐛᔨᑎᒻ ᒐᒋ ᐃᓯᓇᑯᓂᔨᒡ ᐅᔅᑭᒡ ᐛᓯᐊᑦ ᓇᐸᐛ ᑭᔭ ᐃᔎᐛ᙮

⁹ ᒋ ᐎᑎᒪᑎᓇᐛᐤ ᒪᒃ, ᓇᐸᐤ ᐛᐱᓇᒐ ᐎᐛ ᐊᑲ ᒪᒃ ᐅᒋ ᐱᓯᒂᑎᓯᔨᒋ ᐊᓂᔭ ᐎᐛ, ᐊᓐ ᒪᒃ ᓇᐸᐤ ᐎᒋᒪᒐ ᑯᑎᑲ ᐃᔎᐛ ᐱᓯᒂᑎᓯᐤ ᐊᓐ ᓇᐸᐤ᙮”

¹⁰ ᐊᑯ ᒂ ᐃᑎᑯᑦ ᐅᒋᔅᒋᓄᐊᒧᐛᑭᓇ, “ᐅ ᐊ ᐃᔅᐱᔪᐛᒂ ᓇᐸᐤ ᐎᐛ, ᐊᑯᔅ ᒥᔽᓱᐤ ᒐ ᐊᑲ ᒋ ᓂᐳᐅᓇᓄᐅᒡ᙮”

¹¹ ᐊᑯ ᒋᓴᔅ ᒂ ᐃᑕᑦ, “ᓇᒪ ᒥᓯᐛ ᐊᐛᓐ ᒋᑭ ᐅᒋ ᓂᔅᑐᑎᒻ ᐅᔭᔪᐤ ᒋᔅᑯᑎᒪᒐᐅᓂᔪᐤ, ᒥᒄ ᐊᓂᔭ ᐊᐛᔪᐛ ᒋᓴᒪᓂᑐᐤ ᑲ ᒥᔭᑦ ᒐᒋ ᓂᔅᑐᑎᒥᔨᒋ᙮

¹² ᐱᔅᒐ ᒪᒃ ᐊᐛᓐᒋ ᓇᒪ ᒋᑭ ᒋ ᓂᐳᐅᒡ ᐛᔅ ᐊᐅᑯᓐ ᑲ ᐃᓯ ᐱᒪᑎᓯᒡ ᐊᑲ ᒪᒥᑐᓇᔨᑎᒥᐃᑯᒡ ᒐᒋ ᓂᐳᐅᒡ, ᐊᑯ ᑯᑎᑭᒡ ᓇᒪ ᐱᔅᑎᓇᑭᓄᐎᒡ ᒐᒋ ᓂᐳᐅᒡ ᐊᑯ ᑯᑎᑭᒡ ᐎᔨᐛᐤ ᐃᑕᔨᑎᒧᒡ ᒐ ᐊᑲ ᓂᐳᐅᒡ ᐛᔅ ᐃᑕᔨᑎᒧᒡ ᐃᐛᒃ ᒐᒋ ᐊᑐᔅᒐᔅᑕᒡ ᒋᒋᒋᓯᒄ ᐅᒋᒪᐅᓂᔪᐤ ᒥᒄ ᐊ ᐸᐃᑯᓯᒡ᙮ ᐊᓐ ᒪᒃ ᐊᐛᓐ ᑲ ᓂᔅᑐᑕᐧᒃ ᐅᔭ ᐊᑯᔅ ᒋᑭ ᐃᑐᑎᒻ᙮”

ᒋᓴᔅ ᑲ ᓱᐛᔨᒪᑦ ᐊᐛᓴ

¹³ ᒋ ᐸᓱᐛᐅᒡ ᒪᒃ ᐊᐛᓐᒋ ᐅᑦ ᐊᐛᓯᒧᐛᐛ ᐊᓐᑕ ᒋᓴᓴ ᐊ ᑕᔨᒋ ᐊᒋ ᓂᑐᐛᔨᒪᒡ ᒐᒋ ᑕᒋᓇᔨᒋ ᒐᒋ ᐊᔭᒥᐊᔅᑎᒧᐛᔨᒋ ᒪᒃ, ᒥᒄ ᒪᒃ ᐊᓐᒡ ᒋᔅᒋᓄᐊᒧᐛᑭᓐᒡ ᒋ ᒋᑕᐊᒧᐛᐅᒡ ᐊᓂᔭ ᐃᔪᐛ᙮

¹⁴ ᐊᑯ ᒋᓴᔅ ᒂ ᐃᑕᑦ, “ᐱᔅᑎᓇᐧᑯᒡ ᐊᐛᓯᒡ ᒐᒋ ᐸᒋ ᓇᓯᒡ ᐊᑲᐎᔾ ᐅᒋ ᒋᑕᐊᒧᐛᐧᑯᒡ, ᐛᔅ ᐅᔭ ᑲ ᐃᑕᔨᑕᑯᓯᒡ ᐊᐛᓐᒋ ᒋᒋᒋᓯᒄ ᐅᒋᒪᐅᓂᒡ ᐃᓯ ᑎᐸᔨᑕᑯᓱᐅᒡ᙮”

¹⁵ ᒋᓴᔅ ᒂ ᑕᒋᓇᑦ ᐊᓂᔭ ᐊᐛᓴ ᐊᑯ ᒂ ᔅᑐᑕᑦ᙮

ᑲ ᐛᔪᑎᓯᑦ ᓇᐸᐤ

¹⁶ ᐸᐃᒂᐤ ᓇᐸᐤ ᒋ ᐸᒋ ᓂᑐᐛᐱᒪᐤ ᒋᓴᓴ ᐊ ᐃᑕᑦ, “ᒋᔅᑯᑎᒪᒐᓱᐤ, ᒐᒂᓐ ᒐᒋ ᐃᑐᑎᒪᓐ ᐊ ᒥᔽᓯᒡ ᒐᒋ ᐅᒋ ᐊᔭᔭᓐ ᑲᒋᒡ ᐱᒪᑎᓯᐅᓐ ?”

¹⁷ ᐊᑯ ᒋᓴᔅ ᒂ ᐃᑕᑦ, “ᒐᒂᓐ ᐛᒋ ᑯᒂᒋᒥᔨᓐ ᒐᒋ ᐎᑎᒪᑕᓐ ᒐᒂᓐ ᒪᔽᓯᒡ ? ᓇᒪ ᐊᐛᓐ ᑕᐤ ᓇᔅᒡ ᒐᒋ ᒥᔪ ᐃᑎᑦ, ᒥᒄ ᒋᓴᒪᓂᑐᐤ᙮ ᐛ ᐃᔭᐅᓇ ᑲᒋᒡ ᐱᒪᑎᓯᐅᓐ ᒥᓯᐛ ᓂᓇᐃᑕ ᐎᓱᐛᐅᓇ᙮”

¹⁸ ᐊᑯ ᐊᓐ ᓇᐸᐤ ᒂ ᐃᑕᑦ, “ᒐᒄ ᐎᓱᐛᐅᓇ ?” ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ ‘ᐊᑲᐎᔾ ᓂᐸᐃ ᐊᐛᓐ, ᐊᑲᐎᔾ ᐱᓯᒂᑎᓯ, ᐊᑲᐎᔾ ᒋᒧᑎ, ᐊᑲᐎᔾ ᒋᑭ ᓂᑎᔭᒋᒪᐤ ᐊᐛᓐ,

¹⁹ ᒋᔅᑕᔨᒻ ᒍᑕᐎᔾ ᑭᔭ ᒋᑲᐎᔾ,’ ᑭᔭ ‘ᓴᒋᐃ ᒋᒡ ᐃᔪᐤ ᒧᔭᒻ ᒋᔾ ᐊ ᐃᔅᐱᔅ ᓴᒋᐃᓱᔨᓐ᙮’ ”

²⁰ ᐊᑯ ᐊᓐ ᓇᐸᐤ ᒂ ᐃᔅᒋᔄᑦ, “ᑲ ᐸᒋ ᐊᐛᓯᐅᔭᓐ ᓴᔅ ᓂᒋ ᓂᓇᐃᑕᓐ ᐅᔭ ᐎᓱᐛᐅᓇ᙮ ᒐᒂᓐ ᒪᒃ ᐃᔭᐱᒡ ᐊᔅᒄ ᓂᐸ ᐃᑐᑕᓐ ?”

²¹ ᐊᑯ ᒋᓴᔅ ᒂ ᐃᑕᑦ, “ᓇᔅᒡ ᒥᓯᐛ ᒐᒂᓐ ᐛ ᐃᑐᑎᒧᐎᓇ ᒐᒋ ᑯᐃᔅᑯᑕᑎᓯᔨᓐ, ᐊᑕᐛᒐ ᒥᓯᐛ ᑕᓐ ᐊ ᐃᓯ ᐊᔭᔨᓐ, ᐊᑯ ᐊᓐ ᓱᓇᔭᐤ ᑲ ᒋᔅᑎᒪᑎᓯᒡ ᒐ ᒥᔨᑥᐤ᙮ ᐊᑯ ᒪᒃ ᒐ ᐊᔭᔨᓐ ᐛᔪᑎᓯᐅᓐ ᒋᒋᒋᓯᑯᒡ ᑲ ᑎᒂᒡ᙮ ᒋ ᐃᑐᑎᒥᓇ ᒪᒃ ᐅ ᐊᑯ ᒐ ᐸᑐᑕᔨᓐ ᒐ ᐸᒋ ᓇᓴᐎᔨᓐ᙮”

²² ᐃᔅᐱ ᒪᒃ ᐱᔭᑕᐧᒃ ᐊᓐ ᓇᐸᐤ ᐅᔭᔪᐤ ᓇᔅᒡ ᑕᑈ ᒋ ᒥᒐᔨᑎᒻ ᐛᔅ ᓇᔅᒡ ᒋ ᐛᔪᑎᓯᐤ᙮

²³ ᐊᑯ ᒋᓴᔅ ᒂ ᐃᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ, “ᑕᑈ ᒋ ᐎᑎᒪᑎᓇᐛᐤ, ᐊᐛᓐ ᑲ ᐛᔪᑎᓯᑦ ᑕᑈ ᒋᑭ ᐊᔨᒥᓂᔪᐤ ᒐᒋ ᐱᒐᑦ ᒋᒋᒋᓯᒄ ᒋᓴᐅᒋᒪᐅᓂᒡ᙮

²⁴ ᒥᓐ ᐸᐃᒂᐤ ᓂᑭ ᐃᔅᒋᔄᓐ, ᐊᑐᐎᔅ ᐊᔨᒥᓂᔪᐤ ᐊᐛᓐ ᑲ ᐛᔪᑎᓯᑦ ᒐᒋ ᐱᒐᑦ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ ᐃᔅᐱᔅ ᐊᓐ ᐊᐛᓯᔅ ᑲ ᒥᔅᑎ ᐱᔎᐅᑯᓇᑦ ᒐᒋ ᓴᐳᔅᑲᐧᒃ ᐅᔅᑲᒋᐧᑯᔪᐤ ᐊᓐᑕ ᐊ ᐱᑯᓇᔭᐱᔅᑲᔨᒡ᙮”

²⁵ ᐃᔅᐱ ᒪᒃ ᐱᔭᑕᒡ ᐊᓐᒡ ᒋᔅᒋᓄᐊᒧᐛᑭᓐᒡ ᐅᔭ, ᓇᔅᒡ ᒋ ᓯᔅᒋᑯᒋᐃᑯᐅᒡ, ᐊᑯ ᒂ ᐃᔅᒋᔄᒡ, “ᐊᐛᓐ ᒪᒃ ᐊᑯ ᒐᒋ ᐱᒪᒋᐅᑦ ?”

²⁶ ᐊᑯ ᒋᓴᔅ ᑯᐃᔅᒄ ᑲ ᑭᓄᐛᐱᒪᑦ ᐊ ᐃᑕᑦ, “ᑕᓐ ᐊᓂᔭᔪᐛ ᒐ ᐊᑲ ᒋ ᐃᑐᑕᐧᒃ ᐃᔪᐤ ᐎᔾ ᒋᓴᒪᓂᑐᐤ ᒋᑭ ᒋ ᐃᑐᑎᒻ᙮”

²⁷ ᐊᑯ ᐱᑕᕐ ᒂ ᐃᔅᒋᔄᑦ, “ᑭᓄᐛᐸᑕ ᒪ᙮ ᓴᔅ ᒥᓯᐛ ᒐᒂᓐ ᓂᒋ ᓂᑭᑕᓇᓐ ᒐᒋ ᓇᓴᐅᑕᒡ᙮ ᐅ ᒪᒃ ᑲ ᐃᓯ ᐃᑐᑎᒪᒡ ᒐᒂᔪᐤ ᒪᒃ ᒐ ᒥᔨᒥᑦ ᒋᓴᒪᓂᑐᐤ ?”

²⁸ ᐊᑯ ᒋᓴᔅ ᒂ ᐃᑕᑦ, “ᒋᑭ ᒐᔅᑎᓇᐅᓇᐛᐤ, ᐃᔅᐱ ᐃᔪᐤ ᐅᑯᓯᓴᓐ ᐊᐱᒐ ᒋᓴᐅᒋᒪᐤ ᑕᑎᐳᐛᑭᓂᒡ ᒥᓐ ᐅᔅᑲᒐ ᐊᔅᒋᔾ, ᐊᑯ ᑭᔭ ᒋᔨᐛᐤ ᓂᒋᔅᒋᓄᐊᒧᐛᑭᓂᑎᒄ ᒐ ᐊᐱᔭᒄ ᓂᓱᓴᑉ ᐅᒋᒪᐤ ᑕᑎᐳᐛᑭᓇ, ᒐ ᑎᐸᔅᑯᓇᑯᒡ ᓂᓱᓴᑉ ᑲ ᐃᑎᔅᑲᓇᓯᒡ ᐃᔅᕋᐃᓪ ᐃᔪᒡ᙮

²⁹ ᒥᓯᐛ ᐊᐛᓐ ᑲ ᓂᑭᑕᐧᒃ ᐎᒡ ᑭᔭ ᑲ ᓂᑭᑕᑦ ᐎᐧᑲᓂᓴ, ᐅᓂᒋᐃᒂ ᑭᔭ ᐅᑦ ᐊᐛᓯᒪ ᑭᔭ ᒪᒃ ᑲ ᓂᑭᑕᐧᒃ ᐅᑦ ᐊᔅᒋᔾ ᓂᔾ ᐅᒋ, ᐅᔅᑕ ᐸᐃᒄ ᒥᑕᓯᒥᑎᓄᐤ ᒋᑭ ᒋᐛᒥᔭᑭᓄᐤ ᑭᔭ ᑲᒋᒡ ᐱᒪᑎᓯᐅᓂᔪᐤ ᒋᑭ ᒥᔭᑭᓄᐤ᙮

³⁰ ᒥᒄ ᒪᒃ ᒥᒐᑦ ᐊᓐᒡ ᐊ ᒋᔅᑕᔨᑕᑯᓯᒡ ᑲ ᐃᑕᔨᒪᑭᓄᐎᒡ ᓇᒪ ᒋᑭ ᐅᒋ ᒋᔅᑕᔨᑕᑯᓱᐅᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ ᑭᔭ ᒥᒐᑦ ᐊᓐᒡ ᑲ ᐃᑕᔨᒪᑭᓄᐎᒡ ᐊ ᐊᑲ ᒋᔅᑕᔨᑕᑯᓯᒡ ᒋᑭ ᒋᔅᑕᔨᑕᑯᓱᐅᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ᙮”